شیطان اور چار یا پانچ گدہوں پر مال تجارت ، اس روایت کا حکم؟

[یوسف ثانی]

ایک مرتبہ حضرت عیسیٰ علیہ السلام نے دیکھا کہ شیطان چار گدھوں پر سامان تجارت لادے ہوئے جارہا ہے۔ آپ نے پوچھا: ’’اے مردود! یہ کیا لے کر جارہا ہے؟‘‘

شیطان نے کہا: ’’ یہ مال تجارت ہے۔ ایک گدھے پر ظلم، دوسرے پر خیانت، تیسرے پر مکرو فریب اور چوتھے پر حسد لادا ہوا ہے۔‘‘

پیغمبر خدا نے پوچھا: ’’بھلا اس مال کا خریدارکون ہے؟‘‘

شیطان نے جواب دیا: ’’میرے اس مال کے بہت سے گاہک موجود ہیں۔ ظلم، حکمرانوں کے کام کی چیز ہے، وہ اس کو خریدتے ہیں۔ خیانت تاجروں کے ہاتھ فروخت کرتا ہوں۔ مکر و فریب عورتوں کا پسندیدہ مال ہے جبکہ حسد کی علماء کے ہاں بہت مانگ ہے۔

سوالات:
١۔ اس روایت کی کوئی سند موجود ہے؟ یا اسے محض ایک علامتی کہانی اور نصیحت کے طور پر کسی نے بیان کیا ہے۔

٢۔ اگر یہ محض ایک علامتی کہانی یا نصیحت ہے توکیا اس کے جملہ نفس مضمون کی ’’تصدیق‘‘ اسلامی تعلیمات سے کی جا سکتی ہے؟

 

[ابوالحسن علوی]

ایسی کوئی روایت مجھے تو نہیں مل سکی۔ مزید معلومات شاید کفایت اللہ صاحب بہتر دے سکیں۔ آپ حدیث سیکشن میں بھی یہی سوال 'سوالات و جوابات' میں ڈال دیں۔

 

[کفایت اللہ]

مذکورہ روایت کو اسماعيل بن نصر بن عبد المحسن السلاحي المعروف بابن القطعة نے اپنی کتاب ابتلاء الأخيار بالنساء الأشرار میں نقل کیا ہے:

علامہ محمد بن موسى بن عيسى بن علي الدميري، أبو البقاء، كمال الدين الشافعي (المتوفى: 808) نے کہا:
وفي كتاب ابتلاء الأخيار أن عيسى عليه الصلاة والسلام لقي إبليس وهو يسوق خمسة أحمرة عليها أحمال ، فسأله عن الأحمال فقال : تجارة أطلب لها مشترين . قال : وما هي التجارة ؟ قال : أحدها الجور . قال : ومن يشتريه ؟ قال السلاطين . والثاني الكبر . قال : ومن يشتريه . قال : الدهاقين : والثالث الحسد . قال : ومن يشتريه . قال : العلماء . والرابع الخيانة . قال : ومن يشتريها ؟ قال : عمال التجار . والخامس الكيد . قال : ومن يشتريه ؟ قال : النساء [حياة الحيوان الكبرى: 1/ 351]۔

روایت بے سند ہے لہٰذا حجت نہیں ، نیز ابتلاء الأخيار کے مصنف ابن القطعہ کے حالات بھی نامعلوم ہیں ۔
الغرض یہ کہ روایت مذکورہ کا کوئی مستند حوالہ نہیں ہے۔

ویسے ابتلاء الاخیار بڑی دلچسپ کتاب ہے یہ کتاب چھپ چکی ہے اور انٹرنیٹ پر اس کتاب سے بعض اقتباسات منقول ہے اس پوری کتاب میں خواتین کے مکروفریب پر معلومات پیش کی گئی ہے ۔