اَحکام فقہ میں قراء اتِ قرآنیہ کے اَثرات

[ساجد]

اَحکام فقہ میں قراء اتِ قرآنیہ کے اَثرات

ڈاکٹر نبیل بن محمد ابراہیم
مترجم: محمدعمران اسلم​

جس طرح اس میں کسی بھی شخص کی دو رائے نہیں ہوسکتیں کہ قراء اتِ قرآنیہ (متواترہ ہوں یا شاذہ) شرعی اَحکام ومسائل پراَثرات مرتب کرتی ہیں۔بالکل اسی طرح اَحکام فقہ میں بھی قراء ات کی اثر پذیری سے انکار نہیں کیا جاسکتا۔ قراء اتِ قرآنیہ کو فقہاء کس نظر سے دیکھتے ہیں اور کس طرح سے یہ فقہی اَحکام پر اثر انداز ہوتی ہیں اس بحث کو ہم دو عناوین میں پیش کرتے ہیں:
(١) قراء اتِ قرآنیہ کے بارے میں فقہاء کا مؤقف
(٢) اَحکام فقہیہ میں قراء اتِ قرآنیہ کے اَثرات کی مثالیں

 

[ساجد]

قراء اتِ قرآنیہ کے بارے میں فقہاء کا مؤقف
اَئمہ فقہاء قراء اتِ قرآنیہ کے علماء ہونے کی وجہ سے بھرپور اہتمام کے ساتھ ان کو نقل کرتے ہیں اور انہی کی روشنی میں اَحکام شرعیہ مستنبط فرماتے ہیں۔اب ہم قراء اتِ متواترہ اور شاذہ کے بارے میں فقہاء کا مؤقف پیش کرتے ہیں:

 

[ساجد]

قراء اتِ متواترہ کے بارے میں فقہاء کی آراء
علم فقہ اور علم قراء ات کی مدد سے احکام شرعیہ کی تبیین ووضاحت کرنے والوں میں سے ایک نام جلیل القدر تابعی امام حسن بصری﷫کا ہے جن کے بارے میں امام شافعی﷫فرماتے ہیں:
’’لوأشاء أن أقول إن القرآن نزل بلغۃ الحسن البصری لقلت لفصاحتہ‘‘ (أحسن الأثر لمحمود الحصری:ص۹۹)
’’حسن بصری﷫کی فصاحت وبلاغت کی وجہ سے اگر میں یہ بھی کہنا چاہوں کہ قرآن ان کی لغت میں نازل ہوا، تو میں کہہ سکتا ہوں۔ ‘‘
قراء اتِ قرآنیہ کی اہمیت کا اندازہ اس بات سے لگائیے کہ آئمہ فقہاء مقام ومرتبے کے اعلیٰ معیار پر ہونے کے باوجود علماء قراء ات کی تعظیم کرتے اور پیش آمدہ مسائل کے حل کے لیے ان کی طرف رجوع کرتے۔ امام ابوحنیفہ﷫، امام حمزہ﷫(جو کہ قراء سبعہ میں سے ہیں) کے بارے میں فرماتے ہیں :
’’ دوچیزوں کا علم آپ میں بدرجہ اَتم موجود ہے ایک قرآن اوردوسرا علم وراثت۔‘‘(أحسن الأثر للحصری: ص۵۳)
éمالک بن انس﷫امام ابوجعفر﷫کے بارے میں فرماتے ہیں:
’’کان أبو جعفر رجلا صالحا یقریٔ الناس فی المدینۃ‘‘ (غایۃ النہایۃ لابن جزری: ۲؍۳۴۲)
’’ابوجعفر﷫ صالح آدمی تھے اور مدینہ میں لوگوں کو قرآن پڑھاتے تھے۔‘‘

 

[ساجد]

