میری زندگی کے فیصلے کون کرتا ہے: میرا دل یا میرا دماغ؟

[ابوالحسن علوی]

یہ محسوس کیا گیا ہے کہ انسانی طبیعت پر سوچ وبچار کا غلبہ رہتا ہے یعنی انسان ہر وقت کسی نہ کسی سوچ کے عمل سے گزرتا رہتا ہے۔ قرآن مجید نے تفقہ کی نسبت دل کی طرف کی ہے جس پر لوگوں کو یہ سوال پیدا ہوا کہ دل کیسے سوچ وبچار کرتا ہے؟ سوچنے کا کام تو ذہن کا ہے؟ بہر حال یہ سوال اہم تھا لیکن ایک دوسرا سوال شاید بہت اہم ہے کہ میری زندگی کے بارے فیصلہ کون کرتا ہے: میرا دل یا میرا دماغ؟ اس پر یہ بھی سوال ہو سکتا ہے کہ کوئی بھی کرے ہمیں کیا؟ ہیں تو دونوں ہی میرے۔ لیکن ایک جگہ فرق پڑتا ہے کہ جب میں نے سوچ وبچار کے بعد ایک فیصلہ کیا، دل کی مانی یا دماغ کی مجھے نہیں معلوم، فیصلہ غلط تھا، مجھے افسوس ہوا، اب میں چاہتا ہوں دوبارہ غلطی نہ دہراوں، مجھے اصلاح اسی کی کرنی ہے کہ جس نے غلطی کی، یہ غلطی یا تو دل کی ہے یا دماغ کی، جس نے فیصلہ کیا تھا اس کی غلطی ہے، اگر دل کی غلطی ہے تو اس کی اصلاح اور دماغ کی غلطی ہو تو اس کی اصلاح کی ایپروچ میں کچھ فرق ہو گا۔

بعض اوقات یہ سوال بھی پیدا ہوتا ہے کہ میں جو یہ کہتا ہوں کہ مجھے خیال آیا تو یہ خیال کیا دل میں پیدا ہوتا ہے یا دماغ میں؟ کیونکہ مجھے اگر اپنے خیال کی اصلاح کرنی ہے تو مجھے معلوم ہونا چاہیے کہ وہ کہاں پیدا ہو رہا ہے؟

کتاب وسنت نے اصلاح کا دارومدار دل کو قرار دیا ہے، جس سے یہ معلوم ہوتا ہے کہ میری زندگی کے فیصلے میرا دل کرتا ہے۔ اور مجھے یہ احساس ہوتا ہے کہ خیال پہلی مرتبہ پیدا تو دل میں ہوتا ہے پھر اس کے بعد سوچ وبچار کے عمل میں دل کے ساتھ دماغ بھی شریک ہو جاتا ہے۔ واللہ اعلم

 

[انس]

دماغ کو خون کہاں سے سپلائی ہوتا ہے؟؟؟ دل سے!

ظاہر ہے کہ خون کے ساتھ ساتھ احکامات بھی جاتے ہیں ۔۔۔

واللہ تعالیٰ اعلم!

 

[محمد عامر یونس]

جزاک اللہ خیرا

 

[Aamir]

کیا قرآن و حدیث میں کہیں ثابت ہے کہ سوچنے کا کام دل بھی کرتا ہے؟؟
ایسی بہت سی حدیث گزری ہیں جہاں لفظ آتا ہے "جو تمہارا دل چاہے" وغیرہ،،،
کیا سوچنے کا کام صرف دماغ کا ہی ہے یا دل کا بھی اس میں رول ہوتا ہے؟ میری اصلاح فرما دیجئے

 

[qureshi]

کیا قرآن و حدیث میں کہیں ثابت ہے کہ سوچنے کا کام دل بھی کرتا ہے؟؟
ایسی بہت سی حدیث گزری ہیں جہاں لفظ آتا ہے "جو تمہارا دل چاہے" وغیرہ،،،
کیا سوچنے کا کام صرف دماغ کا ہی ہے یا دل کا بھی اس میں رول ہوتا ہے؟ میری اصلاح فرما دیجئے

