معانی واحکام پر ترتیل ِقرآن کریم کے اثرات

[ساجد]

اِدغام متجانسین
یہ تائ، دال، طاء، ذال، اور میم میں ہوتا ہے۔
قرآن کریم میں ہے:
’’ لَآ إِکْرَاہَ فِی الدِّیْنِ قَدْ تَّبَیَّنَ الرُّشْدُ مِنَ الْغَیِّ ‘‘ (البقرہ:۲۵۶)
’قدتبین‘ میں تاء کا دال میں اِدغام اس بات کی وضاحت کر رہا ہے کہ قطعی طور پر ہدایت کا بیان ہوچکا ہے اور الغی(گمراہی) کی وضاحت بھی کر دی گئی ہے۔
قال اﷲ تعالیٰ: ’’ قَدْ أُجِیْبَتْ دَّعْوَتُکُمَا ‘‘ (یونس:۸۹)
کلمہ مذکورہ میں تاء کا دال میں ادغام سیدنا موسیٰ علیہ السلام کی فرعون اور اس کے حواریوں کے خلاف بددعا کے جلد قبول ہو جانے کی طرف اِشارہ کر رہا ہے۔

 

[ساجد]

اِدغام متقاربین
یہ چار حروف ل،ر، ق اور ک میں ہوتا ہے جیسے’’ وَ قُلْ رَّبِّ زِدْنِیْ عِلْمًا ‘‘ (طہٰ:۱۱۴)
قل رب میں لام کا راء میں ادغام تام یہ بیان کر رہا ہے کہ بندۂ مومن کو اللہ رب العزت سے اِضافۂ علم کی دعا میں جلدی کرنی چاہیے۔
اِرشاد باری تعالیٰ ہے:’’ بَلْ رَّفَعَہُ اللّٰہُ اِلَیْہِ وَ کَانَ اللّٰہُ عَزِیْزًا حَکِیْمًا ‘‘ (النساء:۱۵۸)
بل رفع اﷲ إلیہ کا اِدغام رفع عیسیٰ علیہ السلام کے سرعت کا متقاضی ہے۔

 

[ساجد]

اِشمام
اِشمام یہ ہے کہ ہونٹوں کو اس طرح ملانا گویا کہ قاری ضمہ کے پڑھنے کا ارادہ رکھتا ہے لیکن حقیقت میں وہ فتحہ پڑھے یہ قرآن کریم میں سورۃ یوسف میں آیا ہے۔ اِرشاد ربانی ہے: ’’ قَالُوْا یٰٓــأَبَانَا مَالَکَ لَا تَاْمَنَّا عَلٰی یُوْسُفَ ‘‘(یوسف:۱۱)
لا تأمنا میں اِشمام ہے جو اس بات کی طرف اِشارہ ہے کہ جس طرح سامع کو تردد ہوتا ہے کہ آیا قاری فتحہ پڑھ رہا ہے یا ضمہ اسی طرح جب اخوان یوسف علیہ السلام اِجازت طلب کرر ہے تھے تو ان کے قول میں تردد جھلک رہا تھا، کیونکہ وہ بظاہر تو یوسف علیہ السلام کے ناصح ہونے کا اعلان کر رہے تھے لیکن حقیقت میں وہ خائن تھے اسی طرح عملی تردد کی طرف اشمام اشارہ کر رہا ہے۔

 

[ساجد]

