شادی کے لئے والدہ کی رضامندی

[راجا]

السلام علیکم،
میرے ایک قریبی دوست کو ایک مسئلہ درپیش ہے، وہ خود چونکہ انٹرنیٹ استعمال نہیں کرتے لہٰذا ان کے توسط سے یہ سوال میں یہاں پیش کر رہا ہوں۔
میرے دوست کی ایک جگہ شادی طے پائی ہے۔ شادی طے کرتے وقت والد، والدہ اور والد کا پورا خاندان اس شادی پر رضامند تھے۔ لیکن بعد میں والدہ کسی وجہ سے اس شادی سے انکاری ہو گئی ہیں، اب وہ دوست جوان ہے اور اسے موجودہ بے حیائی کے دور میں غلط چکر میں پڑنے کا ڈر بھی ہے۔ ایسی صورت میں وہ یہ شادی جلد کرنا چاہتا ہے لیکن والدہ کو راضی کرنے تک شادی کرنے میں ہچکچا رہا ہے۔ اب سوال یہ ہے کہ اگر والدہ اس شادی پر رضامند نہیں ہوتیں (جبکہ والد اور ددھیالی خاندان سب رضامند ہیں) تو کیا اگر یہ شادی والدہ کی رضامندی کے بغیر ہی ہو جائے تو شرعاً اس میں کوئی قباحت تو نہیں؟ کیا یہ نکاح درست ہوگا؟کیا ولی کی تعریف میں صرف والد ہیں، والدہ شامل نہیں؟
ازراہ کرم اس کا جلد جواب عنایت فرما دیجئے۔

والسلام

 

[عمران اسلم]

شریعت مطہرہ میں نکاح کے لیے ولی کی اجازت کو لازم قرار دیا گیا ہے۔ لیکن ولی کی اجازت مرد کے لیے شرط نہیں ہے بلکہ یہ عورت کے ساتھ خاص ہے۔ رسول اللہ ﷺ نے ارشاد فرمایا:
’’أیما امرأۃ نکحت بغیر إذن موالیہا فنکاحہا باطل ثلاث مرات‘‘
(ابوداؤد: 2083)
’’جس عورت نے ولی کی اجازت کے بغیر نکاح کیا، اس کا نکاح باطل ہے۔ آپﷺ نے یہ کلمات تین مرتبہ دہرائے۔‘‘
یہ حکم خواتین کے لیے ہے نہ کہ مردوں کے لیے۔ مرد خود اپنا ولی ہے وہ شریعت کے احکامات کو ملحوظ رکھتے ہوئے کہیں بھی اپنا نکاح کر سکتا ہے۔ البتہ لڑکے کو چاہئے کہ وہ نکاح کرتے ہوئے والدین کی رضامندی کو اولین ترجیح دے۔ اور حتی المقدور اپنے والدین کو ناراض نہ کرے۔ بالخصوص جب ان کی رضا میں شریعت کے کسی حکم کی خلاف ورزی نہ ہو۔ رسول اللہﷺ نے فرمایا:
’’إن اللہ حرم علیکم عقوق الأمہات‘‘
(صحیح بخاری : 2408)
’’اللہ تعالیٰ نے تم پر ماؤں کی نافرمانی کو حرام فرما دیا ہے۔‘‘
اس تصریح کے بعد مذکورہ سوال کے جواب میں ہم یہی کہیں گے کہ والدہ کی رضامندی کے بغیر نکاح تو درست ہو گا۔ لیکن اگر والدہ اس وجہ سے راضی نہیں ہیں کہ وہ لڑکی میں کوئی شرعی عیب دیکھتی ہیں تو پھر والدہ کی رضا کو سامنے رکھتے ہوئے شادی کے فیصلے پر نظر ثانی کی جا سکتی ہے۔