مختصر صحیح بخاری - زین العابدین احمد بن عبداللطیف - حصہ سوم (یونیکوڈ)

[Aamir]

تفسیر سورۃ الطور
باب۔ اللہ تعالیٰ کے قول '' قسم ہے طور (پہاڑ) کی اور لکھی ہوئی کتاب کی ''(الطور : ۱،۲)کے بیان میں۔
(۱۷۸۲)۔ سیدنا جبیر بن مطعمؓ کہتے ہیں کہ میں نے رسول اللہﷺ کو مغرب کی نماز میں سورۂ طور پڑھتے سنا جب آپﷺ اس آیت :'' کیا یہ لو گ کسی کے پیدا کیے بغیر ہی پیدا ہو گئے ہیں یا یہ خود پیدا کرنے والے ہیں ؟ کیا انھوں نے ہی آسمانوں اور زمین کو پیدا کیا ہے ؟(نہیں) بلکہ یہ لوگ یقین ہی نہیں رکھتے۔ یا کیا ان کے پاس تیرے رب کے خزانے ہیں یا یہ (ان خزانوں کے) داروغہ ہیں (جس کو چاہیں دیں یا نہ دیں)''(سورۂ طور:۳۵۔ ۳۷)پر پہنچے تو قریب تھا کہ میرا دل اڑ جائے یعنی پھٹ کر نکل جائے۔

 

[Aamir]

تفسیر سورۃ النجم
باب۔ اللہ تعالیٰ کا قول '' کیا تم نے لات اور عزیٰ (نامی بتوں) کو دیکھا ہے (کیا وہ بت معبود ہو سکتے ہیں)؟'۔ '(النجم :۹۱)
(۱۷۸۳)۔ سیدنا ابو ہریرہؓ سے مروی ہے کہ رسول اللہﷺ نے فرمایا :'' جو شخص لات اور عزیٰ کی قسم کھائے وہ (تجدید ایمان کر ے) لا الہٰ الا اللہ کہے اور جو شخص اپنے ساتھی سے کہے کہ آؤ قمار بازی کریں (جواء کھیلیں) تو وہ (اپنے گناہ کے کفارہ کے طور پر) صدقہ دے۔ ''

 

[Aamir]

تفسیر سوۃ القمر
باب۔ اللہ تعالیٰ کا قول '' بلکہ قیامت کی گھڑی ان کے وعدے کا وقت ہے اور قیامت بڑی سخت اور کڑوی چیز ہے۔ ''
(۱۷۸۴)۔ ام المومنین عائشہ صدیقہؓ کہتی ہیں کہ یہ آیت '' بلکہ قیامت کی گھڑی ان کے وعدے کا وقت ہے اور قیامت بڑی سخت اور کڑوی چیز ہے۔ ''(القمر :۴۶)محمدﷺ پر مکہ میں نازل ہوئی اور اس وقت میں بچی تھی ، کھیلا کرتی تھی۔

 

[Aamir]

تفسیر سورۃ الرحمن
باب۔ اللہ تعالیٰ کے قول '' اور ان (باغوں) کے علاوہ دو باغ اور ہیں ''(الرحمن : ۶۲)کا بیان
(۱۷۸۵)۔ سیدنا عبداللہ بن قیس (ابو موسیٰ اشعر ی) رضی اللہ عنہ سے روایت ہے کہ رسول اللہﷺ نے فرمایا :'' چاندی کی دو جنتیں ہیں ، ان کے برتن اور سارا سامان چاندی کا ہے او رسونے کی بھی دو جنتیں ہیں ، ان کے بھی برتن اور سامان سونے کا ہے اور جنت عدن میں لوگوں اور ان کے پروردگار کے درمیان میں صرف جلال و عظمت کی چادر حائل ہو گی جو کہ پروردگار کے چہرہ مبارک پر پڑی ہو گی۔ ''

 

[Aamir]

