ماہِ محرم

[Aamir]

بسم اللہ الرحمن الرحیم
​

ماہِ محرم

‏از قلم : شیخ مقصود الحسن فیضی حفظہ اللہ
​

الحمد للہ وحدہ و الصلاۃ والسلام علی من لا نبی بعدہ ۔ وبعد

اللہ تبارک وتعالٰی نے اپنی حکمت وعدل سے بعض ایام کو بعض ایام پر ، بعض مہینوں کو بعض مہینوں اور بعض اوقات کہ بعض اوقات پر فضیلت بخشی ہے ، اور تقریباً ہر فضیلت والے مہینے ، وقت اور دن میں کچھ نیک کام مشروع قرار دئے ہیں ، ان میں گناہ کے کام سے روکا اور اپنی اور اپنے رسول کی نافرمانی کو زیادہ قابلِ مذمت بتلایا ہے ۔

انہیں افضل ومحترم مہینوں میں ایک مہینہ محرم اور انہیں مبارک دنوں میں ایک دن عاشورہ کا بھی ہے ۔

محرم الحرام کی فضیلت :

محرم الحرام کو اللہ تعالٰی نے متعدد فضائل سے نواز ہے :
1. اس کی سب سے پہلی فضیلت وا ہمیت یہ ہے کہ اسلامی سال کی ابتداء اسی مہینہ سے ہوئی ہے ،جیسا کہ تمام مسلمانوں کا اس پر اتفاق ہے ۔
2. یہ مہینہ سال کے چار محترم اور حرمت والے مہینوں میں سے ایک ہے ، ارشاد باری تعالٰی ہے : [إِنَّ عِدَّةَ الشُّهُورِ عِنْدَ اللهِ اثْنَا عَشَرَ شَهْرًا فِي كِتَابِ اللهِ يَوْمَ خَلَقَ السَّمَاوَاتِ وَالأَرْضَ مِنْهَا أَرْبَعَةٌ حُرُمٌ ذَلِكَ الدِّينُ القَيِّمُ] " مہینوں کی گنتی اللہ کے نزدیک کتاب اللہ میں بارہ ہے ، اسی دن سے جب سے آسمان وزمین کو اس نے پیدا کیا ہے ، ان میں سے چار حرمت وادب کے ہیں یہی درست دین ہے " {التوبة:36} ۔ حجۃ الوداع کے موقعہ پر اللہ کے رسول صلی اللہ علیہ وسلم نے اعلان فرمایا تھا کہ : ’’ اب زمانہ گھوم گھما کر پھر اسی حالت پر آگیا ہے جس حالت پر اس وقت تھا جب اللہ تعالٰی نے آسمانوں اور زمین کی تخلیق فرمائی ، سال بارہ مہینوں کا ہے ، جن میں چار حرمت والے ہیں تین پے درپے ہیں ، ذوالقعدہ ، ذو الحجۃ اور محرم اور چوتھا رجب مضر ہے جو جمادی الاولی اور شعبان کے درمیان واقع ہے ۔ { صحیح البخاری :4662 ، التفسیر - صحیح مسلم : 1679 ، القسامہ}حضرت عبد اللہ بن عباس رضی اللہ عنہما کا ارشاد ہے کہ اللہ تعالٰی نے چار مہینوں کو خاص کرلیا اور انہیں حرمت والے قرار دیا ، نیز ان کی عزت وحرمت کو بڑھایا اور ان میں اپنی نافرمانی کو قبیح قرار دیا ، اسی طرح ان مہینوں میں عمل صالح کے اجر و ثواب کو بڑھا دیا { شعب الایمان :5/341 }
3. اس مہینہ میں روزہ رکھنا اور مہینوں کے مقابل میں افضل ہے ۔چنانچہ اللہ کے رسول صلی اللہ علیہ وسلم کا ارشاد ہے کہ : " رمضان المبارک کے بعد سب سے افضل روزہ اللہ کے مہینے محرم کا ہے اور فرض نمازوں کے بعد سب سے افضل نماز رات کی نماز ہے ۔ { صحیح مسلم :1202، الصوم – سنن ابوداود :2429، الصوم – سنن الترمذی :740 ، الصوم ، بروایت ابو ہریرہ } ۔ سنن النسائی الکبری میں ہے کہ آپ صلی اللہ علیہ وسلم سے کسی نے سوال کیا کہ رمضان المبارک کے بعد سب سے افضل روزہ کون ہے؟ تو آپ نے فرمایا : اللہ کے اس مہینے کا روزہ جسے تم محرم کے نام سے یاد کرتے ہو ۔ { سنن النسائی الکبری : 2906 ، ج:2/171 } ۔
4. اس مہینے کی نسبت اللہ کے رسول صلی اللہ علیہ وسلم نے اللہ تعالٰی کی طرف کی ہے یعنی " اللہ تعالٰی کا مہینہ " حالانکہ سارے مہینے ہی اللہ تعالٰی کے پیدا کردہ اور متعین کردہ ہیں ، لیکن اس ماہ کی اہمیت کے پیش نظر اللہ کے رسول صلی اللہ علیہ وسلم نے اس کی نسبت واضافت اللہ تعالٰی کے طرف کی ، جیسا کہ پچھلی دو حدیثوں سے واضح ہوا ، اور ظاہر ہے کہ جن چیزوں کی نسبت اللہ تعالٰی کی طرف ہوتی ہے وہ قابل احترام اور افضل ہوتے ہیں جیسے بیت اللہ ، کعبۃ اللہ وغیرہ ۔
5. اس مہینے میں عاشوراء کا دن ہے جس کا روزہ ایک سال کے گناہوں کا کفارہ ہے ، چنانچہ نبی کریم صلی اللہ علیہ وسلم کا ارشاد ہے :" جس نے عرفہ کے دن کا روزہ رکھا اس کے ایک سال آئندہ اور ایک سال گزشتہ کے گناہ معاف کردئے گئے اور جس نے عاشورا کا روزہ رکھا اس کے گزشتہ ایک سال کے گناہ معاف کردئے گئے ۔ { صحیح مسلم : 1162 ، الصوم – سنن الترمذی :752 ، الصوم ، بروایت ابو ہریرہ }

