نماز قائم کرو اور زکوٰۃ ادا کرو

[محمد نعیم یونس]

بنی اسرائیل کو بھی نماز اور زکوٰۃ کا حکم دیا گیا تھا

زید بن سلام سے روایت ہے کہ ان سے ابو سلام نے کہا کہ ان سے حارث اشعری نے بیان کیا کہ رسول اللہ ﷺ نے فرمایا:اللہ نے یحییٰؑ کو پانچ باتوں کے متعلق حکم دیا تھا کہ ان پر خود بھی عمل کریں اور بنی اسرائیل سے کہیں کہ وہ بھی ان پر عمل کریں یحییٰؑ کو اس میں کچھ تاخیر ہونے لگی تو عیسیٰؑ نے فرمایا:اللہ نے آپ کو پانچ باتوں کے بارے میں حکم دیا تھا کہ آپ خود بھی ان پر عمل پیرا ہوں اور بنی اسرائیل سے بھی ان پر عمل کرنے کو کہہ دیں تو یا تو آپ ان سے کہہ دیجئے یا پھر میں ہی ان سے کہہ دوں یحییٰؑ نے فرمایا کہ مجھے ڈر ہے کہ اس سلسلہ میں آپ نے مجھ سے سبقت کی تو کہیں میں زمین میں دھنسا نہ دیا جاؤں یا کسی عذاب میں گرفتار نہ ہو جاؤں اس کے بعد انھوں نے لوگوں کو بیت المقدس میں جمع کیا جب وہ خوب بھر گیا اور لوگ گیلریوں تک بیٹھ گئے تو فرمایا:اللہ نے مجھے پانچ باتوں کے متعلق حکم دیا ہے کہ خود بھی ان پر عمل کروں اور تمہیں بھی ان پر عمل کرنے کی تاکید کروں پہلی بات یہ ہے کہ تم اللہ ہی کی عبادت کرو اور اس کے ساتھ کسی چیز کو شریک نہ کرو کیونکہ جو شخص اللہ کے ساتھ شرک کرے اس کی مثال ایسی ہے جیسے ایک شخص صرف اپنے سونے چاندی کے مال سے ایک غلام خریدے اور اسے بتا دے کہ دیکھ یہ میرا گھر ہے اور یہ میرا کام ہے ، تو کام کرنا اور اجرت مجھے دیتے رہنا وہ کام تو کرے مگر اجرت اپنے آقا کے بجائے کسی اور شخص کو دیدے بھلا تم میں یہ کو ن پسند کرے گا کہ اس کا غلام ایسا ہو اور یہ کہ اللہ نے تمہیں نماز کا حکم دیا ہے لہٰذا جب تک نماز میں رہو ادھر ادھر نہ دیکھو کیونکہ اللہ اپنے بندے کی طرف پوری طرح متوجہ رہتا ہے جب تک وہ ادھر ادھر نہیں دیکھتا اور اس نے تمہیں روزے کا حکم دیا ہے اس کی مثال ایسی ہے جیسے کسی جماعت میں ایک شخص ہو جس کے پاس ایک تھیلی ہو جس میں مشک ہو اور ہر شخص کو اس کی خوشبو اچھی معلوم ہوتی ہو اور اللہ کے نزدیک روزہ دار کی بو مشک کی خوشبو سے زیادہ پیاری ہوتی ہے اور اس نے تمہیں صدقے کا حکم دیا ہے اس کی مثال ایسی ہے جیسے ایک شخص کو دشمن نے قید کر لیا ہو اور اس کے ہاتھ اس کی گردن سے باندھ دئے ہوں اور اس کی گردن مارنے کے لیے اسے لے جا رہے ہوں وہ کہے کہ میں اپنی جان کے عوض تھوڑا اور بہت سب دیتا ہوں اور اس طرح فدیہ دے کران سے اپنی جان چھڑا لے اور اس نے تمہیں ذکر اللہ کا حکم دیا ہے کیونکہ اس کی مثال ایسی ہے جیسے ایک شخص ہو جس کے تعاقب میں دشمن تیزی سے آ رہا ہو، یہاں تک کہ یہ شخص کسی مضبوط قلعے کے اندر آ جائے اور اپنی جان کو دشمن سے بچا لے اسی طرح بندہ اللہ کے ذکر کے سوا کسی طرح بھی اپنے آپ کو شیطان سے نہیں بچا سکتا معلوم ہوا کہ نماز، زکوٰۃ ، صدقات یہ سب شیطان سے بچاؤ کے لئے ایک ڈھال کی حیثیت رکھتے ہیں (رواہ الترمذی)۔

 

[محمد نعیم یونس]

زکوٰۃ نہ دینا علامت قیامت میں سے ہے

حضرت ابوہرہرہؓ کہتے ہیں کہ رسول اللہ ﷺ نے فرمایا:جب مال غنیمت کو ذاتی دولت قرار دے لیا جائے اور امانت کو غنیمت قرار دے لیا جائے اور زکوٰۃ کو تاوان سمجھا جائے اور علم کو دین کو دنیاوی غرضوں کے لیے حاصل کیا جائے اور مرد عورت کی اطاعت کرنے لگے اور اپنی ماں کی نافرمانی کرے اور اسے رنج دے اور اپنے دوست کو ہم نشین بنائے اور اپنے باپ کو دور کر دے اور مسجدوں میں آوازیں بلند ہوں اور قبیلہ کی سرداری قبیلہ کا ایک فاسق شخص کرے اور قوم کا سربراہ قوم کا نہایت کمینہ شخص ہو اور آدمی کی تعظیم اس کے شر سے بچنے کے لیے کی جائے اور گانے والی لونڈیاں اور باجے پھیل جائیں اور شرابیں پی جانے لگیں اور اس امت کے پچھلے لوگ اس کے اگلے لوگوں کو برا کہنے لگیں تواس وقت انتظار کروسرخ آندھی، زلزلہ، زمین کے دھنسنے ، صورتوں کے مسخ ہونے ، پتھروں کے برسنے کا اور ان پے درپے نشانیوں کا گویا وہ موتیوں کی ایک ٹوٹی ہوئی لڑی ہے جس سے موتی پے درپے گر رہے ہوں (رواہ الترمذی)

چونکہ اس پیشن گوئی میں زکوٰۃ کا بھی ذکر ہے اس لئے پوری حدیث لکھنے کی ضرورت پڑی اس کے علاوہ کتب احادیث میں کثرت کے ساتھ مثالیں موجود ہیں .

