مجھے اندازہ ہو چکا ہے آپ صرف احادیث کی تاویل میں ماہر ہیں، اصول حدیث میں بالکل کورے ہیں، اگر اس عبارت کو غور سے پڑھیں تو ابن جریج نے اپنے سماع کی تصریح کی ہے، لیکن آنکھیں اگر بند ہوں تو دن بھی رات بھلا اس میں قصور کیا ہے آفتاب کا ، ایک بار دوبارہ زحمت فرما لیں اگر پھر بھی سمجھ نہ آئے تو پوچھنے کا کشٹ کر لینا میں بتا دوں گا سماع کی تصریح کہاں ہے؟
محترم حافظ بھائی۔ جس چیز کو آپ بآسانی تاویل فرماتے ہیں وہی بسا اوقات تحقیق ہوتی ہے۔ تحقیق حدیث یہ نہیں ہوتی کہ کسی حدیث کو اس کے اصل ماخذ میں دیکھ لیں اور اس کے ظاہری ترجمہ کو ہی سب کچھ مان لیں۔ ٹھیک ہے کہ یہ بھی درست ہے لیکن اگر اس روایت کی دیگر روایات سے تطبیق کی جائے، اس کے الفاظ کا اصل معنی تلاش کیا جائے یا یہ دیکھا جائے کہ اس روایت کے ہوتے ہوئے علماء امت کے ایک طبقہ نے اس کے ظاہر کے خلاف فتوی کیوں دیا تو یہ تحقیق حدیث ہوتی ہے۔ تاویل کا جو معنی آپ حضرات لیتے ہیں وہ اکثر درست ہی نہیں ہوتا۔ یہ تاویل اردو والی نہیں عربی والی ہو رہی ہوتی ہے۔ اس تاویل کو اپنے اصل معنی میں دیکھنا چاہیں تو تفسیر طبری میں دیکھیے جہاں ابو جعفر طبری رح ہر تفسیر کو تاویل کہتے ہیں۔ کیا اس کا مطلب تاویل مذمومہ ہوتی ہے؟
یہ سلف سے چلتا آرہا ہے کہ ایک شخص کسی روایت میں کوئی کلام کرتا ہے اور دوسرا اس کا رد کرتا ہے لیکن آپ جیسے الفاظ بہت کم استعمال ہوتے ہیں۔ اگر میں یہ استعمال کرنا شروع کر دوں تو آپ کی روایات پر میری جرح خطرناک ہو جائے گی، ایک طبقہ خوش بھی ہوگا لیکن پھر آپ میں اور مجھ میں فرق کیا ہوگا؟
اس روایت کی سند جیسے آپ نے بیان فرمائی درست ہے۔ اب اس کےمتن کا جائزہ لیتے ہیں:۔
اس کا متن یہ ہے:۔
عن ابن جريج، عن عطاء قال: قلت له: أكان ابن الزبير يؤمن على إثر أم القرآن؟ قال: «نعم، ويؤمن من وراءه حتى أن للمسجد للجة»، ثم قال: إنما آمين دعاء
"ابن جریج عطاء سے روایت کرتے ہیں۔ کہتے ہیں میں نے انہیں کہا: کیا ابن زبیر فاتحہ کے بعد آمین کہتے تھے؟ انہوں نے فرمایا: جی ہاں، اور جو ان کے پیچھے ہوتے وہ بھی کہتے حتی کہ مسجد میں ایک گونج سی ہو جاتی۔ پھر کہا: آمین تو دعا ہے۔"
یہاں استدلال لفظ لجۃ سے ہے۔ اس کے معنی یوں کیے جاتے ہیں کہ "مسجد گونج اٹھی۔" حالاں کہ اردو میں یہ ترجمہ جو معانی سمجھا رہا ہے وہ عربی لفظ لجۃ کے نہیں ہیں۔ یہ اردو میں عام ہے کہ جو معنی عربی الفاظ کے ہوتے ہیں اردو ترجمہ وہ مکمل ادا نہیں کر سکتا۔
لجۃ کا اصل معنی ہے آوازوں کا ایک دوسرے سے مختلط ہوجانا، مل جانا، گڈمڈ ہوجانا۔ ایک نارمل آواز میں جو ایک یا دو فرد سن سکتے ہوں اگر بہت سے لوگ بول اٹھیں تو ان کی آوازیں گڈمڈ ہو جاتی ہیں۔ لجۃ کا مکمل معنی اصوات سے کیا گیا ہے یعنی آوازیں۔
تاج العروس میں ہے:۔
و في حديث عكرمة: سمعت لهم لجة بآمين يعني أصوات المصلين.
"حدیث عکرمہ میں ہے میں نے ان کی آمین کی "لجۃ" سنی یعنی نماز پڑھنے والوں کی آوازیں۔"
لسان العرب میں ہے:۔
ولجة القوم: أصواتهم. واللجة واللجلجة: اختلاط الأصوات. ۔۔۔۔ وفي حديث عكرمة: سمعت لهم لجة بآمين، يعني أصوات المصلين.