اس مہینے کے مسنون کام :
اس مہینہ کی اہمیت وفضیلت کے پیش نظر اس میں کچھ ایسے کام مشروع ہیں جو اگرچہ دوسرے مہینوں بھی مشروع ہیں لیکن اس مبارک مہینہ میں ان کی اہمیت زیادہ ہے وہ کام یہ ہیں :

1) روزہ : محرم الحرام کے روزہ کے متعلق دو حدیثیں گزرچکی ہیں جس سے پتہ چلتا ہے کہ نفل روزوں میں سب سے افضل روزے ماہ محرم کے ہیں ۔ ماہ محرم میں روزہ رکھنے کی فضیلت کی وجہ : علماء کہتے ہیں کہ اس مہینے میں روزہ رکھنے کی فضیلت کی دو وجھیں ہیں :

1. چونکہ یہ مہینہ حرمت والا مہینہ ہونے کی وجہ سے مبارک ہے اور روزہ بھی اللہ کے نزدیک بڑا محبوب عمل ہے، لہذا مبارک دن میں محبوب عمل کی ترغیب دی گئی ، اس لئے کہ وقت ، جگہ اورحالت کے اختلات کے پیش نظر نیک عمل کی اہمیت وفضیلت میں بھی اضافہ ہوجاتا ہے ۔
2. یہ سال کا پہلا مہینہ ہے اور شریعت نے کسی چیز کے ابتداء وانتہا میں نیک عمل کی ترغیب دی ہے ، جیسے : ارشاد باری تعالٰی ہے : ’’ وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ‘‘ " اور دن کے دونوں سرو ںمیں نماز قائم کرو اور رات کی کئی ساعتوں میں بھی ، یقینا نیکیاں برائیوں کو دور کردیتی ہیں ، یہ نصیحت ہے نصیحت پکڑنے والوں کے لئے " ۔ {سورہ ھود:114}

اللہ کے رسول صلی اللہ علیہ وسلم کی حدیثوں میں بھی صبح وشام ذکر الہٰی پر خصوصی طور پر ابھارا گیا ہے ، اللہ کے رسول صلی اللہ علیہ وسلم کا ارشاد ہے کہ’’ جو شخص سورج کے طلوع ہونے اور سورج کے غروب ہونے سے قبل نماز پڑھے گا وہ ہر گز ہرگز جہنم میں داخل نہ ہوگا ‘‘۔ { صحیح مسلم : 634، المساجد سنن ابوداود :427 ، الصلاۃ ، بروایت عمارہ } ایک حدیث قدسی میں ہے کہ اللہ تعالٰی فرماتا ہے : اے ابن آدم! دن کے ابتدائی حصے میں میری رضا کے لئے چار رکعت سے عاجز نہ رہ جس کی وجہ آخری حصے تک میں تیرے لئے کافی رہوں گا ۔ { سنن ابو داود :1289، الصلاۃ – مسند احمد :286/5 ، عن نعیم بن معمار الغطفانی }

