تحریک تجدد اور متجددین

[ابوالحسن علوی]

افکار وآراء
غلام احمد پرویز صاحب نے کتاب اللہ کی تفہیم میں سنت ِنبویۖ کی ضرورت واہمیت کا انکار کیا اور وہ محض عربی زبان کی مدد سے قرآن مجید کو براہ راست سمجھنے کے مدعی تھے۔ عربی زبان کی مدد سے قرآن کریم کے براہِ راست مطالعہ کے نتیجہ میں پرویز صاحب نے اپنے کئی ایک نئے فلسفے یا نظریات و اَفکار متعارف کروائے۔ برصغیر پاک وہند میں جس شخص نے سب سے پہلے حدیث وسنت کا انکار کیا وہ عبد اللہ چکڑالوی تھے۔ ان کے بعد مولوی احمد الدین امرتسری نے اس فکر کو آگے بڑھایا۔ اس کے بعد حافظ اسلم جیراج پوری نے اس فکر کو مزید مزین کیا اور آخر میں غلا م احمد پرویز صاحب نے انکارِ حدیث وسنت کے اس فکر کو باقاعدہ ایک مکتب فکر یا مسلک کی صورت میں مدوّن کر دیا۔ علاوہ ازیں مولوی محب الحق عظیم آبادی' تمنا عمادی' نیاز فتح پوری اورعلامہ مشرقی وغیرہم نے بھی انکارِ حدیث کی تحریک میں اہم کردار اد اکیا ہے۔

 

[ابوالحسن علوی]

ایمان باللہ کا تصور
پرویز صاحب کا خیال ہے کہ قرآن مجید میں جہاں جہاں لفظ 'اللہ' آیا ہے تو اس سے مراد اللہ کی ذات نہیں بلکہ 'اللہ کا قانون' یا 'نظامِ ربوبیت' ہے اور قرآن مجید میں اللہ کی جو صفات بیان کی گئی ہیں وہ درحقیقت اللہ کے دیے ہوئے قانون کی صفات ہیں۔ ایک جگہ فرماتے ہیں:

''سلیم اگر تم ایک اہم نکتہ سمجھ لو تو قرآن فہمی میں تمہاری بہت سی مشکلات کا حل خود بخود نکل آئے گا 'یعنی ان مقامات میں جہاں قرآن کریم میں لفظ اللہ' استعمال ہوا ہے' اللہ کی جگہ اگر تم 'اللہ کا قانون' کہہ لیا کرو تو بات بالکل واضح ہو جائے گی۔'' (سلیم کے نام : جلد ۱، ص ۱۷۳)

ایک اور مقام پر پرویز صاحب اپنے فلسفہ ٔنظامِ ربوبیت یا مارکسزم کی شرح میں لکھتے ہیں:

''ہم اس مقام پر ایک اہم نکتہ کی وضاحت ضروری سمجھتے ہیں' جسے آگے بڑھنے سے پہلے سمجھ لینا ضروری ہے۔ ہم نے 'اِنَّ اللّٰہَ اشْتَرٰی مِنَ الْمُؤْمِنِیْنَ…' کی آیت میں بھی اور مذکورہ صدر آیت میں 'اللہ' سے مراد لیا ہے: ''وہ معاشرہ جو قانونِ خداوندی کو نافذ کرنے کے لیے متشکل ہو۔'' (نظام ربوبیت : ص١٥٨)

اسی طرح آیت مبارکہ (وَمَا مِنْ دَآبَّةٍ فِی الْاَرْضِ اِلَّا عَلَی اللّٰہِ رِزْقُھَا)(ھود:٦) کی تفسیر میں پرویز صاحب لکھتے ہیں:

''ہم نے (اس آیت میں) اللہ سے مراد لیا وہ معاشرہ جو قانونِ خداوندی کو نافذ کرنے کے لیے متشکل ہو۔''(نظام ربوبیت : ص١٥٨)

اور اس قانونِ خداوندی سے پرویز صاحب کی مراد مارکس کا دیا ہوا فلسفہ ہوتا ہے جس سے وہ حد درجہ متاثر نظر آتے ہیں۔ آسان الفاظ میں پرویز کے نزدیک قرآن مجید میں لفظ رب یا اللہ سے مراد وہ معاشرہ ہے جو ''قانون الٰہی'' یعنی مارکسزم کے فلسفہ پر قائم ہو' اور اس رب یا اللہ کی صفات سے مراد ''قانونِ الٰہی'' یا مارکسزم کی بنیاد پر قائم معاشرے کی صفات ہیں۔ ایک اور مقام پر لکھتے ہیں:

