ارسال اور سماع کی تصریح

[رضا میاں]

اسلام علیکم
پہلے ایک سوال میں آپ نے فرمایا تھا کہ ارسال کرنے والے کا عن سے روایت کرنا جبکہ اس کے شیخ سے اس کی معاصرت ثابت ہو تو سماع پر محمول ہوتی ہے۔
لیکن اگر کوئی راوی ارسال کرتا ہو اور اپنے کسی خاص شیخ سے اس نے سماع کی تصریح تو کیا کبھی عن سے بھی روایت نہ کیا ہو مثلا کہے: قال فلان، یا یردہ الی فلان وغیرہ۔ لیکن ایک بھی روایت میں اس نے نہ تو سماع کی تصریح کی اور نہ ہی کبھی عن سے روایت کیا، جبکہ صرف اس کی معاصرت ثابت ہے۔ اس حالت میں اس کو سماع پر محمول کیا جائے گا؟
اور "یردہ الی فلان" کہنے میں کوئی خاص فرق تو نہیں؟ مثلا یہ لفظ اس سند میں یوں استعمال ہوا ہے:
ثَنَا الْفُضَيْلُ بْنُ فَضَالَةَ، يَرُدُّهُ إِلَى ابْنِ عَائِذٍ , يَرُدُّهُ ابْنُ عَائِذٍ إِلَى جُبَيْرِ بْنِ نُفَيْرٍ۔۔۔
اور آخر میں یہ بھی بتا دیں کہ یہی حکم ارسال نہ کرنے والے کے بارے میں کیا ہو گا؟
جزاک اللہ خیرا

 

[کفایت اللہ]

اگرمدلس کے علاوہ کوئی بھی راوی (مثلا ارسال کرنے والا) اپنے شیخ سے عن یا اس کے ہم معنی کسی بھی لفظ مثلا قال وغیرہ سے روایت کرے تو یہ سماع ہی پرمحمول ہوگا۔ گرچہ اس نے اپنے شیخ سےپوری زندگی میں کبھی بھی سماع کی صراحت نہ کی ہے ۔

کیونکہ معاصرت ثابت ہونے کے بعد عدم تصریح سماع عدم لقاء کی دلیل نہیں ہے۔



اور اگر یہ ثابت ہوجائے کہ کسی ارسال کرنے والے نے اپنے ایسے معاصر شخص سے بذریعہ عن یا اس کے ہم معنی صیغہ قال وغیرہ سے روایت کیا ہے لیکن اس معاصر سے اس کی ملاقات نہیں ہے تو اسی کوارسال خفی کہتے ہیں۔

اوراگر معاصر سے ملاقات ثابت ہو پھر بھی اس سے وہ روایت عن سے نقل کرے جسے اس نے اپنے اس معاصر شیخ سے نہیں سنا تو یہی چیز تدلیس ہے۔