مختصر صحیح مسلم - (اردو ترجمہ) یونیکوڈ

[Aamir]

باب : جنازہ جلدی لے جانے کا بیان۔
470: سیدنا ابو ہریرہؓ سے روایت ہے کہ نبیﷺ نے فرمایا: جنازہ لے جانے میں جلدی کرو۔ اس لئے کہ اگر نیک ہے تو اسے خیر کی طرف لے جاتے ہو اور اگر بد ہے تو اسے اپنی گردن سے اتارتے ہو۔

 

[Aamir]

باب : عورتوں کے جنازے کے ساتھ جانے کے منع کا بیان۔
471: سیدہ اُمّ عطیہ رضی اللہ عنہا کہتی ہیں کہ ہمیں جنازہ کے ساتھ چلنے سے روکا جاتا تھا مگر تاکید سے نہیں۔

 

[Aamir]

باب : جنازہ کے لئے کھڑے ہونے کا بیان۔
472: سیدنا جابر بن عبد اللہؓ کہتے ہیں کہ ایک جنازہ گزرا تو رسول اللہﷺ کھڑے ہو گئے تو ہم بھی آپﷺ کے ساتھ کھڑے ہو گئے۔ پھر ہم نے عرض کیا کہ یا رسول اللہﷺ! وہ تو یہودی عورت کا جنازہ ہے آپﷺ نے فرمایا کہ موت گھبراہٹ کی چیز ہے ، جب تم جنازہ دیکھو تو کھڑے ہو جاؤ۔

 

[Aamir]

باب : جنازہ کے لئے کھڑا ہونا منسوخ ہے۔
473: سیدنا علیؓ کہتے ہیں کہ ہم نے رسول اللہﷺ کو کھڑے ہوتے ہوئے دیکھا تو ہم بھی آپﷺ کے ساتھ کھڑے ہوئے اور وہ بیٹھنے لگے پھر ہم بھی بیٹھنے لگے یعنی جنازہ میں۔

 

[Aamir]

باب : میت پر نماز جنازہ پڑھنے کے وقت امام کہاں کھڑا ہو؟۔
474: سیدنا سمرہ بن جندبؓ کہتے ہیں کہ میں نے رسول اللہﷺ کے پیچھے سیدنا کعبؓ کی ماں پر نماز جنازہ پڑھی جو نفاس میں فوت ہو گئی تھیں اور رسول اللہﷺ ان کے جنازہ کے وسط میں کھڑے ہوئے۔

 

[Aamir]

باب : نمازِ جنازہ کی تکبیروں کا بیان۔
475: سیدنا ابو ہریرہؓ سے روایت ہے کہ رسول اللہﷺ نے نجاشی کی موت کی خبر دی، جس دن کہ ان کا انتقال ہوا۔ اور صحابہ کرام کے ساتھ عیدگاہ میں گئے اور ان کی (نماز جنازہ پر) چار تکبیریں پڑھیں)۔

 

[Aamir]

باب : پانچ تکبیروں کے بیان میں۔
476: سیدنا عبدالرحمن بن ابی لیلیٰ کہتے ہیں کہ زیدؓ ہمارے جنازوں کی نماز میں چار تکبیریں کہا کرتے تھے اور ایک جنازہ پر پانچ تکبیریں کہیں تو میں نے پوچھا تو انہوں نے کہا کہ رسول اللہﷺ (بھی کبھی کبھی پانچ تکبیریں) کہا کرتے تھے۔

 

[Aamir]

باب : (نمازِ جنازہ میں) میت کے لئے دعا کرنا۔
477: سیدنا عوف بن مالکؓ کہتے ہیں کہ رسول اللہﷺ نے ایک جنازہ پر نماز پڑھی اور میں نے آپ کی دعا میں سے یہ الفاظ یاد رکھے "اے اللہ! اس کو بخش دے ، اس پر رحم کر، اس کو عافیت میں رکھ، اس کو معاف کر، اپنی عنایت سے مہربانی کر، اس کا گھر (قبر) کشادہ کر دے ، اس کو پانی، برف اور اولوں سے دھو دے ، اس کو گناہوں سے صاف کر دے جیسے سفید کپڑا میل سے صاف ہو جاتا ہے ، اس کو گھر کے بدلے اس سے بہتر گھر دے ، اس کے لوگوں سے بہتر لوگ دے ، اس کی بیوی سے بہتر بیوی دے ، جنت میں لے جا اور عذاب قبر سے بچا" یہاں تک کہ میں نے آرزو کی کہ یہ مرنے والا میں ہوتا۔

 

[Aamir]

باب : مسجد میں میت پر نمازِ جنازہ پڑھنے کا بیان۔
478: اُمّ المؤمنین عائشہ صدیقہ رضی اللہ عنہا سے روایت ہے کہ جب (فاتحِ ایران) سیدنا سعد بن ابی وقاصؓ نے انتقال فرمایا تو رسول اللہﷺ کی ازواج مطہرات نے کہلا بھیجا کہ ان کا جنازہ مسجد میں سے لے آؤ کہ ہم بھی نماز پڑھ لیں، سو ایسا ہی کیا گیا۔ اور ان کے حجروں کے آگے جنازہ رکھ دیا کہ وہ نماز پڑھ لیں اور جنازہ کو باب الجنائز سے جو مقاعد کی طرف تھا، وہاں سے باہر لے گئے۔ لوگوں کو یہ خبر پہنچی تو عیب کرنے لگے اور کہا کہ جنازہ کہیں مسجد میں لاتے ہیں؟ اس پر اُمّ المؤمنین عائشہ صدیقہ رضی اللہ عنہا نے کہا کہ لوگ کیا جلدی عیب کرنے لگے اس چیز کے متعلق جس کا ان کو علم نہیں ہے۔ انہوں نے ہم پر عیب کیا کہ جنازہ کو مسجد میں لائے حالانکہ بات یہ ہے کہ رسول اللہﷺ نے بیضاء کے بیٹے سہیل کی نماز جنازہ مسجد کے اندر ہی پڑھی تھی۔

 

[Aamir]

باب : قبر پر نمازِ جنازہ پڑھنا۔
479: سیدنا ابو ہریرہؓ سے روایت ہے کہ ایک حبشی عورت مسجد کی خدمت کرتی تھی یا ایک جوان تھا اور اس کے بارے میں رسول اللہﷺ نے پوچھا تو لوگوں نے عرض کیا کہ وہ مر گئی۔ آپﷺ نے فرمایا کہ تم نے مجھے خبر نہ کی۔ کہا گویا کہ انہوں نے اس کو حقیر جان کر نبیﷺ کو تکلیف دینا مناسب نہ جانا۔ آپﷺ نے فرمایا کہ مجھے اس کی قبر بتاؤ۔ لوگوں نے بتائی تو آپﷺ نے اس پر نماز پڑھی اور فرمایا: یہ قبریں اندھیرے سے بھری ہوئی ہیں اور اللہ تعالیٰ میری نماز کی وجہ سے ان کو روشن کر دیتا ہے۔