تفسیر احسن البیان (تفسیر مکی)

[محمد نعیم یونس]

سورة المدثر

(سورۃ مدثر مکی ہے اور اس میں چھپن آیتیں اور دو رکوع ہیں۔)

​

بِسْمِ اللّٰهِ الرَّحْمٰنِ الرَّحِيْمِ
شروع کرتا ہوں اللہ تعالیٰ کے نام سے جو بڑا مہربان نہایت رحم والا ہے۔

يَا أَيُّهَا الْمُدَّثِّرُ‌ ﴿١﴾
اے کپڑا اوڑھنے والے۔ (١)
١۔١ سب سے پہلے جو وحی نازل ہوئی وہ ﴿اقْرَأْ بِاسْمِ رَبِّكَ الَّذِي خَلَقَ﴾ ہے اس کے بعد وحی میں وقفہ ہو گیا اور نبی ﷺ سخت مضطرب اور پریشان رہتے۔ ایک روز اچانک پھر وہی فرشتہ، جو غار حرا میں پہلی مرتبہ وحی لے کر آیا تھا۔ آپ نے دیکھا کہ آسمان و زمین کے درمیان ایک کرسی پر بیٹھا ہے، جس سے آپ پر ایک خوف سا طاری ہو گیا اور گھر جا کر گھر والوں سے کہا کہ مجھے کوئی کپڑا اوڑھا دو، مجھے کپڑا اوڑھا دو۔ چنانچہ انہوں نے آپ کے جسم پر ایک کپڑا ڈال دیا، اسی حالت میں یہ وحی نازل ہوئی۔ (صحيح البخاری، ومسلم، سورة المدثر وكتاب الإيمان) اس اعتبار سے یہ دوسری وحی اور احکام کے حساب سے پہلی وحی ہے۔

 

[محمد نعیم یونس]

قُمْ فَأَنذِرْ‌ ﴿٢﴾
کھڑا ہو جا اور آگاہ کر دے۔ (١)
٢۔١ یعنی اہل مکہ کو ڈرا، اگر وہ ایمان نہ لائیں۔

 

[محمد نعیم یونس]

وَرَ‌بَّكَ فَكَبِّرْ‌ ﴿٣﴾
اور اپنے رب ہی کی بڑائیاں بیان کر۔

وَثِيَابَكَ فَطَهِّرْ‌ ﴿٤﴾
اپنے کپڑوں کو پاک رکھا کر۔ (١)
٤۔١ یعنی قلب و نیت کے ساتھ کپڑے بھی پاک رکھ۔ یہ حکم اس لیے دیا گیا کہ مشرکین مکہ طہارت کا اہتمام نہیں کرتے تھے۔

 

[محمد نعیم یونس]

وَالرُّ‌جْزَ فَاهْجُرْ‌ ﴿٥﴾
ناپاکی کو چھوڑ دے۔ (١)
٥۔١ یعنی بتوں کی عبادت چھوڑ دے۔ یہ دراصل لوگوں کو آپ کے ذریعے سے حکم دیا جا رہا ہے۔

 

[محمد نعیم یونس]

وَلَا تَمْنُن تَسْتَكْثِرُ‌ ﴿٦﴾
اور احسان کرکے زیادہ لینے کی خواہش نہ کر۔ (١)
٦۔١ یعنی احسان کرکے یہ خواہش نہ کر کہ بدلے میں اس سے زیادہ ملے گا۔

 

[محمد نعیم یونس]

وَلِرَ‌بِّكَ فَاصْبِرْ‌ ﴿٧﴾
اور اپنے رب کی راہ میں صبر کر۔

فَإِذَا نُقِرَ‌ فِي النَّاقُورِ‌ ﴿٨﴾
پس جب کہ صور میں پھونک ماری جائے گی۔

فَذَٰلِكَ يَوْمَئِذٍ يَوْمٌ عَسِيرٌ‌ ﴿٩﴾
تو وہ دن بڑا سخت دن ہو گا۔

عَلَى الْكَافِرِ‌ينَ غَيْرُ‌ يَسِيرٍ‌ ﴿١٠﴾
جو کافروں پر آسان نہ ہو گا۔ (۱)
١٠۔۱ یعنی قیامت کا دن کافروں پر بھاری ہو گا، کیوں کہ اس روز کفر کا نتیجہ انہیں بھگتنا ہو گا، جس کا ارتکاب وہ دنیا میں کرتے رہے ہوں گے۔

 

[محمد نعیم یونس]

ذَرْ‌نِي وَمَنْ خَلَقْتُ وَحِيدًا ﴿١١﴾
مجھے اور اسے چھوڑ دے جسے میں نے اکیلا پیدا کیا ہے۔ (١)
١١۔١ یہ کلمہ وعید و تہدید ہے کہ اسے، جسے میں نے ماں کے پیٹ میں اکیلا پیدا کیا، اس کے پاس مال تھا نہ اولاد، اور مجھے اکیلا چھوڑ دو۔ یعنی میں خود ہی اس سے نمٹ لوں گا۔ کہتے ہیں کہ یہ ولید بن مغیرہ کی طرف اشارہ ہے۔ یہ کفر و طغیان میں بہت بڑھا ہوا تھا، اس لیے اس کا خصوصی طور پر ذکر کیا ہے۔ واللہ عالم۔

 

[محمد نعیم یونس]

وَجَعَلْتُ لَهُ مَالًا مَّمْدُودًا ﴿١٢﴾
اور اسے بہت سا مال دے رکھا ہے۔

وَبَنِينَ شُهُودًا ﴿١٣﴾
اور حاضر باش فرزند بھی۔ (١)
١٣۔١ اسے اللہ نے اولاد سے نوازا تھا اور وہ ہر وقت اس کے پاس ہی رہتے تھے، گھر میں دولت کی فروانی تھی، اس لیے بیٹوں کو تجارت و کاروبار کے لیے باہر جانے کی ضرورت پیش نہیں آتی تھی۔ بعض کہتے ہیں، یہ بیٹے سات تھے بعض کے نزدیک بارہ اور بعض کے نزدیک تیرہ تھے ان میں سے تین مسلمان ہو گئے تھے، خالد، ہشام اور ولید بن ولید رضی اللہ عنہم۔ (فتح القدیر)

 

[محمد نعیم یونس]

وَمَهَّدتُّ لَهُ تَمْهِيدًا ﴿١٤﴾
اور میں نے اسے بہت کچھ کشادگی دے رکھی ہے۔ (١)
١٤۔١ یعنی مال و دولت میں ریاست و سرداری میں اور درازی عمر میں۔

 

[محمد نعیم یونس]

ثُمَّ يَطْمَعُ أَنْ أَزِيدَ ﴿١٥﴾
پھر بھی اس کی چاہت ہے کہ میں اسے اور زیادہ دوں۔ (۱)
۱۵۔۱یعنی کفر و معصیت کے باوجود، اس کی خواہش ہے کہ میں اسے اور زیادہ دوں۔