(٢) کیا مصحف صرف ایک ہی قراء ت پر منضبط ہوا ہے؟
مولانااِصلاحی کا دعویٰ ہے کہ مصحف صرف ایک ہی قراء ت پر منضبط ہوا ہے۔دوسرے الفاظ میں یہ کہ قرآن مجید کو صرف ایک ہی روایت کے مطابق لکھا گیا ہے۔
مولانا صاحب کو خبر ہی نہیں کہ رسم الخط اور قراء ت میں کیا فرق ہوتا ہے ورنہ وہ ایسا احمقانہ دعویٰ نہ کرتے کہ مصحف صرف ایک ہی قراء ت پر منضبط ہوا ہے۔
اہل علم جانتے ہیں کہ رسم الخط قرآن مجید کے متن(Text)کے حروف والفاظ کی مختلف اشکال کا نام ہے۔ گویا قرآنی الفاظ کی شکل وصورت کا نام رسم الخط ہے اور اسے آواز کے ساتھ پڑھنے کو قراء ت کہتے ہیں۔مولانا صاحب قراء ت کو رسم الخط اوررسم الخط کو قراء ت سمجھ بیٹھے ہیں۔دوسرے الفاظ میں وہ پڑھنے کو تحریر اورتحریر کو پڑھنا قرار دیتے ہیں اوریہی ان کاسوء فہم ہے۔
اہل علم جانتے ہیں کہ مصحف عثمانی بغیر اعراب ،حرکات اورنقاط کے لکھا گیا تھا، کیونکہ ان چیزوں کا اس وقت رواج نہ تھا ۔مثال کے طور پر تسمیہ کومصحف عثمانی میں اس طرح لکھا گیا:
ـــــــــــــــــسم اللہ الرحمں الرحـــــــــــــــــــــم
یہ تسمیہ کا ابتدائی رسم الخط ہے جو الفاظ اورحروف کی مخصوص شکلوں سے عبارت ہے اورجواعراب ،نقطوں اور رموز اَوقاف سے بالکل خالی ہے۔مولانا صاحب اسے قراء ت کا نام دے رہے ہیں جب کہ یہ قراء ت نہیں ہے بلکہ رسم الخط ہے اور اسے رسمِ عثمانی کہا جاتا ہے۔جب اس رسم الخط کے الفاظ کو کوئی شخص اپنی آواز کے ساتھ ادا کرے گا تو اسے قراء ت کہاجائے گا۔اس لیے یہ دعویٰ کرنا کہ مصحف قراء ت حفص پر ضبط(لکھا)ہوا ہے علمیت کی نہیں جہالت کی دلیل ہے۔
(٣) کیا قراء ت حفص کے سوا کسی اور قراء ت کے مطابق قرآن کا صحیح ترجمہ وتفسیر ممکن نہیں؟
مولانا اِصلاحی کا یہ دعویٰ بھی بے بنیاداور غلط ہے کہ قراء ت حفص کے سوا کسی اورقراء ت کے مطابق قرآن مجید کا صحیح ترجمہ وتفسیر ممکن نہیں ہے۔حقیقت یہ ہے کہ جس طرح قراء ت حفص کے مطابق قرآن کاترجمہ وتفسیر درست ہے اسی طرح دوسری متواتر قر اء توں کے مطابق بھی قرآن کا صحیح ترجمہ وتفسیر بالکل ممکن ہے اور اس سے قرآن کی بلاغت، معنویت اور حکمت پر کوئی حر ف نہیں آتا ۔مثال کے طور پر سورۃ الفاتحہ میں ہے کہ
ملک یوم الدین (مٰلِکِ یَوْمِ الدِّین یا مَلِکِ یَوْمِ الدِّین )
اس مقام پر
مٰلِکِ کو
مَلِکِ بھی پڑھاگیاہے اوریہ بھی اس کی ایک متواتر قراء ت ہے۔
اب