''انسانوں کے خود ساختہ مذہب کے پیدا کردہ خدا پر ایمان لانے اور اس کے دعاوی پر توکل رکھنے سے وہ یقین کسی طرح پیدا نہیں ہو سکتا جو انسان کو احتیاج کی فکر سے بے خوف کر دے۔یہی وہ خدا تھا جس کے متعلق مارکس نے کہہ دیا تھا کہ اس کا تصور سرمایہ داروں کی مصلحت کوشیوں کا پیدا کردہ ہے' لیکن 'خدا' کے تصور کا ایک مفہوم وہ ہے جسے خود خدا نے متعین کیا ہے اور جو قرآن کے حروف ونقوش میں جگمگ جگمگ کرتا دکھائی دیتا ہے۔ اس تصور کی رو سے ان مقامات پرخدا سے عملاً مفہوم وہ نظام ہے جو اس کے قوانین کو نافذ کرنے کے لیے متشکل ہوتا ہے اور اس طرح وہ تمام ذمہ داریاں اپنے سر لے لیتا ہے جنہیں خدا نے اپنی طرف منسوب کیا ہے۔''

اسی طرح پرویز صاحب کے نزدیک جہاں اللہ اور اس کے رسول ۖ کے الفاظ ایک ساتھ آئے ہیں تو اس سے مراد 'اسلامی نظام حکومت' ہے۔ پرویز صاحب نے اس بنیاد پر 'مرکز ملت' کے نام سے اپنا نیا فلسفہ متعارف کروایا۔ اس فلسفہ کے مطابق قرآن مجید میں اللہ اور اس کے رسول کی اطاعت سے مراد نظام ربوبیت یعنی مارکسزم کی بنیاد پر قائم حکومت کی اطاعت ہے۔ ایک جگہ پرویز صاحب لکھتے ہیں:

''حکومت کے انتظامی امور کے لیے ایک مرکز ہوگا اور اس مرکز کے ماتحت افسرانِ مجاز' قرآن کریم میں اس کے لیے 'خدا اور رسول' کی اصطلاح آئی ہے یعنی وہ نظام خداوندی جسے رسول اللہ نے متشکل فرمایا۔ خدا اور رسول کی اطاعت سے مقصود اسی مرکزی حکومت خداوندی کی اطاعت ہے۔'' (قرآنی فیصلے : ص ٦)

ایک اور جگہ لکھتے ہیں:

'' رسول اللہ کے بعد خلیفة الرسول' رسول اللہ کی جگہ لے لیتا ہے' اب خدا اوررسول کی اطاعت سے مراد جدید مرکز حکومت کی اطاعت ہوتی ہے۔''(معراج انسانیت:٣٥٧)

 

[ابوالحسن علوی]

ایمان بالرسالت
یہ تو پرویز صاحب کا ایمان باللہ کے بارے عقیدہ تھاکہ کبھی تو ان کی اللہ یا رب سے مراد ''نظامِ ربوبیت'' یا مارکسزم پر قائم معاشرہ ہوتا ہے جبکہ وہ لفظ قرآن مجید میں اکیلا مستعمل ہوا ہو اور کبھی ان کی اس سے مراد اس معاشرے کو قائم کرنے والی مرکزی حکومت یا سنٹرل اتھارٹی اور ان کے ماتحت افسران ہوتے ہے جبکہ وہ لفظ قرآن مجید میں رسول کے ساتھ استعمال ہوا ہو۔ اب ایمان بالرسالت کے بارے میں اگر پرویز صاحب کے عقیدہ کا جائزہ لیا جائے تو اس بارے میں پرویز صاحب کا خیال ہم اوپر نقل کر چکے ہیں کہ اس سے ان کی مراد وہی مرکز ملت یا سنٹرل اتھارٹی ہے' یعنی خدا اور رسول مل کر ایک اصطلاح بنی ہے اور اس سے مراد مرکز ملت یا سنٹرل اتھارٹی ہے اور رسول کی اطاعت سے مراد اس مرکز ملت کی اطاعت ہے ۔ایک جگہ آیت مبارکہ (یٰاَیُّھَا الَّذِیْنَ اٰمَنُوْا اَطِیْعُوا اللّٰہَ وَاَطِیْعُوا الرَّسُوْلَ وَاُولِی الْاَمْرِ مِنْکُمْ) (النساء:٥٩) کی تفسیر میں لکھتے ہیں:

