آئیں جنت کی سیر کریں

[عبدالرحیم رحمانی]

رسول اکرم صلی اللہ علیہ وسلم کا ارشاد ہے: "بے شک اہل جنت کی بیویاں اپنے خاوندوں کے لیے اس قدر خوبصورت آواز میں گائیں گی کہ اس جیسی آواز کسی نے نہیں سنی۔ اور ان کے گانوں میں سے ایک گانا یہ بھی ہوگا:
نَحنُ الخَیرَاتُ الحِسَانُ
أَزوَاجُ قَومٍ کِرَامٍ
یَنظُرنَ بِقُرَّةِ أَعیَانٍ
اسی طرح وہ یہ بھی گائیں گے:
نَحنُ الخَالِدَاتُ فَلاَ نَمتنَہ
نَحنُ الآمِنَاتُ فَلاَ نَخَفنَہ
نَحنُ المُقِیمَاتُ فَلاَ نَظعَنَہ
(رواہ الطبرانی فی الصغیر والأوسط وصححہ الألبانی)
حضرت ابو ہریرہ رضی اللہ عنہ کہتے ہیں:
"بےشک جنت میں ایک نہر ہوگی جو اتنی ہی لمبی ہوگی جتنی لمبی جنت ہوگی۔ اس کے دونوں کناروں پر نوجوان لڑکیاں آمنے سامنے کھڑی ہوں گی اور وہ خوبصورت آواز میں گائیں گی جسے تمام لوگ سنیں گے۔ اور وہ یہ محسوس کریں گے کہ جتنی لذت ان کی آواز سننے سے آ رہی ہے وہ کسی اور چیز میں نہیں ہے۔ لوگوں نے ابو ہریرہ رضی اللہ عنہ سے پوچھا: وہ گاتے ہوئے کیا کہیں گی: تو انھوں نے جواب دیا: وہ اِن شاء اللہ تسبیح، تحمید، تقدیس اور اللہ تعالیٰ کی حمد وثناء کے ساتھ گائیں گی۔" (رواہ البیھقی موقوفاً وصححہ الألبانی)

 

[عبدالرحیم رحمانی]

اللہ تعالیٰ فرماتا ہے:
(إِنَّ أَصْحَابَ الْجَنَّةِ الْيَوْمَ فِي شُغُلٍ فَاكِهُونَ، هُمْ وَأَزْوَاجُهُمْ فِي ظِلَالٍ عَلَى الْأَرَائِكِ مُتَّكِؤُونَ، لَهُمْ فِيهَا فَاكِهَةٌ وَلَهُم مَّا يَدَّعُونَ، سَلَامٌ قَوْلًا مِن رَّبٍّ رَّحِيمٍ) (یسٓ: 55-58)
"جنتی لوگ آج کے دن اپنے (دلچسپ) مشغلوں میں ہشاش بشاش ہیں۔ وہ اور ان کی بیویاں سایوں میں مسہریوں پر تکیہ لگائے بیٹھے ہوں گے۔ ان کے لیے جنت میں ہر قسم کے میوے ہوں گے اور اسی طرح جو کچھ وہ طلب کریں گے۔ مہربان رب کی طرف سے انھیں سلام کہا جائےگا۔"
حافظ ابن کثیر نے اپنی تفسیر میں فرمان الہٰی (فِي شُغُلٍ فَاكِهُونَ) "دلچسپ مشغلوں میں ہشاش بشاش ہوں گے" کے بارے میں حضرت عبد اللہ بن مسعود ر ضی اللہ عنہما، حضرت ابن عباس رضی اللہ عنہما اور ان کے علاوہ متعدد ائمۂ تفسیر سے نقل کرتے ہیں کہ ان کا دلچسپ مشغلہ کنواریوں کی بکارت کو زائل کرنا ہوگا۔
نبی کریم صلی اللہ علیہ وسلم اہل جنت کا جنت میں لطف بیان کرتے ہوئے فرماتے ہیں:
"بے شک ایک جنتی کو کھانے، پینے، شہوت اور جماع کے لیے سو افراد کی طاقت دی جائےگی۔" (رواہ ابن حبان فی صحیحہ والحاکم)

 

[عبدالرحیم رحمانی]

