• الحمدللہ محدث فورم کو نئےسافٹ ویئر زین فورو 2.1.7 پر کامیابی سے منتقل کر لیا گیا ہے۔ شکایات و مسائل درج کروانے کے لئے یہاں کلک کریں۔
  • آئیے! مجلس التحقیق الاسلامی کے زیر اہتمام جاری عظیم الشان دعوتی واصلاحی ویب سائٹس کے ساتھ ماہانہ تعاون کریں اور انٹر نیٹ کے میدان میں اسلام کے عالمگیر پیغام کو عام کرنے میں محدث ٹیم کے دست وبازو بنیں ۔تفصیلات جاننے کے لئے یہاں کلک کریں۔

موت کی یاد

muntazirrehmani

مبتدی
شمولیت
فروری 24، 2015
پیغامات
72
ری ایکشن اسکور
20
پوائنٹ
18
موت ایک اٹل حقیقت _________مجھے یقین ہے کہ اگر دل پتھر نہ بن چکے ہوئے ہمارے تو اس پوسٹ کو پڑھنے کے بعد ہمیں ضرور رونا آئے گا بس صرف دل کا دروازہ کھلا ہو نا چاہیے

زندگی ایک سفر ہے اور انسان عالم بقا کی طرف رواں دواں ہے ۔ ہر سانس عمر کو کم اور ہر قدم انسان کی منزل کو قریب تر کر رہا ہے ۔ عقل مند مسافر اپنے کام سے فراغت کے بعد اپنے گھر کی طرف واپسی کی فکر کرتے ہیں ، وہ نہ پردیس میں دل لگاتے اور نہ ہی اپنے فرائض سے بے خبر شہر کی رنگینیوں اور بھول بھلیوں میں الجھ کر رہ جاتے ہیں ہماری اصل منزل اور ہمارا اپنا گھر جنت ہے ۔ ہمیں اللہ تعالیٰ نے ایک ذمہ داری سونپ کر ایک محدود وقت کیلئے اس سفر پر روانہ کیا ہے ۔ عقل مندی کا تقاضا تو یہی ہے کہ ہم اپنے ہی گھر واپس جائیں کیونکہ دوسروں کے گھروں میں جانے والوں کو کوئی بھی دانا نہیں کہتا ۔
شاید کہ تیرے دل میں اتر جائے میری بات

بھائیو اور بہنو کبھی آپ نے سوچا کہ آخر ہم دنیا میں کس لئے آئے ہیں ؟ ہماری تخلیق کا مقصد کیا ہے ؟
کبھی سمجھا بھی مقصد زندگی کا ؟
کبھی سوچا بھی کیوں دنیا میں آئے ہیں ؟
کیا ہمیں اس لئے پیدا کیا گیا کہ
بابر بہ عیش کوش کہ عالم دوبارہ نیست ؟

کیا ہمیں خوردونوش ، ہنسی مذاق ، کھیل کود ، دولت دنیا سمیٹنے ، کوٹھیاں اور بنگلے بنانے ، فخر و مباہات ، جاہ و منصب کے حصول اور اپنی من مانیاں کرنے کیلئے پیدا کیا گیا ؟ ہز گز ، ہر گز نہیں.... اللہ کی قسم نہیں.... ہمیں ان کاموں کیلئے نہیں بلکہ اس عظیم مقصد کیلئے پیدا کیا گیا ہے

جسے خود ہمارے خالق نے بیان فرمایا ہے :
( الذاریات : 58-56 )
” اور میں نے جنوں اور انسانوں کو صرف اس لئے پیدا کیا ہے کہ وہ میری عبادت کریں ، نہ تو میں ان سے روزی مانگتا ہوں اور نہ ہی چاہتا ہوں کہ وہ مجھے کھانا کھلائیں ۔ یقینا اللہ تعالیٰ تو خود سب کو روزی دینے والا ، صاحب قوت اور زبردست ہے ۔ “

