مولانا رمضان یوسف سلفی جوار رحمت میں

[خضر حیات]

مورخ اہل حدیث کے سوانح نگار بھی چل بسے !

چترال سے روانہ ہو کر راولپنڈی ایئرپورٹ کیطرف گامزن پی آئی اے کے جہاز فلائٹ نمبر661 کی تباہی کی ہولناک خبریں ابھی گردش میں تھیں کہ ساتھ ہی واٹس ایپ پر ایک اور حادثہ کی خبر کانوں پر ہی نہیں بلکہ دل و دماغ پر صاعقہ بن کر گری ۔
سینکڑوں شخصیات کے حالات زندگی پر درجنوں کتابیں مرتب کرنے والے مولانا اسحاق بھٹی نے اپنی زندگی کی سرگزشت ’ گزر گئی گزران ‘ کے عنوان سے خود بھی مرتب فرمائی ، لیکن ان سے بھی پہلے ان کی خدمات کا اعتراف اوراپنے ’ مرشد عالی قدر ‘ کی قدر دانی کا اعلی ثبوت دیتے ہوئے ایک اور مصنف نے ان کی حیات و خدمات مرتب فرمائیں ، یہ مولانا رمضان یوسف سلفی صاحب تھے ، جنہوں نے ’ مؤرخ اہل حدیث مولانا اسحاق بھٹی ، حیات و خدمات ‘ کے عنوان سے تقریبا اڑھائی سو صفحات تصنیف کیے ۔ جس پر بھٹی صاحب نے ان کا شکریہ اور حوصلہ افزائی ہی نہیں بلکہ کتاب کی خود نظر ثانی کی ، معتقدین بھٹی نے بھی اس کام کو بہت قدر کی نگاہ سے دیکھا ، اور اس گرانقدر تحفے کا ہاتھوں ہاتھ خیر مقدم کیا۔
اللہ کافیصلہ تھا کہ ابھی لوگ بھٹی صاحب کی رحلت (22 دسمبر 2015ء ) کے غم سے سنبھل نہ پائے تھے کہ بروزبدھ 7 دسمبر 2016 بمطابق 8 ربیع الاول 1438ھ کو مولانا رمضان یوسف سلفی بھی چل بسے ۔
مولانا محمد رمضان بن محمد یوسف بن منشی 4 دسمبر 1967 بمطابق 2 رمضان المبارک 1387 ، پنجاب کے معروف صنعتی شہر فیصل آباد کے ایک گاؤں پکی پنڈوری میں پیدا ہوئے ۔ بعد ازاں محمد یوسف صاحب اہل خانہ سمیت فیصل آباد شہر منتقل ہوگئے ، محمد رمضان ابھی پانچویں جماعت میں تھے کہ 79ء میں والد ماجد کا انتقال ہوگیا ، غم روزگار کے لیے محنت مزدوی شروع کردی ، اور ساتھ ساتھ اہل علم سے اٹھتے بیٹھتے علم حاصل کرنے کی تگ و دو میں لگے رہے ، کسی سے صحیح بخاری پڑھی ، کہیں مشکوۃ المصابیح کا ترجمہ پڑھا ،ناظرہ قرآن کا امتحان ہوا تو نمایاں پوزیشن حاصل کرکے نامور اہل حدیث عالم دین مولانا صادق سیالکوٹی رحمہ اللہ کی شاندار کتاب ’ صلوۃ الرسول ’ بطور انعام حاصل کی ، یوں حوصلہ افزائی ہوئی تو جذبہ مزید بڑھا ، مطالعہ وسیع کیا ، جماعتی رسائل پڑھنا شروع کیے ، محققین کی ’ دانش گاہوں ‘ میں آنا جانا شروع ہوگیا ، 13 مئی 1990ء میں اہل حدیث یوتھ فورس کے تحت سیرت رسول پر مضمون نگاری کا ایک مسابقہ منعقد ہوا ، جس میں ہمارے ممدوح نے حصہ لیا ، اور نمایاں پوزیشن رہی ، انعام و اکرام کی شکل میں کتب وصول پائیں تو ہمت پاکر باقاعدہ مضمون نگاری کا سلسلہ شروع کردیا ، اور جماعت کے معروف رسائل و جرائد اور بعض قومی اخبارات میں مختلف موضوعات پر تحریریں بھیجنے لگے ، اور بزبان شاعر :

