مختصر صحیح بخاری - زین العابدین احمد بن عبداللطیف - حصہ دوم (یونیکوڈ)

[Aamir]

باب۔ جس نے کچھ پروا نہ کی جہاں سے چاہا مال کما لیا
(۹۸۸)۔ سیدنا ابوہریرہؓ نبیﷺ سے روایت کرتے ہیں کہ آپﷺ نے فرمایا :'' لوگوں پر ایک وقت ایساآئے گا کہ آدمی کو اس بات کی کچھ پروا نہ ہو گی کہ حلال طریقہ سے مال حاصل کیا ہے یا حرام طریقہ سے۔''

 

[Aamir]

باب۔ کپڑے وغیرہ کی تجارت کرنا کیسا ہے؟
(۹۸۹)۔ سیدنا براء بن عازب اور زید بن ارقمؓ کہتے ہیں کہ ہم رسول اللہﷺ کے دور میں تجارت کیا کرتے تھے تو ہم نے رسول اللہﷺ سے صرف کے بارے میں دریافت کیا (مثلاً روپیہ روپے کے بدلے بیچنا) تو آپﷺ نے ارشاد فرمایا:'' اگر ہاتھوں ہاتھ (یعنی نقد) ہو تو جائز ہے اور اگر ادھار ہو تو جائز نہیں۔ ''
فائدہ : روایت مذکور میں اگرچہ صراحتاً باب کے ساتھ مناسب نہیں تاہم عموماً مباح کاروباروں میں سے ایک کپڑے کا کاروبار بھی ہے اس لیے کپڑے کا ذکر کیا گیا ہے (فتح الباری) مزید یہ کہ بخاری کے بعض نسخوں میں باب (میں ''وَغَیْرِہ'' یعنی) کپڑے وغیرہ کا ذکر ہے۔

 

[Aamir]

باب۔ تجارت کے لیے سفر کرنا کیسا ہے؟
(۹۹۰)۔ سیدنا ابو موسیٰ اشعریؓ نے امیر المومنین عمرؓ سے (ملاقات کے لیے) اجازت طلب کی مگر ان کو اجازت نہ ملی (اس وقت) سیدنا عمرؓ (کسی کام میں) مشغول تھے۔ پس ابو موسیٰؓ لو ٹ گئے پھر جب سیدنا عمرؓ فارغ ہوئے تو کہا میں نے عبداللہ بن قیس (ابو موسیٰ اشعریؓ) کی آواز سنی تھی ان کو اجازت دے دو تو لوگوں نے کہا کہ وہ تو واپس چلے گئے تو سیدنا عمرؓ نے ان کو پھر بلوایا (اور پوچھا کہ تم کیوں لوٹ گئے تھے؟) انھوں نے جواب دیا کہ ہمیں اسی بات کا حکم دیا جاتا تھا۔ سیدنا عمرؓ نے فرمایا کہ تم اس پر کوئی گواہ پیش کرو پس وہ انصار کی مجلس میں آئے اور ان سے پوچھا تو انصار نے کہا کہ اس بات کی گواہی تو سیدنا ابو سعید خدریؓ جو ہم سب میں چھوٹے ہیں وہی دے دیں گے چنانچہ وہ انہی کو لے گئے (اور انھوں نے شہادت دی کہ رسول اللہﷺ کا حکم تھا) تو سیدنا عمرؓ نے کہا کہ مجھ پر رسول اللہﷺ کا یہ حکم پوشیدہ رہ گیا تو کیوں کہ میں بازاروں میں تجارت کے لیے سفر کرنے میں مشغول ہو گیا تھا۔

 

[Aamir]

باب۔ جس نے رزق میں وسعت کی خواہش کی۔
(۹۹۱)۔ سیدنا انس بن مالکؓ کہتے ہیں کہ میں نے رسول اللہﷺ سے سنا، آپﷺ فرماتے تھے :'' جس شخص کو یہ اچھا معلوم ہو کہ اس کے رزق میں وسعت ہو جائے یا اس کی عمر بڑھ جائے اسے چاہیے کہ اپنے قرابت والوں کے ساتھ نیک سلوک کرے۔ ''

 

[Aamir]