جب ہم اپنی تخلیق کا مقصد جان چکے تو آئیے ! اب ذرا اپنے دل کو ٹٹو لیے اور من سے پوچھئے کہ آپ نے اس مقصد کو کہاں تک پورا کیا ؟ کیا محنت کی ؟ کیا کوشش کی ؟ اور لوگ کیا کر رہے ہیں اور کدھر جا رہے ہیں ؟ یقینا ہمارا دل گواہی دے گا کہ ہم نے تو کچھ بھی نہیں لیا ۔ ہماری کوشش تو بالکل معمولی اور نہ ہونے کے برابر ہے ۔ اگر آج ہی موت آجائے تو اللہ کے دربار میں پیش کرنے کیلئے
ہمارے پاس تو کچھ بھی نہیں
درپیش سفر دراز ہے اور سامان کچھ بھی نہیں

کیا ہم شب و روز مشاہدہ نہیں کرتے کہ موت کس طرح دوست و احباب آل و اولاد اور عزیز و اقارب کو چھین کر لے جاتی ہے ۔ جب مقررہ وقت آ جاتا ہے تو پھر موت نہ بچوں کی کم عمری ، نہ والدین کا بڑھاپا ، نہ بیوی کی جوانی اور نہ ہی کسی کی خانہ ویرانی دیکھتی ہے ۔

کیا ہم نہیں جانتے کہ موت سے کسی کو مفر نہیں ؟ نہ اس سے شاہ بچے نہ گدا ، نہ صالحین اور نہ انبیاء ( علیہ السلام ) حتیٰ کہ
نہ موت بچے گی نہ ملک الموت
موت ہو ، قبر ہو ، محشر ہو کہ غم ہو
یہ ہیں وہ مرحلے جن سے کہیں فرار نہیں

ارشاد باری تعالیٰ ہے :

( آل عمران : 185 )
” ہر جان نے موت کا ذائقہ چکھنا ہے اور تم لوگ قیامت کے دن اپنے کئے کا پورا پورا اجر پاؤ گے ۔ پس جو شخص جہنم سے بچا لیا گیا اور جنت میں پہنچا دیا گیا وہی کامیاب ہوا اور دنیا کی چند روزہ زندگی تو دھوکے کا سامان ہے ۔ “

کیا ہم نے نہیں سنا کہ ہمارے نبی اکرم صلی اللہ علیہ وسلم جو کہ ہر بات وحی الٰہی کے مطابق فرماتے ہیں ، انہوں نے فرمایا : میری امت کے لوگوں کی اوسط عمریں ساٹھ سے ستر برس ہونگی ۔ بہت کم لوگ اس سے آگے بڑھیں گے ۔ ( ترمذی )

کیا ہم اس حقیقت سے نا آشنا ہیں کہ دنیا فانی ہے اور یہ جہاں عارضی ہے ؟ اور یہاں کا سارا سامان عارضی ہے ؟ نبی رحمت صلی اللہ علیہ وسلم کا ارشاد گرامی ہے : پانچ چیزوں کو پانچ چیزوں کے کرنے سے پہلے پہلے غنیمت سمجھو اور ان سے فائدہ اٹھاؤ ۔

1 جوان کو بڑھاپے ،

2 صحت کو بیماری،

3 امیری کو فقیری ،

4 فراغت کو مصروفیت ،

5 زندگی کو موت سے پہلے پہلے ۔

حالی مرحوم نے اس کا کیا خوب ترجمہ کیا
غنیمت ہے صحت علالت سے پہلے
فراغت مشاغل کی کثرت سے پہلے
جوانی بڑھاپے کی زحمت سے پہلے
فقیری سے پہلے غنیمت ہے دولت
جو کرنا ہے کر لو کہ تھوڑی ہے مہلت

ذرا غور فرمائیے ! ہم لمحہ بہ لمحہ موت کی جانب بڑھ رہے ہیں ، گردش لیل و نہار عمر عزیز کو دیمک کی طرح چاٹ رہی ہے ۔ جو چیز ہر روز کم ہوتی رہتی ہے وہ بالآخر ختم ہی ہو جاتی ہے جو لمحہ گزر جاتا ہے کبھی واپس نہیں آتا ۔