لگا رہا ہوں مضامین نو کے انبار
خبر کرو میرے خرمن کے خوشہ چینوں کو​

یہ مبارک سلسلہ تادم واپسیں جاری رہا ۔
اس کے علاوہ علماء کی حالات زندگی پر متعدد کتابیں تصنیف فرمائیں ، اسحاق بھٹی رحمہ اللہ پر کتاب کے ماسوا ’ چار اللہ کے ولی ‘ ، مولانا عبد الوہاب دہلوی اور ان کا خاندان ’ ، عقیدہ ختم نبوت کے تحفظ میں علمائے اہل حدیث کی مثالی خدمات ‘ منشی رام سے عبد الواحد تک ‘ جیسی بیش قیمت کتب ان کے لیے صدقہ جاریہ رہیں گی۔ إن شاءاللہ ۔
یدوم الخط فی القرطاس ، و لکن کاتبہ رمیم فی التراب
سلفی صاحب کے ساتھ نہ میری ملاقات تھی ، نہ کوئی مراسلت ، نہ کوئی راز و نیاز ، ان سے محبت و عقیدت کا رشتہ استوار کرنے کے لیے ایک ہی بہانہ کافی تھا کہ وہ مسلک اہل حدیث کے نمایاں خادمین و محسنین میں شمار ہوتے تھے ، اس نسبت سے مجھے ان کی تحریر کردہ کچھ سوانح عمریاں پڑھنے کا شرف حاصل ہوا تھا ۔
جماعت اہل حدیث کے جلیل القدر مؤرخ عبد الرشید عراقی صاحب ، سلفی صاحب کی ایک کتاب کے مقدمہ میں لکھتے ہیں : ’ مولانا محمد رمضان یوسف سلفی حفظہ اللہ جماعت اہل حدیث پاکستان کے معروف قلمکار ہیں ، ان کے مضامین و مقالات مختلف موضوعات پر ملک کے مؤقر رسائل و جرائد میں شائع ہوتے رہتے ہیں ، ان مضامین و مقالات کے مطالعہ سے سلفی صاحب کے تبحر علمی ، ذوق مطالعہ اور وسعت معلومات کا اندازہ ہوتا ہے ‘ ( عقیدہ ختم نبوت کے تحفظ میں علمائے اہل حدیث کی مثالی خدمات ص نمبر 19 )
بھٹی صاحب پر ان کی کتاب کے ناشر مولانا عبد الحنان جانباز صاحب کے الفاظ کو اپنے جذبات کی عکاسی سمجھتے ہوئے نقل کرنا چاہوں گا :
’ مولانا محمد رمضان یوسف سلفی صاحب ہمارے اخبارات ، جرائد اور رسائل بینوں میں معروف اور قابل تعریف شخصیت ہیں ، ایک عرصے سے لکھ رہے ہیں اور خوب لکھ رہے ہیں ، موصوف سے ملاقات سے مجھ سمیت ہر کسی کا یہی خیال ہوتا ہے کہ بڑی بھاری بھر کم جسم و جثہ اور بلند گلہ کی مالک شخصیت ہوں گے ، اگرچہ ہیں تو ایسے ہی ، مگر مطالعہ و قلم کے اعتبار سے ۔۔۔ ان کے قلم کی مہارت کثرت مطالعہ کی غماز ہے ۔ ‘
ان کو جاننے والے کچھ اہل علم نے ان کی وفات کی خبر سنتے ہی ، فوری تاثرات کا اظہار کیا ،جن میں سے استاد محترم ڈاکٹر حسن مدنی (مدیر ماہنامہ محدث لاہور ) کے الفاظ کچھ یوں تھے :
’’ انا للہ وانا الیہ راجعون ، مولانا رمضان یوسف سلفی کی وفات باعث رنج والم ہے، صاحب طرز ادیب اور تاریخ واعلام اہل حدیث کے نامور خادم تھے۔ مولانا بھٹی رحمہ اللہ کی وفات کے بعد اس میدان میں اپنی مثال آپ تھے۔اللہ درجات بلند فرمائے اور نیک اعمال کو توشۂ أخرت بنائے۔ ‘‘
اس کے علاوہ کئی ایک اہل علم نے سوشل میڈیا پر ان کے بارے میں اچھے تاثرات ، اور ان کے ساتھ اپنی بھولی بسری یادوں کو تازہ کیا ، ان کی وفات کے اعلانات میں انہیں ’ تاریخ دان ، مؤرخ اہل حدیث ‘ جیسے القابات سے ذکر کیا گیا ہے ، امید ہے ، متعدد شخصیات کو بصورت تحریر حیات جاودانی بخشنے والے اس قلم کے سپاہی کو دل کھول کر خراج تحسین پیش کیا جائے گا ۔ و هل جزاء الإحسان إلا الإحسان
مولانا کی پیدائش چار دسمبر اور وفات سات دسمبر کو ہوئی ، اس طرح شمسی تقویم کے مطابق ان کی عمر مکمل 49 سال اورکچھ دن ، جبکہ قمری حساب سے 50سال اور چھ مہینے بنتی ہے ۔
ان کے مختصر حالات زندگی انہیں کے قلم سے دیکھنے کے لیے ملاحظہ فرمائیں ( مولانا اسحاق بھٹی ، حیات و خدمات ‘ ص نمبر 10 تا 14 )
اللہ تعالی مرحوم کی مغفرت فرمائے ، اور ان کی دینی و علمی خدمات کو ان کے لیے توشہ آخرت بنائے ، ان کے علمی و تحقیقی سلسلے جو تشنہ کام رہ گئے ، بعد والوں کوانہیں مکمل کرنے کی توفیق عنایت فرمائے ۔

