اَحرف سبعہ اور ان کا مفہوم

[ساجد]

اسی طرح حدیث بالا کی روشنی میں احرف سبعہ کے نزول کو تخفیف اورتیسیر علی الامۃ قرار دیا گیا ہے تو ان مذکورہ بالا اوجہ کی تخفیف اورتیسیر کے ساتھ کیا مناسبت بنتی ہے؟ مثلاً تقدیم وتاخیر کے اختلاف کا ایک اعرابی بدو کے ساتھ کیا واسطہ؟ اسی طرح زیادتی ونقصان اوراختلاف اعراب یا اختلاف حروف جس میں تغیر معنی وصورت ہو یا نہ ہو ان تمام چیزوں کا تعلق تسہیل وتیسیر کے ساتھ کمزور ترین نظر آتا ہے۔
البتہ ایک قول اس بارے میں خاصا اقرب معلوم ہوتا ہے اور وہ یہ ہے کہ’ حروف سبعہ‘ سے مراد لغاتِ سبعہ ہیں اور یہ اہل عرب کے افصح ترین لغات ہیں خواہ وہ لغاتِ سبعہ ایک کلمہ میں مکمل اتفاق رکھتے ہوں یا ان میں باہم اختلاف ہو اور وہ اختلاف دو وجہوں میں یا تین وجوہ میں یا چارمیں یا اس سے زیادہ میں ہو۔ یہی وجہ ہے کہ کبھی ایک کلمہ تمام لغات میں ایک ہی وضع اور کیفیت کا ہوتا ہے تو اس میں ایک ہی قراء ۃ ہو گی اور کبھی ایک لغت کے لوگ کیفیت نطق میں اختلاف کر رہے ہوتے ہیں تو ایک لغت میں دو قراء تیں ہو جاتی ہیں۔
یہ قول جمہور اہل علم اور محققین فن کا ہے۔ جن میں مکی بن ابی طالب القیسی رحمہ اللہ ابوعبید القاسم بن سلام ابو حاتم السجستانی رحمہ اللہ امام طبری رحمہ اللہ،ابو جعفر الطحاوی رحمہ اللہ اورعصر حدیث کے ادب اورفن بلاغت کے امام مصطفی صادق الرافعی رحمہ اللہ کے اسماء قابل ذکر ہیں۔
البتہ اس قول پر دواعتراض ہوسکتے ہیں لیکن دونوں اعتراض مضبوط دلائل کے سامنے کمزور ہیں۔

 

[ساجد]

پہلا اعتراض
اگر احرف سبعہ سے مراد لغات سبعہ ہیں توپھر ہر کلمہ میں سات وجوہ قراء ا ت ہونی چاہئیں جبکہ عملاً کم یا زیادہ ہوتی ہیں؟
اس کا جواب یہی ہے کہ کبھی مختلف لغات ایک کلمہ پر متفق ہو جاتے ہیں تو ان میں ایک ہی قراء ۃ ہو گی اور کبھی سات لغات میں دو وجہوں پر اختلاف ہوتا ہے تو ان میں دوہی قراء تیں ہو ں گی ۔لہٰذا یہ اعتراض ختم ہوا ۔

 

[ساجد]

دوسرا اعتراض
اگر لغات کا اختلاف مراد ہے توپھر حضرت عمر بن خطاب رضی اللہ عنہ حضرت ہشام بن حکیم رضی اللہ عنہ سے اختلاف کیوں کر رہے ہیں جبکہ دونوں کا لغت قریش کا لغت ہے؟ اور ایک لغت میں باہم مختلف ہونا اس قول کی تردید کرتا ہے ۔

 

[ساجد]

جواب
قرآن کریم کی تلاوت کادارومدار لغت پر نہیں رہا بلکہ اعتماد سماع پر ہے اس لیے حضورﷺنے جس کو جیسے لغت میں پڑھایا وہ اسی کا پابند ٹھہرا۔ اس کی مضبوط دلیل ابن مسعودرضی اللہ عنہ کی وہ روایت ہے جس میں فرماتے ہیں کہ دو آدمیوں کا ایک سورۃ میں قراء ت کا اختلاف ہوادونوں کا دعویٰ یہی تھا کہ مجھے حضورﷺنے اس طرح پڑھایا ہے جب حضورﷺکو اس کی خبر ہوئی تو آپ نے غصہ کا اظہار کرتے ہوئے فرمایا کہ ویسے ہی پڑھو جیسے تمہیں پڑھایا گیا ہے۔
اور خود حضرت عمر tکاقول بھی اسی پر دال ہے جب انہوں نے حضرت ہشام رضی اللہ عنہ سے اختلاف کیا تودونوں نے یہی کہا کہ ہٰکذا أقرأنیہا رسول اﷲ ﷺ اور حضورﷺکے سامنے بھی یہی جملہ دہرایا کہ یہ سورۃ الفرقان اس طریقے پر نہیں پڑھتے جس طرح آپ نے مجھے پڑھایا ہے تو ان میں سے کسی نے بھی اپنے لغت کی طرف نسبت نہیں کی کہ تیری قراء ت لغت قریش کے خلاف ہے بلکہ نسبت سماع عن النبیﷺکی طرف ہے اس سے صراحت ہو گئی کہ اعتماد سماع عن النبی ﷺپر ہے نہ کہ لغت پر تو یہ اعتراض بھی مندفع ہو جاتا ہے۔
پھر اعتماد سماع پر ہونے کی وجہ سے لغات کا اختلاط ہوا اورعرضۂ اخیرہ سے پہلے ان لغات سبعہ کے وہ ابعاض جن کا تعلق تخفیف اور تیسیر کے ساتھ تھا وہ منسوخ ہوگئے اورباقی ابعاضِ سبعہ آج تک موجود ہیں۔ اور جب سیدنا عثمان رضی اللہ نے باجماع صحابہ رسم المصحف کا التزام کیا تو وہ اوجہ جن کو رسم عثمانی کاشمول نہ ہو سکا تو وہ شاذہ ٹھہریں اور اس پر اجماع صحابہ ثابت ہو چکا ہے اب ان قراء ت کوتفسیر وفقہ اورنحو وادب کے احکام میں استنباط کے طور پر تو لیا جاتاہے، لیکن قرآن سمجھ کر ان کی تلاوت ناجائز ہے اس لیے کہ قرآن مکمل طور پر متواتر ہے۔

٭_____٭_____٭