مختصر صحیح بخاری - زین العابدین احمد بن عبداللطیف - حصہ سوم (یونیکوڈ)

[Aamir]

باب: سانپ اور بچھو کے کاٹنے میں دم کی اجازت۔
(۱۹۷۶)۔ ام المومنین عائشہ صدیقہؓ نے کہا کہ نبیﷺ (سانپ ، بچھو وغیرہ) ہر زہریلے جانور کے کاٹنے میں دم کرنے کی اجازت دی ہے۔

 

[Aamir]

باب۔ رسول اللہﷺ کا دم کرنا۔
(۱۹۷۷)۔ ام المومنین عائشہؓ ہی نے کہا کہ نبیﷺ مریض پر یہ پڑھا کرتے تھے :'' بسم اللہ ! یہ ہماری زمین کی مٹی اور ہمیں سے کسی کا تھو ک ہے ، ہمارے بیمار کو ہمارے پروردگار کے حکم سے شفا ہو جائے ''

 

[Aamir]

باب: نیک فال کا بیان۔
(۱۹۷۸)۔ سیدنا ابو ہریرہؓ کہتے ہیں کہ میں نے رسول اللہﷺ سے سنا :'' بد شگونی کوئی چیز نہیں ، نیک فال عمدہ چیز ہے۔ ''لوگوں نے پوچھا کہ فال کیا چیز ہے ؟ تو فرمایا :'' فال وہ اچھی بات ہے جو تم میں سے کوئی سنے۔ ''

 

[Aamir]

باب۔ کہانت کا بیان۔
(۱۹۷۹)۔ سیدنا ابو ہریرہؓ سے روایت ہے کہ رسول اللہﷺ نے قبیلۂ ہذیل کی دو عورتوں کے مقدمے کا فیصلہ فرمایا جو آپس میں لڑی تھیں۔ ایک نے دوسری حاملہ کے پیٹ پر پتھر مارا ، بچہ اندر مر گیا۔ یہ مقدمہ آپﷺ کے سامنے پیش کیا گیا تو آپﷺ نے بچہ کی دیت میں باندی یا غلام دینے کا حکم فرمایا۔ یہ سن کر قاتلہ عورت کے وارث نے کہا کہ جو بچہ پیٹ میں تھا اس نے نہ کھایا نہ پیا نہ بولا نہ چیخا تو اس کی دیت کیسے ہے ؟ وہ تو قابل معافی ہے۔ نبیﷺ نے فرمایا :'' یہ کوئی کاہنوں کا بھائی معلوم ہوتا ہے۔ ''

 

[Aamir]

باب۔ بعض تقریریں بھی جادو بھری ہوتی ہیں۔
(۱۹۸۰)۔ سیدنا عبداللہ بن عمرؓ نے کہا کہ نجد سے دو شخص آئے ،انہوں نے لوگوں کو خطاب کیا تو لوگ ان کے اندازِ بیان سے ششدر رہ گئے۔ رسول اللہﷺ نے فرمایا:''بعض تقریریں جادو بھری ہوتی ہیں۔ ''یا یہ فرمایا :'' بعض تقریر اور بیان جادو (کی مانند) ہوتے ہیں۔ ''

 

[Aamir]

باب۔ کوئی بیماری متعدی نہیں ہوتی۔
(۱۹۸۱)۔ سیدنا ابو ہریرہؓ کہتے ہیں کہ نبیﷺ نے فرمایا :'' (اللہ کے حکم کے بغیر) کسی کی بیماری دوسرے کو نہیں لگ سکتی اور بیمار اونٹ تندرست اونٹوں کے پاس نہ لائے جائیں۔ ''

 

[Aamir]

باب۔ زہر پینا یا زہریلی اور خوفناک دوا یا ناپاک دوا کا استعمال کرنا۔
(۱۹۸۲)۔ سیدنا ابو ہریرہؓ روایت کرتے ہیں کہ نبیﷺ نے فرمایا :'' جس شخص نے دانستہ طور پر پہاڑ سے اپنے آپ کو گرا کر خود کو مار ڈالا وہ دوزخ میں ہمیشہ یہی عذاب پائے گا کہ پہاڑ سے گرایا جایا کرے گا اور جس نے دانستہ طور پر مرنے کے لیے زہر کھا لیا تو اس کو دوزخ میں ہمیشہ یہی عذاب ہو گا کہ اس کے ہاتھ میں زہر ہو گا اور وہ کھاتا رہے گا اور جس نے اپنی جان کو کسی ہتھیار سے ہلاک کر لیا تو اس کو دوزخ میں ہمیشہ ایسے ہی عذاب ہو گا کہ وہی ہتھیار اپنے ہاتھ سے اپنے پیٹ میں مارا کرے گا۔

 

[Aamir]

باب۔ جب مکھی کھانے پینے کی چیز میں گر جائے۔
(۱۹۸۳)۔ سیدنا ابو ہریرہؓ سے روایت ہے کہ رسول اللہﷺ نے فرمایا :'' اگر تمہارے کسی کے سامنے کھانے میں مکھی پڑھ جائے تو اس کو (ایک دفعہ) ڈبو کر پھینک دو ، اس لیے کہ اس کے ایک پر میں شفا ہے اور دوسرے میں بیماری (تو جب وہ کسی چیز میں گھس جاتی ہے تو بیماری والے پر کو ڈبو تی ہے)۔ ''

 

[Aamir]

لباس کے بیان میں

باب۔ جو شخص ٹخنوں سے نیچا کپڑا رکھے وہ دوزخ میں سزاپائے گا۔
(۱۹۸۴)۔ سیدنا ابو ہریرہؓ سے مروی ہے کہ نبیﷺ نے فرمایا :'' جس نے ٹخنوں سے نیچے کپڑا رکھا (جیسے شلوار ، پتلون ، پاجامہ) تو وہ آگ میں جلے گا۔ ''

 

[Aamir]

باب۔ دھاری دار چادر اور یمنی چادر اور شملہ پہننا۔
(۱۹۸۵)۔ سیدنا انس بن مالکؓ سے روایت ہے کہ رسول اللہﷺ کو سب کپڑوں سے زیادہ پسند '' حبرہ '' یعنی یمنی چادر (پہننا) تھی۔

(۱۹۸۶)۔ ام المومنین عائشہ صدیقہؓ سے مروی ہے کہ جب رسول اللہﷺ کی وفات ہو گئی تو آپﷺ ''بردیمانی '' (ایک یمنی چادر) میں ڈھکے ہوئے تھے۔ ''