اگر آپ کو یقین نہیں آتا تو بتائیے آپ کا لڑکپن کدھر گیا ؟ جوانی کدھر گئی ؟ عمر رفتہ کتنی تیزی سے بیت گئی ۔ کچھ پتہ بھی چلا ؟ یوں محسوس ہوتا ہے کہ بچپن اور لڑکپن ابھی کل کی بات ہے
گیا بچپن ہوئی رخصت جوانی
اب اس کے بعد کیا ہو گا عیاں ہے

خالق کائنات نے سچ فرمایا ہے :
( الروم : 55 )
” قیامت کے روز مجرم قسمیں اٹھا اٹھا کر کہیں گے کہ ہم تو بس ایک پَل کیلئے دنیا میں گئے تھے ۔ “

اگر ہم اپنے اقرباءمیں سے بزرگوں کی شکل و شباہت کا ذرا ان کی جوانی سے تقابل کریں تو ہماری زبان حال بے اختیار پکار اٹھے گی ۔
” پاک ہے وہ ذات جو حالات کو بدلتی رہتی ہے ۔ “

ایک فکر انگیز واقعہ :
نبی رحمت صلی اللہ علیہ وسلم ایک دفعہ اپنے احباب کے ہمراہ بکری کے ایک مردہ بچے کے پاس سے گزرے اور آپ اس کا کان پکڑ کر فرمانے لگے : تم میں سے کون اسے ایک درہم کے بدلے خریدنا پسند کرےگا ؟ تو اصحاب رسول صلی اللہ علیہ وسلم عرض کرنے لگے : آقا صلی اللہ علیہ وسلم ! ہم تو اسے مفت میں بھی نہیں لینا چاہتے ، یہ ہمارے کس کام کا ہے ؟ آپ صلی اللہ علیہ وسلم نے پھر دوبارہ پوچھا تو انہوں نے عرض کیا کہ اللہ کی قسم اگر یہ زندہ بھی ہوتا تو پھر بھی عیب دار تھا ، اس کے کان چھوٹے ہیں ، تو پھر رحمت عالم صلی اللہ علیہ وسلم نے ارشاد فرمایا کہ : اللہ کی قسم ! اللہ کے نزدیک دنیا اس سے بھی زیادہ حقیر ہے ۔ اور فرمایا آخرت کے مقابلہ میں دنیا کی مثال ایسی ہے جیسا کہ کوئی سمندر میں اپنی انگلی ڈبوئے اور پھر دیکھے کہ اس کے ساتھ کس قدر پانی آتا ہے ۔ دنیا کی حیثیت آخرت کے مقابلہ میں ایسی ہے جیسا کہ انگلی کے ساتھ لگے ہوئے پانی کے قطرے کی سمندر کے مقابلے میں ۔

یہ ہے دنیا کی حقیقت ۔ کیا ہمیں بھی دنیا کی حقیقت کا کچھ پتہ چلا ؟ یا یہ کہ ابھی تک شیطان ہمیں ورغلا رہا ، وسوسے ڈال رہا اور دنیائے فانی کی خواہشات کو سجا سجا کر آپ کے سامنے پیش کر رہا ہے اور آپ سے ابھی تک کہے جا رہا ہے کہ چھوڑو ! واعظ لوگ ایسی باتیں کرتے ہی رہتے ہیں ، جوانی مستانی ہوتی ہے ، اپنے حسن و جمال اور صحت و جوانی میں مزے لوٹئیے ، دنیا کی لذتیں اڑائیے ، جب بوڑھے ہو جاؤ گے ، تمام قوتیں جواب دے جائینگی پھر حج کر لینا اور توبہ و استغفار کر لینا ، سب کچھ معاف ہو جائے گا ۔

یہی ابلیس ملعون کی چالیں اور اس کے گمراہ کن جال ہیں کہ وہ خود تو ڈوبا ہوا ہے ہی ، دوسروں کو بھی ساتھ ملانا چاہتا ہے ۔

قرآن کہتا ہے :
( فاطر : 6 )
” وہ تو اپنے ہمنواؤں کو بلاتا ہے تا کہ اس کے ساتھ جہنم کا ایندھن بنیں ۔ “