سوچنا سمجھنے میں بنیادی کردار دل کا ہے ،کیونکہ بصیرت کا تعلق قلب سے ہے قرآن نے آفئدہ کا لفظ بھی استعمال کیا ہے،بس لطیفہ قلب میں آفئدہ ہے۔دل جسم میں بادشاہ کی حثیت رکھتا ہے۔اور میڈیکل سائنس بھی اسکی تصدیق کر چکی ہے،آپ تفسیر اسرار التنزیل کا مطالعہ فرمائیں

 

[یوسف ثانی]

دل بھی میرا ہے اور دماغ بھی میرا ہے۔ اب دل سوچے یا دماغ، یا سوچے جگر و پھیپھڑا ۔۔۔ سوچتا تو ”میں“ ہی ہوں اور ”اپنے“ اس سوچ پر عمل بھی ”میں“ ہی کرتا ہوں۔

میں جو یہ کہتا ہوں کہ مجھے خیال آیا تو یہ خیال کیا دل میں پیدا ہوتا ہے یا دماغ میں؟ کیونکہ مجھے اگر اپنے خیال کی اصلاح کرنی ہے تو مجھے معلوم ہونا چاہیے کہ وہ کہاں پیدا ہو رہا ہے؟

ہمارے دل کا دماغ پر یا دماغ کا دل پر شعوری طور پر اس طرح تو کوئی کنٹرول نہیں ہے، جیسا کہ ہمارے دست و بازو کا بقیہ جسم پر ہے۔ ہم یہ عقدہ حل کرکے بھی اپنے خیال کی اس طرح اصلاح نہیں کرسکیں گے جیسا کہ ہمارا دست و بازو پورے جسم کی صفائی ستھرائی کرنے پر قادر ہوتا ہے۔ خیال بھی میرا اپنا ہے (خواہ یہ خیال بیرونی اثرات کی وجہ سے پیدا ہوا ہو یا اندرونی طور پر از خود پیدا ہوا ہو) اور اس کی اصلاح بھی مجھے ہی کرنی ہے۔ خواہ دل کے پیدا شدہ فاسد خیال کی دماغ سے اصلاح ہو تی ہو یا معاملہ اس کے برعکس ہو رہا ہو۔ یہ دونوں کام کرتا تو ”میں“ ہی ہوں۔ خیال عموماً لاشعور سے پیدا ہوکر شعور کے آنگن میں پرورش پاتا ہے۔ میں لاشعور کو تو فاسد خیالات پیدا کرنے سے نہیں روک سکتا، لیکن شعور کے آنگن میں نشو و نما پاتے فاسد خیالات کو میں اپنی طاقت اور قوت سے اس وقت تک بآسانی ختم کرسکتا ہوں، جب تک یہ فاسد خیال پرورش پاکر میری عادتِ ثانیہ نہ بن جائے۔
واللہ اعلم

 

[ناصر رانا]

تحقیق کے سربراہ پروفیسر ایگور گراسمین نے کہا کہ ہماری تحقیق سے ظاہر ہوا ہے کہ دانشمندانہ استدلال تلاش کرنا خصوصی طور پر صرف دماغ اور ذہنی افعال کا نتیجہ نہیں ہے


نصرت شبنم
منقول

مشہور کہاوت ہے کہ فیصلے ہمیشہ دل و دماغ کی رضا مندی کے ساتھ کرنے چاہیئے اور اب سائنس دان بھی اسی نتیجے پر پہنچے ہیں کہ حکمت دماغ کا اکیلا فعل نہیں ہے بلکہ عقلمندی کے فیصلوں کے لیے دل کی دھڑکنیں اور سوچ کا عمل ایک ساتھ ملکر کام کرتا ہے۔

کیا انسان کےدماغ پر دل کی حکمرانی چلتی ہے اس حوالے سے سائنس دانوں کا اب یہ ماننا ہے کہ دل کی دھڑکنوں کے اتارچڑھاؤ سے ایک شخص کی عقلمندی متاثر ہوتی ہے۔

