حفاظتِ قرآنِ کریم کے قدیم وجدید ذرائع اور اس ضمن میں جامعہ لاہور اور دیگر اداروں کی خدمات کا جائزہ

[ساجد]

(٢) جمع کتابی
جمع کتابی سے ہماری مراد وہی کام جسیم جمّع الملک فھد نے شروع کیاہے، آگے بڑھانا ہے۔ جس طرح مجمّع الملک فھد نے چار متداولہ روایات پر مصاحف نشر کئے ہیں، اسی طرح باقی وہ تمام روایات جو قراء ات عشرہ کے نام سے کلیات اور مدارس میں پڑھی پڑھائی جاتی ہیں اور علمی طور پر موجود ہیں اور قراء ات کے بے شمار علماء دنیابھر میں موجود ہیں، جو خدمت قرآن میں اپنی زندگیاں صرف کررہے ہیں اور ہزاروں کی تعداد میں طلبہ قراء ات کی تعلیم حاصل کررہے ہیں، اس کو عملی طور پر مصاحف کی شکل میں شائع کیا جائے، تاکہ وہ روایات جو کتب میں موجود ہیں اور زبانی پڑھی پڑھائی جاتی ہیں عملی اور کتابی طور پر مصاحف کی صورت میں سامنے آجائیں۔ یہ مبارک کام اگر ہوجائے تو کئی اہم فوائد حاصل ہوسکتے ہیں، جنہیں زبانی بحث و مباحثہ سے ہم حاصل نہیں کرسکتے۔ ان فوائد میں سے چند اَہم فوائد ہم ذیل میں ذکر کرتے ہیں:

 

[ساجد]

جمع کتابی کے فوائد
٭ پہلا فائدہ: قراء ات متواترہ کومصاحف کی شکل میں جمع کرنے کا سب سے اہم فائدہ یہ ہے کہ اس سے تاقیامت فتنہ انکار قراء ات کا عوامی سطح پر قلع قمع ہوجائے گا۔ کوئی بھی شخص اگر انکار قراء ات کی طرف پیش قدمی کرنا چاہے اور عوام کو اس کے مقابلہ میں مصحف پیش کردیا جائے تو عوام اس کی بات پر کان دھرنے کے بجائے اس کے درپے ہو جائیں کہ تو قرآن کا انکار کرتا ہے۔
٭دوسرا فائدہ:حجیت قراء ات کے لئے عوام کی سطح پر خاص علمی دلائل دینے کی چندہ ضرورت نہیں رہے گی۔ صرف قرآن کادکھا دینا ہی کافی ہوگا جس سے وہ مطمئن ہوجائیں گے۔ اگر ابتداء مطمئن نہ بھی ہوں تو کم از کم انکار نہیں کرسکیں گے کیونکہ اگر انکار کیا تو قرآن کاانکار لازم آئے گا۔
٭ تیسرا فائدہ:جمع کتابی کا تیسرا فائدہ یہ ہے کہ آج کل دنیا میں قرآن کے متعلق جو نمائشیں ہوتی ہیں، جن میں قرآن کریم مختلف شکلوں، مثلاً چھوٹے ترین یا بڑے ترین خط میں قرآن ، ایک بینر پرلکھا ہوا مکمل قرآن، قرآن کے قدیم سے قدیم نسخہ جات، مختلف خطوں میں لکھے ہوئے متعدد قرآنوں کی صورت میں پیش کیا جاتاہے، جوکہ مسلمانوں کی قرآن سے محبت کی غمازی کرتی ہیں، لیکن اس کے ساتھ ساتھ اگر جمیع روایات میں شائع شدہ قرآن بھی موجود ہوں گے تو ایسی نمائشوں میں ایک علمی اضافہ ہوگا جس سے ان کی اہمیت مزید بڑھے گی۔

 

[ساجد]