''اس آیت مقدسہ کا مفہوم بالکل واضح ہے' اس میں 'اللہ ورسول' سے مراد مرکز ملت یعنی نظامِ خداوندی (central authority) اور اولو الامر سے مفہوم افسرانِ ماتحت ہیں۔'' (معراج انسانیت : ص٣٢٢)

پس پرویز صاحب کے نزدیک قرآن مجید میں لفظ رب یا اللہ سے مراد تو وہ معاشرہ ہے جو نظامِ ربوبیت یعنی مارکسزم کی بنیاد پر قائم ہو اور اللہ اور اس کے رسول ۖکی اطاعت سے مراد ایسے معاشرے کو چلانے والی مرکزی حکومت کی اطاعت اور اولوالامر کی اطاعت سے مراد اس مرکزی حکومت کے ماتحت افسران کی اطاعت ہے۔

پرویز صاحب نے ''قصہ ٔآدم '' کو انسان کا قصہ قرار دیا ہے اور حضرت آدم علیہ السلام کی شخصیت کا انکا ر کیا ہے۔ یعنی ان کے بقول قرآن میں جہاں جہاں لفظ آدم آتا ہے تو اس سے مراد کوئی شخص واحد نہیں تھا بلکہ یہ ایک نوع تھی جس نوع کا اللہ تعالیٰ نے بندروں میں سے انتخاب کیا تھا تا کہ اسے انسان بنائے۔ حضرت آدم علیہ السلام کی نبوت کا بھی انکار کیا ہے' کیونکہ ان کے نزدیک آدم کسی شخص کا نام ہی نہیں ہے بلکہ یہ ایک نوع ہے جسے اللہ تعالیٰ نے ارتقا کے مراحل میں انسان بنانے کے لیے بندروں میں سے چن لیا تھا۔

 

[ابوالحسن علوی]

ایمان بالآخرت
جہاں تک ایمان بالآخرت کا معاملہ ہے تو اس بارے میں پرویز صاحب کا عقیدہ ہے کہ جنت اور جہنم کسی اُخروی زندگی یا حیات میں کسی اچھی بری جگہ یا مکان کا نام نہیں ہے بلکہ یہ بندہ مؤمن پر اس دنیا میں طاری ہونے والی کچھ کیفیات کا نام ہے۔ ایک جگہ جہنم کے بارے میں لکھتے ہیں:

''جہنم انسان کی قلبی کیفیت کا نام ہے' لیکن قرآن کریم کا انداز یہ ہے کہ وہ غیر محسوس' مجرد حقائق کو محسوس مثالوں سے سمجھاتا ہے۔''(جہان فردا : ص٢٣٥)

جنت کے بارے اپنے نظریات بیان کرتے ہوئے فرماتے ہیں:

''جہنم کی طرح اُخروی جنت بھی کسی مقام کا نام نہیں' کیفیت کا نام ہے۔'' (جہان فردا : ص٢٧٠)

ایک اور جگہ جنت کی نعمتوں کے بارے میں اپنا نقطہ نظر بیان کرتے ہوئے لکھتے ہیں:

''جنت کی آسائشیں اور زیبائشیں' وہاں کی فراوانیاں اور خوشحالیاں اس دنیا کی زندگی میں حاصل ہو جاتی ہیں' مرنے کے بعد کی جنت کے سلسلہ میں ان کا بیان تمثیلی ہے۔'' (نظامِ ربوبیت : ص٨٢)

پرویز صاحب نے روزِ حشر اور قیامت کا بھی انکار کیا ہے۔ ایک جگہ فرماتے ہیں:

''یہ تصور صحیح نہیں کہ جتنے لوگ مرتے ہیں وہ مرنے کے بعد قبروں میں روک لیے جاتے ہیں' اور پھر ان سب کو ایک دن اکٹھا اٹھایا جائے گا اسے حشر یا قیامت کا دن کہا جاتا ہے۔'' (جہانِ فردا : ص١٨٠)

