صحابہ رضی اللہ عنہم اجمعین اور تقلید

[تلمیذ]

تقلید کی ایک تعریف یہ کی جاتی ہے کہ امتی کے ایسے قول پر عمل کرنا جو قرآن و حدیث سے ٹکرائے۔ اور اسے گناہ کبیرہ کہا جاتا ہے۔
١- حضرت عثمان رضی اللہ عنہ کے دور میں جمعہ کی دوسری آذان شروع ہوئی ۔ غالبا نبی اکرم صلی اللہ علیہ و سلم سے یہ ثابت نہیں ۔ تو دوسري آذان حضرت عثمان رضی اللہ عنہ کے قول پر شروع کی گئی جو ایک امتی کا قول ہے تو کیا اس طرح حضرت عثمان رضی اللہ عنہ تقلید کروانے اور دوسرے صحابہ رضی اللہ عنہ تقلید کرنے کے مرتکب نہ ہوئے ۔
٢- نبی اکرم صلی اللہ علیہ و سلم نے قرآن سات قرآت میں جائز قرار دیا ۔ لیکن حضرت عثمان رضی اللہ عنہ کے دور میں ان کے قول پر عمل کرتے ہوئے صرف ایک قرآت باقی رکھی گئی ۔ کیا یہ امتی کے قول پر عمل اور تقلید نہیں ہے ۔

 

[ابوالحسن علوی]

١- حضرت عثمان رضی اللہ عنہ کے دور میں جمعہ کی دوسری آذان شروع ہوئی ۔ غالبا نبی اکرم صلی اللہ علیہ و سلم سے یہ ثابت نہیں ۔ تو دوسري آذان حضرت عثمان رضی اللہ عنہ کے قول پر شروع کی گئی جو ایک امتی کا قول ہے تو کیا اس طرح حضرت عثمان رضی اللہ عنہ تقلید کروانے اور دوسرے صحابہ رضی اللہ عنہ تقلید کرنے کے مرتکب نہ ہوئے ۔

نبی کریم صلی اللہ علیہ وسلم سے ایک نماز کے لیے دو اذانیں تو ثابت تھیں لیکن جمعہ کے لیے ثابت نہیں تھیں۔ جیسا کہ اللہ کے رسول صلی اللہ علیہ وسلم کے زمانے میں فجر کے لیے طلوع فجر سے کچھ ہی دیر پہلے حضرت بلال رضی الہ عنہ اذان دیا کرتے تھے تا کہ لوگ اٹھ کر نماز کی تیاری وغیرہ کر لیں اور پھر دوسری اذان طلوع فجر کے وقت ابن ام مکتوم رضی اللہ عنہ دیا کرتے تھے۔ پس اللہ کے رسول صلی اللہ علیہ وسلم کے زمانہ میں ایک مصلحت کے تحت ایک نماز کے لیے دو اذانوں کی مثال موجود ہے۔ حضرت عثمان رضی اللہ عنہ نے اس اصل کو سامنے رکھتے ہوئے اسی مصلحت کے تحت کہ لوگوں کی نماز ضائع نہ ہو، جمعہ کے لیے دو اذانوں کا طریقہ رائج کیا۔ لہذا یہ حضرت عثمان رضی اللہ عنہ کی تقلید نہیں ہے بلکہ اس کی بنیاد سنت نبوی صلی اللہ علیہ وسلم ہے۔

آج بھی وہی مصلحت جمعہ کی نماز کے لیے دو اذانوں کی متقاضی ہے یا نہیں؟ اس بارے اہل علم کا اختلاف ہے۔ شیخ بن باز اور شیخ صالح العثیمین رحمہما اللہ کے نزدیک آج بھی جمعہ کے لئے دو اذانیں دینا پسندیدہ عمل ہے جبکہ علامہ البانی رحمہ اللہ کے نزدیک مصلحت کے ختم ہو جانے کے سبب سے دو اذانیں درست نہیں ہیں۔ واللہ اعلم۔

 

[ابوالحسن علوی]

٢- نبی اکرم صلی اللہ علیہ و سلم نے قرآن سات قرآت میں جائز قرار دیا ۔ لیکن حضرت عثمان رضی اللہ عنہ کے دور میں ان کے قول پر عمل کرتے ہوئے صرف ایک قرآت باقی رکھی گئی ۔ کیا یہ امتی کے قول پر عمل اور تقلید نہیں ہے ۔

حضرت عثمان رضی اللہ عنہ نے قراآت ختم نہیں کی تھیں یہ ان کے بارے غلط فہمی ہے (اور وہ کر بھی کیسے سکتے تھے؟؟) حضرت عثمان رضی اللہ عنہ کا اصل کارنامہ امت کو ایک قراءت پر جمع کرنے کا نہیں ہے بلکہ ان کا اصل کارنامہ امت کو ایک رسم پر جمع کرنے کا ہے۔ اسی لیے رسم عثمانی کی مخالفت ناجائز ہے اور یہ رسم عثمانی ایسا تھا جو تمام مستند اور صحیح قراءات کا جامع تھا۔