٭ چوتھا فائدہ :جمع کتابی کا ایک انتہائی اہم فائدہ یہ ہے کہ فتنہ انکار حدیث کی سرکوبی ہوگی، کیونکہ انکار حدیث کاایک اہم سبب یہ بھی ہے کہ احادیث سے قراء ات کا ثبوت ہوتا ہے جو کہ منکرین قراء ات کے مطابق قرآن کی قطعیت کے منافی ہے۔ لہٰذا وہ احادیث جن میں قراء ات کا ذکر ہے غیر مستند ہیں اور جن راویوں سے وہ روایات منقول ہیں وہ غیر ثقہ ہیں۔ جب قراء ات مصاحف کی شکل میں میں موجود ہوں گی تو جس طرح قراء ات کاانکار ناممکن ہوگا اسی طرح انکار حدیث جو قراء ات کی بنیاد پر کیا جاتاہے ، ختم ہوجائے گا اور اس سے انکار حدیث کی باقی بنیادوں پربھی زد پڑے گی۔
٭ پانچواں فائدہ:جمع کتابی کاایک فائدہ یہ بھی ہے کہ کسی بھی روایت کا مصحف جب تحقیق کے بعد شائع ہوجاتا ہے تو وہ رسم اور ضبط میں معیار بن جاتاہے۔ پھر جب بھی کوئی مسئلہ پیش آئے تو مصحف کی طرف رجوع کرلیاجاتاہے۔ اسی طرح جن روایات میں مصحف شائع ہوچکے ہیں وہ رسم اور ضبط میں بھی ایک معیار بن چکے ہیں اور جن روایات میں مصاحف شائع نہیں ہوتے اور ان میں پایا جانے والا اختلاف شائع شدہ مصاحف میں موجود بھی نہیں ہے۔ اس کی مثال یہ ہے کہ مصاحف مطبوعہ میں اشمام الحرکۃ بالحرکۃ کی مثال تو موجود ہے جیسے قیل لیکن کسی بھی مصحف میں اشمام الحرف بالحرف کی مثال موجود نہیں۔جس طرح صراط اور اصدق میں ص اور زاء کا اشمام اگرچہ کتب میں موجود ہے۔ اسی طرح امام یعقوب کی قراء ات میں یاء ات زائد کی ہے جو یاء ات زوائد وقف اور وصل دونوں میں پڑھی جاتی ہیں ایسی مثالوں کے لئے بھی مصاحف کی صورت میں معیار مقرر رکرنے کی ضرورت ہے جوکہ جمع کتابی کی صورت میں حاصل ہوجائے گا۔

 

[ساجد]

جمع کتابی کے سلسلہ میں کلِّیۃ القرآن ،جامعہ لاہور الاسلامیہ اور دیگر اداروں کی خدمات
کلِّیۃ القرآن الکریم ،جامعہ لاہور الاسلامیہ
کلیۃ القرآن، جامعہ لاہور الاسلامیہ نے جہاں خدمت ِقرآن کے بہت سے سلسلے شروع کررکھے ہیں، وہاں جمع کتابی کے سلسلہ میں بھی کسی سے پیچھے نہیں رہا اور اس میں وہ کام کیا ہے کہ جو تاریخ ِاسلام میں اپنی نوعیت اور جامعیت کے اعتبار سے یگانہ حیثیت کا حامل ہے۔ وہ یہ کہ قراء ات قرآنیہ عشرہ متواترہ، جوکہ کلیات اور مدارس میں صدیوں سے پڑھائی جارہی ہیں اور جیساکہ ہم نے پہلے کہا کہ قواعد و ضوابط اور پڑھنے کے انداز تو کتب ِقراء ات میں موجود ہیں، لیکن باقاعدہ مصاحف کی شکل میں موجود نہیں ہیں، کلِّیۃ القرآن الکریم، جامعہ لاہور کے فضلاء میں سے تقریباً بارہ محقق اساتذہ نے محنت ِ شافہ فرماکر تین سال کے عرصہ میں وہ تمام غیر متداولہ قراء ات میں سولہ مصاحف تیار کرلیے ہیں اور جیسا کہ راقم نے پہلے عرض کیا ہے کہ یہ کام اپنی نوعیت اور جامعیت کے حوالے سے تاریخ اسلامی کا پہلا کام ہے۔ یہ کام کویت کے عالمی ادارہ حامل المسک الاسلامیہ کی سربراہ تنظیم لجنۃ الزکاۃ للشامیۃ والشویخ کے ایما کیا گیا ہے، جس کی مراجعت کے لیے مذکورہ تنظیم کے ذمہ داران کا لجنۃ مراجعۃ المصاحف، مصر سے تعاقد ہے اور آج کل یہ مشروع اسی ادارہ کے زیر اہتمام تنفیذی مراحل میں ہے۔
ان مصاحف کی تیاری میں مجمع الملک فھد کی طرف سے شائع کردہ روایت ِحفص کے مصحف کو اساس بنایا گیا ہے اور قراء ات ِعشرہ کے متعدد اختلافات کے مطابق علم رسم، علم ضبط اور علم الفواصل کی فنی تفصیلات کا لحاظ کرتے ہوئے رسم ِمصحف میں تبدیلیاں کردی گئی ہیں۔ ذیل میں ہم متعدد علوم سے متعلق ان کتب کی ایک فہرست ذکرکرتے ہیں، جن کی روشنی میں اس سارے علمی کو سر انجام دیا گیا:

