کفایت اللہ بھائی آپ اپنی بات (مقدمات) ہمیں سمجھا ہی دیں
محترم بھائی میں نے آپ سے پوچھا تھا کہ:
ایک بات اوربتادیں پھر میں اپنی بات رکھتا ہوں ۔
اہل علم میں مسلم ہے کہ شریعت کا مسئلہ بتانے میں مجتہد اگر صحیح فیصلہ کرے تو دو اجر اور اگرغلطی کرجائے تب بھی ایک اجرہے۔
کیا آپ اس بات کو مانتے ہیں ؟؟؟؟؟
اگرہاں تو اس کی دلیل بھی لکھ دیں ، جو یقینا آپ کو معلوم ہوگی۔
اس کے جواب میں آپ نے لکھا:
جی یہ بات حدیث سے ثابت ہے اس لئے اس کو میں مانتا ہوں اور اسکی دلیل یہ حدیث ہے
اذا حکم الحاکم فا جتھد واصاب فلہ اجران واذا حکم فاجتھدوا اخطاء فلہ اجر واحد
بخاری جلد ٢ ص١٠٩٣
مسلم جلد ٢ صفحہ ٧٦
امام نووی رحمہ اللہ فرماتے ہیں ’’ تمام مسلمانوں کا اتفاق ہے کہ مجتہد ہر اجتہاد میں اجر پاتا ہے اگر اس کا اجتہاد درست نکلا تو دو اجر کا مستحق ہے، ایک اجر اجتہاد کا دوسرا اصابت کا اور اگر اجتہاد خطا نکلا تو بھی ایک اجر اجتہاد کا ملےگا۔ ہاں جو نا اہل ہو اسکو اجتہاد سے حکم کرنا کسی حال میں جائز نہیں بلکہ وہ گنہگار ہے۔ اس کا حکم نافذ بھی نہ ہوگا۔ اگرچہ حق کے موافق ہو یا مخالف کیونکہ اسکا حق کو پا لینا محض اتفاقی ہے کسی اصلِ شرعی پر مبنی نہیں۔ پس وہ تمام احکام میں گنہگار ہے۔ حق کے موافق ہوں یا مخالف اور اس کے نکالے ہوئے تمام احکام مردود ہیں اسکا کوئی عذر شرعاً مقبول نہیں وہ دوزخی ہے۔
شرح مسلم ج2 ص76
عرض ہے کہ یہی حدیث اس بات کی بھی دلیل ہے کہ رجال پر حکم لگانا بھی اجتہادی امر ہے، اوریہاں بھی صحیح فیصلہ پر دو اجر اورغلط فیصلہ پر ایک اجر ملے گا۔
یادرہے کہ ہم نے شریعت کے مسئلہ میں اجتہاد اوراس پر اجر کی دلیل طلب کی تھی اور آپ نے ایسی حدیث پیش کی جس میں حاکم کے فیصلہ کی بات ہے ۔
اب اگر حاکم کے فیصلہ میں شرعی مسائل سے متعلق فیصلہ بھی شامل ہے تو اسی میں رجال سے متعلق فیصلہ بھی شامل ہے ، ورنہ آپ فرق کی دلیل پیش کریں کہ یہ حاکم والی حدیث میں حاکم کے فیصلہ کے ساتھ شرعی مسائل کا فیصلہ بھی شامل ہے لیکن رجال کا فیصلہ شامل نہیں !!!
