سائنس اور باری تعالیٰ کی کبریائی

[محمد نعیم یونس]

سائنس کیا ہے؟۔۔۔۔ اللہ کی تخلیقات کے مطالعے کا نام سائنس ہے۔ اللہ کی تخلیقات میں کارفرما اصول و ضوابط، اور قوانین کو مسلسل غور و فکر کے ذریعے جان لینا سائنس ہے۔ انسان سائنسی علوم کا خالق نہیں،دریافت کرنے والا ہے۔ سائنس اللہ کی تخلیق ہے۔ سائنس خدا نہیں مخلوق ہے، لامحدود نہیں محدود ہے۔ فزکس، کیمسٹری، بیالوجی، آسٹرولوجی، جغرافیہ، تاریخ غرض جس علم کا بھی نام لیں۔ اصلاً تو ہر حرف، اللہ کی تخلیقات، اس کے بنائے ہوئے قوانین سب اللہ کی باتیں ہیں۔ اور ابھی دنیا بھر میں پھیلی اربوں کتابیں صرف اور صرف دنیا اور اس کے علوم کے گرد گھومتی ہیں۔ یہ وہ باتیں ہیں جن پر ہم نے آج غور کرنا شروع کیا ہے، جاننا اور کھوجنا شروع کیا ہے لیکن یہ ہمیشہ سے موجود ہیں۔ یہ اس وقت بھی موجود تھیں جب قرآن کا نزول ہوا تھا اور اللہ تعالیٰ نے اپنی عظمت بیان کرنے کے لئے فرمایا تھا کہ اگر سمندروں کے برابر بھی سیاہی آ جائے تب بھی اللہ کی باتیں اور کلمات لکھے نہیں جا سکتے۔ وہ علم جو انسان کی دسترس سے بعید، بہت بعید ہے، وہ اتنا زیادہ ہے کہ سمندروں کی روشنائی اور تمام درختوں کے قلم بن جائیں تو بھی احاطہ تحریر میں لانے کے لئے ناکافی ہوں گے۔ اللہ کے مقابل ہم کیا اور ہمارا علم کیا۔ جتنے قلم اس زمین کے درختوں سے بن سکتے ہیں اور جتنی روشنائی زمین کے موجودہ سمندر اور ویسے ہی سات مزید سمندر فراہم کر سکتے ہیں، ان سے اللہ کی قدرت و حکمت اور اس کی تخلیق کے سارے کرشمے تو درکنار، شاید موجودات عالم کی مکمل فہرست بھی نہیں لکھی جا سکتی۔ تنہا اس زمین میں جتنی موجودات پائی جاتی ہیں انہی کا شمار مشکل ہے کجا کہ اس اتھاہ کائنات کی ساری موجودات ضبط تحریر میں لائی جا سکیں۔۔

 

[محمد نعیم یونس]

اس تمام گفتگو کے بعد ذہن میں یہ بھی خیال آتا ہے کہ کیا سائنس کے راستے پہ چلتے ہوئے کبھی ایسا ممکن ہوگا کہ کائنات کے تمام اسرار کو سمجھ لیا جائے۔؟
اللہ تعالیٰ کی تمام قدرتوں کو جان اور پرکھ لیا جائے۔؟ تمام سوالات کے جواب حاصل کر لیا جائے۔؟ کیا انسانی عقل کبھی ان سارے سوالوں کے جواب ڈھونڈ پائے گی؟؟؟۔۔۔ تو ایسا معلوم ہوتا ہے کہ ان ساری باتوں کا جواب ہے نہیں کیونکہ ہمارے پاس اتنی سیاہی نہیں ہے کہ ہم اتنی معلومات کو احاطہ تحریر میں لا سکیں۔ لیکن یہاں سے یہ اشارہ بھی ملتا ہے کہ انسان کو اگرچہ صلاحیتیں دی گئی ہیں لیکن اتنے وسائل نہیں دئے گئے کہ وہ پوری کائنات کے اسرار کو جان سکے۔ تو جب محدودات کا علم اکھٹا کرنے اور جاننے میں اتنی دشواریاں ہیں تو پھر اللہ تعالی کی ذات اور صفات کا احاطہ کیسے کیا جائے گا۔ اس کے لئے اگر مستقل وسائل بھی ہوں تو بھی انسان ان کو بیان نہیں کر سکتا۔

واللہ اعلم۔
تحریر: سمارا

 

[محمد نعیم یونس]

حوالہ جات
قرآن پاک
تفسیر ابن کثیر
تفہیم القرآن از مولانا مودودی
اینڈ آف ٹائم از ڈاکٹر شاہد مسعود
قرآن کی روشنی از عامرہ احسان
بی بی سی
وکی پیڈیا