کینیڈا کی واٹرلو یونیورسٹی کے ماہر نفسیات اور آسٹریلین کیتھولک یونیورسٹی سے تعلق رکھنے والے محققین کی ٹیم نے دانشمندانہ فیصلوں پر دل کی دھڑکنوں کے اثرات کی نشاندھی کرتے ہوئے بتایا کہ دل کی دھڑکن کی رفتار اور سوچنے کےعمل کے درمیان تعلق موجود ہے،جو پیچیدہ مسائل کے بارے میں عقلمندانہ وجوہات تلاش کرنے کے لیے ملکر کام کرتا ہے۔

تحقیق کے سربراہ پروفیسر ایگور گراسمین نے کہا کہ ہماری تحقیق سے ظاہر ہوا ہے کہ دانشمندانہ استدلال تلاش کرنا خصوصی طور پر صرف دماغ اور ذہنی افعال کا نتیجہ نہیں ہے۔

ماہر نفسیات پروفیسر گراسمین نے وضاحت کرتے ہوئے کہا کہ ہمیں پتا چلا ہے کہ دل کی دھڑکنوں میں زیادہ مختلف حالتوں کے حامل افراد تیسرے شخص کے نقطئہ نظر سےسماجی مسائل کے بارے میں سوچنے کےقابل تھے۔ انھوں نے عقلمند استدلال کے لیے زیادہ سے زیادہ صلاحیتوں کا مظاہرہ کیا اور وہ دل کی کم شرح رکھنے والوں کے مقابلے میں کم جانبدار تھے۔۔

محققین نے دعوی کیا کہ ہماری تحقیق سے اس بات کی نشاندھی ہوئی ہے کہ کم جسمانی سرگرمیوں کے دوران دل کی دھڑکنوں کی رفتار کا کم جانبدار اور عقلمندی کے فیصلوں کےساتھ تعلق ہے ۔

ایک شخص کی دل کی دھڑکنوں میں اکثر تبدیلیاں ہوتی ہیں حتی کہ جب وہ زیادہ فعال نہیں ہوتے ہیں یا آرام کی حالت میں بیٹھے ہوتے ہیں۔

دل کی شرح میں اتار چڑھاؤ دراصل دل کی دھڑکنوں کے درمیان وقفہ ہےجو انسانی اعضاء کو کنٹرول کرنے والے اعصابی نظام سے منسلک ہے ۔

یہ مطالعہ یونیورسٹی ویسٹرن سڈنی سے تعلق رکھنے والے 150 طالب علموں پر مشعمل تھا جن کی عمریں اوسطا 25 سال تھی ۔

جرنل 'فرنٹیئرز ان بی ہیوریل نیوروسائنس میں شائع ہونے والے تحقیق کے دوران شرکاء سے ایسی سرگرمیوں میں حصہ لینے کے لیے کہا گیا جس میں انھیں سماجی مسائل کے حوالے سے ایک تیسرے شخص کے نقطہ نظر سے فیصلہ کرنے کے لیے کہا گیا تھا۔

ہر ٹاسک کے اختتام پر محققین نے ای سی جی کا استعمال کرتے ہوئے شرکاء کے دل کی دھڑکنوں کی رفتار کو دیکھا۔

پروفیسر گراسمین نے کہا کہ ہم پہلے سے جانتے ہیں کہ دل کی دھڑکنوں میں زیادہ اتار چڑھاؤ رکھنے والے افراد دماغ کے اعلی انتظامی افعال کےمالک ہوتے ہیں لیکن اس کا مطلب یہ نہیں ہے کہ یہ افراد زیادہ سمجھدار ہیں۔

انھوں نے دلیل پیش کی کہ ان میں سے کچھ لوگ اپنی علمی صلاحیتوں کو غیر دانشمندانہ فیصلوں کے لیے بھی استعمال کرسکتے ہیں جبکہ،سمجھدار فیصلہ کرنے کے لیے انھیں اپنے انا پرست نظریات پر قابو پانے کی ضرورت ہوگی۔