معانی واحکام پر ترتیل ِقرآن کریم کے اثرات

[ساجد]

ایک باریک نکتہ
مذکورہ مثالوں سے معلوم ہوتا ہے کہ ہر لفظ کا اپنے مابعد اور ماقبل حرف سے کس قدر گہرا اور معجزاتی تعلق ہے جو یہ یقین مزید پختہ کر دیتا ہے کہ یہ واقعی کلام اللہ ہے۔

 

[ساجد]

سورۃ الفلق
’’وَمِنْ شَرِّ حَاسِدٍ إِذَا حَسَدَ ‘‘
یہاں حاسدٍ پر اظہار ہے۔ یہ اس بات کی طرف اِشارہ ہے کہ ’عین الحاسد‘ اچانک اور فجاء ۃ لگ جاتی ہے۔

 

[ساجد]

سورۃ الناس
جب ہم اس سورۃ پر غور کرتے ہیں تو دیکھتے ہیں کہ اس سورۃ کی ہر آیت میں غنہ موجود ہے تو یہ اللہ رب العزت کی وسعت رحمت کا پتہ دے رہی ہے، کیونکہ جس شر سے پناہ مانگی جارہی ہے وہ اس قدر بڑا اور نفوذ پذیر ہے کہ اللہ رب العزت کے تین ناموں کا واسطہ دیا گیا ہے۔ یعنی ’’ قُلْ اَعُوْذُ بِرَبِّ النَّاسِ٭ مَلِکِ النَّاسِ٭ اِلٰـہِ النَّاسِ ‘‘
لہٰذا یہاں ہر آیت میں غنہ اس اللہ رب العزت کے وسعت حفظ اور شیطانوں کے وسعت شر پر دال ہے۔

 

[ساجد]

اِدغام کے معانی پر اَثرات
نون ساکن وتنوین کے قواعد میں سے ایک ادغام بھی ہے جس کا معنی ہے کہ ایک حرف کو دوسرے حرف میں اس طرح داخل کرنا کہ پڑھتے وقت یوں محسوس ہو کہ ایک ہی حرف ہے۔ نون کا ادغام چھ حروف ی، ر، م، ل، و، ن میں ہوتا ہے۔ ا س کی دواقسام ہیں۔
(١) ادغام ناقص (٢) ادغام کامل
ناقص کا مفہوم یہ ہے کہ دوران ادغام ’ن‘ کی صفت غنہ باقی رہے یہ ’یومن‘ کے چار حروف میں ہوتا ہے اور کامل کا مطلب یہ ہے کہ نون کو بدون غنہ اَدا کیا جائے اور یہ مابعد حروف میں تبدیل ہو جائے یہ ’ل‘ اور’راء‘ میں ہوتا ہے۔ ان دو اقسام میں سے ہر ایک کے فوائد ہیں ادغام کامل تبیین اور وضاحت کا فائدہ دیتا ہے جبکہ ادغام ناقص وسعت معنی کے لیے آتا ہے۔۔ مثلاً’’وَ لَمْ یَکُنْ لَہُ کُفُوًا أَحَدٌ‘‘ میں یکن لہ کا ادغام کامل اس بات میں قطعیت کا فائدہ دے رہا ہے کہ حق تعالیٰ شانہ کی برابری کی کسی میں قوت نہیں ہے۔ اسی طرح ’’وَلَلْآخِرَۃُ خَیْرٌ لَّکَ مِنَ الْأُوْلٰی‘‘ یہاں ’خیر لک‘ کا ادغام تام اس کا بیان ہے کہ خیر کا آپ کے ذات کے ساتھ الصاق کامل ہے۔ کبھی بھی آپ سے منفصل نہیں ہوسکتی۔
نیز’’ وَیْلٌ لِّکُلِّ ہُمَزَۃٍ لُّمَزَۃِ ‘‘ یہاں ویل لکل اور ہمزۃ لمزۃ کا ادغام تام اس اَمر میں نص ہے کہ چغل خور اور غیبت کرنے والے کے ساتھ عذاب اس طرح ملصق ہوگیا ہے کہ گویا اس کی ذات کا جزء بن گیا ہے۔ َمَنْ یَّعْمَلْ مِثْقَالَ ذَرَّۃٍاس آیت میں ادغام ناقص کے ذریعے عمل کے بقاء اور استمرار کی طرف اِشارہ کیا گیا ہے۔