یہی وجہ ہے آپ دیکھیں گے کہ اسلامی سال کا پہلا مہینہ اور آخری مہینہ دونوں حرمت والے ہیں اور دونوں میں نیک اعمال کی خصوصی اہمیت حاصل ہے ،،،، واللہ اعلم ۔۔

2) گناہوں سے پرہیز : اس مبارک مہینہ کا دوسرا خصوصی عمل یہ ہے کہ بندے کو چاہئے کہ عبادت کے کاموں اور دیگر نیک کاموں میں دلچسپی لے اور گناہ کے کام سے خصوصی طور پر پرہیز کرے ، جیسا کہ ارشاد باری تعالٰی ہے : ’’ فَلَا تَظْلِمُوا فِيهِنَّ أَنْفُسَكُمْ ‘‘" ان مہینوں میں {حرمت والے مہینوں میں } تم لوگ اپنے اوپر ظلم نہ کرو " {التوبة:36}اس جملے کی تفسیر کرتے ہوئے امام ابن کثیر رحمہ اللہ لکھتے ہیں کہ : " یعنی قتال کرکےیا گناہ کا کام کرکے اپنے اوپر ظلم نہ کرو ، کیونکہ ان مہینوں میں گناہ کرنا اور مہینوں کے مقابلے میں زیادہ برا ہے ، جس طرح کہ حرم میں گناہ دوسری جگہوں کے مقابلے زیادہ برا ہے "{تفسیر ابن کثیر }

3) توبہ واستغفار : چونکہ اس ماہ میں کثرت سے روزہ رکھنا مشروع ہے نیز اپنے خالق و مربی کی نافرمانی سے پرہیز بڑی اہم نیکی ہے لہذا اگر کوئی بندہ ٴمومن ان دونوں کاموں کے ساتھ ساتھ اپنے رب کے حضور سچی توبہ کرتا ہے تو قوی امید ہے کہ اللہ تعالٰی اس کی توبہ قبول فرمائے گا ، اس سلسلے میں مسند احمد وغیرہ میں ایک حدیث مروی ہے جسے امام ترمذی اور حافظ منذری رحمہما اللہ وغیرہ حسن قرار دیتے ہیں ، چنانچہ حضرت علی رضی اللہ عنہ سے کسی شخص نے سوال کیا کہ رمضان المبارک کے بعد وہ کونسا مہینہ ہے جس میں روزہ رکھنے کا ہمیں آپ مشورہ دیتے ہیں ؟ حضرت علی رضی اللہ عنہ نے اس سے فرمایا : ایک دن میں اللہ کے رسول صلی اللہ علیہ وسلم کے پاس بیٹھا ہوا تھا کہ ایک شخص نے آپ سے یہی سوال کیا ، آپ صلی اللہ علیہ وسلم نے جواب میں ارشاد فرمایا : اگر تم رمضان المبارک کے بعد کسی مہینہ کا روزہ رکھنا چاہتے ہو تو ماہ محرم کا روزہ رکھو ، کیونکہ وہ اللہ تعالٰی کا مہینہ ہے ، اس مہینہ میں اللہ تعالٰی نے ایک قوم کی توبہ قبول کی ہے اور دوسری قوموں کی توبہ بھی قبول فرمائے گا ۔ { مسند احمد :1/154 – سنن الترمذی : 741 ، الصوم }

4) اتفاق واتحاد : اشہر حُرم کے ضمن میں اللہ تعالٰی ارشاد فرماتا ہے : ’’ وَقَاتِلُوا المُشْرِكِينَ كَافَّةً كَمَا يُقَاتِلُونَكُمْ كَافَّةً وَاعْلَمُوا أَنَّ اللهَ مَعَ المُتَّقِينَ ‘‘ " اور مشرکوں سے سب مل کر لڑو جس طرح کہ وہ تم سے مل کر لڑتے ہیں اور یاد رکھو کہ کہ اللہ تعالٰی متقیوں کے ساتھ ہے " ۔ {التوبة:36}یعنی جس طرح کہ وہ متفق متحد ہوکر تم سے لڑتے ہیں اس طرح تمہیں بھی چاہئے کہ کہ تم ان سے متفق ومتحد ہوکر لڑو کیونکہ اللہ تعالٰی کی مدد آپس میں نا اتفاقی ، ایک دوسرے کی دشمنی اور ایک دوسرے سے بغض ونفرت سے نہیں بلکہ آپسی اتفاق و اتحاد اور آپسی محبت ومودت سے حاصل ہوسکتی ہے ۔