ایک جگہ قرآنی الفاظ 'یوم القیامة' کی تاویل کرتے ہوئے لکھتے ہیں:

''یوم القیامة سے مراد ہو گا وہ انقلابی دور جو قرآن کی رو سے سامنے آیا تھا۔'' (جہانِ فردا : ص١٣٣)

ایک اور جگہ قرآنی لفظ 'الساعة' کی تاویل کرتے ہوئے لکھتے ہیں:

''الساعة سے مراد حق وباطل کی وہ آخری جنگ ہوتی ہے جس سے باطل کی قوتیں شکست کھا کر برباد ہو جاتی ہیں۔''(لغات القرآن :جلد۲ ، ص ۹۱۸ )

 

[ابوالحسن علوی]

فرشتوں پر ایمان
فرشتوں کے بارے میں پرویز صاحب کا خیال ہے کہ یہ کوئی علیحدہ سے خدائی مخلوق نہیں ہیں بلکہ بعض انسانی داخلی قوتوں کو ملائکہ کا نام دیا گیا ہے۔ ایک جگہ پرویز صاحب لکھتے ہیں:

''ملائکہ ہماری اپنی داخلی قوتیں ہیں' یعنی ہمارے اعمال کے وہ اثرات جو ہماری ذات پر مرتب ہوتے رہتے ہیں۔'' (ابلیس وآدم : ص١٦٢)

ایک اور جگہ فرماتے ہیں:

''ملائکہ یعنی کائنات کی قوتیں جن سے رزق پیدا ہوتا ہے' انسان کے تابع فرمان ہیں۔'' (ابلیس وآدم:ص ٥٢)

ایک اور جگہ لکھتے ہیں:

'' فرشتے' ملائکہ' وہ کائناتی قوتیں ہیں جو مشیت خداوندی کے پروگرام کو بروئے کار لانے کے لیے زمانے کے تقاضوں کی شکل میں سامنے آتی ہیں۔'' (اقبال اور قرآن :ص ١٦٥)

پرویز صاحب نے قرآن مجید میں جنات سے مراد بدوی اور وحشی قبائل لیے ہیں۔ فرشتوں اور جنات کے بارے میں یہ تقریباً وہی نقطہ نظر ہے جو سرسید مرحوم کا تھا۔تقدیر کے بارے میں ان کا خیال ہے کہ مجوسیوں نے یہ عقیدہ اسلام میں داخل کیا ہے۔

 

[ابوالحسن علوی]

ایمان بالقرآن
پرویز صاحب قرآن مجید کو ابدی وحی مانتے ہیں' لیکن حدیث وسنت کے ذریعے قرآن کی تفسیر کے قائل نہیں ہیں اور ان کا کہنا یہ ہے کہ قرآن نے اصول دے دیے ہیں اور ان اصولوں کی تشریح اور توضیح کے مطابق ایک اسلامی نظامِ حیات یا قانون کی تفصیلات ہم خود طے کریں گے۔ ایک جگہ لکھتے ہیں:

''قرآن کریم نے صرف اصولی احکام دیے ہیں اور یہ چیز انسانوں پر چھوڑ دی ہے کہ وہ اپنے اپنے زمانے کے تقاضوں کے مطابق ان اصولوں کی روشنی میں جزئی قوانین ایک نظام کے تابع خود مرتب کریں۔'' (لغات القرآن : جلد۲، ص ۴۷۹)

پرویز صاحب قرآن مجید کی تفسیر خود کرنے کے قائل ہیں اور اللہ کے رسول ۖ کی طرف سے کی گئی قرآنی تفسیر کی ضرورت اور اہمیت کے منکر ہیں۔ ایک جگہ فرماتے ہیں:

''قرآن کے اصول مکمل غیر متبدل اور ابدی ہیں' اس لیے اب کسی نبی کی ضرورت نہیں۔ باقی رہا یہ تصور کہ ان اصولوں کو سمجھانے کے لیے ایسے شخص کی ضرورت ہے جو خدا کی طرف سے ان اصولوں کو سمجھنے کا علم حاصل کرے اور انہیں پھر دوسرے انسانوں کو سمجھائے تو یہ تصور یکسر غیر قرآنی ہے۔ قرآن کریم نے کہیں نہیں کہا کہ میری تعلیم سمجھانے کے لیے بھی کسی مامور من اللہ یا ملہم ربانی کی ضرورت ہے۔'' (قرآنی فیصلے : جلد۳، ص ۲۶۰)