یہ چند مثالیں ہیں جس سے نماز اور انفاق کی اہمیت کا اندازہ لگا سکتے ہیں اس کے بعد بالترتیب ابواب میں آیات قرآنی اس طرح ہیں پہلا باب ’’اقیمو الصلوٰۃ واتوالزکوٰۃ‘‘ یعنی وہ آیات جس میں نماز اور زکوٰۃ کا ذکر ہے دوسرا باب ’’اقیموالصلوٰۃ وممارزقنھم ینفقون‘‘ یعنی جس میں نماز اور خرچ کرنے کا ذکر ہے تیسرا باب ’’الصلوٰۃ‘‘ یعنی جس میں صرف نماز کا ذکر ہے چوتھا باب ’’الانفاق‘‘ جس میں صرف خرچ کا ذکر ہے پانچواں باب میں بخل کی مذمت کا ذکر ہے چھٹواں باب میں نقشہ آئینہ نماز اور آئینہ زکوٰۃ اور مختصر نماز کا طریقہ ہے ساتواں باب میں سجدۂ تلاوت اور آٹھواں اور آخری باب مسجدوں و دیگر سجدوں کا مختصر بیان ہے ۔

*****​

 

[محمد نعیم یونس]

پہلا باب

پرہیزگاروں کی صفات

بسم اللہ الرحمن الرحیم
الٓمٓ ذالک الکتاب لاریب فیہ ھدے للمتقین الذین یؤمنون با الغیب ویقیمون الصلوٰۃ وممارزقنھم ینفقون(البقرہ۲:۱۲۳)
اس کتاب میں کوئی شک نہیں ، پرہیزگاروں کیلئے ہدایت کرنے والی ہے ، جو لوگ غیب پر ایمان لاتے ہیں اور نماز قائم کرتے ہیں اور ہمارے دیئے ہوئے میں خرچ کرتے ہیں ۔

توضیح:الحمدللہ اللہ تعالیٰ کی توفیق سے موضوع کتاب کے تحت قرآن کریم کی پہلی آیات کی توضیح کا شرف حاصل کر رہا ہوں ۔
قرآن کریم اللہ کی کتاب ہے اور اس سے صرف ان لوگوں کو ہدایت مل سکتی ہے جو اللہ سے ڈرنے والے ہیں ، مفسر القرآن حضرت ابن عباس رضی اللہ عنہ یوں تفسیر فرمائی ہے کہ ’’متقین وہ لوگ ہیں جو ایمان لا کر شرک سے دور ہو جائیں اور اللہ تعالیٰ کے جملہ احکامات کو بجا لائیں ‘‘غیب پر ایمان کیا ہے وہی نا جو قرآن میں اور احادیث نبوی ﷺ میں بتایا گیا ہے پھر متقین کی علامتوں سے اہم علامت یہ بتائی گئی ہے کہ یہ لوگ نماز کو قائم کرنے والے ہوتے ہیں اور یہ مال جو اللہ تعالیٰ نے ہمیں بطور امانت دے رکھا ہے اس میں سے فی سبیل اللہ خرچ کرتے ہیں پھر یہ صفات جن میں ہوں گی وہی متقی ہیں اور یہی اللہ کے پسندیدہ بندے ہیں اس کے بعد کی چوتھی آیت میں مزید تشریح کے ساتھ لوگوں کو اللہ پر اور تمام رسولوں پر اور جو کچھ ان پر نازل ہوا ہے ایمان رکھنے کی تاکید کے ساتھ کامیابی و کامرانی کی سند دی گئی ہے اللھم اجعل منھم آمین مسلمانو تم نماز قائم کرنے والے اور ضرورت مندوں و حاجت مندوں پر خرچ کرنے والے بن جاؤ تاکہ ہم سے اللہ تعالیٰ خوش رہے اور ہم اس کی بندگی کا حق ادا کر سکیں ۔

واقیموالصلٰوۃ واتوالزکٰوۃ وارکعوامع الراکعین (البقرہ۲:۴۳)
اور نمازوں کو قائم کرو اور زکوٰۃ دیتے رہو اور رکوع کرنے والوں کے ساتھ رکوع کیا کرو۔

توضیح:اقامت نماز اور اقامت زکوٰۃ کے بارے میں قرآن کریم کی پہلی آیت ہے اس کے پہلے کی آیات میں یہود و نصاریٰ کو تنبیہ کی گئی ہے کہ تم حق نہ چھپاؤ جب کہ تمہیں اس بات کا علم ہے کہ اللہ کے پیغامبر حضرت محمد رسول اللہ ﷺ سچے رسول ہیں اور آپ پر جو پیغام نازل ہو رہا ہے وہ سچا ہے ، یہ جانتے ہوئے بھی تم کس ہٹ دھرمی میں ہو اور اب حق کو تسلیم کرتے ہوئے رحمۃ اللعلمین ﷺ کے ساتھ مل کر نمازیں قائم کرو اور زکوٰۃ کی ادائیگی بھی کرتے رہو رکوع و سجود میں اصحاب کرام کے ساتھ شامل رہا کرو آیت مذکورہ سے کئی مسائل مستنبط ہوتے ہیں مثلاً:حالت نماز میں امام کی پیروی ، کسی بھی ارکان میں امام سے سبقت نہ ہو اور جس حالت میں امام ہو بعد میں شریک ہونے والے اسی حالت میں شامل ہو جائیں اقامت صلوٰۃ و اقامت زکوٰۃ سے دین محمدی ﷺ میں عمل پیرا ہونے کا حق ادا ہو گا وغیرہم۔

