فکر آخرت کی متعلق اشعار

[عبداللہ کشمیری]

وَعَلَيْكُمُ السَّلَام وَرَحْمَةُ الله
مجھے نہیں معلوم یہ اشعار کس شاعر نے لکھے ہے بہت پہلے میں نے ایک اخبار سے ان اشعار کو اپنی ڈائری میں کوپی کرکے رکھا تھا وہاں پر بھی شاعر کا نام نہیں لکھا تھا ۔۔۔

 

[محمد شاہد]

عبداللہ کشمیری بھائی آپ بہت اچھے اشعار شئیر کرتے ہیں۔جس شاعر کا نام معلوم نہ ہو بس آخر میں صرف اتنا لکھ دیا کریں کے شاعر کا نام معلوم نہیں

 

[عبداللہ کشمیری]

آخرت کو بھول بیٹھا فکر دنیا کے عوض
موت کا حملہ اچانک بے خبر کیسا لگا؟
ہنستے ہنستے تو نے دنیا میں گزار دی زندگی
اب نیا زیرزمین تنگ گھر کیسا لگا؟
دفن کرکے قبر میں سب بے رخی سے چل دیے
جس سے تو مانوس تھا اب وہ بشر کیسا لگا؟
تو ہنسا کرتا تھا اوروں کو پریشان دیکھ کر
چل دیا اپنوں کو روتا چھوڑ کر کیسا لگا؟
اب نہ وہ تکیہ ملائم اور نہ بستر مخمل
جسم پر دو گز کفن مٹی پر سر کیسا لگا؟​

 

[محمد آصف مغل]

جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے

جہاں میں ہیں عبرت کے ہر سُو نمونے
مگر تجھ کو اندھا کیا رنگ و بُو نے
کبھی غور سے بھی دیکھا ہے تو نے
جو معمور تھے وہ محل اب ہیں سُونے

جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے

ملے خاک میں اہلِ شاں کیسے کیسے
مکیں ہو گئے لا مکاں کیسے کیسے
ھوئے ناموَر بے نشاں کیسے کیسے
زمیں کھا گئی آسماں کیسے کیسے

جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے

اجل نے نہ کسریٰ ہی چھوڑا نہ دارا
اسی سے سکندرسا فاتح بھی ہارا
ہر ایک چھوڑ کے کیاکیا حسرت سدھارا
پڑا رہ گیا سب یہیں ٹھاٹ سارا

جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے

تجھے پہلے بچپن میں برسوں کھلایا
جوانی نے پھر تجھ کو مجنوں بنایا
بڑھاپے نے پھر آ کے کیا کیا ستایا
اجل تیرا کر دے گی بالکل صفایا

جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے

یہی تجھ کو دُھن ہے رہوں سب سے بالا
ہو زینت نرالی ہو فیشن نرالا
جیا کرتا ہے کیا یونہی مرنے والا؟
تجھے حسنِ ظاہر نے دھوکے میں ڈالا


کوئی تیری غفلت کی ہے انتہا بھی؟
جنون چھوڑ کر اب ہوش میں آ بھی
جگہ جی لگانے کی دنیا نہیں ہے
یہ عبرت کی جا ہے تماشہ نہیں ہے


​

 

[Dua]

جزاک اللہ ۔اچھی شئیرنگ ہے بھائی۔

 

[شوکت پرویز]

آخرت کا سفر بہت دشوار
اور پاس اپنے کوئی زاد نہیں

 

[عبداللہ کشمیری]

منہ دیکھ لیا آئینے میں پر داغ نہ دیکھا سینے میں
جی ایسا لگایا جینے میں مرنے کو مسلماں بھول گئے​

 

[ساجد تاج]

جزاک اللہ خیرا

 

[عبداللہ کشمیری]

نہ دولت کام آئے گی نہ ثروت کام آئے گی
نہ منصب کام آئے گا نہ شہرت کام آئے گی​

نہ ہرگز پیر صاحب کی کرامت کام آئے گی
نہ شوکت کام آئے گا نہ شوکت کام آئے گی​

نہ رعب و دبدبہ سطوت، وجاہت کام آئے گی
نہ ہیبت، سلطنت، حشمت، حکومت کام آئے گی​

جب عزائیل آئیں گے دھرا رہ جائے گا منصب
نہ طاقت رنگ لائے گی نہ قوت کام آئے گی​

اتاری جائے گی تن سے، وہ وردی ہو کہ گدڑی ہو
تو ایسے وقت میں رب کی خشیت کام آئے گی​

جب اترے گا جنازہ قبر کی گھاٹی میں میرے دوست
تو ساتھ اعمال جائیں گے، عبادت کام آئے گی​

تمھیں سونا پڑے گا لاکھوں من مٹی تلے حاصلؔ
نہ کرسی ساتھ جائے گی نہ عزت کام آئے گی​

تمھارے ناملیوا بھی تمھیں دفنا کے آئیں گے
نیا نعرہ لگائیں گے سیاست کام آئے گی​

نہ اعلیٰ عہدے والے بھی سفارش کرنے پائیں گے
نہ اپنے ووٹروں کی کچھ حمایت کام آئے گی​

یہاں کے جھوٹے دعوے سب یہیں رہ جائیں گے پیارے
وہاں تو سچ کی قیمت ہے صداقت کام آئے گی​

جو شاطر ہیں وہ اپنی چاپلوسی بھول جائیں گے
کب اس دربارِ عالی میں ذہانت کام آئے گی​

اگر اسلام کے سانچے میں ڈھل جانا جہالت ہے
تو سن لو حشر میں ایسی جہالت کام آئے گی​

 

[عبداللہ کشمیری]

جس کو دیکھو غمِ معاش میں ہے
اور سے اور کی تلاش میں ہے
تھا جو مقصود مل نہیں پایا
مبتلا صرف کاش کاش میں ہے
بے وفا مال تھا، سو چھوڑ گیا
باوفا تھا عمل، سو نعش میں ہے
حی و قیوم کی نظر تجھ پر
پھر بھی الجھا ہوا تو لاش میں ہے
نفس بننے لگا ہے لوامہ
اب تو خوبی بھی بدمعاش میں ہے
وہ حقیقت کو پائے گا کیونکر
جو اثرؔ سائے کی تلاش میں ہے​