حروفِ سبعہ پرقرآن کا نزول اور تدریجی نزول کی حکمتیں

[ساجد]

حروفِ سبعہ پرقرآن کا نزول اور تدریجی نزول کی حکمتیں

ابو البیان محمد سعید اَحمد مجددی﷫​

لفظ نزول کا معنی ہے: ’’نقل الشيء من الأعلی إلی الأسفل‘‘ یعنی کسی چیز کا اُوپر سے نیچے اُترنا ۔
یہ نزول اگر دفعۃً واحدۃً (یکبارگی ) ہو تو إنزال کہلاتا ہے۔ اگر تدریجا (آہستہ آہستہ) ہو تو تنزیل کہلاتا ہے۔
قرآن حکیم کا نزول یکبارگی بھی ہوا ہے اور تدریجا بھی ۔ قرآن ، اللہ تعالی کا کلام ہے جو اَزل سے لوح محفوظ میں موجود ہے۔ پھر وہاں سے باقتضائے حکمت ایز دی مختلف مراتب نزول سے گزرتا ہوا قلب محمدﷺ پر جلوہ گر ہوا۔

 

[ساجد]

تنزلاتِ قرآن
پہلا تنزل: اولاً دائرہ اَصل اورمر تبہ وجوب سے لوح محفوظ میں نازل ہوا جیسا کہ فرمایا :
’’بَلْ ہُوَ قُرْئَانٌ مَّجِیْدٌ فِیْ لَوْحٍ مَّحْفُوْظٍ‘‘ (البروج:۲۱،۲۲) ’’بلکہ یہ قرآن مجید لوح محفوظ میں ‘‘ پھر وہاں سے الفاظ ومعانی کی صورت میں اس کا نزول ہوا۔
دوسرا تنزل: لوح محفوظ سے آسمان دنیا (بیت العزت) میں نازل ہوا۔
(١) ’’إِنَّآ أَنْزَلْنٰہُ فِیْ لَیْلَۃِ الْقَدْرِ ‘‘ (القدر:۱)
(٢) ’’إِنَّآ أَنْزَلْنٰہُ فِیْ لَیْلَۃٍ مُّبٰرَکَۃٍ ‘‘ (الدخان:۳) میں اس کی صراحت موجود ہے۔
بیت العزت ، کعبہ شریف کے محاذات میں آسمان پر ملائکہ کی عبادت گاہ ہے۔ یہ نزول (یکبارگی) لیلۃ القدر میں ہوا۔ جیسا کہ حضرت عبد اللہ بن عباس ﷜سے مروی ہے:
’’أنزل القرآن جملۃ إلی السمآء الدنیا في لیلۃ القدر۔‘‘ (سنن الکبریٰ للنسائي: ۱۱۳۰۸)
تیسرا نزول: بیت العزت سے بواسطہ جبرائیل اَمین﷤حضور سرور عالمﷺکے قلب اَقدس پر نازل ہوا جس کی دلیل یہ اِرشاد ربانی ہے: ’’نَزَلَ بِہِ الرُّوْحُ الأَمِیْنُ عَلٰی قَلْبِکَ … الخ‘‘ (الشعراء: ۱۹۳،۱۹۴)

 

[ساجد]

تدریجی نزول کی حکمتیں
قرآن مجید سرور کائنات ﷺپر ایک ہی مرتبہ پورے کا پورا نازل نہیں ہوا بلکہ تھوڑا تھوڑا کر کے تقریباً تیئس سال کے عرصہ میں اُتارا گیا۔
بعض اَوقات ایک چھوٹی سی آیت یا اس کا کوئی ایک جزو نازل ہوتا اور بعض اَوقات کئی کئی آیتیں بیک وقت نازل ہو جاتیں۔ مثلاً قرآن کا سب سے مختصر حصہ جو مستقل طور پر نازل ہوا وہ ’’غَیْرُ أُوْلی الضَّرَرِ‘‘ (النساء:۹۵) ہے جو ایک لمبی آیت کا جزو ہے اور دوسری طرف پوری سورۃالانعام ایک ہی بار نازل ہوئی ہے۔
پورے قرآن کو ایک ہی نازل کر نے کی بجائے تھوڑا تھوڑا کر کے کیوں نازل کیا گیا ؟ اس کی مندرجہ ذیل حکمتیں بیان کی گئی ہیں۔

