سابقہ اَقوال پربحث وتمحیص
قولِ اوّل:
جس میں حروف کے بارے میں یہ مؤقف اختیارکیا گیا ہے کہ حدیث ِسبعہ احرف دراصل معنوی لحاظ سے متشابہ ہے اور اس کے مفہوم کا اِدراک نہیں ہوسکتا۔
اگر تو یہ بات اس قول کے قائل کی اپنے بارے میں ہے کہ میرے لیے یہ حدیث متشابہ المعنی ہے اورمیں اس کے مفہوم کو نہیں سمجھ سکا، تب تو اس قول میں کوئی مضائقہ نہیں، لیکن اگر قائل کی مراد تمام اُمت کے لیے مطلق طور پر ہے کوئی بھی اُمتی اس کے مفہوم و حقیقت سے آشنا نہیں تو قائل کا یہ نظریہ فقط ایک غلط فہمی ہے اور اس نظریے کی تردید اس اَمر سے بخوبی ہوجاتی ہے کہ نبی اکرمﷺاپنی اُمت کوسکھانے اور تعلیم دلانے کے لیے مبعوث کئے گئے تھے جس میں آپ کو سبعہ اَحرف کی تعلیم دینے کاحکم بھی تھا۔چنانچہ آپ نے اُمت کو عملاً اس کی تعلیم دی اور انہیں ان حروف پر تلاوت کا حکم دیا۔جس کو اُمت بجا لائی(جیسا کہ اَحادیث سابقہ بھی اس پر مصرح ہیں) اور صحابہ کرام رضی اللہ عنہم سبعہ احرف پر تلاوت کرتے رہے اور بخوبی ان کاعلم رکھتے تھے یا صحابہ کی اکثریت کے پاس ان حروف کاعلم تھا۔بعد میں صحابہ نے تابعین کو اس کی تعلیم دی اور یہ حروف ہر زمانے میں رائج رہے۔حتیٰ کہ ہم تک متصل اسانید کے ساتھ پہنچ گئے۔ ان تمام حقائق کی روشنی میں یہ کیسے کہاجاتا ہے کہ یہ سبعہ احرف متشابہ المعنی ہیں جن کے معانی و مفاہیم کا اِدراک نہیں کیاجاسکتا…؟
اگر اس قول سے مراد یہ ہے کہ پہلی صدی ہجری کے مسلمان اس کا علم رکھتے تھے اور ان کے ساتھ قراء ت کرتے تھے، لیکن بعد میں یہ علم ختم ہوگیا اور اس کے اثرات و نشانات معدوم ہوگئے،لہٰذا آج ہم اس کی حقیقت کو نہیں جان سکتے تو اس بات کا بھی عقل و فہم سے کچھ واسطہ نہیں۔ یہ وہی بات ہے جس کو ابن جریررحمہ اللہ نے اختیار کیا ہے اور اس پرتفصیلاً بحث آگے پانچویں قول کے ضمن میں آئے گی، لیکن مختصراً یہ سمجھ لینا چاہئے کہ:
قرآن کی ایسی ثابت قراء ات جو آج ہم میں موجود اور مروّج ہیں اور اپنے دامن میں
الأحرف السبعۃ کو سموئے ہوئے ہیں، کے بارے میں اہل علم و تحقیق کا کبھی یہ اختلاف نہیں رہا کہ ان متواتر عشرہ قراء ات کا بڑا حصہ اَحرف سبعہ پر مشتمل ہے۔ بلکہ اس سے بڑھ کر یہ بھی متفقہ بات ہے کہ عشرہ قراء ات ان تمام حروف پر مشتمل ہیں جو نبی اکرمﷺ پرسب سے آخر میںنازل کئے گئے تھے۔ چونکہ اللہ تعالیٰ نے قرآن کریم کی تاقیامت حفاظت کی ذمہ داری اپنے سر لی ہے اور ایسا ممکن نہیں کہ قرآن سے کچھ بھلا دیا گیا ہو، یا معدوم ہوگیا ہو۔ لہٰذا اس سے یہ بات ثابت ہوتی ہے کہ جملہ حروف جونبی اکرمﷺپر سب سے آخر میں نازل ہوئے سب کے سب محفوظ و مامون ہیں حتیٰ کہ ہر دور میں اُمت کا ان کو تلقی بالقبول حاصل رہا ہے اور یہ ہمیشہ محفوظ ہی رہیں گے یہاں تک کہ اللہ تعالیٰ قرآن کے اٹھا لیے جانے کاحکم دے دیں۔ اس قول کی تردید ’حدیث میں وارد شدہ صراحت‘ سے بھی ہوتی ہے کہ ان سبعہ حروف کے نزول کا مقصد اُمت کے لیے آسانی پیدا کرنا ہے۔ کیا مجہول اورنامعلوم شے سے اُمت کے لیے آسانی پیدا ہوسکتی ہے۔ علاوہ ازیں کس دلیل کی بناء پر اس رخصت اور آسانی کو فقط دورِ اوّل تک محدود کیاجاسکتا ہے؟ جبکہ حدیث میں ’امت‘ کے لفظ عام ہیں اور پوری اُمت محمدیہﷺ پردال ہیں۔
باقی رہا یہ مسئلہ کہ حرف کامفہوم قطعی نہیں اور یہ ایسا لفظ ہے جو مشترک اور کثیر معانی پر بولا جاتاہے تو یہ بات تو صحیح ہے کہ حرف کالفظ عام ہے، لیکن باوجود اس کے قرائن و آثار کی رو سے حرف کی تعیین اور مراد واضح اور حتمی ہوچکی ہے (جیسا کہ آگے تفصیل سے بیان ہوگا) چنانچہ اس تفصیل کے بعد حرف کا لفظ مشترک نہیں رہے گابلکہ احادیث سبعہ احرف میں استعمال ہونے والے حرف کا مفہوم متعین ہوجائے گا۔
![محدث فورم [Mohaddis Forum]](/styles/default/xenforo/Forum.jpg)
