تفسیر احسن البیان (تفسیر مکی)

[محمد نعیم یونس]

فَهُوَ فِي عِيشَةٍ رَّ‌اضِيَةٍ ﴿٧﴾
وہ دل پسند آرام کی زندگی میں ہوگا۔ (۱)
۷۔۱یعنی ایسی زندگی جس کو وہ صاحب زندگی پسند کرے گا۔

 

[محمد نعیم یونس]

وَأَمَّا مَنْ خَفَّتْ مَوَازِينُهُ ﴿٨﴾
جن کے پلڑے ہلکے ہونگے۔ (۱)
۸۔۱جس کی برائیاں نیکیوں پر غالب ہوں گی اور برائیوں کا پلڑا بھاری اور نیکیوں کا ہلکا ہوگا۔

 

[محمد نعیم یونس]

فَأُمُّهُ هَاوِيَةٌ ﴿٩﴾
اس کا ٹھکانا ہاویہ (جہنم) ہے۔ (۱)
۹۔۱ہاویہ جہنم کا نام ہے اس کو ہاویہ اس لیے کہتے ہیں کہ جہنمی اس کی گہرائی میں گرے گا۔ اور اس کو ام (ماں) سے اس لیے تعبیر کیا کہ جس طرح انسان کے لیے ماں، جائے پناہ ہوتی ہے اسی طرح جہنمیوں کا ٹھکانا جہنم ہوگا۔ بعض کہتے ہیں کہ ام کے معنی دماغ کے ہیں۔ جہنمی، جہنم میں سرکے بل ڈالے جائیں گے۔(ابن کثیر)

 

[محمد نعیم یونس]

وَمَا أَدْرَ‌اكَ مَا هِيَهْ ﴿١٠﴾
تجھے کیا معلوم کہ وہ کیا ہے (١)
١٠۔١ یہ استفہام اس کی ہو لناکی اور شدت عذاب کو بیان کرنے کے لئے ہے کہ انسان کے وہم و تصور سے بالا ہے انسانی علوم اس کا احاطہ نہیں کر سکتے اور اس کی کنہ نہیں جان سکتے۔

 

[محمد نعیم یونس]

نَارٌ‌ حَامِيَةٌ ﴿١١﴾
وہ تند تیز آگ ہے (١)
١١۔١ جس طرح حدیث میں آتا ہے کہ انسان دنیا میں جو آگ جلاتا ہے، یہ جہنم کی آگ کا سترواں حصہ ہے، جہنم کی آگ دنیا کی آگ سے ٦٩ درجہ زیادہ ہے (صحیح بخاری، کتاب بدء الخلق، باب صفۃ لنار وأنھا مخلوقۃ مسلم ، کتاب الجنۃ، باب فی شدۃ حرنار جھنم) ایک اور حدیث میں ہے کہ "آگ نے اپنے رب سے شکایت کی کہ میرا ایک حصہ دوسرے حصے کو کھائے جا رہا ہے، اللہ تعالٰی نے اسے دو سانس لینے کی اجازت فرما دی۔ ایک سانس گرمی میں اور ایک سانس سردی میں پس جو سخت سردی ہوتی ہے یہ اس کا ٹھنڈا سانس ہے، اور نہایت سخت گرمی جو پڑتی ہے، وہ جہنم کا گرم سانس ہے"(بخاری، کتاب و باب مذکور) ایک اور حدیث میں نبی صلی اللہ علیہ وسلم نے فرمایا"جب گرمی زیادہ سخت ہو تو نماز ٹھنڈی کر کے پڑھو، اس لیے کہ گرمی کی شدت جہنم کے جوش کی وجہ سے ہے۔(حوالہ مذکور، مسلم، کتاب المساجد)

 

[محمد نعیم یونس]

سورة التکاثر

(سورة التکاثر ۔ سورہ نمبر ۱۰۲ ۔ تعداد آیات ۸)​

بِسْمِ اللّٰهِ الرَّحْمٰنِ الرَّحِيْمِ
شروع کرتا ہوں میں اللہ تعالٰی کے نام سے جو بڑا مہربان نہایت رحم والا ہے
أَلْهَاكُمُ التَّكَاثُرُ‌ ﴿١﴾
ز یادتی کی چاہت نے تمہیں غافل کر دیا (١)
١۔١ الھیٰ یلھی کے معنی ہیں،غافل کردینا۔ تکاثر، زیادتی کی خواہش۔ یہ یہ عام ہے، مال، اولاد، اعوان و انصار اور خاندان و قبیلہ وغیرہ سب کو شامل ہے۔ ہر وہ چیز، جس کی کثرت انسان کو محبوب ہو اور کثرت کے حصول کی کوشش و خواش اسے اللہ کے احکام اور آخرت سے غافل کر دے۔ یہاں اللہ تعالٰی انسان کی اس کمزوری کو بیان کر رہا ہے۔ جس میں انسانوں کی اکثریت ہر دور میں مبتلا رہی ہے۔

 

[محمد نعیم یونس]

حَتَّىٰ زُرْ‌تُمُ الْمَقَابِرَ‌ ﴿٢﴾
یہاں تک کہ تم قبرستان جا پہنچے۔ (١)
٢۔١ اس کا مطلب ہے کہ حصول کی خاطر محنت کرتے کرتے تمہیں موت آ گئی اور تم قبروں میں جا پہنچے۔

 

[محمد نعیم یونس]

كَلَّا سَوْفَ تَعْلَمُونَ ﴿٣﴾
ہرگز نہیں (١) تم عنقریب معلوم کر لو گے۔
٣۔١ یعنی تم جن تکاثر و تفاخر میں ہو، یہ صحیح نہیں۔

 

[محمد نعیم یونس]

ثُمَّ كَلَّا سَوْفَ تَعْلَمُونَ ﴿٤﴾
ہرگز نہیں پھر تمہیں جلد معلوم ہو جائے گا (١)
٤۔١ اس کا انجام عنقریب تم جان لو گے، یہ بطور تاکید دو مرتبہ فرمایا۔

 

[محمد نعیم یونس]

كَلَّا لَوْ تَعْلَمُونَ عِلْمَ الْيَقِينِ ﴿٥﴾
ہرگز نہیں اگر تم یقینی طور پر جان لو۔ (۱)
۵۔۱مطلب یہ ہے کہ اگر تم اس غفلت کا انجام اسطرح یقینی طور پر جان لو جس طرح دنیا کی کسی دیکھی بھالی چیز کا تم یقین کرتے ہو تو تم یقینا تکاثر وتفاخر میں مبتلا نہ ہو۔