باب۔ نبیﷺ کا ادھار خریدنا ثابت ہے
(۹۹۲)۔ سیدنا انسؓ سے روایت ہے کہ وہ جو کی روٹی اور چربی، نبیﷺ کے پاس لے کر گئے اور (اس دور میں) نبیﷺ نے اپنی ایک زرہ مدینہ میں ایک یہودی کے پاس گروی رکھ دی تھی اور اپنے گھر والوں کے لیے اس سے کچھ جو خرید لئے تھے (سیدنا انسؓ) کہتے ہیں کہ بے شک میں نے آپﷺ کو یہ فرماتے ہوئے سنا تھا :'' آل محمد کے پاس شام کو گندم یا کسی اور غلہ کا ایک صاع بھی نہیں رہتا حالانکہ ان کے پاس نو بیویاں ہیں۔ ''

 

[Aamir]

باب۔ آدمی کا خود کمانا اور اپنے ہاتھ سے کام کرنا
(۹۹۳)۔ سیدنا مقدامؓ نبیﷺ سے روایت کرتے ہیں کہ آپﷺ نے فرمایا :'' کسی شخص نے اپنے ہاتھ کی کمائی سے زیادہ پاک کھانا نہیں کھایا اور اللہ کے نبی داؤدؑ اپنے ہاتھ کی کمائی سے کھایا کرتے تھے۔ ''

 

[Aamir]

باب۔ خریدو فروخت میں نرمی اور آسانی کرنا بہتر ہے
(۹۹۴)۔ سیدنا جابر بن عبداللہؓ سے روایت ہے کہ رسول اللہﷺ نے فرمایا :'' اللہ اس شخص پر رحم کرے جو بیچتے وقت اور خریدتے اور تقاضا کرتے وقت نرمی اور فیاضی سے کام لے۔ ''

 

[Aamir]

باب۔ جس نے مالدار کو قرض ادا کرنے کے لیے مہلت دی
(۹۹۵)۔ سیدنا حذیفہؓ کہتے ہیں کہ نبیﷺ نے فرمایا :'' تم سے پہلے لوگوں میں فرشتوں نے ایک شخص کی روح سے ملاقات کی اور کہا کہ کیا تو نے کچھ نیکی کی ہے؟ اس نے کہا کہ (کچھ خاص تو نہیں بس) میں اپنے ملازموں کو یہ حکم دیتا تھا کہ وہ تنگ دست کو ادائے قرض معاف کر دیں اور مالدار سے (تقاضا میں) نرمی اختیار کریں۔ '' راوی نے بیان کیا کہ آنحضرتﷺ نے فرمایا :'' چنانچہ انھوں نے بھی اس کو چھوڑ دیا۔ ''

 

[Aamir]

باب۔ جب بیچنے والا اور خریدار دونوں صاف صاف بیان کر دیں
(۹۹۶)۔ سیدنا حکیم بن حزامؓ کہتے ہیں کہ رسول اللہﷺ نے فرمایا :۔ '' بیچنے والے اور خریدار دونوں کو اختیار ہے جب تک کہ جدا نہ ہوں ''یا یہ فرمایا '' یہاں تک کہ علیحدہ ہو جائیں، پس دونوں گروہ سچ بولیں اور عیب و ہنر اس کا ظاہر کر دیں تو انھیں ان کی اس خرید و فروخت میں برکت دی جائے گی اور اگر جھوٹ بولیں گے اور عیب پوشی کریں گے تو ان کی تجارت میں سے برکت ختم کر دی جائے گی۔ ''

 

[Aamir]

باب۔ کھجوروں کی مختلف قسموں کا ایک ہی جگہ ملا کہ بیچنا کیسا ہے؟
(۹۹۷)۔ سیدنا ابو سعید خدریؓ کہتے ہیں کہ ہمیں مختلف اقسام کی ملی جلی کھجوریں ملا کرتی تھیں تو ہم ان کے دو صاع ایک صاع (ایک ہی قسم کی اچھی کھجور) کے عوض فروخت کر دیتے تو نبیﷺ نے فرمایا :'' دو صاع، ایک صاع کے عوض فروخت نہ کرو اور نہ دو درہم ایک درہم کے عوض (کیوں کہ یہ سود ہے)۔ ''