واذاخذنامیثاق بنی اسرائیل واقیموالصلوٰۃ واتوالزکوٰۃ وانتم معرضون(البقرہ۲:۸۳)
اور جب ہم نے بنی اسرائیل سے وعدہ لیا کہ تم اللہ تعالیٰ کے سوا دوسرے کی عبادت نہ کرنا اور ماں باپ کے ساتھ اچھا سلوک کرنا اور اسی طرح قرابت داروں اور یتیموں اور مسکینوں کے ساتھ اچھا سلوک کرنا اور لوگوں کو اچھی باتیں کہنا اور نمازیں قائم کرنا اور زکوٰۃ دیتے رہنا لیکن تھوڑے سے لوگوں کے علاوہ تم سب پھر گئے اور منہ موڑ لیا۔

توضیح:اللہ تعالیٰ نے بنی اسرائیل سے جو عہد و پیماں لیا مذکورہ آیت میں واضح ہے جس میں حقوق اللہ اور حقوق العباد کی مثال دی گئی ہے نماز قائم کرنا اور زکوٰۃ کی ادائیگی کرتے رہنا یہ بھی ایک اہم بات ہے جواس شریعت میں بھی بنی اسرائیل کو کرنے کی تاکید کی گئی تھی مگر بہت کم ہی لوگوں نے اس پر عمل کیا ورنہ اکثریت نے کفر کا راستہ اختیار کیا اسی کفر کے سبب قوم عذاب الٰہی کا شکار ہوئی امت محمدیہ ﷺ کو بھی مذکورہ باتیں کا حکم دیا گیا ہے مگر کتنے لوگ ہیں کہ اس سے منہ موڑے ہوئے ہیں ۔

 

[محمد نعیم یونس]

واقیموالصلوۃ واتولزکوٰہ وماتقدموالانفسکم من خیر تجدوہ عند اللہ ان اللہ بماتعملون بصیرہ(البقرہ۲:۱۱۰)
ترجمہ :تم نمازیں قائم رکھو اور زکوٰۃ دیتے رہا کرو اور جو کچھ بھلائی تم اپنے لئے آگے بھیجو گے وہ سب کچھ اللہ کے پاس پا لو گے بے شک اللہ تعالیٰ دیکھ رہا ہے جو کچھ تم کر رہے ہو

توضیح:یہود و نصاریٰ رحمۃ اللعلمین رسول اللہ ﷺسے اور مومنین سے بہت زیادہ حسد کرتے تھے اسلام کی شان و شوکت کو دیکھ کر جلے مرتے تھے دوسرے لوگوں کو مسلمانوں کے خلاف بھڑکاتے تھے اور اس کو شش میں تھے کہ مسلمان دین اسلام سے پھر جائیں اللہ تعالیٰ نے مذکورہ آیت نازل فرمائی کہ آپ ان لوگوں سے درگزر کا معاملہ کریں گویا صبر و استقلال کی تعلیم دی گئی ہے اور مومنوں کو تاکید کی گئی ہے کہ نماز قائم کریں اور زکوٰۃ ادا کرتے رہیں اللہ تعالیٰ اس سے دنیا میں تمہیں غلبہ اور رحمت و مدد عطا کرے گا اور آخرت میں جہاں ایک ایک نیکی کے لئے ترسیں گے وہاں اجر و ثواب کا ذخیرہ نصیب کرے گا ان شاء اللہ۔

لیس البران تولوا واتی المال علی حبہواقام الصلوۃ واتی الزکوٰۃ اولئک الذین صدقو واولئک ھم المتقون (البقرہ۲: ۱۷۷)
ترجمہ :نہیں ہے ساری بھلائی مشرق و مغرب کی طرف منہ کرنے میں لیکن بھلائی اس میں ہے کہ جو اللہ پر اور قیامت کے دن پر اور فرشتوں پر اور اللہ کی کتاب پر اور نبیوں پر ایمان لے آئے اور جو اللہ کی محبت میں اپنا مال خرچ کرے قرابت داروں اور یتیموں اور مسکینوں اور مسافروں اور سوال کرنے والوں پر اور غلاموں کو آزاد کرنے میں اور نماز قائم کرے اور زکوٰۃ ادا کرے اور جب وعدہ کرے تو اسے پورا کرے اور صبر کرے ، تنگدستی دکھ درد میں اور حالت جنگ میں یہی توسچے لوگ ہیں اور یہی پرہیزگار متقین ہیں ۔

توضیح:آیت مذکورہ میں ایمان کا ماحصل بیان کیا گیا ہے پہلے مومنوں کا قبلہ بیت المقدس کی طرف تھا بعد میں حکم نازل ہوا کہ اپنا چہرہ مسجد حرام کی طرف پھیر لیں مومنوں نے حکم الٰہی کی تعمیل فرمائی مگر بعض اہل ایمان کو شاق گزرا تو اللہ رب العلمین نے آیت ہٰذا نازل فرما کر یہ واضح فرما دیا کہ اصل مقصد اطاعت الٰہی ہے اس کا جو حکم ہے اسے تسلیم کر لیا جائے صحابی اجل حضرت ابوذر رضی اللہ عنہ نے رحمۃ اللعلمین رسول اللہ ﷺسے عرض کہ حضور ایمان کیا ہے ؟تو آپ ﷺ نے آیت مذکورہ پڑھ کر سنا دی (ابن ابی حاتم) اسی طرح حضرت ابوذر رضی اللہ عنہ سے کسی نے ایسا ہی ایمان کے بارے سوال کیا تو آپ نے بھی یہی آیت پڑھ کر سنا دی اور فرمایا کہ میں نے بھی حضورﷺ سے یہی سوال کیا تو آپؐ نے بھی یہی آیت پڑھ کر سنائی۔