یہی وہ بات ہے جس کے بارےمیں ہم نے کہا تھا کہ یہ اوپر نقل کردہ اقتباس میں بھی ہے ۔
چنانچہ اس حدیث پر غور کرنے کے بعد یہ اقتباس دوبارہ پڑھیں :
امام منذري رحمه الله (المتوفى656)فرماتے ہیں:
واختلاف هؤلاء كاختلاف الفقهاء، كل ذلك يقتضيه الاجتهاد، فأن الحاكم إذا شهد عنده بجرح شخص، اجتهد في أن ذلك القدرمؤثر أم لا؟ وكذلك المحدث إذا أراد الاحتجاج بحديث شخص ونقل إليه فيه جرح، اجتهد فيه هل هو مؤثر أم لا؟ ويجري الكلام عنده فيما يكون جرحا ، في تفسير الجرح وعدمه، وفي اشتراط العدد في ذلك، كما يجري عند الفقيه، ولا فرق بين أن يكون الجارح مخبرا بذلك للمحدث مشافهة أو ناقلا له عن غيره بطريقه، والله عز وجل أعلم. [جواب الحافظ المنذري عن أسئلة في الجرح والتعديل ص: 83]۔
ان محدثین کا اختلاف فقہاء کے اختلاف کی طرح ہے ، یہ سب کچھ اجتہاد کی بنا پرہوتا ہے ، کیونکہ حاکم کے پاس جب کسی شخص سے متعلق جرح پیش ہوتی ہے تو وہ اجتہاد کرتا ہے کہ یہ جرح اثرانداز ہوگی یا نہیں ، اسی طرح محدث جب کسی راوی کی حدیث سے حجت پکڑنا چاہتا ہے اور اوراس راوی سے متعلق اسے جرح ملتی ہے تو وہ اجتہاد کرتا ہے کہ یہ جرح اثرانداز ہوگی یا نہیں اوراس کے نزیک اس بات کا فیصلہ یہ دیکھ کر ہوتا ہے کہ جرح مفسر ہے یا نہیں ، اسی طرح جارحین کا تعداد کتنی ہے ، ٹھیک ایسا ہی معاملہ فقیہ کے ساتھ بھی ہوتا ہے ، اوراس بات سے کچھ فرق نہیں پڑتا کہ جارح اپنی جرح سے محدث کو براہ راست خبردیتا ہے یا دوسرے کی جرح اپنی سند سے پیش کرتا ہے۔
نیز امام ذھبی رحمہ اللہ کے حوالہ سے ہم نے جو لکھا تھا اسے بھی دوبارہ پڑھیں:
اورجس طرح فقہی امورمیں مجتہد سے غلطی ہوجائے تواس کے لئے ایک اجرہے اسی طرح جرح وتعدیل کے امور میں بھی کسی مجتہدسے غلطی ہوجائے تو اس کے لئے ایک اجرہے یہ بات ہماری نہیں امام ذہبی کی ہے ، چنانچہ:
امام ذهبي رحمه الله (المتوفى748)فرماتے ہیں:
ولكنَّ هذا الدين مؤيَّد محفوظ من الله تعالى ، لم يَجتمع علماؤه على ضلالة ، لا عَمْداً ولا خطأ ، فلا يَجتمِعُ اثنانِ على توثيقِ ضعيف ، ولا على تضعيفِ ثقة ، وإنما يقعُ اختلافُهم في مراتبِ القُوَّةِ أو مراتبِ الضعف . والحَاكمُ منهم يَتكلَّمُ بحسبِ اجتهادِهِ وقُوَّةِ مَعارِفِه ، فإن قُدِّرَ خطؤه في نقده ، فله أجرٌ واحد ، والله الموفق . [الموقظة في علم مصطلح الحديث للذهبي: ص: 20، ]۔
لیکن یہ دین موید اوراللہ کی طرف سے محفوظ ہے، اس فن کے علماء گمراہی پرجمع نہیں ہوئے نہ جان بوجھ کراورنہ ہی غلطی سے ، پس کسی ضعیف راوی کی توثیق پر یا ثقہ راوی کی تضعیف پر دو امام جمع نہیں ہوسکتے ، بلکہ ان کااختلاف قوۃ و ضعف کے مرتبہ پر ہوتا ہے ، اوران میں فیصلہ کرنے والا اپنے اجتہاد اور اپنی معلومات کے بقدرکلام کرتا ہے، پس اگر اپنے نقد میں وہ غلطی کرجائے تب بھی اسے ایک اجرملے گا۔
![محدث فورم [Mohaddis Forum]](/styles/default/xenforo/Forum.jpg)
