جامعہ محمدیہ اہلحدیث خان پور

[محمد ارسلان]

بسم اللہ الرحمن الرحیم​

جامعہ محمدیہ اہل حدیث (للبنین و للبنات) خانپور

قاری عبدالوکیل صدیقی
رئیس جامعہ خانپور​

خانپور( ضلع رحیم یار خان) کراچی لاہور کے درمیان ریلوے لائن پر واقع ایک معروف ریلوے جنکشن اور مشہور کاروباری منڈی اور سابقہ ریاست بہاولپور کا قدیمی شہر ہےجس کی آبادی تقریبا دو لاکھ ہے۔یہ پورا علاقہ شرک و بدعت اور جہالت و گمراہی کا مرکز تھا۔ہر طرف قبر پرستی کا دوردورہ تھا پورے علاقے میں اہل شرک و بدعت کی مشہور خانقاہیں،آستانے اور بدعات و خرافات میں ترویج کے لیے بڑے بڑے مراکز اور ادارے تھے۔ساتھ ہی اس علاقے کی معاشی پسماندگی اور جہالت کی وجہ سے عیسائی،قادیانی اور ہندو تبلیغی مشن غریب لوگوں کو اسلام سے برگشتہ کرنے کے لیے اپنی بھرپور کوششوں میں مصروف تھے جبکہ دوسری طرف اس پورے خطے میں حق و صداقت کی کوئی موثر آواز سنائی نہ دیتی تھی اور خصوصا مسلک اہل حدیث کا تعارف نہ ہونے کے برابر تھا۔بلکہ عام لوگوں کے دلوں میں اہل توحید اور عاملین سنت کے خلاف نفرت کوٹ کوٹ کر بھری ہوئی تھی۔اگر کوئی شخص سنت نبوی ﷺ کے مطابق نماز ادا کرتا تو اس کو دھکے دے کر مسجد سے نکالا جاتا ،مسجدوں کو دھویا جاتا اور صفیں جلا دی جاتیں۔

 

[محمد ارسلان]

جامعہ محمدیہ اہل حدیث خانپور کی تاسیس
ان انتہائی نامساعد حالات میں آج سے اڑتیس (38) سال پہلے جامعہ محمدیہ اہل حدیث کی بنیاد رکھی گئی۔ابتداء میں یہ چھوٹا سا مدرسہ تھا جو کہ اللہ تعالیٰ کے فضل وکرم اور مخلص احباب و اخوان کے تعاون سے آج ایک عظیم جامعہ کی صورت اختیار کر چکا ہے،کتاب و سنت کی بے لوث خدمت و اشاعت اور نہایت اعلیٰ و مثالی کارگردگی کی وجہ سے یہ جامعہ ایک تحریک بن چکا ہے جس کے زیر اہتمام بے شمار مساجد و مدارس کام کر رہے ہیں جبکہ دیگر متعدد شعبہ جات بھی شب و روز دین حنیف کی خدمت میں مصروف ہیں۔

 

[محمد ارسلان]

عظیم الشان مرکز کی تعمیر
ابتدائی کام جامع مسجد اہل حدیث اور اس سے ملحقہ ایک چھوٹی سی بلڈنگ سے شروع کیا گیا۔بعد ازاں کام کی وسعت کے پیش نظر عظیم الشان مرکز کے لیے ماڈل ٹاؤن سے ملحق نہایت موزوں محل وقوع پر چوبیس (24) کنال کا پلاٹ لاکھوں روپے کے زرکثیر سے خریدا گیا۔جہاں عظیم الشان جامع مسجد،درس گاہیں،دارالاقامہ ،دارالافتاء،دارایتام،مدرسۃ البنات،لائبریری اور دیگر شعبہ جات کی تعمیر کا منصوبہ بنایا گیا۔اس عظیم مرکز کی عمارت تین بلاکوں اور ایک عظیم الشان جامع مسجد پر مشتمل ،جدید طرز کے خوب صورت نقشہ جات تیار کروا کر تعمیری کام کا باقاعدہ آغاز کر دیا گیا۔اس عظیم الشان مرکزکا سنگ بنیاد ایک نہایت ہی باوقار تقریب اور روح پرور تقریب میں امام کعبہ الشیخ محمد بن عبداللہ السبیل حفظہ اللہ تعالیٰ نے اپنے دست مبارک سے رکھا۔

 

[محمد ارسلان]