٭اسی طرح امام نافع﷫کی قراء ت کے بارے میں آپ﷫فرماتے ہیں:
’’قراء ۃ أہل المدینۃ سنۃ‘‘(أحسن الاثر:ص۱۲) ’’اہل مدینہ کی قراء ت سنت ہے۔‘‘
آپ﷫ سے مزید دریافت کیا گیا کہ کیااس سے مراد امام نافع﷫کی قراء ۃ ہے توآپ نے اِثبات میں جواب دیااور جب امام موصوف سے نماز کے شروع میں بسملہ جہر سے متعلق دریافت کیا گیا تو آپ﷫ نے فرمایا:
’’سلو نافعا فکل علم یسأل عنہ أہلہ،ونافع إمام الناس فی القراء ۃ‘‘(لطائف الارشادات: ۱؍۹۴)
’’یہ سوال امام نافع﷫ سے کرو، کیونکہ ہر علم سے متعلق اس کے اہل سے سوال کرنا چاہیے اور نافع قراء ۃ میں لوگوں کے امام ہیں۔‘‘
٭امام شافعی﷫امام نافع کی قراء ت کے بارے میں فرماتے ہیں:
’’قراء ۃ نافع سنۃ‘‘ (لطائف الارشادات: ۱؍۹۴)’’امام نافع کی قراء ت سنت ہے۔‘‘

 

[ساجد]

٭ جب امام احمد﷫سے آپ کی پسندیدہ قراء ت کے بارے میں دریافت کیا گیاتوآپ نے اہل مدینہ یعنی امام نافع﷫ کی قراء ت کی طرف اِشارہ فرمایا۔
سابقہ بحث کے مطالعے سے اس بات کا اندازہ کرنا مشکل نہیں ہے کہ فقہاء کرام متعدد قراء ات کا خصوصی التزام کیا کرتے تھے۔یہی وجہ ہے کہ وہ قراء ت متواترہ اور غیرمتواترہ، قراء تِ مقبولہ اور غیر مقبولہ کے مابین خوب تمیز روا رکھتے ہوئے نظر آتے ہیں۔فقہاء کرام دو مختلف المعنی متواتر قراء ات پر عمل کو واجب قرار دیتے ہیں اوران کے نزدیک ان دونوں میں سے ایک کو دوسری پر اولویت حاصل نہیں ہے۔ احکام القرآن میں ہے:
’’والقرا ء تان کالآیتین یجب العمل بہما‘‘ (أحکام القرآن لابن العربی: ۱؍۱۴۹)
’’دو قراء ات دو آیات کی طرح ہیں ان دونوں پر عمل کرنا واجب ہے۔‘‘
٭شیخ الاسلام ابن تیمیہ﷫قراء اتِ قرآنیہ کے متعلق فرماتے ہیں:
’’قراء ات کی معرفت اور ان کو حفظ کرناایسی سنت ہے جس کی اتباع کی گئی ہے اور بعد میں آنے والوں نے اسے پہلوؤں سے اَخذ کیا ہے۔‘‘(مجموع الفتاوی:۱۳؍۴۰۴)
علاوہ ازیں شیخ موصوف﷫قراء عشرہ سے متعلق علماء کرام کا مؤقف بیان کرتے ہوئے رقمطراز ہیں:
’’علماء کرام میں سے کسی ایک نے بھی قراء تِ عشرہ کا انکار نہیں کیا،لیکن سوائے اس کے جو علم قراء ت سے ناواقف ہے یا جس تک قراء اتِ قرآنیہ پہنچ نہیں سکیں۔
اس کے بعد مزید لکھتے ہیں کہ
’’اگر کوئی شخص مغربی بلاد اِسلامیہ میں سکونت پذیر ہے اور اس تک بعض قراء ات نہیں پہنچیں تو وہ ایسی قراء ات پڑھنے سے گریز کرے جن سے وہ نابلد ہے۔‘‘ (مجموع فتاوی: ۱۳؍۳۹۳،۳۹۴)

 

[ساجد]

قراء اتِ شاذہ سے متعلق فقہاء کی آراء
قراء اتِ شاذہ کو بطورِ دلیل اختیار کرنے میں فقہاء کرام کے دو مذاہب ہیں:
(١) قراء ات ِشاذہ حجت ہیں اور ان پر عمل کرنا جائز ہے۔
(٢) قراء ات ِشاذہحجت نہیں ہیں اور ان پر عمل کرنا بھی جائز نہیں۔

