اللہ رب العالمین کو مذکر کہنا؟

[شاہد نذیر]

السلام علیکم ورحمتہ اللہ!

اللہ نے اپنے کلام میں خود اپنے لئے مذکر کے صیغے استعمال کئے ہیں تو کیا اللہ رب العالمین کو مذکر کہا جاسکتا ہے؟

 

[ابوالحسن علوی]

اہل الحدیث اللہ جل جلالہ کے لیے صرف انہی صفات کا اثبات کرتے ہیں جن کا کتاب وسنت نے اثبات کیا ہے اور اللہ کی ذات سے صرف انہی صفات کی نفی کرتے ہیں کہ جن کی نفی کتاب وسنت نے کی ہے۔ اور جن کے بارے کتاب وسنت خاموش ہے تو اس بارے خاموش رہتے ہیں اور اس کے بارے سوال کو بدعت قرار دیتے ہیں۔
پس اللہ تعالی نے کتاب وسنت میں اپنے لیے نہ تو صفت مذکر کا اثبات کیا ہے اور نہ ہی نفی کی ہے لہذا اس بارے اصل اصول خاموشی ہے اور سوال بدعت ہے۔ مزید تفصیل کے لیے یہ عربی لنک ملاحظہ فرمائیں۔

 

[شاہد نذیر]

جزاک اللہ شیخ محترم۔
کیا آپ مجھے بتا سکتے ہیں کہ اللہ رب العالمین نے اپنے لئے مذکر ہی کے صیغے کیوں استعمال کئے ہیں جبکہ مونث کے صیغے بھی ہیں اور ایسے صیغے بھی موجود ہیں جو مذکر اور مونث دونوں کے لئے استعمال ہوتے ہیں، اس کی حکمت اگر کسی عالم، محدث یا صحابی نے بیان کی ہوتو بتائیں۔

 

[ابوالحسن علوی]

اس کی حکمت اگر کسی عالم، محدث یا صحابی نے بیان کی ہوتو بتائیں۔

جو لنک ہم نے دیا تھا اس میں اس کی حکمت کی طرف اشارہ کیا گیا ہے۔تذکیر وتانیث زبان کے لوازمات ہیں، ان کا حقیقت سے کوئی تعلق نہیں ہے مثلا سورج اردو زبان میں مذکر استعمال ہوتا ہے یعنی ہم کہتے ہیں:
سورج طلوع ہوتا ہے
اور
عربی زبان میں یہ مونث استعمال ہوتا ہے یعنی عرب کہتے ہیں
تطلع الشمس
اب سورج نہ تو مذکر ہے نہ ہی مونث، یعنی جس معنی میں ہم مذکر ومونث مراد لیتے ہیں۔
اسی طرح سائیکل، گاڑی، دہی، میز، کرسی وعلی ھذا القیاس ہزاروں اشیاء کے بارے یہ کہنا مشکل ہے کہ یہ مذکر یا مونث ہیں اگرچہ ان کے لیے صیغے مذکر یا مونث ہی کے استعمال ہوتے ہیں اور یہ زبان کے اسالیب ہیں۔
علم نحو کے امام ، امام سیبویہ نے کہا ہے کہ مذکر ومونث کے صیغوں میں سے اصل مذکر کا صیغہ ہے کیونکہ مونث کا صیغہ مذکر سے بنتا ہے لہذا مذکر کا صیغہ افضل واشرف ہے۔
پس اسی لیے اللہ سبحانہ وتعالی کے لیے اشرف صیغہ استعمال کیا گیا ہے۔واللہ اعلم بالصواب
جہاں تک مذکر ومونث کا تعلق ہے تو یہ اجناس اللہ کی مخلوق ہیں۔ ارشاد باری تعالی ہے:
( وَأَنَّهُ خَلَقَ الزَّوْجَيْنِ الذَّكَرَ وَالْأُنْثَى ) (النجم:45) .
اور بلاشبہ اللہ تعالی نے جوڑے پیدا کیے ہیں یعنی مذکر اور مونث۔
پس اللہ کی مخلوق کو اللہ کی صفت بنانے سے اجتناب کرنا چاہیے۔
واللہ اعلم بالصواب