حافظ خضر حیات ، مدینہ منورہ ، عزیزیہ ، بروز جمعہ 9 دسمبر 2016ء / 10 ربیع الاول 1438 ھ​

 

[خضر حیات]

پی آئی اے حادثہ میں لوگ اس قدر مصروف ہوئے کہ مسلک اہل حدیث کا یہ حادثہ کسی کو یاد ہی نہ رہا ، جس دن فوت ہوئے ، اسی دن ان کی خبر لگ جانی چاہیے تھی ، خیر اللہ نے توفیق دی ، ایک مختصر تحریر کے ذریعے ، اس کا مداوا کرنے کی کوشش کی ہے ۔ اللہ تعالی ہمیں اپنے محسنین کی قدر کرنے کی توفیق عطا فرمائے ۔
مولانا کی کچھ کتب محدث لائبریری پر موجود ہیں ، جو یہاں دیکھی جاسکتی ہیں ۔

 

[محمد طارق عبداللہ]

انا لله وانا اليه راجعون

اللہ رب العالمین انکی اخطاء کو معاف فرمائے ، اعزاء و اقارب کو صبر جمیل عطاء فرمائے ۔

 

[اسحاق سلفی]

إِنَّا لِلَّهِ وَإِنَّا إِلَيْهِ رَاجِعُونَ
اللہ کریم اپنی خاص رحمت سے ان کی مغفرت فرمائے ،
بہت مشہورمعروف عالم تھے ، محدث میگزین میں ان کے کئی دفعہ مضامین پڑھنے کا موقع ملا ،
«اللهُمَّ، اغْفِرْ لَهُ وَارْحَمْهُ وَعَافِهِ وَاعْفُ عَنْهُ، وَأَكْرِمْ نُزُلَهُ »

محقق اہل حدیث میر ابراہیم سیالکوٹی رحمہ اللہ کی شاندار کتاب ’ صلوۃ الرسول ’ بطور انعام حاصل کی ،