مٰلِکِ یَوْمِ الدِّین جوکہ قراء ت حفص ہے اس کے مطابق اس کا ترجمہ یہ ہے کہ’’بدلے کے دن کا مالک‘‘ اور اس کی تفسیر خود قرآن مجید کے نظائر کی روشنی میں یہ ہے کہ جزا وسزا کے دن تمام اختیارات کا مالک صرف اللہ تعالیٰ ہوگا اورسب اس کے آگے عاجز اور بے بس ہوں گے۔جیساکہ دوسرے مقام پر ارشاد ہوا:
’’یَوْمَ لَا تَمْلِکُ نَفْسٌ لِّنَفْسٍ شَیْئًا وَالأمْرُ یَوْمَئِذٍ ﷲِ‘‘ (الانفطار:۱۹)
’’جس دن کسی جان کو دوسری جان پر اختیار نہ ہوگا اورسارا معاملہ اس دن اللہ ہی کے اختیار میں ہوگا۔‘‘
اب دوسری متواتر قراء ت میں
مَلِکِ یَوْمِ الدِّین ہے اس کا ترجمہ یہ ہے کہ
’’بدلے کے دن کا بادشاہ۔‘‘
اور اس کی تفسیر قرآن مجید کے دوسرے نظائر میں یہ ہو گی کہ جزا اورسزا کے دن اللہ تعالیٰ ہی بادشاہ ہوگا اورسب اس کے محکوم ہوں گے۔بادشاہی صرف اسی کی ہوگی اور حکم صرف اسی کا چلے گا۔جیسا کہ اللہ تعالیٰ کا ارشاد ہے کہ
’’ لِمَنِ الْمُلْکُ الْیَوْمَ ط ﷲِ الْوَاحِدِ الْقَہَّار ِ‘‘ (المؤمن:۱۶)
’’آج بادشاہی کس کی ہے؟صرف اللہ واحدقہار کی۔‘‘
اس طرح دونوں متواتر قراء توں کے مطابق قرآن کی تفسیر درست ہوجاتی ہے۔بلکہ دلچسپ امر یہ ہے کہ مولانا اصلاحی نے خود اس آیت کی جو تفسیر لکھی ہے وہ ان کے اپنے دعویٰ کے برعکس قراء ت حفص کے بجائے دوسری متواتر قراء ت کے نظائر کے مطابق لکھی گئی ہے۔چنانچہ انہوں نے اس کی یہ تفسیر بیان کی ہے:
’’جزا اورسزا کے دن کا تنہا مالک ہونے کا مطلب یہ ہے کہ اس روز سارا زور اوراختیار اسی کو حاصل ہوگا ۔اس کے آگے سب عاجز وسرفگندہ ہوں گے۔کسی کی مجال نہ ہوگی کہ اس کی اجازت کے بغیر زبان کھول سکے ،سارے معاملات کا فیصلہ تنہا وہی کرے گا جس کو چاہے گا سزا دے گا ،جس کوچاہے گا انعام دے گا۔جیساکہ فرمان باری تعالیٰ ہے
’’اَلْمُلْکُ یَوْمَئِذٍ ﷲ یَحْکُمُ بَیْنَہُمْ‘‘ ( الحج:۵۶)
’’اس دن اختیار اللہ ہی کوہوگا ،وہی ان کے درمیان فیصلہ کرے گا‘‘
’’لِمَنِ الْمُلْکُ الْیَوْمَ ط ﷲِ الْوَاحِدِ الْقَہَّارِ‘‘(المؤمن:۱۶)
’’آج کے دن بادشاہی کس کی ہے؟صرف خدائے واحد وقہار کے۔‘‘(تدبر قرآن :۱؍۵۷،طبع مئی ۱۹۸۳ء لاہور)
اس طرح مذکورہ آیت کا ترجمہ وتفسیر خود قرآن حکیم ہی کے نظائر کی روشنی میں دونوں طرح ممکن ہے اور درست ہے اور اس سے نہ تو قرآن کی بلاغت ومعنویت مجروح ہوتی ہے اورنہ اس کی حکمت میں کوئی کمی واقع ہوتی ہے۔
![محدث فورم [Mohaddis Forum]](/styles/default/xenforo/Forum.jpg)