 

[ساجد]

پہلی حکمت
یک دم پورا قرآن نازل ہونے کی صورت میں تمام اَحکام قرآنیہ کی تعمیل وپابندی ہر مسلمان پر فوراً لازم ہو جاتی اور یہ شریعت محمدیہ ﷺ کی ان حکیمانہ مصلحتوں کے خلاف ہو جاتا جو اس میں ملحوظ رکھی گئی ہیں۔

 

[ساجد]

دوسری حکمت
قریش مکہ کی طرف سے سرور عالمﷺ کو روزانہ نئی اَذیتیں برداشت کرنا پڑتی تھیں اس لیے بار بار آیاتِ قرآنیہ کا نازل ہونا آپﷺکے دل مبارک کی تقویت کاسبب بنتا تھا۔ جس سے ان اَذیتوں کا مقابلہ آسان ہو جاتا تھا۔

 

[ساجد]

تیسری حکمت
قرآن کا اَکثر حصہ لوگوں کے مختلف سوالات اور ان کے جوابات او رمختلف واقعات پر مشتمل ہے لہٰذا ان آیات کا نزول اِنہی اَوقات میں زیادہ مناسب تھا جن میں وہ سوالات کیے گئے تھے یا جب کہ وہ واقعات وحالات رونما ہوئے تھے۔ اس طریقہ سے اہل اِسلام کے جذبۂ اِستقامت اور بصیرت وہدایت میں اِضافہ ہوتا رہتا تھا اور قرآن کی حقانیت پر اور زیادہ یقین ہو جاتا تھا۔

 

[ساجد]

چوتھی حکمت
اُمت کے اُمی (ناخواندہ) ہونے کی بنا پر یہی مناسب تھا کہ قرآن تدریجی مراحل میں نازل کیا جاتا تاکہ حفظ قرآن اور فہم قرآن ، اُمت پر آسان ہو جائے نیز عادات جاہلیہ ایک ایک کر کے دور ہو جائیں اور عبادات کی عادات ، فطری طریقہ سے ان کے قلب ونظر میں جگہ پکڑ لیں۔واﷲ أعلم بالصّواب۔
مشرکین مکہ کے اس اعتراض (قرآن تدریجاکیوں اترا؟) کا جواب قرآن حکیم نے ان الفاظ میں دیا۔
’’ وَقَالَ الَّذِیْنَ کَفَرُوْا لَوْلاَ نُزِّلَ عَلَیْہِ الْقُرْئَانُ جُمْلَۃً وٰحِدَۃً کَذٰلِکَ لِنُثَبِِّتَ بِہٖ فُؤَادَکَ وَرَتَّلْنٰہُ تَرْتِیْلًا ‘‘(الفرقان:۳۲)

 

[ساجد]

حروفِ سبعہ پر قرآن کا نزول
صحیح بخاری ، کتاب فضائل قرآن کی ایک حدیث میں سرور عالم ﷺکا ارشاد ہے۔
’’إِنَّ ہٰذَا الْقُرْآنَ أُنْزِلَ عَلَیٰ سَبْعَۃِ أَحْرُفٍ فَاقْرَئُوْا مَا تَیَسَّرَ مِنْہُ‘‘ (صحیح بخاری :۴۹۹۲)
’’ تحقیق یہ قرآن سات حروف پر نازل کیاگیا ہے پس پڑھو اس میں سے اس طریقے پر جو تمہارے لیے آسان ہو ۔‘‘
اس حدیث میں سات حروف پر قرآن کے نازل ہونے سے کیا مراد ہے؟
علماء مفسرین ومحققین کا اس میں شدید اِختلاف ہے اور یہ مسئلہ علوم قرآنیہ میں مشکل ترین مسئلہ شمار کیا جاتاہے۔ علامہ ابن عربی﷫ نے اس مسئلہ میں پینتیس اَقوال نقل کیے ہیں۔ ( الزرکشي البرہان في علوم القرآن:۱؍۲۱۲)
مذکورہ بالا حدیث ، علماء کے نزدیک معنی کے اعتبار سے متواتر ہے جیسا کہ مشہور محدث امام ابوعبید قاسم بن سلام ﷫ اور معروف امام علامہ ابن الجزری﷫ نے اس کے تواتر کی تصریح فرمائی ہے اور یہ واقعہ بھی متعدد محدثین نے نقل کیا ہے کہ ایک مرتبہ حضرت عثمان﷜نے منبر نبوی علی صاحبہا الصلوٰت پر اِعلان فرمایا کہ وہ تمام حضرات کھڑے ہو جائیں جنہوں نے بزبان رسالت مآب 1سے یہ (مذکورہ) حدیث سنی ہے چنانچہ اس پر صحابہ کرام﷢ کی اتنی بڑی جماعت کھڑی ہو گئی جس کوشمار نہ کیا جاسکا۔ ( النشر في القراء ات العشرلابن الجزري)

