سفر بیت المقدس کی نذر کا حکم

[ساجد تاج]

​

سفر بیت المقدس کی نذر کا حکم​

بیت المقدس میں اعتکاف وادائے نماز کی غرض سے سفر کی منت ماننے وا لے کی ایفائے نذر کے متعلق امام شافعی رحمہ اللہ کے دوقول ہیں۔​

پہلا قول : اس نذر کاایفا واجب ہے ،امام مالک رحمہ اللہ واحمد بن حنبل جیسے اکثر ا ئمہ کایہی قول ہے۔​

دوسرا قول : (ایفائے نذر)واجب نہیں ہے۔یہی قول امام ابو حنیفہ رحمہ اللہ کا ہے امام ابو حنیفہ رحمہ اللہ کے اس قول کی بنیاد ان کے اس اصول پر ہے کہ اسی نذر کا ایفا ء واجب ہے۔ جس کی جنس سے کوئی واجب شرعی (موجود) ہو۔ اسی لیے وہ نماز، روزہ، صدقہ، حج اورعمرہ کی نذر کا ایفا واجب فرماتے ہیں کیونکہ اس کی جنس کاواجب شرعی (موجود) ہے اور نذرِ اعتکاف بھی واجب ہے کیونکہ آپ کے نزدیک اعتکاف بلا روزہ صحیح نہیں۔ یہی مذہب امام مالک رحمہ اللہ کا ہے ،نیز امام احمدرحمہ اللہ کی دو روایات میں سے ایک روایت کی بنا پر ان کا بھی یہی مذہب ہے۔​

جمہور کا مسلک: لیکن اکثر ائمہ (مذکورہ بالا) کی دلیل حضر ت عائشہ رضی اللہ عنہاکی صحیح بخاری کی مرفوع روایت حسن میں ہے‘ کہ آنحضرت ﷺ نے فرمایا:​

{مَنْ نَّذَرَأَنْ یُطِیْعَ اللہَ فَلْیُطِعْہُ وَ مَنْ نَّذَرَ اَنْ یَّعْصِیَ اللہَ فَلَا یَعْصِہٖ }​

جو شخص اطاعت الٰہی کی نذر مانے اس کو ا یفا کرنا چاہیے لیکن نذر معصیت کا ادا کرنا جائز نہیں۔
دیکھئے رسول اللہ ﷺ نے ہر نذر اطاعت کی ا یفا کا حکم دیا ہے اور اطاعت کے لیے واجب بالشرع کی جنس سے ہونا مشروط نہیں فرمایا۔ اور حسب قول (امام ابو حنیفہ رحمہ اللہ ) یہی قول زیادہ صحیح ہے۔​

مسجد نبویﷺ کے سفر کی نذر: ایسے ہی مسجدنبوی ﷺ کے لیے منت ماننے میں نزاع ہے، حالانکہ وہ مسجد اقصیٰ سے افضل ہے۔​

سفر بیت اللہ کی منت: لیکن حج وعمرہ کے لیے مسجد الحرام جانے کی منت کااداکرنا بالاتفاق علماء واجب ہے۔​

مسجد الحرام کی افضلیت: مسجد الحرام(خانہ کعبہ )تمام مساجد سے افضل ہے۔ بعدہ‘ مسجد نبوی پھر مسجد اقصیٰ، صحیحین میں ہے ۔کہ آنحضرت ﷺ نے فرمایا :​

{صَلٰوۃٌ فِیْ مَسْجِدِ یْ ھٰذَا خَیْرٌ مِّنْ اَلْفِ صَلٰوۃٍ فِیْمَا سَوَآہُ مِنَ الْمَسَاجِدِ اِلَّا الْمَسْجِدِ الْحَرَامِ } [بخاری ومسلم]​

مسجد حرام کے علاوہ باقی تمام مساجد کی نسبت میری اس مسجد (مسجد نبوی) میںنماز پڑھنا ہزار نماز سے بہتر ہے۔​

مساجدِ ثلاثہ کی نمازوں کاموازنہ: جمہورعلما کا مذہب ہے کہ مسجد نبوی ﷺ کی نسبت مسجد الحرام میں نماز پڑھنا افضل ہے۔ مسند احمد ونسائی وغیرہ میں روایت ہے کہ مسجد الحرام میں نماز پڑھنا لاکھ (۱۰۰۰۰۰) نماز کے برابر ہے۔ مسجد اقصیٰ کی نماز کے متعلق مروی ہے کہ پچاس ہزار نماز کے برابر ہے۔ پانچ سو بھی مروی ہے اور یہی درست ہے۔

از افادات شیخ الاسلام امام ابن تیمیہ رحمہ اللہ​