آیت مذکورہ میں دیگر حقوق کے ساتھ اقامت نماز اور اقامت زکوٰۃ کا بھی ذکر خاص ہے ہمیں چاہئے ہم بھی ان باتوں پر عمل کرنے والے بن جائیں تاکہ ہم مومن ہونے کا حق ادا کر سکیں ۔

 

[محمد نعیم یونس]

ان الذین امنواوعملوالصلحت واقاموالصلوۃ واتوالزکوٰۃ لھم اجرھم عندربھم ولاخوف علیھم ولاھم یحزنون (البقرہ۲:۲۷۷)
ترجمہ :بے شک جو لوگ ایمان لائے اور نیک اعمال کرتے رہے اور نمازیں قائم کرتے رہے اور زکوٰۃ ادا کرتے رہے ان کا اجر اللہ رب العلمین کے پاس ہے ان پر نہ تو کوئی خوف ہو گا اور نہ کوئی رنج و غم۔

توضیح:اللہ تعالیٰ نے اس سے پہلے کی آیات میں سود اور بیاج کی حرمت و قباحت و نقصان اور تجارت کی حلت و فوائد بیان فرمائے ہیں جو بھی مومن و مسلمان سود کی مہلک و خطرناک دلدل میں پھنسے گا وہ کبھی بھی کامیاب نہ ہو گا اور جو شخص صدقہ و خیرات کرتے رہے گا اس کے کاروبار میں برکت و رحمت نازل ہو گی اور اس کے بعد بتایا گیا کہ ایمان لانے کے بعد نام کے مسلمان نہ رہیں بلکہ عمل صالح نیک اعمال کرتے رہیں نیک اعمال کی اہم علامت اقامت نماز اور زکوٰۃ کی ادائیگی ہے جس سے دنیا و آخرت کی سعادتیں نصیب ہوں گی اور اس کے چھوڑنے والے نہایت بدبخت اور شقی ہیں ۔

الم ترالی الذین قیل لھم کفوا ایدیکم واقیموالصلوٰۃ واتوالزکوٰۃ فلماکتب والاخرۃ خیرلمن التقے ولاتظمون فتیلا (النسآء۴:۷۷)
ترجمہ :کیا اپ نے انہیں نہیں دیکھا جنھیں کہا گیا تھا کہ اپنے ہاتھوں کو روکے رکھو اور نمازیں قائم کرو اور زکوٰۃ ادا کرتے رہو پھر جب ان لوگوں کو جہاد کا حکم دیا گیا تو اسی وقت ان کا ایک گروہ اس قدر ڈرنے لگا جیسے اللہ کا ڈر ہو بلکہ اس سے بھی زیادہ ڈر اور کہنے لگے اے ہمارے رب تو نے ہم پر جہاد کیوں فرض کر دیا؟کیوں ہمیں تھوڑی سی زندگی اور نہ جینے دی آپ کہہ دیجئے کہ دنیا کا فائدہ تو بہت ہی کم ہے اور پرہیزگاروں کے لئے تو آخرت ہی بہتر ہے تم پر ایک دھاگے کے برابر بھی ظلم نہ کیا جائے گا۔

توضیح:ابتدا اسلام میں جبکہ مسلمان مکۃ المکرمہ میں کمزور اور کم تھے وہاں مشرکین ہر اعتبار سے فوقیت رکھتے تھے اور مومنین پر ظلم کے پہاڑ توڑے ہوئے تھے رحمۃ اللعلمین رسول اللہ ﷺ اپنے جاں نثاروں کو صبر و استقلال کی تعلیم دیتے رہتے تھے ادھر مومنین کے جذبات کفار سے مقابلہ کے لئے بے تاب تھے چونکہ اب تک پرامن دعوت کا کام چل رہا تھا مشرکین کے رد عمل میں کوئی ایسی کاروائی کرنے کی آپﷺ نے اجازت نہیں دی تھی جس سے تنازعے پیدا ہو اور توحید کی دعوت میں کوئی رکاوٹ اکثر مومنین کے زبانوں میں آ جاتا تھا کہ کب جہاد کی آیات نازل ہوں اور ہم کفار کی اینٹ سے اینٹ بجا دیں پھر طویل عرصہ کے بعد اللہ تعالیٰ نے ہجرت کا حکم دیا لوگ مکہ المکرمہ چھوڑ مدینہ المنورہ چلے گئے جہاں مومنین کو ہر اعتبار سے تعاون ملا اور اسلام پھولا پھلا اور مومنین کو راحت نصیب ہوئی اسلام کی اشاعت کے لئے راہیں ہموار ہوئیں ۔

بعد ہجرت اللہ تعالیٰ نے جہاد کے احکامات نازل فرمائے جہاد کا حکم نازل ہوتے ہی کچھ اللہ کے بندے خوف زدہ ہو گئے میدان جنگ کے تصورات سے بشری تقاضے کے تحت گھبراہٹ میں ان کی زبانوں سے یہ الفاظ نکل گئے کہ اے اللہ ابھی جہاد کیوں فرض ہو گیا اسی پس منظر کو مذکورہ آیات میں بیان کیا گیا ہے ۔

اس سے قبل مومنوں کو حکم دیا گیا کہ نمازیں قائم کرو اور زکوٰۃ ادا کرتے رہو اہل ایمان برابر نماز کی پابندی اور زکوٰۃ کی ادائیگی کرتے تھے لیکن تمنا کرتے تھے کہ جہاد بھی فرض ہو جائے احکامات نازل ہوتے ہی مومنوں نے آمنا و صدقنا فرما کر رضی اللہ عنھم و رضو عنہ کے القاب سے ملقب ہوئے البتہ منافقین کا گروہ تا دم آخر حیلے بہانے پر قائم رہے آخر ان کا انجام من الدرک الاسفل من النار ہوا۔