 

[ابوالحسن علوی]

قرآنی آیات کی پرویزی تفسیر کے چند نمونے
پرویز صاحب نے قرآن کے دیگر مقامات کو بھی اپنی تاویلات کا تختہ مشق بنایا ہے' مثلاً قرآنی آیت (فَلَبِثَ فِیْھِمْ اَلْفَ سَنَةٍ اِلاَّ خَمْسِیْنَ عَامًا) (العنکبوت : ١٤) یعنی ''حضرت نوح علیہ السلام اپنی قوم میں ٩٥٠ سال رہے'' کی تاویل کرتے ہوئے فرماتے ہیں کہ عربی زبان میں 'سَنَة' کے لفظ سے مراد 'فصل' ہوتی ہے اور ایک سال میں چار فصلیں ہوتی ہیں' لہٰذا ہزار فصلوں کا معنی ٢٥٠ سال ہوئے اور اس میں سے ٥٠ سال نکال لیں تو ٢٠٠ سال باقی رہ گئے' لہٰذا حضرت نوح علیہ السلام کی عمر ٢٠٠ برس ہوئی جو معقول بات ہے۔

اسی طرح قرآنی آیت (وَقَالَ یٰاَیُّھَا النَّاسُ عُلِّمْنَا مَنْطِقَ الطَّیْرِ)(النمل : ١٦) یعنی ''حضرت سلیمان علیہ السلام نے کہا: اے لوگو! ہمیں پرندوں کی بولی سکھائی گئی ہے'' کی تاویل میں فرماتے ہیں کہ 'منطق' سے مراد قواعد وضوابط ہیں اور 'طیر' سے مراد گھوڑے ہیں اور 'منطق الطیر'سے مراد گھوڑوں کے رسالہ سے متعلق علم ہے۔

(اَنِّیْ اَخْلُقُ لَکُمْ مِّنَ الطِّیْنِ کَھَیْئَةِ الطَّیْرِفَاَنْفُخُ فِیْہِ فَیَکُوْنُ طَیْرًام بِاِذْنِ اللّٰہِ ) (آل عمران:٤٩) یعنی ''بلاشبہ میں تمہارے لیے مٹی سے پرندے کی ایک صورت بناتا ہوں پس میں اس میں پھونک مارتا ہوں تو وہ اللہ کے حکم سے پرندہ بن جاتا ہے'' کا مفہوم یہ بیان کیا ہے کہ میں وحی کے ذریعے انسانوں کو حیات نو عطا کروں گا اور وہ خاک سے فضا میں اڑنے کے قابل ہو جائیں گے۔

(وَانْظُرْ اِلَی الْعِظَامِ کَیْفَ نُنْشِزُھَا ثُمَّ نَکْسُوْھَا لَحْمًا) (البقرة : ٢٥٩) یعنی ''تم گدھے کی ہڈیوں پر غور کرو کہ کیسے ہم انہیں اٹھاتے ہیں اور انہیں گوشت کا لباس پہناتے ہیں'' کی تاویل یہ کی ہے کہ اس سے مراد رحم مادر میں انسان کا جنین ہے۔

(اَلرِّجَالُ قَوّٰمُوْنَ عَلَی النِّسَآء)(النساء :٣٤) یعنی ''مرد عورتوں پر نگران ہیں'' کی تاویل یہ کرتے ہیں کہ آیت مبارکہ میں 'قوام' کا معنی روزی مہیا کرنے کا کیا ہے۔

حضرت ابراہیم علیہ السلام کے آگ میں پھینکے جانے والے واقعہ کی تاویل یہ کی کہ مشرکین نے انہیں اپنی دشمی اور عداوت کی آگ میں پھینکا تھا۔ حضرت ابراہیم علیہ السلام کے حضرت اسمٰعیلd کو ذبح کرنے کے بارے میں یہ تاویل کی کہ یہ غلط فہمی تھی جو خواب کی غلط تعبیر کی صورت میں حضرت ابراہیم علیہ السلام کو لاحق ہوئی اور اللہ تعالیٰ نے انہیں اس غلط فہمی پر عمل سے اس طرح بچا لیا کہ ان کی جگہ کچھ اور ذبح ہو گیا۔