سکتات کے معانی پر اثرات
مصحف مدینہ میں موجود ہے کہ امام حفص سے بطریق شاطبی متفق علیہا سکتات کی تعداد پانچ ہے جو درج ذیل ہیں:
(١) عوجا (سورۃ کہف:۱)
(٢) مرقدنا (یٰسین:۵۲)
(٣) من راق (سورۃ قیامۃ:۲۷)
(٤) بل ران (المطففین:۱۴)
(٥) مالیہ ( الحاقہ:۲۸)
جب ہم آیات پر غور کرتے ہیں تو معلوم ہوتا ہے کہ مذکورہ مقامات پر اگرچہ ایک لمحہ کے لیے ہی ٹھہرا جائے، ٹھہرنا ضرورچاہیے، کیونکہ یہ امور ہیں ہی کچھ ایسے کہ تدبر، تفحص اور تحقق کا تقاضا کرتے ہیں۔
مثلاً:’’ وَ لَمْ یَجْعَلْ لَّہٗ عِوَجًا٭پ قَیِّمًا …‘‘ (کہف:۱)
مذکورہ آیت میں عوجاً کا سکتہ اس لیے ہے کہ کچھ لحظہ ٹھہر کر غور وفکر کر لو کہ اس کتاب کی کیا قدرو منزلت ہے اور وہ یہ ہے کہ اس میں کسی قسم کی کجی اور ٹیڑھ پن نہیں ہے بلکہ یہ ایک مستقیم کتاب ہے۔
اِرشادی ایزدی ہے:’’ مَنْ۰ بَعَثَنَا مِنْ مَّرْقَدِنَا ۷پ ہٰذَا مَا …‘‘ (یٰسین:۵۲)
یہاں مرقدنا سے یہ اِشارہ مقصود ہے کہ یہاں ٹھہر کر غور کرو کہ آئندہ جو کلام تم پڑھنے لگے ہو یہ ملائکہ اور اہل ایمان کا کلام ہے نہ کہ کافروں کا۔ کیونکہ اس سے ماقبل کلام میں کافروں نے مسلمانوں سے سوال کیا تھا اس کا جواب دیا جا رہا ہے۔
’’ اِذَا تُتْلٰی عَلَیْہِ ئایٰتُنَا قَالَ أَسٰطِیْرُ الْأَوَّلِیْنَ٭ کَلَّا بَلْ پ رَانَ عَلٰی قُلُوْبِہِمْ مَّا کَانُوْا یَکْسِبُوْنَ ‘‘(المطففین: ۱۳، ۱۴)
یہاں لفظ بل میں سکتہ یہ دعوت دے رہا ہے کہ غور تو کرو کہ لوگوں نے کس وجہ سے قرآن کریم کو جھٹلایا وہ صرف یہ تھا کہ ان کے دلوں میں قبولیت حق کی صلاحیت نہیں تھی وہ کفر وشرک اور عدوان بغی سے زنگ آلود تھے۔

 

[ساجد]

صلہ ھا کی ضمیر کے معانی پر اثرات
اِمام حفص ہر اس ہاء ضمیر پر صلہ کرتے ہیں جس سے ماقبل اور مابعد متحرک ہو لیکن چند کلمات اس قاعدہ سے مستثنیٰ ہیں جو خاص معانی پر دلالت کرتے ہیں۔جیسے
(١) یَرْضَہُ
یہ لفظ سورۃ زمر کی اس آیت میں وارد ہوا ہے :
’’ وَاِنْ تَشْکُرُوْا یَرْضَہُ لَکُمْ ‘‘ (الزمر:۷)
یہاں عدم صلہ اس بات پر دال ہے کہ جوں ہی بندہ اللہ رب العزت کا شکر بجالاتا ہے تو اللہ رب العزت فی الفور اس پر راضی ہوجاتے ہیں۔
(٢) أَرْجِہْ
یہ لفظ یوں استعمال ہوا ہے:
’’ قَالُوٓا أَرْجِہْ وَ أَخَاہُ ‘‘ (الاعراف:۱۱۱)
یہ صلہ اس بات کی طرف اِشارہ کر رہا ہے کہ فرعون کے حواری سیدنا موسیٰ علیہ السلام اور ہارون علیہ السلام کے معاملہ کو بہت ہلکا سمجھ رہے تھے کیونکہ ان کا گمان تھا کہ یہ جادوگر ہیں(نعوذباللہ)
(٣) فَاَلْقِہِ
یہ سورۃ نمل کی آیت
’’ اِذْہَبْ بِکِتٰبِیْ ہٰذَا فَاَلْقِہِ اِلَیْہِمْ ثُمَّ تَوَلَّ ‘‘ (سورۃ النمل:۲۸)
میں آیا ہے جو اس بات پر دال ہے کہ سیدنا سلیمان کے ہاں قوم سبا کی کوئی اہمیت نہیں تھی۔

 

[ساجد]

قواعد تجوید کے ذریعہ بعض احکام کا بھی استنباط ممکن ہے
اللہ رب العزت کا فرمان ہے:
’’ فَمَنْ تَمَتَّعَ بِالْعُمْرَۃِ إِلَی الْحَجِّ فَمَا اسْتَیْسَرَ مِنَ الْھَدْیِ فَمَنْ لَّمْ یَجِدْ فَصِیَامُ ثَلٰثَۃِ أَیَّامٍ فِی الْحَجِّ وَسَبْعَۃٍ إِذَا رَجَعْتُمْ ‘‘ (البقرہ:۱۹۶)
مذکورہ آیت میں ایام فی پر غنہ ہے جو اس بات کی طرف اِشارہ کر رہا ہے کہ ایام حج میں فوراً روزے رکھنا ضروری نہیں بلکہ دوران ایام معاملہ میں وسعت ہے جبکہ وسبعۃ إذا رجعتم کا عدم غنہ اس بات پر دال ہے کہ حاجی کو گھر پہنچتے ہی فوراً روزے رکھنے چاہئیں کسی قسم کی تاخیر نہیں کر سکتا۔