 

[محمد نعیم یونس]

لکن الراسخون فی العلم منھم والمومنون یومنون بمآ انزل الیک ومآ انزل من قبلک والمقیمین الصلوٰۃ والموتون الزکوٰۃ والمومنون باللہ والیوم الاخراولئک سنوتیھم اجراً عظیما(النسآء:۱۶۲)
ترجمہ :لیکن ان میں سے جو کامل اور مضبوط علم والے ہیں اور مومن ہیں ایمان لاتے ہیں اس پر جو آپؐ کی طرف اتارا گیا اور اس پربھی جو آپ سے پہلے اتارا گیا اور وہ نمازوں کو قائم کرنے والے ہیں اور زکوٰۃ کے ادا کرنے والے ہیں اور اللہ پر روز قیامت کے دن پر ایمان رکھنے والے ہیں ، یہی تو ہیں جنھیں ہم بہت بڑے اجر و ثواب سے نوازنے والے ہیں

توضیح:اہل کتاب یہود و نصاریٰ کی سرکشی و طغیانی ظلم و زیادتی و حد سے تجاوز و حرام خوری کی وجہ سے ان پر حلال اور پاکیزہ چیزیں حرام کر دی گئی تھیں اور انہیں ان کی حرکتوں کی سزا ملی تھی اور عذاب الٰہی ایسے لوگوں کے لئے تیار ہے ۔

مگر کچھ پختہ علم رکھنے والے ان میں بھی تھے جو آپ ﷺ پر ایمان لے آئے جیسے حضرت عبداللہ بن سلام و حضرت ثعلبہ بن سعید و حضرت اسید بن عبید اللہ حضرت زید بن ابن سعید رضی اللہ تعالیٰ عنھم جن کی تعریف آیت مذکورہ میں ہے کہ وہ اللہ پر یوم آخرت اور کتاب ہذا (قرآن) پر اور سابقہ کتب (توریت، زبور، انجیل) پربھی ایمان رکھتے اور ان کی خاص صفات کہ وہ نمازوں کو قائم کرنے والے ہیں اور زکوٰۃ ادا کرنے والے ہیں ایسے ہی لوگوں کے لئے اللہ رب العلمین اجر عظیم کا وعدہ فرمایا ہے ۔

ولقداخذاللہ میثاق بنی اسرائیل وبعثنامنھم اثنی عشر نقیبا وقال اللہ انی معکم لئن اقمتم الصلوۃ واتیتم الزکوٰۃ وامنتم برسلی (المآئدۃ۵:۱۲)
ترجمہ :اور تحقیق کہ اللہ نے بنی اسرائیل سے عہدو پیمان لیا، اور انہیں میں سے ہم نے بارہ سرداروں کا انتخاب کیا، اور اللہ نے فرما دیا کہ بے شک میں تمہارے ساتھ ہوں اگر تم نماز کو قائم رکھو گے اور زکوٰۃ دیتے رہو گے اور میرے رسولوں پر ایمان رکھو گے اور ان کی مدد کرتے رہو گے اور اللہ کو قرض حسنہ دیتے رہو گے (فی سبیل اللہ خرچ کرنا)تو ضرور بالضرور میں تمہاری خطاؤں کو درگزر کرونگا اور ضرور تمہیں ان جنتوں میں داخل کرونگا جن کے نیچے سے نہریں بہہ رہی ہیں اب جوتم میں سے اس عہد و پیمان کے بعد اس عہد کو توڑ دے تو یقیناً وہ گمراہی کے راستے میں چل پڑا۔

توضیح:آیت ہٰذا میں بنی اسرائیل کے ایک عہد و پیماں کا ذکر ہے جو آیت کے ترجمہ میں آ گیا ہے اللہ نے قیامت تک کے آنے والوں کے لئے عہد کی وفا داری کا حکم دیا ہے اسلام کے پیغام کو لوگوں تک پہنچانے کے اصول بھی بیان کئے گئے ہیں ، اور اس میں بتایا گیا ہے کہ اللہ تعالیٰ کی رحمت و نصرت و تائید و مدد اس وقت تک رہے گی جب تک کہ اللہ کے بندے مذکورہ اصول کو اپناتے رہیں گے گویا شرط مشروط ہے اگر مسلمان اس شرط سے ہٹے تو ذلت ورسوائی ان کا استقبال کرے گی اذافات الشرط فات المشروط کے تحت ان کا برا حشر ہو گا تعلق باللہ کے لئے ایک خاص وصف نماز کا قائم کرنا اور زکوٰۃ کا ادا کرنا ہے جو قوم اس سے محروم ہو گی اس کا انجام کار؟

 

[محمد نعیم یونس]

انماولیکم اللہ ورسولہ والذین امنوالذین یقیمون الصلوۃ ویوتون الزکوٰۃ وھم رکعون (المآئدہ۵:۵۶!۵۵)
ترجمہ :مسلمانو!یقیناً اللہ تمہارادوست ہے اور اس کے رسول (ﷺ)ہیں اور ایمان والے ہیں ، جو نمازوں کی پابندی کرتے ہیں اور زکوٰۃ ادا کرتے ہیں یہی تو ہیں اللہ کے سامنے جھکنے والے اور بھلا جو شخص اللہ سے اور اس کے رسول سے اور مومنوں سے دوستی کرے یقین مانو یہی ہے اللہ کی جماعت جو ہمیشہ غالب رہے گی