عصائے موسیٰ علیہ السلام سے پانی کے پھٹ کر دو دیواروں کی شکل میں کھڑے ہونے کی تاویل یہ کی کہ 'کُلُّ فِرْقٍ' سے مراد دونوں جماعتیں یعنی آلِ فرعون اور بنی اسرائیل کی جماعتیں تھیں جو تودوں کی مانند آمنے سامنے کھڑی ہوئیں۔

(فَاَلْقٰٹھَا فَاِذَا ھِیَ حَیَّة تَسْعٰی)(طٰہٰ ) یعنی ''حضرت موسیٰ علیہ السلام نے اپنا عصا پھینکا تو وہ ایک دوڑتا ہوا سانپ بن گیا'' میں عصائے موسیٰ علیہ السلام سے مراد احکام لیے ہیں جو حضرت موسیٰ علیہ السلام نے اپنی قوم کے سامنے پیش کیے تھے۔

(وَیُکَلِّمُ النَّاسَ فِی الْمَھْدِ) (آل عمران : ٤٦) یعنی حضرت عیسیٰ علیہ السلام ماں کی گود میں کلام کریں گے'' کی تاویل یہ کی ہے کہ اس سے مراد ہے کہ وہ چھوٹی عمر میں خوب باتیں کرنے والا ہو گا۔

 

[ابوالحسن علوی]

دیگر افکار وآراء
نماز کے بارے میں فرماتے ہیں کہ یہ ایک بے روح رسم اور پرستش ہے لیکن پھر بھی میں جمہور مسلمانوں کے طریقہ پر نماز تو پڑھ لیتا ہوں۔
پرویز صاحب کے نزدیک 'اقامت صلوٰة'سے مراد وہ موقت اجتماعات ہیں جو نظام ربوبیت کی یاد تازہ کرنے کے لیے منعقد کیے جائیں۔
زکوٰة کے بارے میں فرماتے ہیں کہ زکوٰة کی کوئی شرح اسلام میں مقرر نہیں ہے' ایک اسلامی حکومت سارا مال بھی لے سکتی ہے۔ زکوٰة اور ٹیکس ایک ہی شے ہے' ان میں کوئی فرق نہیں ہے۔
قربانی کے بارے میں فرماتے ہیں کہ حج کے علاوہ قربانی ایک رسم اور قرآن پر جھوٹ ہے۔
حرم کعبہ سے مراد مکہ مکرمہ نہیں ہے بلکہ وہ جگہ ہے جہاں سے دینی احکام کا نفاذ ہو۔
بغیر سمجھے تلاوتِ قرآن پر اجر وثواب کے قائل نہیں ہیں اور اسے ایک عجمی سازش قرار دیتے ہیں۔
تعددِ ازواج کے بارے میں فرماتے ہیں کہ ایک بیوی کی جگہ دوسری بیوی آ سکتی ہے لیکن اس کی موجودگی میں نہیں۔
قرآنی حدود کے بارے میں فرماتے ہیں کہ قرآن نے جو سزائیں بتلائی ہیں وہ انتہائی سزائیں ہیں اور حدود شرعی نافذ کرنے والے ان سے کم سزائیں بھی جاری کر سکتے ہیں۔

 

[ابوالحسن علوی]

پرویز پر کفر کا فتویٰ
امام حرم شیخ محمد بن عبد اللہ السبیل نے غلام احمد پرویز اور اس کے متبعین کو کافر قرار دیا ہے۔حکومت کویت کی طرف سے وزارتِ اوقاف کی فتویٰ کمیٹی کے چیئرمین شیخ مشعل مبارک عبد اللہ احمد الصباح نے بھی پرویزی عقائد رکھنے والوں کو کافر قرار دیا ہے۔ سعودی عرب کے سابقہ مفتی اعظم شیخ عبد العزیز بن باز رحمہ اللہ اور ان کے بعد شیخ عبد العزیز بن عبد اللہ آل الشیخ نے بھی غلام احمد پر ویز پر منکر حدیث ہونے کی وجہ سے کفر کا فتویٰ عائد کیا ہے۔

