حسن اخلاق اسلام کی نظر میں

[اخت ولید]

بسم اللہ الرحمٰن الرحیم​

السلام علیکم ورحمۃ اللہ وبرکاتہ​

وعن عائشة رضيَ الله عنها قالت سمعت رسولَ الله صَلّى اللهُ عَليْهِ وَسَلّمَ يَقول: «إِنَّ الُمُؤْمِنَ ليدْرِكُ بِحُسْنِ خُلُقِهِ دَرَجَة الصَّائِمِ القَائِمِ» رواه أبو داود۴۷۹۸ و ابن حبان ۴۸۰، و موطا ۱۶۷۵.

سیدہ عائشہ رضی اللہ عنہا سے مروی ہے،وہ بیان کرتی ہیں کہ انھوں نے رسول اللہ صلی اللہ علیہ وسلم کو فرماتے ہوئے سنا’’بلاشبہ مومن اپنے حسن اخلاق کی بدولت رات کا قیام کرنے والے اور دن کا روزہ رکھنے والے کے مقام کو پا لیتا ہے‘‘​

​

​

شرح الحدیث:​

​

اس حدیث کی شرح میں صاحب عون المعبود علامہ شمس الحق عظیم آبادی فرماتے ہیں:’’حسن اخلاق کے مالک شخص کو یہ عظیم فضیلت اس لیے عطا ہوئی کہ جس طرح روزہ دار اور رات کو تہجد پڑھنے والا اپنے نفس کے خلاف جہاد کرتا ہے،اسی طرح مختلف طبیعت کے لوگوں کے ساتھ حسن اخلاق سے پیش آنے والا شخص بہت سے نفسوں سے جہاد کرتا ہے۔اس لیے جو درجہ روزہ دار اور تہجد گزار کو حاصل ہے،وہی اس کو حاصل ہے بلکہ بعض دفعہ اس کا درجہ ان سے بھی بڑھ جاتا ہے‘‘عون المعبود:جلد ۳ ص:۱۵۴​