توضیح:مومنین کو بتایا جا رہا ہے کہ تمہارے دوست کفار و مشرکین نہیں ہیں اور نہ یہود و نصاریٰ بلکہ حقیقت تمہارے دوست اللہ اور اس کے رسول اور اہل ایمان ہیں کب؟جبکہ تم نمازوں کو قائم کرنے والے اور زکوٰۃ کے ادا کرنے والے بن جاؤ کیونکہ ان اوصاف سے تم اللہ تعالیٰ کے عاجز وانکساربندے کہلاؤ گے پھر جو اللہ تعالیٰ کے دوست ہو جائیں گے تو کیا انہیں کوئی مغلوب کر سکتا ہے ؟ہرگز نہیں کیونکہ یہ گروہ حزب اللہ اللہ کی جماعت ہو جائے گی اور اللہ کی جماعت کبھی مغلوب نہ ہو گی ان شاء اللہ پھر اس میں مومنوں کو اشارہ دیا گیا ہے کہ دوستی صرف اور صرف اہل ایمان سے کریں جو مذکورہ اوصاف سے متصف ہوں یہاں تک کہ بے نمازی ،بے دین، بے زکاتی سے بھی ہرگز دوستی نہ کی جائے چونکہ وہ شقی القلب ہے اللہ کے سامنے جھکنے سے بیزار ہے۔

فاذا انسلخ الاشھرالحرم فاقتلوالمشرکین حیث وجد تموھم وخذ وھم واحصروھم واقعدوالھم کل مردصدفان تابوا واقا موا الصلوۃ واتوالزکوٰۃ فخلواسبیلھم ان اللہ غفور رحیم (التوبہ۹:۵)
ترجمہ :پھر جب حرمت والے مہینے گزر جائیں تو مشرکین کو جہاں کہیں پاؤ قتل کر ڈالو اور ہر جگہ تاک میں بیٹھ کر ان کا محاصرہ کرو پھر اگر یہ توبہ کریں اور نمازیں قائم کرنے لگیں اور زکوٰۃ ادا کرنے لگیں تو ان کا راستہ چھوڑ دو بے شک اللہ بخشنے والا مہربان ہیں

توضیح:معاہدہ، عہد و پیماں اور وعدہ کی اسلام میں بڑی اہمیت ہے اس کا اندازہ نزول سورۂ توبہ کے سیاق و سباق سے لگایا جا سکتا ہے ۶ھ میں رحمۃ اللعلمین رسول اللہ ﷺ اور مشرکین کے درمیان دس سال کے لئے ایک اہم معاہدہ ہوا تھا (جس کی تفصیل جاننے کے لئے مکمل تفسیر سورۂ توبہتفسیر ابن کثیرکا مطالعہ فرمائیں )۔

لیکن مشرکین نے صرف چھ مہینے میں اس معاہدہ کی خلاف ورزی کر دی اور عہد کو توڑ دیا اللہ رب العلمین کو مشرکین کی دغا بازی اس قدر ناپسندہوئی اللہ تعالیٰ نے غصہ میں سورۃ توبہ نازل فرما دی جس کے شروع میں بسم اللہ الرحمن الرحیم نہیں ہے اور اللہ تعالیٰ نے مشرکین سے بیزاری کا اعلان فرما دیا اور رحمۃ اللعلمین ﷺ کو اجازت دے دی کہ اب آپ ان کی اینٹ سے اینٹ بجا دیں جو آیات مذکورہ میں بتایا گیا ہے کہ اب انہیں قتل کرو جہاں کہیں پاؤ اور اس وقت تک ان کو کاٹو جب تک کفر سے توبہ نہ کر لیں یہ نہیں کہ ہمارے آپ کے جیسے مسلمان بے نمازی بے زکاتی بن جائیں بلکہ وہ نمازیں قائم کرنے لگیں اور زکوٰۃ ادا کرنے لگیں تو اللہ تعالیٰ نے ان کی جان و مال کی حفاظت کا حکم صادر فرمایا کہ اب ان کا راستہ چھوڑ دو کیوں کہ اب وہ رحمت الٰہی میں آ گئے ہیں اقامت نماز اور اقامت زکوٰۃ اس کے بغیر کوئی بھی مسلمان اور مومن نہیں بن سکتے ۔

 

[محمد نعیم یونس]

فان تابواواقاموالصلوٰۃ واتوالزکوٰۃ فاخوانکم فی الدین ونفصل الآیات لقوم یعلمون(التوبۃ۹:۱۱)
ترجمہ :تو پھر اگر یہ لوگ توبہ کر لیں ، اور نمازوں کو قائم کرنے لگیں اور زکوٰۃ ادا کرنے لگیں تو پھر یہ تمہارے دینی بھائی ہیں اور ہم کھول کھول کر آیات بیان کر رہے ہیں علم والوں کے لئے ۔

توضیح:چونکہ آیت ہٰذا بھی سورۃ توبہ کی ہے اور اس سے قبل کی آیات میں اس کی توضیح ہو چکی ہے مطلب یہ ہے کہ اگر مشرکین اپنی حرکتوں سے باز آ جائیں اور کفر کو خیر باد کہہ دیں نماز و زکوٰۃ کے پابند ہو جائیں تو مومنوں کو چاہئے کہ ان کے گزشتہ کارناموں کو فراموش کر دیں اور اب انہیں اپنا دینی بھائی سمجھیں کیوں کہ رب کائنات نے دائرہ اسلام میں داخل ہونے کے بعد نمازیں قائم کرنے والوں کو اور زکوٰۃ ادا کرنے والوں کو دینی بھائی ہونے کا سرٹیفکٹ عنایت فرمایا ہے۔