حضرت بریدہ رضی اللہ عنہ بیان کرتے ہیں کہ ایک شخص نے نبی کریم صلی اللہ علیہ وسلم سے سوال کیا کہ کیا جنت میں گھوڑے ہوں گے؟ تو آپ نے فرمایا:
"اگر تمھیں اللہ تعالیٰ نے جنت میں داخل کیا تو اگر تم چاہوگے کہ سرخ ہیروں والے گھوڑے پر تمھیں سوار کیا جائے اور وہ جنت میں تمھیں لے کر جہاں تم چاہو اڑے تو ایسا ضرور ہوگا۔" پھر ایک شخص نے کہا: یا رسول اللہ! کیا جنت میں اونٹ بھی ہوں گے؟ تو آپ نے اسے اس طرح جواب نہ دیا جیسے پہلے شخص کو دیا تھا۔ تاہم آپ نے فرمایا: "اگر تمھیں اللہ تعالیٰ نے جنت میں داخل کیا تو اس میں تمھیں وہ سب کچھ ملےگا جس کی خواہش تمہارا نفس کرےگا اور جس سے تمہاری آنکھوں کو لذت ملےگی۔" (رواہ الترمذی وقال الألبانی فی الترغیب: حسن لغیرہ)
حضرت ابو ایوب رضی اللہ عنہ بیان کرتے ہیں کہ ایک اعرابی (دیہاتی) نبی کریم صلی اللہ علیہ وسلم کی خدمت میں حاضر ہوا اور کہنے لگا: یا رسول اللہ! مجھے گھوڑا بہت پسند ہے تو کیا جنت میں بھی گھوڑے دستیاب ہوں گے؟ آپ نے فرمایا:
"اگر تم جنت میں داخل ہوئے تو تمھیں قیمتی ہیروں والا گھوڑا دیا جائےگا جس کے دو پر بھی ہوں گے۔ پھر تمھیں اس پر بٹھایا جائےگا۔ اور وہ تمھیں لے کر جہاں تم چاہوگے اڑےگا۔" (رواہ الترمذی وقال الألبانی فی الترغیب: صحیح لغیرہ)

 

[عبدالرحیم رحمانی]

حضرت صہیب بن سنان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
"جب جنت والے جنت میں اور جہنم والے جہنم میں چلے جائیں گے تو اعلان کرنے والا اعلان کرےگا: اے اہل جنت! بےشک اللہ تعالیٰ نے تم سے ایک وعدہ کیا تھا جسے وہ اب پورا کرنا چاہتا ہے۔ وہ کہیں گے: وہ کیا ہے؟ کیا اللہ تعالیٰ نے ہمارے ترازو بھاری نہیں کیے؟ اور کیا اس نے ہمارے چہروں کو روشن نہیں کیا؟ اور کیا اس نے ہمیں جنت میں داخل نہیں کر دیا؟ اور کیا اس نے ہمیں جہنم سے نجات نہیں دے دی؟ (یعنی ان نعمتوں کے بعد اب اور کون سا وعدہ باقی رہ گیا ہے؟) پھر اچانک پردہ ہٹایا جائےگا۔ چنانچہ وہ اللہ تعالیٰ کی طرف دیکھیں گے۔ اللہ کی قسم! اللہ تعالیٰ نے انھیں کوئی ایسی چیز نہیں دی ہوگی جو انھیں اس کے دیدار سے زیادہ محبوب ہوگی اور جس سے ان کی آنکھوں کو زیادہ ٹھنڈک نصیب ہوگی۔" (یعنی جنت میں دیدار الہٰی انھیں جنت کی دیگر تمام نعمتوں کی نسبت زیادہ محبوب ہوگا اور اس سے ان کی آنکھوں کو سب سے زیادہ ٹھنڈک نصیب ہوگی) پھر آپ صلی اللہ علیہ وسلم نے یہ آیت تلاوت کی: (لِّلَّذِينَ أَحْسَنُواْ الْحُسْنَى وَزِيَادَةٌ) "جو لوگ نیک عمل کریں انھیں جنت ملےگی اور اس کے علاوہ اللہ کا دیدار بھی نصیب ہوگا۔" (رواہ مسلم والترمذی والنسائی، واللفظ لأحمد وابن ماجہ۔ صحیح الجامع: 521)