 

[ساجد]

کتب علم قراء ات
(١) جامع البیان فی القراء ات السبع المتواترۃ اَز امام ابو عمرو دانی رحمہ اللہ
(٢) النشر فی القراء ات العشر اَز امام ابن جزری رحمہ اللہ
(٣) غیث النفع فی القراء ات السبع اَمام صفاقسی رحمہ اللہ
(٤) عنایات رحمانی شرح شاطبیۃ اَز استاد القراء قاری فتح محمد پانی پتی رحمہ اللہ
(٥) البدور الزاھرۃ فی القراء ات العشر المتواترہ من طریقی الشاطبیہ والدرۃ اَز شیخ عبدالفتاح القاضی رحمہ اللہ
(٦) مصحف دارالصحابۃ بالقراء ات العشر المتواترۃ اَز جمال الدین محمد شریف حفظہ اللہ
(٧) القراء ات العشر فی ھامش القرآن الکریم اَز محمد کریم راجح حفظہ اللہ
(٨) أجزاء مختلفۃ فی القراء ات العشر المتواترۃ اَز قاری رحیم بخش پانی پتی رحمہ اللہ

 

[ساجد]

کتب علم ِرسم
(١) المقنع فی معرفۃ رسم المصاحف والامصاراَز امام دانی رحمہ اللہ
(٢) المحکم فی نقط المصاحف از امام دانی رحمہ اللہ
(٣) کتاب المصاحف اَز امام ابوبکر عبداللہ بن سلیمان بن اَشعث السجستانی بالمعروف بابن اَبی داؤدرحمہ اللہ
(٤) مختصر التبین لھجاء التنزیل اَز امام ابوداؤد سلیمان بن نجاح رحمہ اللہ
(٥) عقیلۃ أتراب القصائد اَز امام ابو القاسم شاطبی رحمہ اللہ
(٦) دَلیل الحیران اَز الشیخ ابراہیم بن احمد المارغنی رحمہ اللہ
(٧) تنبیہ الخَلان علی أعلان بتکمِیْل مَوْردِ الظَّمْـان اَز علامہ عبدالواحد الاندلسی رحمہ اللہ
(٨) نثر المرجان فی رسم نظم القرآن اَز محمد غوث بن محمد النائطی رحمہ اللہ
(٩) جامع البیان فی مَعْرفَۃ رسم القرآن اَز علی اسماعیل الھنداوی رحمہ اللہ
(١٠) نفائس البیان فی رسم القرآن اَز شیخ محمد اِدریس العاصم حفظہ اللہ

 

[ساجد]

کتب ِعلم ضبط
(١) کتاب النقط اَز امام ابو عمرو دانی رحمہ اللہ
(٢) المحکم فی نقط المصاحف اَز امام ابو عمرو دانی رحمہ اللہ
(٣) کتاب أصول الضبط و کیفیتہ علی جہۃ الاختصار اَز امام ابوداؤد سلیمان بن نجاح رحمہ اللہ
(٤) الطَّراز فی شَرْح ضَبْطِ الخَرَّازاَز الامام ابوعبداللہ محمد بن عبداللہ التَّنِّیسِی رحمہ اللہ
(٥) سمیر الطالبین فی رسم وضبط الکتاب المبیناَز شیخ علامہ علی محمد الضبَّاع رحمہ اللہ
(٦) إرشاد الطالبین إلی ضبط الکتاب المبین اَز ڈاکٹر محمد سالم المحیسن رحمہ اللہ