ماکان للمشرکین ان یعمروامسجداللہ شھدین علی انفسھم بالکفراولئک حبطت اعمالھم وفی النارھم خلدون انما یعمر مسجد اللہ من امن با اللہ وبا الیوم الاخر واقام الصلوۃ واتی الزکوٰۃ ولم یخش الا اللہ فغسی اولئک ان یکونوا من المھتدین (التوبہ۹:۱۷۱۸)
ترجمہ :مشرکین کے لئے لائق ہی نہیں کہ اللہ کی مسجدیں آباد کریں کیوں کہ وہ خود اپنے کفر کی وجہ سے گواہ ہیں ان کے اعمال اکارت ہو گئے ہیں اور وہ جہنم میں ہمیشہ کے لئے داخل ہونے والے ہیں اللہ کی مسجدیں تو وہی لوگ آباد کرتے ہیں جو ایمان لائے ہیں اللہ پر اور آخرت کے دن پر اور نمازوں کو پابندی کے ساتھ پڑھتے ہیں اور زکوٰۃ دیتے رہتے ہیں اور وہ اللہ کے سواکسی سے ڈرتے بھی نہیں ہیں پس عنقریب یہی لوگ ہیں ہدایت والے ۔

توضیح:آیت ہٰذا کا شان نزول اس طرح ہے کہ حضرت عبداللہ ابن عباس رضی اللہ نما روایت کرتے ہیں کہ حضرت عباس بن عبدالمطلب رضی اللہ عنہ اسلام قبول کرنے سے پہلے جبکہ غزوہ بدر میں گرفتار کر کے مدینہ لائے گئے تو انہیں اصحاب کرامؓ نے ان کے کفر پر ملامت کئے اور ان کو ان کے شرک پر عار دلائی تو حضرت عباس نے جواب دیا کہ تم لوگ صرف ہماری برائیوں کے گن گار ہے ہو اور ہماری اچھائیوں اور نیکیوں کو نہیں دیکھتے ؟ہم کعبۃ اللہ کے خادم ہیں حجاج کرام کی خدمت کرتے ہیں انہیں پانی پلاتے ہیں اور اسی طرح مشرکین مکہ کو اس پر فخر و ناز تھا، اللہ تعالیٰ نے ان کے اس مشرکانہ عقائد کے جزاء کی حقیقت کو واضح کرنے کے لئے آیات مذکورہ نازل فرما دی کہ اللہ کے اس متبرک گھر کو صرف اور صرف اہل ایمان ہی اس کی آبادکاری کا حق ادا کر سکتے ہیں جو اللہ پر اور یوم آخرت پر ایمان رکھتے ہوئے نمازوں کو قائم کرتے ہیں زکوٰۃ ادا کرتے ہیں اور وہ لوگ اللہ تعالیٰ کے سواکسی سے نہیں ڈرتے معلوم ہوا کہ اقامت نماز اور ادائیگی زکوٰۃ اہم امور ہیں ۔

 

[محمد نعیم یونس]

والمومنون والمومنت بعضھم اولیآء بعض یامرون بالمعروف وینھون عن المنکرویقیمون الصلوۃ ویوتون الزکوٰۃ ویطیعون اللہ و رسولہ اولئک سیرحمھم اللہ ان اللہ عزیزحکیم وعداللہ (التوبہ۹:۷۱۷۲)
ترجمہ :اور ایمان والے مرد(مومن) اور ایمان والی عورتیں (مومنہ) ایک دوسرے کے یار و مددگار ہیں وہ لوگ نیک باتوں کا حکم کرتے ہیں اور برائی سے روکتے ہیں اور نمازیں قائم کرتے ہیں اور زکوٰۃ دیتے رہتے ہیں اور اطاعت کرتے ہیں اللہ کی اور اس کے رسول کی یہی لوگ ہیں اصل جن پر اللہ رحم و کرم فرماتا ہے ، بے شک اللہ زبردست غالب اور حکمت والا ہے۔
اللہ کا وعدہ ہے مومن مرد اور مومنہ عورتوں کے لئے ایسی جنتوں کا جن کے نیچے نہریں بہ رہی ہیں ہمیشگی کی جنت میں صاف ستھرے محل میں رہنے کا اور اللہ کی رضا و خوشنودی سب سے بڑی ہے اور یہی بڑی کامیابی ہے ۔

توضیح:یہاں مومنین کی صفات بیان کئے گئے ہیں مومن ومسلمان کا باہم ربط و ضبط کیا ہونا چاہئے اس کا خلاصہ ہے افسوس صدافسوس آج ہم تعلیمات بالاسے کو رے ہیں اس اوصاف کے الٹ ہماری زندگی ہے مومن، مومن دوست و مدد گار نہیں امر بالمعروف و نھی عن المنکر سے غفلت اقامت نماز اور ادائیگی زکوٰۃ سے دور ہیں اللہ اور اس کے رسول کے اتباع کے بجائے ہم کسی اور کی اتباع کر رہے ہیں کہیں ایسا تو نہیں کہ جو اوصاف منافقین کے بتائے گئے ہیں اس پر ہم عامل ہوں آئیے ذرا اس کا بھی جائزہ لیں اللہ نے ارشاد فرمایا:منافق مرد اور منافقہ عورتیں آپس میں سب ایک ہی ہیں جو حکم کرتے ہیں برائی کا اور روکتے ہیں بھلائی سے اور بند رکھتے ہیں اپنے ہاتھ(یعنی بخیل ہیں اللہ کے راستے میں خرچ نہیں کرتے )اور اللہ کو بھول گئے ہیں تو اللہ نے انہیں بھلا دیا یقیناً منافقین نافرمان ہیں ۔ (التوبہ ۹:۶۷۶۸) آج کا مسلمان اپنی شکل قرآنی آئینہ میں دیکھے ۔

قال انی عبداللہ، اتنی الکتب وجعلنی نبیا وجعلنی مبراکا این ماکنت واوصنی با الصلوۃ والزکوٰۃ مادمت حیا وبربوالدتی ولم یجعلنی جبارا شقیا(مریم۱۹:۳۰۳۱۳۲)
ترجمہ :بچہ بول اٹھا کہ یقیناً میں اللہ کا بندہ ہوں ،اس نے مجھے کتاب عطا فرمائی ہے اور مجھے اپنا پیغمبر بنایا ہے ، اور اس نے مجھے بابرکت کیا ہے ، جہاں بھی میں رہوں ، اور اس نے مجھے خصوصی وصیت فرمائی کہ میں نماز اور زکوٰۃ کی پابندی کرتا رہوں جب تک بھی زندہ رہوں اور اس نے مجھے اپنی والدہ کا فرمانبردار و خدمت گزار بنایا ہے اور مجھے سرکش اور بدبخت نہیں بنایا۔

