سنو یہ فخر سے اک راز بھی ہم فاش کرتے ہیں !

[عبداللہ کشمیری]

سنو یہ فخر سے اک راز بھی ہم فاش کرتے ہیں
کبھی ہم منہ بھی دھوتے تھے، مگر اب واش کرتے ہیں​

تھا بچوں کے لیے بوسہ مگر اب کِس ہی کرتے ہیں
ستاتی تھیں کبھی یادیں مگر اب مِس ہی کرتے ہیں​

چہل قدمی کبھی کرتے تھے اور اب واک کرتے ہیں
کبھی کرتے تھے ہم باتیں مگر اب ٹاک کرتے ہیں​

کبھی جو امی ابو تھے ، وہی اب مما پاپا ہیں
دعائیں جو کبھی دیتے تھے وہ بڈھے سیاپا ہیں​

کبھی جو تھا غسل خانہ ، بنا وہ باتھ روم آخر
بڑھا جو اور اک درجہ ، بنا وہ واش روم آخر​

کبھی ہم بھی تھے کرتے غسل، شاور اب تو لیتے ہیں
کبھی پھول چُنتے تھے، فلاور اب تو لیتے ہیں​

کبھی تو درد ہوتا تھا، مگر اب پین ہوتا ہے
پڑھائی کی جگہ پر اب تو نالج گین ہوتا ہے​

ڈنر اور لنچ ہوتا ہے، کبھی کھانا بھی کھاتے تھے
بریڈ پر ہے گزارا اب، کبھی کھابے اُڑاتے تھے​

کبھی ناراض ہوتے تھے، مگر اب مائنڈ کرتے ہیں
جو مسئلہ کچھ اُلجھ جائے ، سلوشن فائنڈ کرتے ہیں​

جگہ صدمے کی یارو اب تو ٹیشن ، شاک لیتے ہیں
کہ "بُوہا" شٹ جو کرتے ہیں تو اس کو لاک دیتے ہیں​

ہوئے ''آزاد"''جب ہم تو ''ترقی'' کرگئے آخر
جو پینڈو ذہن والے تھے، وہ سارے مر گئے آخر​

 

[خضر حیات]

مجموعی طور پر بہت ہی خوب ۔
عبد اللہ بھائی یہ کن کا کلام ہے ؟

 

[جمشید]

صاحب کلام کا نام ضرور دیناچاہئے

 

[جمشید]

ابھی جب میں نے سرچ کیاتوپتہ چلاکہ یہ پوسٹ پہلے اردو محفل فورم بھی موجود ہے۔اردو مجلس میں آزاد صاحب نے شیئر کیااوروہاں سے لے کر پھریہاں شیئر کیاگیاہے۔

 

[کنعان]

السلام علیکم

آپکی بات درست ھے، یہ کلام "آزاد" نے ہی 3 جون 2010 میں پیش کیا تھا جو اس نے کسی رسالہ سے نقل کیا تھا۔ پھر بعد میں اس سے نقل ہوتا رہا۔

والسلام