باب۔ اللہ تعالیٰ کے قول '' حوریں ہیں جو خیموں میں مستورہیں ''(الرحمن :۷۲)کے بیان میں
(۱۷۸۶)۔ سیدنا عبداللہ بن قیسؓ سے ہی مروی ہے کہ رسول اللہﷺ نے فرمایا :'' جنت میں ایک خواب دار موتی کا خیمہ ہے اور اس خیمہ کا عرض ساٹھ میل کا ہے ، اس کے ہر گوشے میں مسلمانوں کی بیبیاں ہوں گی ، ایک گوشہ والیاں دوسری طرف والیوں کو نہیں دیکھ سکتیں اور مومن لوگ ان کے پاس پھرتے رہیں گے۔۔۔۔ ''باقی حدیث ابھی گزری ہے (دیکھیے حدیث :۱۷۸۵)۔

 

[Aamir]

تفسیر سورۃ الممتحنہ
باب۔ اللہ تعالیٰ کے قول'' (اے ایمان والو!) تم میرے اور (خود) اپنے دشمنوں کو دوست نہ بناؤ۔ '' (الممتحنہ :۱)کا بیان
(۱۷۸۷)۔ امیر المومنین سیدنا علی بن ابی طالبؓ نے فرمایا کہ رسول اللہﷺ نے مجھے ، زبیر اور مقدادؓ کو مقام روضہ خاخ میں بھیجا کہ وہاں ایک عورت ہے اس کے پاس ایک خط ہے وہ لاؤ۔۔۔ پس حاطب بن بلّعہ کی پوری حدیث بیان کی اور آخر میں کہا کہ اس وقت یہ آیت اتری '' اے ایمان والو ! تم میرے اور (خود)اپنے دشمنوں کو دوست نہ بناؤ ، تم تو دوستی سے ان کی طرف پیغام ارسال کرتے ہو اور وہ۔۔۔۔ ''الخ۔
با ب۔ اللہ تعالیٰ کا قول'' اے پیغمبر ! جب مسلمان عورتیں آپﷺ سے بیعت کرنے کے لیے آئیں ''(الممتحنہ :۱۲)

(۱۷۸۸)۔ سیدہ ام عطیہؓ کہتی ہیں کہ ہم نے رسول اللہﷺ سے بیعت کی اور یہ آیت کہ :''وہ اللہ کے ساتھ کسی کو بھی شریک نہ کریں گی۔ ''پڑھی اور ہمیں نوحہ کرنے سے منع فرمایا تو ایک عورت نے بیعت کرنے سے ہاتھ کھینچ لیا اور کہا فلاں عورت نے نوحہ کرنے میں میرا ساتھ دیا تھا ، میں اس کا بدلہ دے لوں ؟ نبیﷺ نے کچھ نہ فرمایا۔ وہ گئی اور (نوحہ کر کے)پھر آئی اور آپﷺ نے اس سے بیعت لے لی (وہ عورت خود ام عطیہؓ تھیں)۔

 

[Aamir]

تفسیر سورۃ الجمعہ
باب۔ اللہ تعالیٰ کے قول '' اور دوسروں کے لیے بھی انہی میں سے جواب تک ان سے نہیں ملے۔ '' (الجمعہ :۳)کے بیان میں
(۱۷۸۹)۔ سیدنا ابو ہریرہؓ کہتے ہیں کہ (ایک روز) ہم نبیﷺ کے پاس بیٹھے تھے کہ سورۂ جمعہ اتری ، جب یہ آیت '' اور دوسروں کے لیے بھی ہے جو ابھی ان سے نہیں ملے۔۔۔ 'نازل ہوئی تو میں نے کہا کہ یا رسول اللہ ! یہ کون لوگ ہیں ؟ آپﷺ نے کچھ جواب نہ دیا ،یہاں تک کہ میں نے تین مرتبہ پوچھا اور ہمارے درمیان سیدنا سلمان فارسیؓ بھی موجود تھے۔ رسول اللہﷺ اپنا ہاتھ مبارک ان کے سر پر رکھا اور فرمایا :'' اگر ایمان ثریا (ستارے) کے پاس بھی ہوتا (یعنی بہت ہی دور ہوتا) تو بھی ان (اہل فارس) میں سے ایک شخص یا کچھ لوگ (راوی کا شک) اس کو حاصل کر لیتے۔ ''

