سلسلہ صحیحہ سے چند احادیث مبارکہ

[ابوطلحہ بابر]

۳۹۷۵ سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ”یہ نہیں ہو سکتا ہے کہ جہنم جیسی ( ‏‏‏‏ ہولناک ) چیز سے بچنے والا سویا ہوا ہو اور یہ بھی نہیں ہو سکتا ہے کہ جنت جیسے ( ‏‏‏‏نعمت کدے ) میں داخل ہونے والا محو آرام ہو ۔“ سلسلہ احادیث صحیحہ ۹۵۳

 

[عبدالمنان]

۳۰۰۷ سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ”اس وقت تک دعا قبول نہیں ہوتی جب تک نبی صلی اللہ علیہ وسلم پر درود نہ بھیجا جائے ۔“ سلسلہ احادیث صحیحہ ۲۰۳۵

اس حدیث کی شرح میں علماء نے کہا ہے کہ درود دعا کی قبولیت کے وسائل میں سے ایک وسیلہ ہے۔ دعا کے لئے درود واجب نہیں مستحب ہے۔ والله اعلم

 

[ابوطلحہ بابر]

۴۰۷۴ سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا : ”تم سن رہے ہو اور تم سے سنا جائے گا اور اس سے بھی سنا جائے گا جس نے تم سے سنا ہو گا ۔“ سلسلہ احادیث صحیحہ ۱۷۸۴

 

[ابوطلحہ بابر]

۴۰۷۵ سیدنا ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا : ”ہر جھگڑے کا کفارہ دو رکعتیں ہیں ۔ “ سلسلہ احادیث صحیحہ ۱۷۸۹

 

[ابوطلحہ بابر]

۴۰۷۰ سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا : ”میری امت کی عمریں ساٹھ سے ستر کے درمیان ہیں ، کم ہی لوگ ایسے ہیں جو اس حد سے تجاوز کرتے ہیں ۔ “ سلسلہ احادیث صحیحہ ۷۵۷

 

[ابوطلحہ بابر]

۴۰۸۴ سیدنا عمر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا : ”مکمل کٹ جانے والے ناک کی دیت سو اونٹ ہے ، ہاتھ کی پچاس ، ٹانگ کی پچاس ، دماغ کی جھلی تک یا اندر تک پہنچنے والے سر کے زخم کی دیت نفس کی ایک تہائی ، اندر تک جانے والے پیٹ کے زخم کی دیت نفس کی ایک تہائی ، ہڈی ٹوٹ جانے کی دیت پندرہ اونٹ ، ہڈی ننگا کرنے والے زخم کی پانچ ، دانت کی پانچ اور ہر انگلی کی دیت دس اونٹ ہے ۔ “ سلسلہ احادیث صحیحہ ۱۹۹۷

 

[ابوطلحہ بابر]

۴۰۸۵ سیدنا انس رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا : ”جس نے اپنے بھائی کی عدم موجودگی میں اس کی مدد کی ، تو اﷲ تعالیٰ دنیا و آخرت میں اس کی مدد کرے گا ۔ “ سلسلہ احادیث صحیحہ ۱۲۱۷

 

[ابوطلحہ بابر]

۴۰۹۶ سیدنا معاذ رضی اللہ عنہ کہتے ہیں : میں نے کہا: اے اللہ کے رسول ! مجھے وصیت فرمائیں ۔ آپ صلی اللہ علیہ وسلم نے فرمایا : ”اللہ تعالیٰ کی عبادت اس طرح کرو ، گویا کہ تم اسے دیکھ رہے ہو ، اپنے آپ کو مردہ تصور کرو ، ہر پتھر اور درخت کے پاس اﷲ کا ذکر کرو اور جب برائی کا ارتکاب کر بیٹھو تو اس کے ساتھ ہی نیکی کر لو ( ‏‏‏‏تاکہ برائی کا اثر زائل ہو جائے ) ، مخفی برائی کے بدلے نیکی بھی مخفی کی جائے اور اعلانیہ برائی کے بدلے نیکی بھی اعلانیہ کی جائے ۔ “ سلسلہ احادیث صحیحہ ۱۴۷۵

 

[ابوطلحہ بابر]

۴۰۹۸ ابوسعید خدری رضی اللہ عنہ سے روایت ہے ، وہ کہتے تھے : ( ‏‏‏‏ ‏‏‏‏ہم ) رسول اللہ صلی اللہ علیہ وسلم کی وصیت کو مرحبا ( ‏‏‏‏ ‏‏‏‏کہتے ہیں ) ۔ رسول اللہ صلی اللہ علیہ وسلم ہمیں تمہارے بارے میں وصیت کرتے تھے ۔ آپ کی مراد حدیث کے طلبہ تھے ۔ سلسلہ احادیث صحیحہ ۲۸۰

 

[میرب فاطمہ]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا : ”بیشک بعض لوگ مسجد نشیں ہوتے ہیں کہ فرشتے ان کے ہم نشیں ہوتے ہیں ، اگر وہ غائب ہو جائیں تو وہ انہیں تلاش کرتے ہیں ، اگر وہ بیمار پڑھ جائیں تو وہ ان کی تیمار داری کرتے ہیں اور اگر انہیں کوئی ضرورت ہو تو وہ ان کی اعانت کرتے ہیں ۔ مسجد میں بیٹھنے والے کو کوئی ایک فائدہ ضرور ہوتا ہے : کوئی اس سے استفادہ کرتا ہے یا وہ حکمت والی بات کرتا ہے یا اسے رحمت کا انتظار ہوتا ہے ۔“
سلسلہ صحیحہ 3401

الله اکبر ۔۔۔۔فرشتے تلاش کرتے ہیں۔۔۔سبحان اللہ