 

[ساجد]

سورۃ الکہف میں اَحکام تلاوت کا معانی پر اَثرات
’’زِدْنٰہُمْ ہُدًی‘‘ کی دال پر قلقلہ ہے جو اللہ رب العزت کی طرف اعطائے کثرت ہدایت پر دال ہے اسی طرح ’’وَرَبَطْنَا عَلیٰ قُلُوْبِھِمْ‘‘ (الکہف:۱۴) میں رَبَطْنَا کا قلقلہ ان کے تعلق کی گہرائی کی طرف اِشارہ کر رہا ہے۔
’’ اِذَا طَلَعَتْ تَّزٰوَرُ عَنْ کَھْفِھِمْ ‘‘ (الکہف:۱۷) میں طَلَعَتْ تَّزٰوَرُ کا ادغام اس طرف اشارہ کر رہا ہے کہ سورج طلوع ہی ان کے کہف کے دائیں طرف ہوتا تھا یہ نہیں کہ پہلے طلوع کا مقام کچھ اور ہوتا بعد ازاں کہف سے دائیں طرف پھرتا۔

 

[ساجد]

٭ سورۃ کہف میں اصحاف کہف کی تعداد بذریعہ قواعد تجوید بھی معین کرنا ممکن ہے۔’’ ثَلٰثَۃٌ رَّابِعُھُمْ کَلْبُھُمْ ‘‘ (الکہف:۲۲)یہاں ثلٰثۃ اور رابعہم کے درمیان عدم غنہ ہے جو اس بات پر دال ہے کہ اس پر تفکیر کی ضرورت نہیں ہے یہاں جلدی سے گزر جاؤ اس کے بعد ’’ خَمْسَۃٌ سَادِسُھُمْ ‘‘ (الکہف:۲۲)میں غنہ اس پر قدرے غور کی دعوت دے رہا ہے اور ’’ سَبْعَۃٌ وَّ ثَامِنُھُمْ ‘‘ (الکہف:۲۲) میں ادغام بھی ہے غنہ جو اس کی طرف اِشارہ کر رہا ہے کہ تعداد اس قابل ہے کہ اس پر اس مسئلہ میں بنیاد رکھی جائے۔
’’ فَإِنِ اتَّبَعْتَنِیْ فَلَا تَسْئَلْنِیْ عَنْ شَیْئٍ حَتّیٰٓ أُحْدِثَ لَکَ مِنْہُ ذِکْرًا ‘‘ (الکہف:۷۰)
یہاں کا اِظہار اس بات پر دال ہے کہ جس طرح یہاں عدم غنہ ہے اس طرح موسیٰ کو عدم سوال کی نصیحت ہے اورٍ حَتّیٰٓ اُحْدِثَ لَک کی مد میں اس بات کی طرف اِشارہ ہے کہ یہاں سے اگر علم کی دولت حاصل کرنی ہے تو ایک لمبا عرصہ ساتھ گزارنا پڑے گا۔
ہم نے اس سلسلہ میں ایک ادنیٰ سی کاوش کی ہے اللہ رب العزت قبول فرمائے اور اہل علم کو قرآن کے اس پہلو پر بھی سوچنے کی توفیق دے۔آمین

٭_____٭_____٭

 

[محمد موسی]

السلام علیکم !محترم ساجد صاحب مجھے یہ مضمون (پی ۔ڈی۔ایف ) فارمیٹ میں چاہیے ۔ممنون ہوں گا ۔ جزاک اللہ خیرا

 

[شاکر]

السلام علیکم !محترم ساجد صاحب مجھے یہ مضمون (پی ۔ڈی۔ایف ) فارمیٹ میں چاہیے ۔ممنون ہوں گا ۔ جزاک اللہ خیرا

وعلیکم السلام ورحمتہ اللہ وبرکاتہ،
محمد موسی بھائی، علم القراءات کے موضوع پر یہ تمام آرٹیکلز جو ساجد بھائی شیئر کر رہے ہیں۔ آپ پی ڈی ایف کی صورت میں ہماری کتب لائبریری سے حاصل کر سکتے ہیں۔

ماہنامہ رشد: قراءات نمبر حصہ اول
ماہنامہ رشد: قراءات نمبر حصہ دوم
ماہنامہ رشد: قراءات نمبر حصہ سوم