شعبہ تعلیمات
گمراہی اور فرقہ پرستی کے اس دور میں جامعہ محمدیہ اعتدال کا نقیب اور اصل اسلام،کتاب و سنت کا داعی اور علم بردار ہے۔عام روایتی مدارس کی طرز سے ہٹ کر قدیم و جدید علوم کے امتزاج سے ایسے تعلیم یافتہ،صاحب کردار اور باصلاحیت افراد تیار کرنا ہے جو کہ خدمت اسلام کے سچے جذبے سے سرشار ہو کر نہایت اعلیٰ،باوقار طریقے سے زندگی کے ہر میدان میں باطل فتنوں کی سرکوبی کر کے اسلام کی عظت و حقانیت کا لوہا منوا سکیں۔اس نصب العین کے پیش نظر جامعہ کا تعلیمی نصاب و نظام انتہائی اعلیٰ اور معیاری ہے۔جو کہ قدیم و جدید علوم کا حسین امتزاج ہے۔جامعہ وفاق المدارس السلفیہ پاکستان کا باقاعدہ رکن ہے جس کی سند حکومت پاکستان کی طرف سے ایم اے کے مساوی تسلیم کی جاتی ہے۔جامعہ کی مکمل تعلیم وفاق کے مطابق ہے اور امتحانات بھی وفاق کے شیڈول کے مطابق ہوتے ہیں۔قرآن مجید کی تفسیر،اصول تفسیر،حدیث،اصول فقہ،ادب،عربی صرف و نحو،میراث،فن خطابت کے علاوہ انگلش،حساب ،تاریخ ،سائنس وغیرہ جملہ علوم و فنون کی تعلیم دی جاتی ہے۔تعلیمی و تدریسی میدان میں۔۔۔۔۔

• شعبہ علوم اسلامیہ
• وفاق المدارس السلفیہ
• شعبہ تفسیر القرآن الکریم
• شعبہ تحفیظ القرآن و ناظرہ
• شعبہ علوم عصریہ
• پرائمری تا بی اے
• شعبہ تربیت بنات

فی الحال تقریبا سات سو(700) مقامی و بیرونی طلباء و طالبات اور تیس (30)اساتذہ کرام تعلیم و تعلم میں مشغول ہیں جبکہ آئندہ برسوں میں اس تعداد میں یقینی اضافہ متوقع ہے۔(ان شاء اللہ)
طلباء کی جملہ ضروریات کا جامعہ کفیل ہے۔اب تک 1000 سے زائد طلباء مکمل قرآن مجید حفظ کر چکے ہیں اور پانچ سو سے زائد علماء کرام اور فضلاء کرام اندرون ملک و بیرون ملک خدمت دین میں مصروف ہیں۔
طلباء کی علمی،فکری،اخلاقی تربیت اور نماز پنجگانہ باجماعت کے ساتھ تہجد اور نفلی روزوں کی ترغیب جامعہ کی امتیازی خصوصیات ہیں۔علاوہ ازیں شہر کے کاروباری حضرات ،کالجوں،سکولوں کے طلباء اور ملازم پیشہ حضرات کے لیے بعد نماز مغرب تا عشاء قرآن مجید کے لفظی اور بامحاورہ ترجمہ اور تفہیم و تفسیر کے لیے خصوصی کلاس کا اہتمام کیا گیا ہے۔الحمدللہ پانچ مرتبہ یہ کلاس نہایت کامیابی کے ساتھ مکمل ہو چکی ہے جبکہ چھٹی مرتبہ یہ کلاس شروع کی جا رہی ہے۔شہری احباب اس سے استفادہ فرمائیں۔

 

[محمد ارسلان]

تنظیم المساجد
جامعہ کے زیر اہتمام اب تک خانپور کے گردونواح میں تقریبا پچاس مساجد تعمیر کی گئی ہیں۔جبکہ متعدد مساجد کی تعمیر میں بھرپور تعاون کیا گیا ہے۔تمام مساجد میں خطبہ جمعہ کے لیے علماء و خطباء کی ڈیوٹیاں لگائی جاتی ہیں اور ابتدائی تعلیم و تدریس کا سلسلہ بھی جاری ہے جہاں بھی جماعت سے کچھ لوگ منسلک ہوتے ہیں وہاں فی الفور مسجد کا قیام عمل میں لایا جاتا ہے۔بہاولپور ڈویژن کی پچاس (50) سے زائد مساجد تنظیم المساجد کے نظم سے وابستہ ہیں۔متعدد مساجد کے مکمل اور کچھ جزوی اخراجات بذمہ جامعہ ہیں۔

 

[محمد ارسلان]

