مستقل بیمار شخص کا رمضان میں فدیہ

[محمد ارسلان]

السلام علیکم
اگر کوئی مرد کسی بیماری کی وجہ سے روزہ چھوڑ قضا کرے تو کیا وہ فدیہ بھی دے؟
اگر کسی کو ایسی بیماری ہو کہ وہ روزے رکھ سکنے کے بالکل بھی قابل نہ ہو ،نہ رمضان میں نہ رمضان کے بعد تو کیا وہ صرف فدیہ دے؟
اور فدیے کی مقدار کیا ہے؟

 

[ابوالحسن علوی]

اگر کوئی مرد کسی بیماری کی وجہ سے روزہ چھوڑ قضا کرے تو کیا وہ فدیہ بھی دے؟

یہ بات پہلے ایک سوال کے جواب میں بیان ہو چکی ہے کہ فدیہ صرف اسی صورت میں ہے جبکہ روزوں کی قضا کو ایک سال سے زیادہ لیٹ کر دیا جائے اور اگر قضا اگلے سال کے رمضان سے پہلے پہلے کر لی ہے تو پھر صرف قضا ہی ہے، فدیہ نہیں ہے۔

اگر کسی کو ایسی بیماری ہو کہ وہ روزے رکھ سکنے کے بالکل بھی قابل نہ ہو ،نہ رمضان میں نہ رمضان کے بعد تو کیا وہ صرف فدیہ دے؟
اور فدیے کی مقدار کیا ہے؟

جی ہاں ایسی صورت میں صرف فدیہ ہے اور ایک روزے کا فدیہ ایک مسکین کو کھانا کھلانا ہے۔ارشاد باری تعالی ہے:
وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ ۖ فَمَن تَطَوَّعَ خَيْرًا فَهُوَ خَيْرٌ لَّهُ ۚ وَأَن تَصُومُوا خَيْرٌ لَّكُمْ ۖ إِن كُنتُمْ تَعْلَمُونَ ﴿١٨٤﴾

اور جو لوگ روزہ رکھنے کی طاقت رکھیں (لیکن رکھیں نہیں) وہ روزے کے بدلے محتاج کو کھانا کھلا دیں اور جو کوئی شوق سے نیکی کرے تو اس کے حق میں زیادہ اچھا ہے۔ اور اگر سمجھو تو روزہ رکھنا ہی تمہارے حق میں بہتر ہے ۔

 

[محمد ارسلان]

جزاک اللہ خیرا

آج کل ہمارے پیسوں کے حساب سے ایک مسکین کے کھانے کی کیا مقدار ہو گی؟

 

[ابوالحسن علوی]

بعض اہل علم کے نزدیک فدیہ ایک وقت کا کھانا ہے جبکہ بعض کے نزدیک دو وقت کا کھانا ہے۔ لیکن یہ کھانا وہ ہے جو آپ خود کھاتے ہوں۔ یعنی اس کا حساب نہیں لگانا کہ غریب کا پیٹ کتنی روٹیوں سے بھرتا ہے بلکہ اس کا حساب لگانا ہے کہ آپ اپنے گھر میں جو کھانا کھاتے ہیں، اس کے اعتبار سے ایک آدمی کے ایک وقت کے کھانے کی کیا قیمت بنے گی۔ اس کے اعتبار سے فدیہ ادا کر دیں۔ یا زیادہ بہتر تو یہ ہے کہ جو گھر میں کھاتے ہیں، اس کا ایک حصہ بقدر ایک شخص فقراء ومساکین میں تقسیم کرتے رہیں۔ ایک عام آدمی کا کھانا آپ تقریبا پچاس روپے لگا سکتے ہیں اور دو وقت کا کھانا کریں تو ایک روزہ کے بدلے سو روپے بن جائیں گے۔ قیمت دینے کی بجائے کھانا دینا چاہیے یا راشن ڈلوا دیں کیونکہ قرآن نے کھانا کھلانے کا ذکر کیا ہے۔
جزاکم اللہ

 

[محمد ارسلان]

جزاک اللہ خیرا