کیا جمعہ کے دن عصر کی نماز کے بعد درود پڑھنے کی خاص فضیلت ہے؟

[محدث میڈیا]

اس بارے میں ایک روایت سیدنا ابوہریرہ سے بیان کی جاتی ہے کہ جو شخص جمعہ کے دن عصر کی نماز کے بعد اپنی جگہ سے اٹھنے سے پہلے اسی مرتبہ یہ درود شریف پڑھے تو اس کے اسی سال کے گناہ معاف ہوں گے اور اسی سال کی عبادت کا ثواب اس کے لئے لکھا جائے گا۔(القول البدیع صفحہ198)

اسی طرح دوسری روایت سیدنا سہل بن عبداللہ رضی اللہ عنہ سے مروی ہے کہ جو شخص جمعہ کے دن عصر کے بعد یہ درود شریف اسی مرتبہ پڑھے گا اس کے اسی سال کے گناہ معاف ہوں گے۔( القول البدیع صفحہ199)

یہ دونوں روایات سند کے اعتبار سے صحیح نہیں ہیں بلکہ بے اصل ہیں۔ امام سخاوی رحمہ اللہ نے خود ہی ان دونوں روایات کو اپنی کتاب ( القول البدیع صفحہ 199) میں غیر صحیح قرار دیا ہے اور ان کے بے اصل ہونے کو واضح کیا ہے،جبکہ بدعت پرستوں نے ان سے استدلال کرنا شروع کر دیا ہے۔ (دیکھیں: القول البدیع صفحہ 199) چونکہ یہ دونوں روایات ہی ثابت نہیں ہیں ،لہذا ان پر عمل نہیں کیا جاسکتا ہے اور ان میں بیان کیے گئے ثواب کو بھی درست نہیں کہا جا سکتا۔ والله أعلم بالصواب.