توضیح:اللہ تعالیٰ نے حضرت آدم علیہ السلام کو مٹی سے بنایابناکسی ماں باپ کے اور حضرت حوا علیھا السلام کو آدم علیہ السلام کی بائیں پسلی سے پیدا کر دیا بنا کسی ماں باپ کے اسی طرح حضرت مریم علیھا السلام کے بطن سے حضرت عیسیٰ علیہ السلام کو پیدا فرما دیا بناکسی باپ کے جب آپ کی پیدائش ہوئی تو حضرت مریمؑ کو قوم کے لوگوں نے طعنے دینا شروع کر دیا اور ایسی پاکدامن جن کی پاکبازی اور پارسائی کی تعریف خود خالق کائنات نے کی ہے ، حضرت مریم علیھا السلام نے فرمایا کہ ابھی تمہاری غلط فہمیاں دور ہو جاتی ہیں قدرت الٰہی اپنا جلوہ دکھاتی ہے مریم علیھا السلام کی گود میں روح اللہ نے قوم کے لوگوں کی زبان میں تالے لگا دئیے اور اس ننھے بچے نے اللہ تعالیٰ کے حکم سے جو گفتگو فرمائی آیات بالا میں مذکور ہے۔


ذرا غور فرمائیں کہ اللہ رب العلمین نے حضرت عیسیٰ علیہ السلام کو جو تعلیم سکھلائی جو خصوصیت کے ساتھ تا دم آخر نماز قائم کرنے اور زکوٰۃ ادا کرنے کی وصیت فرمائی اور اسی کے ساتھ ماں کی خدمتگاری اور فرمانبرداری کی تعلیم ہے اور جو مذکورہ احکامات پر عمل نہ کرے وہ یقیناً بڑاسرکش اور بڑا بدبخت ہے ۔

 

[محمد نعیم یونس]

واذکرفی الکتاب اسماعیل انہ کان صادق الوعد وکان رسولانبیا وکان یامراھلۃ با الصلوۃ والزکوٰۃ وکان عندربہ مرضیا(مریم۱۹:۵۵)
ترجمہ :اس کتاب میں اسماعیل علیہ السلام کا واقعہ بھی ذکر کرو وہ بڑا ہی وعدہ کا سچا تھا اور وہ پیغامبر اور نبی تھے ، وہ اپنے گھر والوں کو برابر نماز اور زکوٰۃ کا حکم کرتے تھے اور تھے بھی وہ اپنے پروردگار کے پسندیدہ اور مقبول بندے ۔

توضیح:آیت ہٰذا میں حضرت اسماعیل علیہ السلام کی سیرت طیبہ پر روشنی ڈالی گئی ہے حالانکہ جتنے انبیاء کرام علیھم السلام اس دنیا میں تشریف لائے ہیں سب ہی اللہ کے برگزیدہ بندے اور معصوم تھے مگر اللہ رب العلمین ہر پیغامبر کی الگ الگ صفات بیان فرمائی ہے کہ آپؑ کے ہی نسل سے ساراعرب ہے اور خود شریعت محمدی ﷺ بھی ملت ابراہیمی ؑ ہے اس لئے اس امت مسلمہ کے لئے ایک مثال دی گئی ہے کہ اسماعیل ؑ بڑے وعدہ کے سچے تھے اور نمازوں کی پابندی اور زکوٰۃ کی ادائیگی کرتے تھے اور اپنے اہل کو بھی اس کا حکم فرماتے تھے ۔

خود نبی کریم ﷺ ٰ نے حکم دیا کہ آپ بھی اپنے اہل و عیال کو نماز کا حکم کریں اور آپ بھی اس پر پابندی سے قائم رہیں ۔
ووھبنالہ اسحاق ویعقوب نافلۃ وکلاجعلناصلحین وجعلنھم ائمۃ یھدون بامرنا واواحینآ الیھم فعل الخیرات واقام الصلوۃ وایتآء الزکوٰۃ وکانوا لنا عابدین(الانبیآء۲۱:۷۲۷۳)
ترجمہ :اور ہم نے اسے اسحاق عطا فرمایا اور یعقوب اور زیادہ اور ہر ایک کو ہم نے نیک و کار بنایا اور ہم نے انہیں رہنما بنا دیا کہ ہمارے حکم سے لوگوں کی رہنمائی کریں اور ہم نے ان کی طرف وحی بھیجی کہ نیک کام کریں اور نمازیں قائم کریں اور زکوٰۃ دیتے رہیں اور وہ سب کے سب ہمارے عبادت گزار بندے تھے ۔

توضیح:آیات بالاسے قبل حضرت خلیل اللہ ابراہیم علیہ السلام کا با التفصیل تذکرہ ہے اللہ تعالیٰ نے آپؑ کی نیکو کاری کے تذکرہ کے ساتھ اقامت نماز اور اقامت زکوٰۃ کا بھی خصوصی ذکر فرمایا ہے تاکہ آپ کی پیروی کرنے والے جان لیں کے اللہ کے پیغامبروں کو بھی اس سے مستثناء نہیں رکھا گیا جب رسولوں کو بھی نمازوں اور زکوٰۃ کی پابندی کا حکم ملا تو پھر ہم آخراس اہم فریضہ سے غافل کیوں ہیں یہ بھی یاد رہے کہ جو ان پر عمل کرے گا وہ اصل اللہ تعالیٰ کی عبادت گزار ہونے کا حق ادا کرے گا۔