آم کے متعلقات

[ماریہ انعام]

السلام علیکم ورحمۃ اللہ وبرکاتہ

پیاری بہنو!
آم کا موسم اپنے جوبن پر ہے۔۔۔بازاروں میں نہ صرف آم بلکہ کیریاں بھی وافر اورنسبتاً ارزاں نرخوں میں دستیاب ہیں۔۔۔آم ایک ایسا پھل ہے جونہ صرف کھانے میں بےحد لذیذ اور خوش ذائقہ ہے ۔۔۔ہرعمر کا بندہ اسے شوق سے کھاتا ہے۔۔۔بلکہ یہ واحد پھل ہے جس سے بننے والی ڈشز بھی بے شماربھی ہیں اور ہر ذائقہ کی بھی ہیں میٹھی‘ نمکین اور ترش تینوں ذائقوں کی ڈشز اس سے تیار کی جا سکتی ہیں۔۔۔اس پھل کو یہ منفرداعزاز بھی حاصل ہے کہ اس کا اچار بنایا جاتا ہے۔۔۔گویا یہ پھل پکنے سے پہلے ہی مرغوب ہے
غالباً انہی وجوہات کی بناء پر اسے پھلوں کا بادشاہ کہا جاتا ہے

اس تھریڈ میں ہم ان ڈشز کا تذکرہ کریں گے جو آم سے ماخوذ ہوتی ہیں ۔۔۔۔یعنی آم کے متعلقات کا ذکرِ خیر ہو گا

 

[ماریہ انعام]

میری خالہ(جو میری ساس بھی ہیں)نہایت لذیذ آم کا اچار ڈالتی ہیں۔۔۔ان کے ہاتھ کا ڈالا گیا اچارجو ایک بار کھا لے پھر اسے کوئی اور اچار نہیں بھاتا۔۔۔خاندان بھر میں ان کے اچار کی مانگ ہے۔۔۔کافی عرصہ قبل وہ وسیع پیمانے پر آم کا اچار ڈال کر مارکیٹ میں سپلائی کیا کرتی تھیں۔۔۔بیرونِ ملک سے انھیں اچار کے آڈر موصول ہوتے تھے
اس بار میں نے ان کے ساتھ مل کر اچار ڈالا اور ساری ترکیب نوٹ کر لی۔۔۔افادہ عام کے لیے حاضرِ خدمت ہے
( یاد رہے اچار ڈالنے کے لیے یہ موسم نہایت موزوں ہے۔۔۔بڑوں کی زبان میں آم میں جالا لگ چکا ہے۔۔۔لہذا جو بہن اچار ڈالنا چاہتی ہیں دیر نہ کریں)

اچار کے اجزاء

آم دس کلو
ہری مرچیں دو کلو
(ہری مرچیں موٹی لیں کیونکہ یہ اچار کے لیے موزوں ہوتی ہیں)
رائی دو چھٹانک
میتھرے پانچ چھٹانک
سونف چار چھٹانک
سرخ مرچ دو چھٹانک
(باریک پسی ہوئی)
سرخ مرچ تین چھٹانک
(موٹی کٹی ہوئی)
ہلدی ایک چھٹانک
( پسی ہوئی)
گرم مصالحہ دو تولہ
(پسا ہوا)
لہسن چارچھٹانک
(چھلا ہوا)
کلونجی دو تولہ
نمک دو کلو
سرسوں کا تیل دو کلو
سرکہ ایک کلو

اچار ڈالنے سے پہلے دو تین باتیں ذہن نشین کر لیں
یاد رکھیے ! اچار ڈالنے میں استعمال ہونے والی ہر چیز بالکل خشک ہونی چاہیے۔۔۔۔اور اگر ایسا نہ ہوتو آپ یہ توقع نہ رکھیے کہ آپ کا اچار لمبے عرصے تک آپ کا ساتھ دے گا۔۔۔یہ بہت جلد خراب ہو جائے گا
اگر آپ چاہتی ہیں کہ آپ کا اچار ہمیشہ خوش ر نگ رہے تو اس میں کبھی لکڑی کے علاوہ کسی اور دھات کا بنا ہوا چمچہ نہ ڈالیں
اچار اگر آپ بالکل اسی ترکیب کے مطابق بناناچاہتی ہیں تو لازم ہے کہ سارے اجزاء اوپر درج کردہ وزن کے عین مطابق ہوں۔۔۔گھر میں وزن کرنا مشکل ہوتا ہے ۔۔۔اس کا اچھا طریقہ یہ ہے کہ بازار سے عین اسی وزن کے برابر اجزاء تلوا لیے جائیں

ترکیب

آموں اور ہری مرچوں کو اچھی طرح دھو کر خشک کر لیں
آم تیز چھری سے لمبی لمبی باریک قاشوں کی صورت میں کاٹ لیں۔۔۔۔بازاری ٹوکے سے نہیں کٹوانے
ہری مرچوں کو لمبائی کے رخ کاٹ لیں
رائی‘ میتھرے اور سونف کو الگ الگ گرائنڈر میں پیس لیں
لہسن میں اچار کے اجزاء کا ہی کچھ نمک شامل کر کے ہاون دستے میں باریک کر لیں
اب گرم مصالحہ کے علاوہ تمام خشک اجزاء کو ایک بڑے برتن میں ڈال کر ملا لیں
اسی میں سرکہ اور لہسن بھی شامل کر لیں
آم کی قاشیں اور کٹی ہوئی ہری مرچیں ڈال کر اچھی طرح ملا لیں
اب آخری مرحلے میں اس میں تیل شامل کر کے اس برتن کو اچھی طرح ڈھک دیں
دو تین دن روزانہ اس کو ہلائیں
جب اچار رچا بسا محسوس ہو تو اس میں گرم مصالحہ بھی ڈال دیں
لیجیے! آپ کا خوش رنگ اورٰ خوش ذائقہ آم کا اچار تیار ہے