شاید لکھنا چاہ رہے تھے :
محقق اہل حدیث مولانا صادق سیالکوٹی رحمہ اللہ کی شاندار کتاب ’ صلوۃ الرسول ’ بطور انعام حاصل کی ‘‘

 

[عمر اثری]

إِنَّالِلَّهِ وَإِنَّا إِلَيْهِ رَاجِعُونَ
اللہ انکی مغفرت فرمائے اور جنت میں اعلی مقام عطا فرمائے آمین

 

[محمد نعیم یونس]

انا للہ وانا الیہ راجعون
اللھم اغفر لہ

 

[محمد عامر یونس]

انا للہ و انا الیہ راجعون

اللہ تعالی ان کی مغفرت کرے اور جنت الفردوس میں اعلٰی مقام عطاء فرمائے اور لواحقین کو صبر جمیل عطا فرمائے ۔ آمین یا رب العالمین

 

[خضر حیات]

شاید لکھنا چاہ رہے تھے :
محقق اہل حدیث مولانا صادق سیالکوٹی رحمہ اللہ کی شاندار کتاب ’ صلوۃ الرسول ’ بطور انعام حاصل کی ‘‘

سیدھا سیدھا وہم ہے ۔ اللہ تعالی آپ کو جزائے خیر دے ۔ تصحیح کردیتا ہوں ۔

 

[T.K.H]

اللہ تعالی ان کی مغفرت فرما کر جنت الفردوس میں اعلٰی مقام اور ان کے لواحقین کو صبرِ جمیل عطا فرمائے ۔ آمین یا رب العالمین !

 

[خضر حیات]

وہ میری آئیڈل شخصیات میں سے ایک تھا
دنیا فانی ہے ۔۔۔ تین روز قبل سماجی ویب سائٹس کے ذریعہ یہ اطلاع پائی کہ مورخ اہلحدیث جناب رمضان یوسف سلفی رحمہ اللہ دار فانی کو خیر باد کہتے ہوئے ابدی زندگی کی طرف کوچ کر گئے ہیں، یہ اطلاع کیا آئی میرے سامنے ماضی کے دریچے سے کھل گئے ایک خوبصورت ہنستا مسکراتا چہرہ آنکھوں کے سامنے آکر ٹھر ساگیا میں ان لمحات کو یاد کرنے لگا جب ان سے پہلی بار ملاقات ہوئی اور پھر ہوتی ہی رہی سلفی صاحب رحمہ کا وقتا فوقتا
جامعہ تعلیم الاسلام ماموں کانجن میں آنا جانا ہوتا رہتا تھا بڑے جذبے سے مخزن کتب میں جاتے اورایسے گھومتے جیسے کسی جوہر کی تلاش میں ہوں ایک بار ان کی دوکان جو امین پور بازار میں ہے وہاں جانے کا اتفاق ہوا چائے وائے بنا ہوچھے منگوائی گئی خوب کھل کر باتیں ہوئیں اپنے لکھاری بننے کا سبب اور کہانی بھی سنائی کہ کیسے ایک دوردراز کا آدمی اس بحر محیط میں کودا اور ایسا غوطہ زن ہوا کہ آج ہم اس گوہر نایاب کو مورخ کا نام دیکر رحمہ اللہ کے راگوں سے نوازے ہوئے ہیں.
بے تحاشا سادہ انسان، ہنس مکھ، متواضع شخصیت اور تکلف سے بے پایاں دوری میں نے ان میں واضح پائی، میں سمجھتا ہوں کہ یہ چند ان شخصیات میں سے ایک ہیں جن کی کوئی ایسی ادا اللہ کو پسند آجاتی ہے کہ اللہ ان سے کام لے لیتا ہے.
اللہ کی حسنات کو قبول کریں جنت میں اعلی مقام نصیب کریں اور بشری غلطیوں سے درگزر کریں یقینا وہ غفور الرحیم ہے.
اللھم اوسع قبرہ ونورلہ وارفع درجتہ فی المھدیین.
اللھم آمین.

تحریر : ابو رشدان خالد​