غلام احمد پرویز کے کفرکے بارے میں سعودی عرب کے ان علماء کے فتاوٰی کی تائید کرنے والوں میں مولانا محمد ادریس سلفی' مولانا ڈاکٹر سرفراز احمد نعیمی' مولانا محمد تقی عثمانی'مفتی عبد القیوم ہزاروی' مولانا ڈاکٹر مفتی غلام سرور قادری' ڈاکٹر عبد الرزاق سکندر' مولانا سراج الدین' مولانا محمد یوسف لدھیانوی' مولانا حافظ عبد القادر روپڑی' مولانا مفتی محمد رفیع عثمانی' مولانا عبد الحفیظ مکی' مولانا منظور احمد چنیوٹی' مولانا ڈاکٹر شیر علی شاہ مدنی' مولانا مفتی عاشق الٰہی البرنی' مفتی ڈاکٹر عبد الواحد' مولانا عبد الستار خان نیازی' مولانا صفی الرحمن مبارکپوری' مولانا مجاہد الاسلام قاسمی' مولانا محمد اجمل قادری' مولانا ریاض الحسن نوری' مولانا عبد الرحمن مدنی' مولانا ابو عمار زاہد الراشدی' مولانا عبد المالک' مولانا مفتی الیاس کشمیری' ڈاکٹر اسرار احمدوغیرہ شامل ہیں۔

١٩٦٢ء میں غلام احمد پرویز کے بارے میں تکفیر کی ایک مہم چلائی گئی اور اس بارے میںایک مفصل فتویٰ مرتب ہوا۔ ٢٥٦ صفحات پر مشتمل یہ فتویٰ 'پرویز کے بارے علماء کا متفقہ فتویٰ' کے نام سے جامعہ عربیہ اسلامیہ' کراچی سے شائع ہوا ۔اس فتویٰ پر ١٠٢٨ کے قریب علماء کے دستخط شامل ہیں' جن میں مولانا داؤد غزنوی' حافظ عبد اللہ محدث روپڑی' حافظ عبد القادر' مولانا مفتی محمود' مولانا مفتی محمد شفیع' مولانا احمد علی لاہوری' مولانا احتشام الحق تھانوی' مولانا ظفر احمد عثمانی' مولانا محمد ادریس کاندھلوی' مولانا غلام غوث ہزاروی' مولانا محمد یوسف بنوری' مفتی ولی حسن ٹونکی' محمد عبد الحامد قادری' محمد عبد السلام قادری' محمد عبد الحلیم چشتی' محمد سلیم الدین چشتی' عبد الکریم قاسمی' محمد بہاء الحق قاسمی وغیرہ شامل ہیں۔ علاوہ ازیں کتاب کے آخر میں عالم عرب یعنی مکہ ومدینہ اور مصر وشام کے کبار علماء کے فتاویٰ بھی شامل کیے گئے ہیں۔

غلام احمد قادیانی کے بعد برصغیر پاک وہند میں غلام احمد پرویز دوسرا شخص ہے کہ جس کی جمیع مکاتب فکر کے نمائندہ علماء نے تکفیر کی ہے اور اسے اور اس کے متبعین کو دائرہ اسلام سے خارج قرار دیا ہے۔

 

[ابوالحسن علوی]

مصادر ومراجع
١۔ ماہنامہ محدث' فتنہ انکار حدیث نمبر' ستمبر ٢٠٠٢ء' لاہور
٢۔ آئینہ پرویزیت' مولانا عبد الرحمن کیلانی' مکتبہ السلام' لاہور'٢٠٠٤ء
٣۔ تفسیر مطالب الفرقان کا علمی وتحقیقی جائزہ' پروفیسر ڈاکٹر محمد دین قاسمی' ادارہ معارف اسلامی' لاہور
٤۔ جناب غلام احمد پرویز کے نظامِ ربوبیت پر ایک نظر' پروفیسر ڈاکٹر محمد دین قاسمی' بیت الحکمہ' لاہور' ٢٠٠٧ء
٥۔ جناب غلام احمد پرویز اپنے الفاظ کے آئینے میں' پروفیسر ڈاکٹر محمد دین قاسمی' بیت الحکمہ' لاہور' ٢٠٠٦ء
٦۔ ہفت روزہ الاعتصام' حجیت حدیث نمبر' دار الدعوة السلفیہ ' لاہور' ١٩٥٦ء
7-http://en.wikipedia.org