امام ابوالحسن دارقطنی رحمۃ اللہ علیہ
(ولادت:۳۰۶ھ۔ وفات:۳۸۵ھ)
امام ابوالحسن علی بن عمر دارقطنی، دارقطن کے رہنے والے تھے۔ یہ بغداد کا ایک محلہ تھا۔
معرفت علل، اسماء رجال اور معرفت رواۃ میں دارقطنی کو بلند مقام حاصل تھا۔ دوسرے علوم خاص طورسے قرآن اور فقہاء کے مذہب اور ان کے اختلافات سے انھیں اچھی واقفیت حاصل تھی۔ شعر و ادب پر عبور رکھتے تھے۔ عرب کے بہت سے دواوین انہیں حفظ تھے۔ ابو طیب حدیث میں
دارقطنی کو امیرالمومنین کہتے تھے۔ (حدیث کا تعارف، ص:۱۱۴، ۱۱۵)
امام دارقطنی کا حافظہ غیر معمولی اور بے نظیر تھا۔ نہ صرف احادیث بلکہ دوسرے علوم کا بھی ان کا سینہ مخزن تھا۔ بعض شعر ا کے دواوین بھی ان کو ازبر تھے قدیم عربوں کی طرح وہ تحریر و کتابت کی بجائے اکثر اپنے حافظہ سے ہی کام لیتے تھے۔ اپنے تلامذہ کی کتابیں زبانی املا کراتے تھے۔ تذکرہ نگاروں نے ان کو ’’الحافظ الکبیر، الحافظ المشہور، کان عالماً حافظً ‘‘ وغیرہ لکھا ہے۔
ذہبی نے ان کو ’’حافظ الزماں ‘‘ کہا ہے۔ اورسیر اعلام النبلا میں لکھتے ہیں:
الإمام الحافظ المجود, شيخ الإسلام, علم الجهابذة, أبو الحسن علي بن عمر بن أحمد بن مهدي بن مسعود بن النعمان بن دينار بن عبد الله البغدادي, المقرئ المحدث, من أهل محلة دار القطن ببغداد.
ولد سنة ست وثلاث مائة, هو أخبر بذلك.
حاکم فرماتے ہیں کہ وہ ’’حافظے میں یکتائے روزگار تھے۔ ‘‘
سمعانی کا بیان ہے کہ: ’’دارقطنی کا حافظہ ضرب المثل تھا۔ ‘‘
علامہ ابن جوزی رقم طراز ہیں کہ: ’’وہ (دارقطنی) حافظہ میں منفرد اور یگانۂ عصر تھے۔ ‘‘
حافظ ابن کثیر لکھتے ہیں کہ ’’بچپن ہی سے دارقطنی اپنے نمایاں اور غیر معمولی حافظہ کے لئے مشہور تھے۔ ‘‘
ابوالطیب طاہر طبری کا بیان ہے کہ ’’بغداد میں جو بھی حافظ حدیث آتا وہ امام دارقطنی کی خدمت میں ضرور حاضر ہوتا اور اس کے بعد اس کے لئے ا ن کی علمی بلند پائیگی اور حافظہ میں برتری اور تقدم کا اعتراف کرنا لازمی ہو جاتا۔‘‘
ان کے حافظہ اور ذہانت کا یہ حال تھا کہ ایک ہی نشست میں ایک ہی روایت کی بیس بیس سندیں برجستہ بیان کر دیتے تھے۔
حافظ ذہبی نے اس طرح کے ایک واقعہ کو نقل کرنے کے بعد لکھا ہے کہ اس کو دیکھ کر دارقطنی کی بے پناہ ذہانت، قوت حافظہ اور غیر معمولی فہم و معرفت کے سامنے سرنگوں ہو جانا پڑتا ہے۔
![محدث فورم [Mohaddis Forum]](/styles/default/xenforo/Forum.jpg)