شعبہ تبلیغ
اللہ کے فضل و کرم سے جامعہ کا یہ شعبہ بے حد فعال اور متحرک ہے۔علاقہ بھر میں دوردراز مقامات پر سال بھر میں سینکڑوں تبلیغی و اصلاحی اجتماعات ہوتے ہیں۔جن میں مقامی و بیرونی علماء و مبلغین لوگوں تک قرآن و حدیث کی دعوت پیش کر کے ان کے عقائد و اعمال کی اصلاح کرتے ہیں۔سال کے آخر میں سالانہ سہ روز مرکزی سیرت النبی ﷺ کانفرنس خانپور منعقد ہوتی ہے۔
اب تک 36 سالانہ کانفرنسیں منعقد ہو چکی ہیں ان میں عالم اسلام کے ممتاز جید علماء کرام،خطباء عظام،محدثین و مفکرین خطاب کر چکے ہیں۔الحمدللہ خانپور کی سالانہ کانفرنسیں ملک گیر شہرت حاصل کر چکی ہیں۔ملک بھر سے ہزاروں افراد جوش و خروش سے شرکت کرتے ہیں۔شعبہ تبلیغ کی بے حد مثالی اور لائق تحسین کارگردگی کی وجہ سے بلامبالغہ ہزاروں بھٹکے ہوئے بھائیوں کو راہ ہدایت نصیب ہو چکی ہے اور ان کے گلستان ایمان میں بہار آ چکی ہے،اس شعبے میں بیس (20) سے زیادہ مقامی و علاقائی مبلغین بلامعاوضہ اعزازی خدمات سرانجام دے رہے ہیں۔اس اہم ترین شعبے کے دائرہ کار کو وسیع سے وسیع تر کرنے کے لیے ایک جامع پروگرام مرتب کیا گیا ہے۔جس کے تحت مساجد میں تبلیغی پروگراموں کے علاوہ مختلف جگہوں پر پروگرام ہوتے ہیں خصوصا پرانی سبزی منڈی،چوک دل کشا ہوٹل ،محلہ رحیم آباد۔یونیکو گرائمر سکول،دین پور چوک سے ملحقہ ایریا میں بڑے جاندار اور شاندار نتائج کے حامل پروگرام ہر مہینے منعقد ہوتے ہیں جن سے شرک و بدعت کے ایوانوں میں تہلکہ مچا ہوا ہے۔وباللہ التوفیق

 

[محمد ارسلان]

شعبہ دارالافتاء
جامعہ کا یہ شعبہ نہایت مستعدی سے قرآن و سنت کی روشنی میں عوام الناس کی دینی رہنمائی کا فریضہ سر انجام دے رہا ہے۔اندرون ملک اور بیرون ملک سے آئے ہوئے ہزاروں سوالات کے تحریری جوابات نہایت تفصیل و تحقیق اور ذمہ داری اور دیانت داری سے بغیر کسی معاوضہ کے دیے جاتے ہیں۔ہر مکتبہ فکر سے تعلق رکھنے والے لوگ اپنے جملہ مسائل کی صحیح رہنمائی کے لیے پورے اعتماد کے ساتھ ہمارے دارالافتاء کی طرف رجوع کرتے ہیں۔اس سخت محنت طلب کام میں قرآن و سنت کی روشنی میں پوری ذمہ داری اور دیانت داری سے اللہ کے بندوں کی بے لوث رہنمائی کی جاتی ہے۔

 

[محمد ارسلان]

شعبہ فلاح و بہبود
جامعہ نے اپنے محدودوسائل اور لامحدود مسائل کے باوجود خدمت خلق کو اپنے پروگرام میں شامل کر رکھا ہے۔اس شعبہ کے تحت وقتا فوقتا بیواؤں،یتیموں،مریضوں،مستحق طلباء غرباء نادار و سفید پوش حضرات سے حتی المقدور نقدی،وظائف،پارچہ جات،غذآئی اجناس،ادوایات کی صورت میں تعاون کیا جاتا ہے۔جبکہ سیلاب اور دیگر قدرتی آفات سے متاثرہ حضرات کی بھرپور اعانت کی جاتی ہے۔

 

[محمد ارسلان]

شعبہ نشرواشاعت
پڑھے لکھے لوگوں کو دعوت ھق پہنچانے کے لیے شعبہ ہذا کے تحت دینی،مسلکی،اصلاحی لٹریچر پر مشتمل کتابیں،پمفلٹ،رسائل و پوسٹر وغیرہ چھپوا کر یا قیمتا خرید کر مفت تقسیم کیے جاتے ہیں۔اس سلسلہ میں متعدد اہل علم کی ہزاروں کتابیں ،پمفلٹ ،رسائل،کتابچے وغیرہ تقسیم کیے جا چکے ہیں جبکہ ناخواندہ متلاشیان حق تک کیسٹوں کے ذریعے بھی دعوت حق پہنچائی جاتی ہے۔

 

[محمد ارسلان]

دارالمطالعہ لائبریری
علمی ذوق رکھنے والوں کے لیے دینی اسلامی،تاریخی کتب پر مشتمل لائبریری دارالمطالعہ بھی قائم ہے۔عربی،فارسی،انگریزی،اردو،سندھی،پنجابی وغیرہ زبانوں میں مختلف موضوعات پر کتابوں کا ایک بڑا ذخیرہ لائبریری میں موجود ہے۔ساتھ ہی کیسٹ لائبریری کا جال بچھایا گیا ہے اور یہ سلسلہ ابھی تک جاری ہے۔ان لائبریریوں سے عوام الناس مطالبہ کر رہے ہیں۔