گونج اٹھنے کے اصل الفاظ کیا ہیں؟ القاموس الجدید اردو۔عربی میں اس کے لیے الفاظ استعمال ہوئے ہیں:۔
دوّی المکان و دوی، ضج المکان بہتافات، تجاوبت الصدی
تجاوب ، جواب سے باب تفاعل ہے یعنی آپ نے آواز دی اور وہ آواز دیواروں وغیرہ سے ٹکرا کر واپس آئے۔ دیواریں یا پہاڑیاں آپ کی بات کا جواب دیں۔
ضجۃ گونج کے لیے اصل لفظ ہے۔ اس کا معنی معجم الوسیط میں مذکور ہے:۔
(الضجة) الجلبة والصياح
جلبہ کے معنی بھی آوازوں کے ہیں اور صیاح کے معنی تیز آواز، چیخ کے ہیں۔ لغت میں تفسیر بالاعم کی جاتی ہے۔ دونوں کو ملا کر ہم ترجمہ کریں تو اردو میں گونج کا ترجمہ بنتا ہے۔
تاج العروس میں لجۃ کے معنی میں بھی ضجۃ کا لفظ لکھا گیا لیکن یہ بھی تفسیر بالاعم ہے۔ کیوں کہ اس کا عمومی ترجمہ اصوات اور اختلاط اصوات سے ہی کیا گیا ہے۔ جیسے اوپر واضح کیا گیا ہے۔
مقاییس اللغہ میں ہے:۔
واللجة: الجلبة.
اور جلب کا معنی تاج العروس میں ہے:۔
(و) الجلب: الأصوات، وقيل (اختلاط الصوت كالجلبة)
معجم الوسیط میں ہے:۔
(اللجة) اخْتِلَاط الْأَصْوَات وَيُقَال سَمِعت لجة النَّاس أَصْوَاتهم وصخبهم والجلبة
تو ان سب لغات سے معلوم ہوتا ہے کہ لجۃ کا معنی گونج اٹھنا کرنا ،مکمل معنی نہیں۔ اور نہ ہی لجۃ سے یہ ثابت ہوتا ہے کہ وہ سب مل کر آاااامی ی ی ی ن کہتے ہوں گے۔ بلکہ اس سے سب میں ایک اٹھتی ہوئی آواز ثابت ہوتی ہے جو سب کے ہلکی یا نارمل آواز سے آمین کہنے سے پیدا ہوجاتی ہے۔ اس کے لیے اتنے زور سے کہنا ضروری نہیں۔
اخفاء بالکل کرنا یعنی آواز ہی نہ آئے یہ اخفاء کا اعلی درجہ ہے اور اس قدر کے قریب والوں کو آواز آجائے یہ اخفاء کا ادنی درجہ ہے۔ تو ان حضرات کا اس طرح آمین کہنا اخفاء سے خارج نہیں ہوتا۔ ممکن ہے بیچ میں چند عام افراد زور سے بھی کہہ دیتے ہوں اور چوں کہ یہ مسئلہ مجتہد فیہ ہے اس لیے ابن زبیر رض نے نکیر نہیں فرمائی ہو۔
پھر اگر ہم اس روایت سے جہر کا ثبوت مان بھی لیں تو اس کے مقابلے میں قوی دلائل ایسے ہیں جو خفا پر دلالت کرتے ہیں۔ جیسے آیت مبارکہ "ادعوا ربکم تضرعا و خفیۃ" جب کہ اسی روایت میں عطا کا یہ قول ہے کہ آمین تو دعا ہے۔ تو اگر احناف ایک جانب کے دلائل کو راجح جان کر ان کے مطابق عمل کرتے ہیں تو اس میں اعتراض کی کیا بات ہے؟؟
دوسری بات یہ کہ اس قسم کی روایات سے ایک صحابی کا اجتہاد ثابت ہوتا ہے ۔ اور اجتہادی مسائل میں جب دوسرے مجتہد کے پاس بھی دلائل ہوں تو اس پر کسی اور کا اجتہاد حجت نہیں ہوتا۔ ابراہیم نخعیؒ مشہور تابعی اور فقیہ و محدث ہیں۔ ان کی تعریف ذہبی یوں کرتے ہیں:۔
وكان بصيرا بعلم ابن مسعود، واسع الرواية، فقيه النفس، كبير الشأن، كثير المحاسن - رحمه الله تعالى -.
علم ابن مسعود رض کے ان حامل کا فتوی یہ ہے:۔
عن الثوري، عن منصور، عن إبراهيم قال: " خمس يخفين: سبحانك اللهم وبحمدك، والتعوذ، وبسم الله الرحمن الرحيم، وآمين، واللهم ربنا لك الحمد "
مصنف عبد الرزاق 2۔87 مجلس العلمی
"ابراہیم کہتے ہیں: پانچ چیزیں امام پوشیدہ ادا کرے گا: سبحانک اللہم، تعوذ، تسمیہ، آمین اور اللہم ربنا لک الحمد۔"
تو اب ہمارے پاس اس بحث کا خلاصہ یہ جمع ہوا:۔
1۔ لجۃ سے صرف ہلکی آواز ثابت ہوتی ہے۔ مطلوبہ آمین پر مزید دلائل چاہیے ہوں گے۔
2۔ اس کے مقابلے میں قوی دلائل موجود ہیں۔
3۔ یہ اجتہادی معاملہ ہے اور اس کے مخالف اجتہاد بھی موجود ہے۔
مجھے قوی امید ہے کہ اب آپ اس کو تاویل نہیں کہیں گے اور جواب دیتے وقت لہجہ بھی شائستہ رکھیں گے۔ آپ میری بات کا بالدلیل جو رد کریں گے اس سےمیں خوشی محسوس کروں گا۔
![محدث فورم [Mohaddis Forum]](/styles/default/xenforo/Forum.jpg)