5) توکل : محرم کا مہینہ آتے ہی حضرت موسی علیہ السلام اور ان کی قوم کا ذکر چھڑ جاتا ہے کہ کسی طرح اللہ تعالٰی نے حضرت موسی علیہ السلام اور ان کی قوم کو ظالموں کے چنگل سے نجات دیا اور جب ایک شخص موسی علیہ السلام کے اس موقف پر ایک نظر ڈالتا ہے کہ وہ اپنی قوم کو لیکر رات و رات فرعون کی پکڑ سے بچنےکے لئے سرزمینِ مصر سے کہیں دور نکل جانا چاہتے ہیں لیکن ابھی فرعون کی حکومت کے حدود ہی میں ہیں کہ وہ اپنے پورے لشکر کے ساتھ سمند رکے کنارے انہیں پالیتا ہے ، بنو اسرائیل چیخ پڑتے ہیں کہ اب تو ہم مارے گئے ، سامنے سمندر ہے اور پیچھے سے فرعون اور اس کا لشکر بالکل قریب پہنچ چکے ہیں، لیکن ایسے مشکل وقت میں بھی حضرت موسی علیہ السلام نے اللہ تعالٰی پر توکل و اعتماد کا دامن نہیں چھوڑا اور اپنی قوم کو تسلی دیتے ہوئے ایک ایمان بھرا جواب دیا کہ:" قَالَ كَلَّا إِنَّ مَعِيَ رَبِّي سَيَهْدِينِ " ’’ ہرگز نہیں ، یقین مانو ! میرا رب میرے ساتھ ہے جو ضرور مجھے راہ دکھائے گا ‘‘{الشعراء:62 } ۔ہوا بھی ایسا ، چنانچہ اللہ تعالٰی نے حکم دیا کہ موسی! ابھی چھڑی اس سمندر میں مارو ، تمہارے لئے ایک راستہ نہیں بارہ راستے بن جائیں گے ۔

یہ ہے اس مبارک مہینے کی شرعی حیثیت جسے بالائے طاق رکھ کر عام مسلمانوں نے اسے شرک وبدعات کا مہینہ ٹھہرا لیا ہے ، اور بہت سے سادہ مسلمان یہ سمجھتے ہیں کہ ماہ محرم منحوس ہے جس میں شادی وبیاہ اور کوئی کاروبار شروع نہیں کرنا چاہتے ، اور کچھ لوگ یہ سمجھتے ہیں کہ اس مہینہ کو جو اہمیت ملی ہے اس کی وجہ حادثہِ کربلا ہے ۔ نعوذ باللہ ۔

 

[ابن خلیل]

جزاکم اللہ خيرا واحسن الجزاء في الدنيا و الآخرا

 

[محمد ارسلان]

جزاک اللہ خیرا

 

[محمد شاہد]

ﺟﺰﺍﮐﻢ ﺍﻟﻠﮧ ﺧﻴﺮﺍ ﻭﺍﺣﺴﻦ
ﺍﻟﺠﺰﺍﺀ ﻓﻲ ﺍﻟﺪﻧﻴﺎ ﻭ ﺍﻵﺧﺮﺍ

 

[انس]

جزاكم الله خيرا
بہت ہی اچھا معلوماتی مضمون ہے۔
مضمون نگار کون ہیں؟؟؟ ازراہ کرم ان کا حوالہ دے دیں!

 

[Aamir]

جزاكم الله خيرا
بہت ہی اچھا معلوماتی مضمون ہے۔
مضمون نگار کون ہیں؟؟؟ ازراہ کرم ان کا حوالہ دے دیں!

انس بھائی جان یہ مضمون شیخ مقصود الحسن فیضی حفظہ اللہ کا ہے، فورم پر جب میں نیا تھا جب انہی کے مضمون کو پوسٹ کرتا تھا،

 

[محمد عامر یونس]

جزاكم الله خيرا
بہت ہی اچھا معلوماتی مضمون ہے۔