 

[شاہد نذیر]

بات انسانی ہاتھ کی ہوتی ہے ناکہ ترکیب کی۔ آپ کی ساس صاحبہ کے ہاتھ کے اچار کا جو ذائقہ ہوگا وہ دوسرے کے ہاتھ کا تو نہیں ہوگا ناں؟

ویسے کیا یہ بات صحیح ہے کہ ذائقہ ہاتھ میں ہوتا ہے؟ مجھے تو ایسا ہی لگتا ہے۔

 

[کنعان]

السلام علیکم

جی شاھد بھائی اچار پر کچھ ایسا ہی ھے، اس میں انسانی ہاتھ کی بات ھے ترکیب کی نہیں۔ لاہور میں میرے والد محترم سے سب اچار بنواتے ہیں اور سیالکوٹ میں ہمارے عزیز ہیں ان کی والدہ اب انتقال فرما چکی ہیں وہ تو سبزیوں کا اچار بھی ایسا بناتی تھیں، اور اھل محلہ والے ان کے گھر میں سارا سامان لے کر چلے جاتے تھے اور وہ انہیں اچار بنا دیتی تھیں۔

والسلام

 

[مشکٰوۃ]

وعلیکم السلام ورحمۃ اللہ وبرکاتہ
بہت خوب!
مجھے یاد آگیا جب دادی اماں اچار ڈالتی تھیں تو سب کزنز کیریاں اٹھا کر بھاگ جایاکرتے تھے ۔۔:)
نانو امی اور دادی امی دونوں کے ہاتھ کا ڈالا اچار بہت زبردست ہوتا ہے لیکن اب دونوں ہی نہیں ڈالتیں ):
امی جان بہت شوق سے ترکیب پڑھ رہی تھیں اب دیکھیں کس دن آموں کی شامت آتی ہے:)
بیچارے لیموں اکیلے پڑے اداس ہو رہے ہوں گے:)

 

[ماریہ انعام]

السلام علیکم

جی شاھد بھائی اچار پر کچھ ایسا ہی ھے، اس میں انسانی ہاتھ کی بات ھے ترکیب کی نہیں۔ لاہور میں میرے والد محترم سے سب اچار بنواتے ہیں اور سیالکوٹ میں ہمارے عزیز ہیں ان کی والدہ اب انتقال فرما چکی ہیں وہ تو سبزیوں کا اچار بھی ایسا بناتی تھیں، اور اھل محلہ والے ان کے گھر میں سارا سامان لے کر چلے جاتے تھے اور وہ انہیں اچار بنا دیتی تھیں۔

والسلام

یہ غلطی ایسے ہی ہےجیسے۔۔۔۔
ماہِ ررمضان کا مہینہ
آبِ زمزم کا پانی

 

[ماریہ انعام]

بات انسانی ہاتھ کی ہوتی ہے ناکہ ترکیب کی۔ آپ کی ساس صاحبہ کے ہاتھ کے اچار کا جو ذائقہ ہوگا وہ دوسرے کے ہاتھ کا تو نہیں ہوگا ناں؟

ویسے کیا یہ بات صحیح ہے کہ ذائقہ ہاتھ میں ہوتا ہے؟ مجھے تو ایسا ہی لگتا ہے۔

کسی حد تک یہ بات درست ہے لیکن ہو بہو ترکیب اپنا کر اریب قریب کا ذائقہ تو حاصل کیا جا سکتا ہے

 

[مشکٰوۃ]

معذرت کے ساتھ۔۔۔ابتسامہ

اور اگر ایسا نہ ہوتو آپ یہ توقع نہ رکھیے کہ آپ کا اچار لمبے عرصے تک آپ کا ساتھ دے گا

اگر آپ چاہتی ہیں کہ آپ کا اچار ہمیشہ خوش ر نگ رہے

اور اھل محلہ والے ان کے گھر میں سارا سامان لے کر چلے جاتے تھے اور وہ انہیں اچار بنا دیتی تھیں۔

 

[ماریہ انعام]

ہا ہا ہا ہا۔۔۔۔بہت خوب

 

[نسرین فاطمہ]

زبردست ترکیب شئیر کی بہنا ۔
میں نے مصالحے میں گاجر ملاکر اچار کے مرتبان میں دال رکھا ہے تاکہ اب کیریوں کے سیزن میں کیریاں بھی شامل کردوں ۔
کیا خیال ہے مناسب رہے گا اس طرح کرنا؟
کیونکہ میں گھر میں کبھی خالی لہسن کا کبھی پیاز ہری مرچوں کا کبھی کریلے اور کبھی ادرک کا اچار ڈال دیتی ہوں جو کھانے میں انتہائی لذیذ ہوتے ہیں ،