کھاتا پیتا بھی رہے اور روزہ بھی نہ ٹوٹے

[یوسف ثانی]

ایک وکیل نے رمضان کے مہینے میں سید عطاءاللہ شاہ بخاری سے ارزاہ مذاق کہا: علماء تعبیر و تاویل میں یدطولیٰ رکھتے ہیں، پھر کوئی ایسا نسخہ تجویز فرمایئے کہ آدمی کھاتا پیتا بھی رہے اور روزہ بھی نہ ٹوٹے۔

شاہ صاحب کہنے لگے: یہ تو بہت سہل ہے، قلم اور کاغذ نکالو اور لکھو:

"ایسا مرد چاہیے جو وکیل صاحب کو صبح صادق سےمغرب تک جوتے مارتا جائے۔ یہ جوتے کھاتے جائیں اور غصے کو پیتے جائیں۔"

اس کے بعد وکیل سے مخاطب ہو کر فرمانے لگے: "جاؤ اس طرح دن بھر کھاتے پیتے رہو تمہارا روزہ نہیں ٹوٹے گا۔"

 

[یوسف ثانی]

دولت مند باپ نے اپنے کاہل اور نکھٹو بیٹے کو ڈانٹتے ہوئے کہا ۔

’’تم نہایت ہی کاہل اور سست آدمی ہو، کوئی کام وغیرہ نہیں کرتے ۔ بس ہر وقت پڑے رہتے ہو، فرض کرو تمہاری شادی ہو جائے اور تمہاری بیوی تمہیں گھر سے باہر جانے اور کام کرنے پر مجبور کرے تو تم کیا کرو گے ‘‘؟

’’دوسری بیوی کی تلاش‘‘۔ بیٹے نے بڑے اطمینان سے جواب دیا ۔

 

[یوسف ثانی]

والدہ : ہم تمہارے لئے رشتہ ڈھونڈ رہے ہیں۔ تمھیں کیسی لڑکی چاہیے

بیٹا: ایک ایسی لڑکی جو مجھ سے بہت پیار کرے، ایک ایسی لڑکی جو بہت اچھا کھانا بنائے، ایک ایسی لڑکی جو میری خوب خدمت کرے، ایک ایسی لڑکی جو آپ لوگوں کی خدمت کرے

والدہ: (طنز کرتے ہوئے): کچھ اور؟

بیٹا: جی ہاں ۔۔۔ اور یہ کہ وہ چاروں مل جل کر رہیں