اللہ نے عقل دی ہے ذرا اتنا ہی سوچئے کہ شیطان کیسے یہ گارنٹی دے سکتا ہے کہ ہم بڑھاپے تک جئیں گے ؟ اس کے پاس کیا ضمانت ہے کہ ہمیں تب تک مہلت ضرور ملے گی ؟ اور اگر ہمیں مہلت مل بھی گئی تو کیا وہ دوبارہ ہم پر حملہ نہیں کرےگا ؟

سوچئے غوروفکر کیجئے ! اور اپنے رب کا فرمان سامنے رکھےے ارشاد باری تعالیٰ ہے :
( ابراھیم : 22 )
کہ قیامت کے روز جب دربار الٰہی سے فیصلہ صادر ہو جائے گا اور حسرت و ندامت اور آہ و بکا بے سود ہو گی تب شیطان اپنے پیروکاروں سے کہے گا :

( ابراھیم : 22 )
” بے شک اللہ تعالیٰ نے تم سے سچا وعدہ کیا تھا اور میں نے تم سے جھوٹا وعدہ کیا ، لیکن میں نے تم پر کوئی زبردستی تو نہیں کی تھی ، بس تم کو بلایا اور تم بھاگے چلے آئے ۔ لہٰذا مجھے برا بھلا کہنے کی بجائے اپنے آپ کو ملامت کرو ، نہ میں تمہاری فریاد رسی کر سکتا ہوں اور نہ تم میری داد رسی کر سکتے ہو ۔ تم نے جس طرح مجھے اللہ کا شریک بنایا ، میں اس کا انکاری ہوں یقینا ظالموں کیلئے دردناک عذاب ہے ۔ “

میرے بھائیو ! ذرا اس مشکل وقت کو یاد کیجئے جو ایک نہ ایک دن ضرور آنے والا ہے ۔ جب دوست و احباب ، اولاد و احفاد اور بہن بھائی آپ کے گرد جمع ہونگے اور آپ اشکوں سے بھیگی ہوئی ، حسرت بھری نگاہوں سے انہیں ہمیشہ کیلئے الوداع کہہ رہے ہونگے اور یہ دولت دنیا ، رشتے ناطے اور امنگیں آرزوئیں دھری کی دھری رہ جائیں گی ۔
موت آئی اور انسان کو اچک کر لے گئی
لمحہ بھر کے بعد وہ اک ساز بے آواز تھا

ارشاد باری تعالیٰ ہے :
( ق : 19 )
” اور موت کی بیہوشی برحق خبر لے کر آئی ، یہی وہ حقیقت ہے جس کے اعتراف سے تو راہ فرار اختیار کرتا تھا ۔ “

پھر کیا ہوگا.... ؟ کاش ! معاملہ یہیں ختم ہو جاتا ۔

لیکن درحقیقت مرنے سے آنکھیں بند نہیں ہوتیں بلکہ آنکھیں تو اب کھلی ہیں ۔ موت کے بعد کے مراحل تو اس سے زیادہ سخت اور آنے والے مناظر تو اس سے زیادہ ہولناک ہیں ۔ دعا ہے کہ رب تعالیٰ ہمارا خاتمہ بالخیر کرے اور فردوس اعلیٰ نصیب[اقتطعه واتساب]
 
شمولیت
ستمبر 21، 2015
پیغامات
2,697
ری ایکشن اسکور
760
پوائنٹ
290
جزاك الله خيرا

اور پہلا حساب نماز کا لیا جائیگا ۔ اللہ ساری امت پر رحم فرمائے ۔ قبر کے عذاب اور جہنم کی آگ سے محفوظ رکہے ، انسانوں اور شیطانوں کے وسوسوں سے بچائے رکہے ۔
آمین
 

عمر السلفی۔

مشہور رکن
شمولیت
ستمبر 22، 2020
پیغامات
1,608
ری ایکشن اسکور
41
پوائنٹ
110
‏جس پر “کل نفس ذائقتہ الموت” کی حقیقت کھل گئی وہ لوگوں کے سامنے مسکراتا ہے اور رات کی تنہائیوں میں اللہ کے آگے اشکبار رہتا ہے!!
 
Top