فضائل ابی حنیفہ رحمہ اللہ کی بعض کتابوں پر تحقیقی نظر

[کلیم حیدر]

نمبر11:
خطیب بغدادی رحمہ اللہ (ثقہ ،عادل اور انصاف پسند معتدل) کی کتاب ’’تاریخ بغداد‘‘ انتہائی معتبر کتابوں میں سے ہے اس میں عام طور پر سندوں کا التزام کیا گیا ہے ۔اس کتاب میں امام ابوحنیفہ رحمہ اللہ کےحق میں اور مخالفت میں بہت سی روایات جمع کی گئی ہیں۔ جن میں سے بعض صحیح وحسن ہیں ،بعض موضوع وباطل ہیں اور بعض ضعیف ومردود ہیں ۔لہذا اس کتاب کی ہر روایت کی ہر سند کاتحقیقی جائزہ لینا ضروری ہے اور سند کے صحیح یا حسن ثابت ہوجانے کے بعد ہی اس کاحوالہ دینا چاہیے۔اس کتاب میں بعض اقوال بے سند بھی موجود ہیں مثلا خطیب بغدادی کاقول کہ امام ابوحنیفہ رحمہ اللہ نے سیدنا انس بن مالک رضی اللہ عنہ کو دیکھا تھا،بےسند ہے اور بے سند ہونے کی وجہ سے ناقابل اعتماد ہے۔

 

[کلیم حیدر]

نمبر12:
حافظ ابن عبدالبر رحمہ اللہ کی کتاب ’’الانتقاء‘‘ میں فضائل ابی حنیفہ رحمہ اللہ کے بارے میں اکثر روایات ابویعقوب یوسف بن احمد ابن الدخیل کےمجہول التوثیق ہونے کی وجہ سے ضعیف ومردود ہیں ۔(ابن الدخیل کےمجہول ہونے کےلیے دیکھیئے مقدمہ ابی الوفاء الافغانی التقلیدی لاخبار ابی حنیفۃ :کتاب الصیمری )

 

[کلیم حیدر]

نمبر13:
اہل بدعت نے بھی امام ابوحنیفۃ رحمہ اللہ کے فضائل ومناقب پر اردو زبان وغیرہ میں بہت سی کتابیں لکھی ہیں ،لیکن یہ ساری کتابیں بے سند اور صحیح تحقیق نہ ہونے کی وجہ سے قابل اعتماد نہیں ہیں ۔مثلا:

1۔شبلی نعمانی کی کتاب ’’سیرت النعمان ‘‘
2۔سرفراز خان صفدر دیوبندی کی کتاب ’’مقام ابی حنیفہ رحمہ اللہ ‘‘
3۔ظفر احمد تھانوی دیوبندی کی عربی میں کتاب ’’ابوحنیفۃ واصحابہ المحدثون‘‘
4۔طاہر القادری کی کتاب ’’امام ابوحنیفۃ رضی اللہ عنہ امام الائمۃ فی الحدیث‘‘

ان کے علاوہ اور بھی بہت سی ناقابل اعتماد کتابیں ہیں جو موضوعات اور مردود روایتوں سے بھری پڑی ہیں ۔امام ابوحنیفہ رحمہ اللہ کی طرف منسوب کوئی بھی کتاب باسند صحیح ثابت نہیں ہے۔
خوارزمی (توثیق نامعلوم) کی ’’جامع المسانید‘‘ اور عبداللہ بن محمد یعقوب الحارثی (کذاب) کی کتاب ’’مسند ابی حنیفۃ‘‘ بھی ناقابل اعتماد ہیں ۔
حارثی کےحالات کےلیے دیکھیئے نورالعینین از زبیر علی زئی حفظہ اللہ ص43

ابونعیم الاصبہانی رحمہ اللہ (ثقہ وصدوق) کی کتاب ’’مسند الامام ابی حنیفہ ‘‘ میں عام روایات ضعیف ،مردود اور موضوع ہیں ،لہذا اس کتاب کی ہر روایت کی تحقیق بھی ضروری ہے ۔

عجیب وغریب بات یہ ہے کہ اس مسند کےمصنف امام ابونعیم الاصبہانی رحمہ اللہ نے امام ابوحنیفہ رحمہ اللہ کے بارے میں اپنےنزدیک درج ذیل تحقیق لکھی ہے۔
’’قال بخلق القرآن واستتيب من كلامه الردي غير مرة كثير الخطا والاوهام ‘‘ (کتاب الضعفاء لابی نعیم ص 154)

یہ عبارت بہت شدید جرح ہے ۔

مختصر یہ کہ ابونعیم کی کتاب ہو یا کسی محدث اور امام کی کتاب ہو ،کسی عالم کی کتاب ہو یا کسی جاہل کی کتاب ہو ،صحیح العقیدہ کی کتاب ہو یا بدعقیدہ گمراہ کی کتاب ہو،ہر کتاب کی ہرروایت کی تحقیق ضروری ہے سوائے صحیحین کے،ان کی تمام مرفوع مسند متصل روایات یقینا صحیح ہیں ۔والحمدللہ

ختم شد

نوٹ
یہ مضمون الحدیث حضروشمارہ نمبر78 سے لیا گیا ہے

 

[lovelyalltime]

اشماریہ بھائی کیا یہاں جو کچھ کہا گیا صحیح ہے - کیا آپ ان باتوں سے متفق ہیں -