 

[ساجد]

کتب علم الفواصل و عدالآی
(١) ناظمۃ الزھر فی علم الفواصل اَز امام ابوالقاسم شاطبی رحمہ اللہ
(٢) بشیر الیسر شرح ناظمۃ الزھراز علامہ عبدالفتاح القاضی رحمہ اللہ
(٣) کاشف العسر شرح ناظمۃ الزھر از قاری فتح محمد پانی پتی رحمہ اللہ
(٤) ھدایات الرَّحیم اَز قاری رحیم بخش پانی پتی رحمہ اللہ

 

[ساجد]

مجمّع الملک فھد بن عبدالعزیز
گذشتہ صفحات میں ہم مجمع کی جمع کتابی کے سلسلہ میں خدمات پر روشنی ڈال چکے ہیں کہ مجمّع ملک فھد نے روایت حفص کے علاوہ باقی تین متداول روایات میں مصاحف شائع کرکے باقاعدہ اس کام کی بنیاد ڈالی ہے، یقینا وہ اس بارے میں ہونے والے کام کے اجراء میں برابر کے شریک ہیں، کیونکہ جس فکرہ کے مطابق ذمہ داران کلیہ القرآن یہ کام شروع کیا تھا وہ مجمع کے کام ہی سے سامنے آیا۔ مجمّع ملک فھد کا علمی کام کون سے شیوخ نے کن کتب کے روشنی میں کیا، اس کی تفصیل ہر ایک مصحف کے آخر میں موجود ہے۔
ہماری حالیہ اطلاعات کے مطابق مجمّع الملک فھد نے بھی روایات ِغیر متداولہ پر کام شروع کردیا ہے۔ اللہ تعالی جمع کتابی کے مشروع کے سلسلہ میں اہل جہد کی مبارک کاوشوںبار آور فرمائے۔ آمین

 

[ساجد]

دارالقراء ات البانیۃ
جمع کتابی کے سلسلہ میں علاقہ البانیہ کا ایک ادارہ دارالقراء ات بھی کام کر رہا ، جس کے تحت قراء ات سبعہ کی چودہ مرویات میں سے غیر متداولہ قراء ات کی طباعت کا مشروع جاری ہے۔ اہل ادارہ نے اپنے کام کے تعارف کے لیے باقاعدہ ایک ویب سائٹ بھی بنا رکھی ہے۔ طباعت مصاحف کی سلسلہ میں اس ادارہ کا انداز یہ ہے کہ ایک ایک مصحف کی تیاری کرکے اس کی تکمیل کرتے ہیں اور پھر دوسرے مصحف پر کام شروع کرتے ہیں۔ یہ ادارہ فی الحال دو مصاحف یعنی مصحف بزی اور مصحف قنبل پر کام مکمل کرچکا ہے اور لجنۃ مراجعۃ المصاحف مصر کے رئیس شیخ القراء ڈاکٹر احمد عیسیٰ معصراوی حفظہ اللہ کی زیر نگرانی تیرہ افراد کی کمیٹی ان دونوں مصاحف کی مراجعت کرچکی ہے اور یہ مصاحف طباعت کے مرحلہ میں ہیں۔ اہل ادارہ آج کل روایت ہشام اور روایت ابن ذکوان کی تیاری کے سلسلہ میں کام کررہے ہیں۔ اللہ تعالی انہیں بھی اپنے بابرکت پروگرام مکمل کرنے کی توفیق عطا فرمائے۔ آمین
نوٹ: چار متداولہ روایات کو مجمع ملک کے علاوہ عالم ِاسلام کے متعدد ممالک کے مختلف طباعتی اداروں نے بھی نشر کیا ہے۔ وہ مطبوعہ مصاحف جن ان چار روایات میں مختلف مکتبوں کی طرف سے مطبوع ہیں ان میں سے تیس کے قریب اداروں کے مصاحف ہمارے پاس موجود ہیں، جس کی مکمل فہرست آپ ’’قراء ات متداولہ اور ان میں مطبوع مصاحف کا ایک تعارفْ‘‘ کے زیرعنوان لکھے گئے مقالہ میں دیکھ سکتے ہیں۔