 

[ساجد]

صفات حروف کے معانی پر اَثرات
ہر حرف کے لیے ایک متعین مخرج ہے جس سے وہ ایک خاص کیفیت کے ساتھ اَدا ہوتا ہے اس کیفیت کو صفت الحروف کہتے ہیں صفات سے بھی معانی پر کئی اَثرات مرتب ہوتے ہیں جو کہ توضیح وتفسیر میں نفع بخش ثابت ہوتے ہیں۔ ذیل میں ہم اس کا تذکرہ کرتے ہیں۔

 

[ساجد]

حروف استعلاء
’س‘ حروف استعلاء میں سے نہیں جبکہ ’ص‘ حروف استعلاء میں سے ہے جس کا مفہوم اِرتقاء اور بلندی ہے۔ ان دو حروف کو درج ذیل دو آیات میں دیکھنے سے صفات کے اثرات کا اَندازہ ہوگا۔ قرآن کریم میں ہے:
’’ أَمْ عِنْدَہُمْ خَزَآپـنُ رَبِّکَ أَمْ ہُمُ الْمُصَیْطِرُوْنَ۔ ‘‘ ( الطور:۳۲)
’’ لَسْتَ عَلَیْہِمْ بِمُصَیْطِرٍ‘‘ (الغاشیۃ: ۲۲)
لفظ المصیطرون اور المصیطر قرآن کریم میں بلحاظ اصل ’س‘ کے ساتھ مکتوب ہونا چاہیے لیکن کیونکہ حرف س حروف استعلاء میں سے نہیں ہے اور وہ معنی مقصود صحیح اَنداز میں نہیں اَدا کر پاتا اس لیے کی دوسری قراء ت بصاد یعنی المصیطر بھی نازل کر دی گئی تاکہ معنی کی تبیین کا حق اَدا ہوسکے۔

 

[ساجد]

حروف قلقلہ وحروف امتداد
قلقلہ سے مراد یہ ہے کہ حروف کو بحالت وقف قدرے جنبش دے کر پڑھنا یہ پانچ حروف ہیں:
ق، ط، ب، ج، د۔ حرف امتداد فقط ضاد ہے۔ یہاں امتداد کا مفہوم یہ ہے کہ زبان کی ابتداء سے انتہاء تک آواز کو اس طرح دراز کرنا کہ تحریک وتقلیل کا شائبہ نہ ہو۔
جب ہم حروف قلقلہ پر غور کرتے ہیں خصوصاً جب قلقلہ کبریٰ ہو تو وہ کلمہ وسعت اور زیادتی کے معنی دے رہا ہوتا ہے یا پھر یہ حروف تاکید کا فائدہ دیتے ہیں، کیونکہ قلقلہ میں قدرے حرف کے تکرار کا احساس ہوتا ہے اور تکرار حرف تاکید کے لیے ہوتا ہے۔ مثلاً ’’ اِقْرَأْ بِاسْمِ رَبِّکَ الَّذِیْ خَلَقَ ٭ خَلَقَ الْاِنْسَانَ مِنْ عَلَقٍ ‘‘ (العلق:۱،۲)
مذکورہ آیت میں خلق کا ’ق‘ اپنے قلقلہ کی بدولت اللہ رب العزت کی وسعت تخلیق کی غمازی کر رہا ہے جبکہ علق میں جنبش حرف سے منی کے قطرات میں موجود Spermsکی کثرت کی طرف اِشارہ کررہا ہے۔اسی طرح العذاب، الحق، والأسباط، الأحزاب، أزواج، المیعاد۔ یہ بھی اپنے معنی میں وسعت رکھتے ہیں۔
حرف ضاد کی خصوصیت یہ ہے کہ سکون کی حالت میں اس میں کسی چیز کو قوت کے ساتھ روکے رکھنے کے معنی پائے جاتے ہیں اور عدم قلقلہ کی بناء پر کسی طرح کی حرکت اور جنبش کے لیے مانع ہے جیسا کہ ِارشاد باری تعالیٰ ہے:
’’ ثُمَّ قَبَضْنٰہُ اِلَیْنَا قَبْضًا یَّسِیْرًا ‘‘ (الفرقان:۴۶)
یہاں حرف ضاد کا سکون اور عدم قلقلہ لفظ ’القبض‘ کے معنی میں تاکید پیدا کر رہا ہے۔