 

[ساجد]

سات حروف پر قرآن پڑھنے کی اِجازت کا فلسفہ
سات حروف پر قرآن پڑھنے کی اِجازت کا اصل فلسفہ اُمت محمدیہﷺ کے لئے تلاوت میں آسانی پیدا کرنا ہے۔ اللہ تعالی نے اپنے فضل وکرم سے اس اُمت کو یہ سہولت عطا فرمائی ہے تاکہ جوشخص ایک طریقہ سے کوئی لفظ نہیں پڑھ سکتا تو دوسرے طریقے سے پڑھ لینے پر قادر ہو جائے۔ چنانچہ اس اَمر کی وضاحت صحیح مسلم شریف کی اس حدیث سے ہوتی ہے جس کے راوی حضرت اُبی بن کعب﷜ہیں سرور عالمﷺبنو غفار کے تالاب کے پاس تھے آپ کے پاس حضرت جبرائیل﷤ حاضر ہوئے او رکہا کہ اللہ تعالی نے آپ کو حکم دیا ہے کہ آپ کی اُمت قرآن کو ایک حرف پر پڑھے آپ نے فرمایا میں اللہ تعالی سے معافی اوربخشش مانگتا ہوں میری اُمت یہ طاقت نہیں رکھتی پھر جبریل﷤ دوبارہ حاضر ہوئے اور کہا کہ اللہ تعالی آپ کو حکم دے رہا ہے کہ آپ کی اُمت قرآن کودو حرفوں پر پڑھے۔ آپ نے فرمایا میں اللہ تعالی سے معافی اور بخشش مانگتا ہوں میری اُمت میں اس قدر طاقت نہیں ہے پھر وہ تیسری مرتبہ آئے اور کہا کہ اللہ تعالی نے آپ کی اُمت کو تین حروف پر قرآن پڑھنے کا حکم دیا ہے آپ نے معافی اور مغفرت طلب کی کہ میری اُمت اس کی طاقت نہیں حتی کہ
ثم جائہ الرابعۃ فقال: ’’إِنَّ اﷲَ یَأْمُرُکَ أَنْ تَقْرَأَ أُمَّتُکَ الْقُرْآنَ عَلَیٰ سَبْعَۃِ أَحْرُفٍ فَأَیُّمَا حَرْفٍ قَرَؤُوْا عَلَیْہِ فَقَدْ أَصَابُوْا‘‘۔ (صحیح مسلم: ۱۹۰۶)
پھر وہ چوتھی بار آئے او رعرض کیا کہ اللہ تعالی نے آپ کوحکم دیا ہے کہ آپ کی اُمت قرآن حکیم کو سات حرفوں پر پڑھے پس وہ جس حرف پر بھی پڑھیں گے ان کی قراء ت درست ہو گی ۔‘‘

 

[ساجد]

قولِ راجح
ہمارے علماء محققین کے نزدیک’ قرآن کے سات حروف‘ کی سب سے بہتر تشریح یہ ہے کہ حدیث پاک میں حروف کے اختلاف سے مراد قراء توں کا اختلاف ہے یعنی قرآن پاک کی جو قراء تیں اللہ تعالی کی طرف سے نازل ہوئی ہیں ان میں جوباہمی اختلافات پائے جاتے ہیں وہ سات قسموں پر مشتمل ہیں اور یہ قول سب سے پہلے حضرت امام مالک﷫ کی طرف منسوب ہے۔