کرتے رہیں ہمیشہ حفاظت زبان کی

[عبداللہ کشمیری]

اللہ نے جو بخشی ہے نعمت زبان کی
کرتے رہیں ہمیشہ حفاظت زبان کی
فتنے یہ کیسے کیسے اٹھائے اک آن میں
میں کیا بتاؤں کیسی ہے آفت زبان کی
ہم تو وہاں بھی اس کو چلاتے ہیں بے دریغ
ہوتی نہیں جہاں پہ ضرورت زبان کی
جو اہلِ دل ہیں اہلِ نظر ہیں جہان میں
کرتے ہیں پاسداری نہایت زبان کی
سوچے ذرا کہ دے گا وہاں کس طرح جواب
رکھتا نہیں یہاں جو رعایت زبان کی
ہشیارباش! آپ کی یہ ملکیت نہیں
رکھیئے سنبھال کر یہ امانت زبان کی
قینچی کی مثل اس کو چلائیں نہ رات دن
زحمت بنے نہ حشر میں نعمت زبان کی
تیغ و تبر سے گہرا ہے لفظ و بیاں کا زخم
نشتر سے تیزتر ہے جراحت زبان کی
جس نے زبان روک لی، وہ پا گیا نجات
کم بولنا، ہے اصل کرامت زبان کی
ہم چلتے پھرتے ذکر سے بس تر رکھیں اسے
آسان کس قدر ہے عبادت زبان کی
محفوظ پھر وہ رہ نہیں سکتا بلاؤں سے
کرتا نہیں اثرؔ جو حفاظت زبان کی

 

[قاری مصطفی راسخ]

جزاکم اللہ خیرا