آؤ بچو نماز پڑھیں!

[مشکٰوۃ]

نمازِ استخارہ کی دعا​

سیدنا جابر بن عبد اللہ رضی اللہ عنہ سے مروی ہے کہ رسول اکرم صلی اللہ علیہ وسلم ہمیں تمام معاملات میں استخارہ کرنے کی تعلیم اس طرح دیتے تھے جیسے وہ ہمیں قرآن ِ مجیدکی کسی سورت کی تعلیم دیتے تھے۔وہ فرماتے تھے:
جب تم میں سے کوئی کسی کام کا ارادہ کرے تو دو رکعتیں پڑھے پھر وہ کہے:
اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ وَأَسْأَلُكَ مِنْ فَضْلِكَ الْعَظِیْمِ ، فَإِنَّكَ تَقْدِرُ وَلا أَقْدِرُ وَتَعْلَمُ وَلا أَعْلَمُ وَأَنْتَ عَلامُ الْغُيُوبِ اللَّهُمَّ إِنْ كُنْتَ تَعْلَمُ اَنَّ هَذَا الأَمْرَخَيْرٌ لِي فِي دِينِي وَمَعَاشِي وَعَاقِبَةِ أَمْرِي فَاقْدُرْهُ لِي وَيَسِّرْهُ لِي ثُمَّ بَارِكْ لِي فِیْہِ وَإِنْ كُنْتَ تَعْلَمُ أَنَّ هَذَا الأَمْرَشَرٌّ لِي فِي دِينِي وَمَعَاشِي وَعَاقِبَةِ أَمْرِي فَاصْرِفْہُ عَنّیْ وَاصْرِفْنِیْ عَنْہُ وَاقْدُرْ لِي الْخَيْرَ حَيْثُ كَانَ ثُمَّ اَ رَضِّنِي بِهِ
"اے اللہ ! میں آپ کے علم کے واسطے سے آپ سے بھلائی کا درخواست گزار ہوں ،آپ کی قدرت کے حوالے سے اختیار کا طالب ہوں۔آپ کے عظیم فضل سے بھلائی کا کچھ حصہ مانگتا ہوں،کیونکہ قدرت آپ کے پا س ہے میرے پاس نہیں،علم آپ کے پاس ہے میرے پاس نہیں،اور آپ چھپی ہوئی باتوں کے جاننے والے ہیں ۔اے اللہ ! اگر آپ اس کام کو(کام کا نام لیں )میرے دین،میری معیشت اور میرے انجام کار کے لئے بہتر جانتے ہیں تو مجھے اسے نبھانے کی توفیق عطا فرمائیں،اسے میرے لئے آسان فرما دیں اور اس میں میرے لئے برکت فرما دیں اور اگر آپ اس معاملے کو میرے دین،میری معیشت اور میرے انجام کار کے لئے نقصان دہ خیال کرتے ہیں تو اسے مجھے سے اور مجھے اس سے ہٹا دیں اور جہاں کہیں بھلائی ہے اسے میرا مقدر بنادیں اور اس پر مجھے شاداں کر دیں۔"
نمازِ استخارہ ممنوعہ اوقات کے علاوہ کسی وقت بھی ادا کی جاسکتی ہے ۔یہ ضروری نہیں ہے کہ خواب آئے یا کسی قسم کا کوئی اشارہ ملے ۔استخارہ بندے اور رب کے درمیان ایک گہرے تعلق کا نام ہے ۔اس لئے خود کیا جائے نہ کہ کسی دوسرے سے کروایا جائے۔"

 

[مشکٰوۃ]

نمازِ جنازہ کی دعا​

اَللّٰھُمَّ اغْفِرْلَہٗ وَارْحَمْہٗ وَعَافِہٖ وَاعْفُ عَنْہُ وَاَکْرِمْ نُزُلَہٗ وَوَسِّعْ مُدْخَلَہٗ وَاغْسِلْہُ بِالْمَآءِ وَالثَّلْجِ وَالْبَرَدِ وَنَقِّہٖ مِنَ الْخَطَایَا کَمَا نَقَّیْتَ الثَّوْبَ الْاَبْیَضَ مِنَ الدَّنَسِ وَاَبْدِلْہُ دَارًا خَیْرًا مِّنْ دَارِہٖ وَاَھْلاً خَیْرًا مِّنْ أَھْلِہٖ وَزَوْجًا خَیْرًا مِّنْ زَوْجِہٖ وَاَدْخِلْہُ الْجَنَّۃَ وَاَعِذْہُ مِِنْ عَذَابِ الْقَبْرِ وَعَذَابَ النَّار
"یا اللہ ! اسے بخش دیں،اس پر رحم فرمائیں،اس سے درگزر کریں،اسے معاف فرمائیں،اس کی عزت سے میزبانی فرمائیں،اس کی قبر کشادہ کر دیں،اسے ،پانی ،برف اور اولوں سے غسل دیں اور اسے گناہوں سے اس طرح صاف کر دیں جیسے آپ سفید کپڑا میل کچیل سے صاف کرتے ہیں ،اسے اس کے گھر سے بہتر گھر ،اس کے گھر والوں سے بہتر گھروالے اور اس کی بیوی سے بہتر بیوی عطا فرمائیں،اسے جنت میں داخل کر دیں اور اسے عذابِ قبر اور عذابِ جہنم سے محفوظ رکھیں۔"
نمازِ جنازہ کا طریقہ یہ ہے :
1۔نمازِ جنازہ میں چار تکبیرات ہوتی ہیں یعنی امام چار مرتبہ اللہ اکبر کہے گا۔
2۔پہلی تکبیر کے بعد ثنا،سورت فاتحہ اور قرآنِ کریم سے کچھ آیات پڑھی جائیں گی۔
3۔دوسری تکبیر کے بعد درود یعنی درودِ ابراہیمی پڑھا جائے گا،جو نماز میں پڑھا جاتا ہے۔
4۔تیسری تکبیر کے بعد جنازے کی یہ دعا یا کوئی اور دعا جو نبی کریم صلی اللہ علیہ وسلم فرمایا کرتے تھے ،وہ پڑھی جائے گی۔
5۔چوتھی تکبیر یعنی چوتھی مرتبہ اللہ اکبر کہنے کے بعد سلام پھیرا جائے گا۔
نوٹ : نمازِ جنازہ بلند آواز سے بھی پڑھی جا سکتی ہے اور آہستہ بھی۔سورت فاتحہ پڑھنا اس میں بھی ضروری ہے۔کیونکہ اس کے بغیر کوئی بھی نماز نہیں ہوتی۔

بشکریہ
مکتبہ قدوسیہ