جاب کیلے جعلی سرٹفیکیٹ

[محمد عامر]

اسلام علیکم ورحمتہ اللہ
بھائی جان آپ اللہ کے فضل سے خیریت سے ہوں گے بھائی جان میرا سوال یہ ہے کے اگر ہم کسی جاب کیلے آپلائی کرتے ہیں لیکن کمپنی کی ڈیمانڈ BTach ڈگری ہے لیکن میرے پاس Diploma ہے اور کمپنی کو ٹینکنیشن چاہیے اور میرا پرفیشنل بھی ٹیکنیشن ہے لیکن میں اس جاب کیلے آپلائی کرنا چاہتا ہوں اور ہندو مذہب کے لوگ دو نمبر ڈگری بنا کروہی جاب حاصل کر لیتے ہیں اور مسلم قابل بھی ہو اس کو مواقع نہیں دیتے تو اس کے بارے میں میری قرآن و سنت کی روشنی میں رہنمائی فرمائے۔اور اگر یہ جاب میں دو نمبر ڈگری سے حاصل کر لیتا ہوں تو کیا میری کمائی حرام کی ہو گی۔ مہربانی کرکے میرے سوال کا جواب دیں اللہ آپ کو جزائے خیر دیں۔آمین

 

[ابوالحسن علوی]

وعلیکم السلام
اگر آپ کے سوال کا تجزیہ کیا جائے تو دو چیزیں اہم ہیں اور انہیں الگ الگ رکھ کر ہی سمجھنے سے فقہ الواقع کا صحیح فہم حاصل ہوتا ہے۔
ایک تو آپ کا جاب کے حصول کے لیے جعلی سند حاصل کرنا ہے اور اس کی بنیاد پر جاب حاصل کرنا ہے اور
دوسرا اس جعلی سند پر حاصل کی گئی جاب کی صورت میں محنت کرنا اور اس محنت پر اجرت وصول کرنا۔

جہاں تک جعلی سند بنوانے اور اس کی بنیاد پر جاب حاصل کرنے کا معاملہ ہے تو یہ جھوٹ اور فراڈٍ ہے اور شریعت اسلامیہ میں ایک حرام فعل ہے۔ اور جہاں تک اس جاب میں محنت کے بدلے اجرت حاصل کرنے کا معاملہ ہے تو چونکہ اجرت سند کا بدل نہیں ہے بلکہ محنت کا بدل ہے لہذا اگر آپ کو کام آتا ہے یعنی کام کی اہلیت آپ میں ہے اور آپ محنت سے کمپنی کی طرف سے عائد کردہ ذمہ داریوں کو بخوبی انجام دیتے ہیں تو آپ کی کمائی حلال کی ہے۔ سند جاب کے حصول کے لیے تو ایک سبب ہے لیکن ہر ماہ کی تنخواہ یا اجرت کی بنیاد نہیں ہے مثلا ایک شخص اگر کمپنی کی ڈیمانڈ سے اعلی تعلیم یافتہ ہو لیکن اسے کام نہ آتا ہو یا کام چور ہو یا کمپنی کی ڈیمانڈ پوری نہ کرتا ہو تو اسے کمپنی کیوں اجرت دے گی؟ کیا صرف سند کی بنیاد پر؟ نہیں ! تو اجرت سند کی نہیں ہے بلکہ آپ کے کام کی ہے لہذا اجرت جائز ہے جبکہ جعلی سند کی بنیاد پر جاب حاصل کرنا جائز نہیں ہے۔

خلاصہ کلام یہ ہے کہ آپ اس عمل کے ذریعے ایک جھوٹ یا فراڈ کے مرتکب تو ہوں گے جو شریعت اسلامیہ میں جائز نہیں ہے لیکن آپ کی کمائی حلال کی ہے۔ جزاکم اللہ خیرا