معیارِ فضیلت کیا ہے؟

[عاصم]

السلام علیکم و رحمۃ اللہ
یہ سوال سامنے آیا ہے کہ اہلِ تشیع کی جانب سے دین کو اہلِ بیت(ان کے تسلیم کردہ) کے گرد کھمانے کواہلِ سنت رد کرتے ہیں۔لیکن موروثیت سابقہ انبیاء کے ہاں بھی موجود تھی۔ نبی کا بیٹا یا بھتیجا ہی نبی بنتا تھا۔پھر یہ کلیہ سیدنا محمد ﷺ کے لیے کیوں نہیں۔ جب کہ اہلِ سنت ان احادیث کو بھی درست مانتے ہیں جن میں سیدہ فاطمہ الزہرا کو خاتون جنت، سیدنا حسنین کو نوجوانانِ جنت کا سردار کہا گیا ہے۔
سوال یہ ہے کہ مذکورہ بالا احادیث صحیح ہیں؟
اگر ہاں توکیا ان کی فضیلت محض پیغمبرﷺ کی آل ہونے کے سبب ہے یا کچھ اور؟
ان سوالات کے جواب عنایت فرمادیں۔جزاک اللہ خیرا

 

[ابوالحسن علوی]

اہل بیت سے مراد نبی کے گھر والے ہوتے ہیں جبکہ اس کے ساتھ ساتھ ایک اور اصطلاح اہل بیعت کی ہے یعنی وہ لوگ جو نبی کے مشن کے ساتھی ہوتے ہیں۔ اس میں تو کوئی شک نہیں ہے کہ آخرت میں نجات کی بنیاد محض اہل بیت میں سے ہونا نہیں ہے بلکہ اس کے لیے اہل بیعت میں سے ہونا شرط لازم ہے جیسا کہ حضرت نوح اور حضرت لوط علیہما السلام کی بیویوں کا معاملہ ہے کہ وہ اہل بیت میں سے تو تھیں لیکن اہل بیعت میں سے نہ ہونے کی وجہ سے اللہ کے عذاب کی مستحق ہو گئیں۔

اگر اہل بیت، اہل بیعت میں سے بھی ہوں تو ان کی نبی سے نسبت دوہری ہو جاتی ہے یعنی ایک تو نبی کے مشن کے ساتھ ہیں یعنی مومنین صالحین میں سے ہیں اور دوسرا وہ اضافی طور نبی سے نسبی تعلق بھی رکھتے ہیں۔ پس میرا خیال یہ ہے کہ جب اہل بیت، اہل بیعت میں سے بھی ہوتے ہیں تو نبی کی تکریم اور تشریف کے لیے اللہ تعالی ان کے نسبی متعلقین کو بھی آخرت میں دوسرے اہل جنت کی نسبت کچھ نعمتیں عطا فرمائیں گے۔

 

[انس]

﴿ وَالَّذِينَ آمَنُوا وَاتَّبَعَتْهُمْ ذُرِّ‌يَّتُهُم بِإِيمَانٍ أَلْحَقْنَا بِهِمْ ذُرِّ‌يَّتَهُمْ وَمَا أَلَتْنَاهُم مِّنْ عَمَلِهِم مِّن شَيْءٍ ۚ ۔۔۔ ٢١ ﴾ ۔۔۔ سورة الطور
اور جو لوگ ایمان لائے اور ان کی اولاد نے بھی ایمان میں ان کی پیروی کی ہم ان کی اولاد کو ان تک پہنچا دیں گے اور ان کے عمل سے ہم کچھ کم نہ کریں گے۔

 

[ابوالحسن علوی]

جزاکم اللہ خیرا۔
بہت خوب دلیل ہے۔