حسن لغیرہ کیا ہے اور کیا یہ حجت ہے؟

[ریحان احمد]

السلام علیکم
احادیث کی ایک قسم جس کے بارے میں علماء کا مختلف موقف ہے وہ حسن لغیرہ ہے۔ اس بارے میں متقدمین اور متاخرین میں بھی اختلاف ہے اور دور حاضر کے معاصرین علماء میں بھی اختلاف نظر آتا ہے۔ عصر حاضر میں شیخ البانی نے اس سے احتجاج کیا ہے جبکہ حافظ زبیر علی زئی اس کو حجت نہیں تسلیم کرتے۔

کچھ عرصہ پہلے ابو الحسن علوی صاحب کا مضمون بھی اس ضمن میں پڑھا لیکن تسکین قلب حاصل نہ ہو سکی۔ سوال یہ ہے کہ اگر حسن لغیرہ حجت ہے تو بہت سے ایسے مسائل جن میں مقلدین اور اہلحدیث کا اختلاف ہے وہ بے معنی ہو جاتے ہیں۔ جیسا کہ شیخ البانی علیہ رحمہ نے ترک رفع یدین کی عبد اللہ بن مسعود رضی اللہ عنہ والی روایت کو حسن کہا ہے وغیرہ۔

اسی طرح مقلدین یہ تسلیم کرتے ہوئے کہ 20 رکعات تراویح کی احادیث ضعیف ہیں، یہ کہتے ہیں کہ تعدد طرق کی وجہ سے یہ حسن کے درجے کو پہنچ جاتی ہیں۔

شیخ مبشر ربانی حفظہ اللہ لکھتے ہیں کہ متقدمین میں یہ اصطلاح مشہور نہ تھی لیکن متاخرین نے اس سے حجت پکڑی ہے۔ ارشاد الحق اثری صاحب کی مقالات میں بھی اس کے حجت ہونے پر مقالہ ہے۔

براہ مہربانی اختصار کے ساتھ اس مسئلے کی وضاحت کر دیں۔

جزاک اللہ

 

[کفایت اللہ]

حسن لغیرہ کے بارے میں راجح موقف یہی معلوم ہوتا ہے کہ اس بارے میں علی الاطلاق کوئی بات نہ کہی جائے بلکہ تفصیل کی جائے ۔
یعنی بعض حالات میں حسن لغیرہ حجت ہے اور بعض حالات میں حجت نہیں ہے۔

علامہ معلمی رحمہ اللہ اور دکتور خالد بن منصور الدريس حفظہ اللہ کا یہی موقف ہے ۔
اس بارے میں تفصیل کے لئے درج ذیل دھاگہ میں پیش کردہ کتب کا مطالعہ مفید ہوگا۔
http://forum.mohaddis.com/threads/ضعیف-ضعیف-حسن-لغیرہ-کی-حجیت-پر-بہترین-کتب.4130/