اجتہاد مطلق کیا ہے؟

[طاہر اسلام]

عام طور پر معروف ہے کہ چوتھی صدی کے بعد اجتہاد اور خاص طور پر اجتہاد مطلق کا دروازہ بند ہو گیا؛اس تناظر میں میرا اہل علم سے یہ سوال ہے کہ اجتہاد مطلق کی تعریف اور ماہیت کیا ہے؟؟ تا کہ غور کیا جاسکے کہ جو چیز چوتھی صدی تک جاری رہی اس کے بعد اس پر پابندی کیوں کر عائد ہو گئی؟؟مجھے ابھی تک اجتہاد مطلق کی کوئی جامع و مانع تعریف نہیں مل سکی ؛امید ہے احباب رہ نمائی فرمائیں گے تا کہ واضح ہو سکے کہ کیا آج اس کا کوئی امکان باقی ہے یا نہیں؟؟
خاص طور سے برادران احناف سے گزارش ہے کہ وہ اپنا نقطۂ نظر بہ دلائل بیان فرمائیں؛تمام دوستوں سے التماس ہے کہ یہ ایک خالص علمی بحث ہے لہٰذا اس میں مناظرانہ یا طعن و تشنیع پر مبنی اسلوب اختیار نہ فرمائیں؛جزاکم اللہ خیراً

 

[جوش]

اجتہاد کا دروزہ صرف احناف کے یہاں بند ہے اگر وہ اجتہاد نہ بند کرتے تو انکا مقصد حاصل نہ ہوتا ۔ ورنہ اجتہاد کا دروازہ قیامت تک کھلا رہے گا کچھ نئے مسائل آئیں گے جن پر واضح نصوص نہ ملنے کی بناء پر صاحب صلاحیت علماء اجتہاد کرین گے واللہ اعلم بالصواب

 

[اشماریہ]

اجتہاد مطلق کا مطلب ہے کوئی شخص ایسا مجتہد ہو جو اپنے ذاتی اصولوں کی بنیاد پر فقہ کی تدوین کر سکے۔ یہ ایک صلاحیت ہے جو خداداد ہوتی ہے۔
اجتہاد مطلق کے بعد مجتہدین کی دیگر تقسیمات کی جاتی ہیں جیسے مجتہد منتسب اور مجتہد فی المذہب وغیرہ۔

یہ کہنا کہ اجتہاد مطلق کا دروازہ بند ہو گیا ہے تشریعا (یعنی بطور مسئلہ شرعی کے) درست نہیں ہے کیوں کہ اس پر کوئی دلیل شرعی نہیں ہے۔ اللہ پاک کی قدرت میں ہے کہ وہ کسی کو آج کے دور میں مجتہد مطلق بنا دیں۔ البتہ عملا یہ ہوا ہے کہ چوتھی صدی کے بعد مجتہد مطلق کوئی آیا نہیں۔ اس کی وجہ یہ نہیں ہے کہ کسی میں اجتہاد مطلق کی صلاحیت ہی موجود نہیں تھی جیسا کہ بعض لوگ سمجھتے ہیں بلکہ اس کی وجہ یہ ہے کہ ائمہ مجتہدین ہمت انسانی کے لحاظ سے تمام اصول نکال چکے تھے۔ تو اگر کوئی اجتہاد مطلق کا دعوی کرتا تو اس کا کیا فائدہ ہوتا اور وہ بطور مجتہد مطلق کے نیا کیا کرتا؟ اس لیے جن میں یہ صلاحیت تھی بھی انہوں نے بھی ماقبل مجتہدین کے کام کو مزید آگے بڑھایا اور اپنے کام میں ان مجتہدین کے اصولوں سے استفادہ کیا۔۔ اس لیے انہیں مجتہد مطلق نہیں کہا گیا۔
یہاں یہ بھی یاد رکھنا چاہیے کہ شوکانیؒ وغیرہ نے مجتہدین کے اقوال سے ہٹ کر کسی نئے قول کو نکالنا اجماع مرکب کے خلاف قرار دیا ہے۔ تو اگر کوئی مجتہد مطلق ہونے کا دعوی کرتا اور کسی طرح اپنے کوئی نئے اصول مستنبط کرتا تو ان حضرات کے نزدیک وہ اجماع مرکب کے مخالف ہوتا۔
واللہ اعلم