 

[ساجد]

پہلے مذہب کے قائلین:
٭ احناف (فواتح الرحموت شرح مسلّم الثبوت للأنصاری: ۲؍۱۶)
٭ حنابلہ اسی کو ترجیح دیتے ہیں۔ (روضۃ الناظر: ۱؍۸۱)
٭ امام مالک﷫سے بھی یہی مذہب بیان کیا گیا ہے۔(شرح الکوکب المنیر للفتوحی: ۲۰؍۱۴۰)
٭ جمہور شافعیہ جن میں ابوحامد،ماوردی، ابن یونس، رافعی، ابن سبکی اور اسنوی﷭شامل ہیں،اور متاخرین شافعیہ نے بھی یہی مذہب اختیار کیاہے۔
٭ کمال بن ہمام ﷫فرماتے ہیں:
’’ القراء ۃ الشاذۃ حجۃ ظنیۃ خلافا للشافعی‘‘ (کتاب التحریر مع شرحیہ: ۳؍۹)
’’ امام شافعی﷫ کے (مذہب کے ) برخلاف قراء ۃِ شاذۃ ظنی حجت ہیں۔ ‘‘

 

[ساجد]

٭امام ابن قدامہ﷫ رقمطراز ہیں:
’’والصحیح أنہ حجۃ،لأنہ یخبر۔ أی الصحابی الذی روی القراء ۃ الشاذۃ ۔ أنہ سمع من النبی فإن لم یکن قرآن فہو خبر‘‘ (روضۃ الناظر: ۱؍۱۸۱)
’’صحیح یہ ہے کہ قراء اتِ شاذۃ حجت ہیں،کیونکہ یہ خبرہیں۔ یعنی وہ صحابی جو قراء اتِ شاذۃ بیان کررہا ہے اس نے ضرور وہ رسول اللہﷺسے سنی ہے۔ اگر وہ قرآن نہیں تو کم ازکم خبر تو ضرور ہوگی۔‘‘
٭ابن سبکی﷫فرماتے ہیں:
’’ أما إجراؤہ مجری الأخبار الآحاد فی الاحتجاج فہو صحیح‘‘ (جمع الجوامع: ۲۳۱)
’’قراء تِ شاذہ کو دلیل میں خبر واحد کے طور پر پیش کیا جا سکتا ہے۔‘‘
٭ابن حجر ہیثمی﷫اس کی وضاحت ان الفاظ میں کرتے ہیں:
’’والقراء ۃ الشاذۃ یحتج بھا فی الأحکام کخبر الواحد علی المعتمد‘‘(تحفۃ المحتاج بشرح المنہاج: ۸؍۲۸۹)
’’احکام میں قراء ۃ شاذۃ کو بطورِ دلیل اختیار کیا جائے گاجیسا کہ خبر واحد پر اعتماد کیا جاتا ہے۔‘‘

 

[ساجد]

دوسرے مذہب کے قائلین:
٭امام مالک﷫ (مختصر ابن الحاجب مع شرحیۃ العضن: ۲؍۲۱)
٭ایک قول کے مطابق امام شافعی اور آپ کے بعض اصحاب کا یہی مؤقف ہے۔(الأم للشافعی: ۷؍۶۶)
٭امام احمد﷫ سے بھی یہی مؤقف روایت کیا گیاہے۔ (اُصول مذہب امام احمد:ص۱۸۶)
٭امام ابن حزم ﷫کا بھی یہی قول ہے۔(الأحکام فی أصول الاحکام:۴؍۱۷۰،۱۷۱)

 

[ساجد]

راجح مؤقف
ان دونوں مذاہب کے مطالعے سے ہم اس نتیجے پر پہنچے ہیں کہ
قراء اتِ شاذۃ کو اس وقت بطورِ دلیل اختیار کیا جائے گاجب وہ کسی حکم کی ترجیح کے طورپر استعمال ہو اور اس وقت اس کو دلیل نہیں بنایا جا سکتا جب وہ کسی حکم کی ابتدائی دلیل کے طور پروارد ہو۔