 

[ساجد]

حروف تفخیم وترقیق
بعض حروف کی تفخیم اس کی زیادتی معنی پر دلالت کرتی ہے اسی طرح ترقیق حروف بھی بعض لطیف اشیاء کی گرہ کشائی کرتی ہے۔ حروف تفخیم دراصل حروف استعلاء ہی ہیں لیکن بعض حالات میں را بھی مفخم پڑھی جاتی ہے۔ نیز لفظ الجلالہ سے ماقبل فتحہ یا ضمہ ہو تو اسے پر پڑھاجاتا ہے۔ جیسے: ’’ قُلْ ہُوَ اللّٰہُ أَحَدٌ ‘‘ (الاخلاص:)‘ ’’وَیَفْعَلُ اللّٰہُ مَا یَشَآء‘‘ (ابراھیم:۲۷) البتہ ماقبل کسرہ ہو تو باریک ہوتا ہے جیسے بسم اﷲ، الحمد ﷲ۔
میرا یہ اعتقاد ہے کہ یہ وسیع دراسۃ کا محتاج ہے جس میں حروف کے اصول اور ان سے وجود پانے والے کلمات کا جائزہ لینے کی ضرورت ہے۔

 

[ساجد]

اِدغام مثلین، متجانسین اور متقاربین کے معانی پر اَثرات
اِدغام مثلین: دونوں حروف صفات اور مخرج میں متحد ہوں۔
اِدغام متجانسین: دونوں حروف مخرج میں متحد ہوں اور صفات میں مختلف ہوں۔
اِدغام متقاربین: دونوں حروف مخرج اور صفات میں مختلف ہوں۔
جیسا کہ ہم نے پہلے بھی عرض کیا ہے کہ اِدغام کا مل معاملے کی قطعیت پر اور کسی زمانی یا مکانی فاصلہ کے عدم وجود پر دلالت کرتا ہے۔ لہٰذا ہم چند مزید مثالیں ذکر کر رہے ہیں تاکہ مزید وضاحت ہوجائے۔

 

[ساجد]

اِدغام مثلین
اِرشاد ربانی ہے:’’ أَیْنَ مَا تَکُوْنُوْا یُدْرِکْکُّمُ الْمَوْتُ وَ لَوْ کُنْتُمْ فِیْ بُرُوْجٍ مُّشَیَّدَۃٍ ‘‘ (النساء:۷۸)
دوران تلاوت یدرککم کے کاف اول کا ثانی میں اس طرح ادغام کریں کہ وہ حرف مشدد ہو جائیں یہ ادغام اس بات کی طرف اشارہ کر رہا ہے کہ جب کسی پر موت کا وقت آ پہنچے تو پھر اس کے واقع ہونے میں بے اِنتہا سرعت سے کام لیا جاتا۔
اِرشاد باری تعالیٰ ہے:
’’ اِذْہَبْ بِکِتٰبِیْ ہٰذَا فَــأَلْقِہِ إِلَیْہِمْ ثُمَّ تَوَلَّ عَنْہُمْ ‘‘ (النمل:۲۸)
یہاں اذہب بکتٰبی میں باء کا اِدغام یہ اشارہ کر رہا ہے کہ سیدنا سلیمان علیہ السلام نے ہدہد کو بہت سرعت اور تیزی کے ساتھ خط پہنچانے کا حکم دیا تھا۔