ظرف مکان بنانے کا قاعدہ

[محمد سعود مقصود]

اسمِ ظرف​

اسمِ ظرف وہ اسم ہے جس میں جگہ یا وقت کے معنی پائے جائیں۔
اس کی دو قسمیں ہیں:
ظرفِ مکان
ظرفِ زمان
ظرفِ مکان: وہ اسم ہے جس میں جگہ یا مقام کا ذکر ہو۔ جیسے: مسجد، مدرسہ، باغ، مکتب، گھر، محل۔

ظرفِ زمان: وہ اسم ہے جس میں زمانے یا وقت کا ذکر ہو۔ جیسے: صبح، شام، دن، رات، کل، پرسوں ۔

ظرفِ مکان بنانے کے قاعدے

1۔ بعض اسموں کے اخر میں مندرجہ ذیل لاحقے لگا کر ظرفِ مکان بناتے ہیں:
گھر: چڑیاں گھر، بجلی گھر، کتاب گھر، ڈاک گھر
پور: نارائن پور، مدھوپور، رامپور، کانپور، رسول پور
نگر: رسول نگر، جام نگر، سری نگر، مظفر نگر
گھاٹ: دھوبی گھاٹ، شمشان گھاٹ، پنگھٹ، راج گھاٹ
دانی: سرمہ دانی، صابن دانی، مچھر دانی، برف دانی
گنج: صاحب گنج، دریا گنج، نواب گنج، سلطان گنج
گڑھ: فتح گڑھ، علی گڑھ، چھتیس گڑھ، صادق گڑھ، جونا گڑھ
کوٹ: سیالکوٹ، پٹھانکوٹ، شورکوٹ، راجکوٹ
منڈی: سبزی منڈی، میوہ منڈی، غلہ منڈی، مچھی/ مچھلی منڈی

2- فارسی اسمائے ظرف بھی بکثرت اردو میں استعمال ہوتے ہیں جو اسموں کے اخر میں مندرجہ ذیل علامت لگانے سے بنتے ہیں:
گاہ: عیدگاہ، گزرگاہ، درسگاہ، بندرگاہ، خوابگاہ، آرامگاہ، بارگاہ
خانہ: غسل خانہ، کتب خانہ، بت خانہ، پاگل خانہ، قید خانہ، کار خانہ
ستان: گلستان، قبرستان، نخلستان، ریگستان، ہندوستان، پاکستان
آباد: اسلام آباد، عظیم آباد، سکندر آباد، الہ آباد، حیدرآباد
دان: عطردان، شمع دان، آتشدان، قلمدان، گلدان، نمکدان
زار: گلزار، سبزہ زار، لالہ زار، مرغزار، خار زار
سرائے: مہمان سرائے، مغل سرائے، مسافر سرائے، کارواں سرائے
کدہ: آتش کدہ، غم کدہ، صنم کدہ، میکدہ، دانش کدہ

3- بعض اسموں سے پہلے مندرجہ ذیل عربی سابقے لگا کر ظرفِ مکان بناتے ہیں:
دار: دارالحکومت، دارالحدیث، دارالعلوم، دارالسلام، دار الافتا، دار الكتب
بیت: بیت اللہ، بیت المقدس، بیت المعمور، بیت المال، بیت الخلاء

4- عربی کے اسماۓ ظرف مندرجہ ذیل اوزان پر آتے ہیں:
مَفْعَل: مدخل، مقتل، مكتب، مخرج، مطبخ، معبد
مَفْعِل: مسجد، محفل، مشرق، مجلس، موقف، منزل،‌ موقع، مغرب، موطن
مَفْعَله: محکمہ، مقبره،مزرعہ، مدرسه، مرحلہ، مكتبه، مغسلہ

5- بعض اوقات اسم سے پہلے ڈیرہ، بستی، کوٹ لگانے سے اسم ظرف بنتا ہے۔ جیسے:
بستی: بستی پٹھاناں، بستی بلوچاں، بستی ملاحاں، بستی شوکت
کوٹ: کوٹ ادّو، کوٹ لکپٹ،کوٹ مٹھن، کوٹ مومن
ڈیرہ: ڈیرہ غازی خان، ڈیرہ بابا نانک، ڈیرہ اسماعیل خان، ڈیرہ بگٹی۔

"اللَّهُمَّ انْفَعْنَا بِمَا عَلَّمْتَنَا وَعَلِّمْنَا مَا يَنْفَعُنَا وَزِدْنَا عِلْمًا"


محمد سعود
متعلم: جامعہ نجران، سعودی عرب