 

[Aamir]

تفسیر سورۃ المنافقون
باب۔ اللہ تعالیٰ کے قول '' جب آپﷺ کے پاس یہ منافقین آتے ہیں تو کہتے ہیں کہ ہم گواہی دیتے ہیں کہ بے شک آپ اللہ کے رسول ہیں ''(المنافقون :۱)کے بیان میں
(۱۷۹۰)۔ سیدنا زید بن ارقمؓ نے کہا کہ میں ایک غزوہ میں تھا کہ میں نے عبداللہ بن ابی ابن سلول کو اپنے کانوں سے یہ کہتے ہوئے سنا کہ تم رسول اللہﷺ کے ساتھیوں کو خرچ و خیرات وغیرہ نہ دو یہاں تک کہ وہ ان کا ساتھ چھوڑ دیں اور اگر ہم اس لڑائی سے لوٹ کر مدینہ پہنچے تو عزت والا ذلیل کو نکال دے گا (یعنی ہم انھیں نکل دیں گے) میں نے یہ بات اپنے چچا یا سیدنا عمرؓ کو بتائی تو انھوں نے نبیﷺ سے ذکر کر دیا۔ آپﷺ نے مجھے بلوایا ، میں نے جو بات تھی کہہ دی ، پھر رسول اللہﷺ نے عبداللہ بن ابی اور اس کے ساتھیوں کو بلوا بھیجا (ان سے پوچھا کہ تو) انھوں نے حلف اٹھا لیا کہ ہم نے ایسا نہیں کہا۔ رسول اللہﷺ نے مجھے جھوٹا کہا اور اس کی تصدیق کی۔ مجھے ایسا رنج ہوا کہ کبھی نہ ہوا تھا ، میں اپنے گھر میں بیٹھ رہا۔ میرے چچا نے پوچھا کیا وجہ ہے کہ رسول اللہﷺ نے تجھے جھوٹا کہ اور تجھ پر غصہ ہوئے ؟ اس وقت نبیﷺ پر یہ آیت '' جب آپ کے پاس یہ منافق آتے ہیں ''نازل ہوئی تو نبیﷺ نے مجھے بلوا بھیجا پھر پوری آیت سنائی اور فرمایا :'' اے زید ! بے شک اللہ نے تجھے سچا کیا۔ ''

(۱۷۹۱)۔ سیدنا زید بن ارقمؓ ہی سے ایک روسری روایت ہے ، کہتے ہیں کہ پھر نبیﷺ نے عبداللہ بن ابی اور اس کے ساتھیوں کو بلایا تا کہ ان کے لئے استغفار کریں (کیونکہ انھوں نے جھوٹی قسم کھائی تھی)وہ نہ آئے اور اپنے سر پھیر لیے۔

(۱۷۹۲)۔ سیدنا زید بن ارقمؓ ہی کہتے ہیں کہ میں نے رسول اللہﷺ کو سنا (آپ یہ دعا مانگتے تھے) اے اللہ ! انصار کو اور انصار کے بیٹوں کو معاف فرما دے۔ ''راوی کو شک ہے کہ شاید آپﷺ نے یہ بھی فرمایا :'' اے اللہ ! انصار کے بیٹوں کے بیٹوں کو بھی معاف فرما دے ''

 

[Aamir]

تفسیر سورۃالتحریم
اللہ تعالیٰ کا قول ''اے نبی ! جو چیز اللہ نے آپ کے لیے حلال کر دی ہے اسے آپ حرام کیوں کرتے ہیں ؟'' (التحریم :۱)
(۱۷۹۳)۔ ام المؤمنین عائشہ صدیقہ رضی اللہ عنہا کہتی ہیں کہ رسول اللہﷺ ام المؤمنین زینب بنت حجش رضی اللہ عنہا کے گھر میں شہد نوش فرمایا کرتے تھے اور(اسی واسطے)وہاں بہت دیر ٹھہرتے تھے تو میں نے اور ام المؤمنین حفصہ رضی اللہ عنہا نے آپس میں اتفاق کیا کہ ہم میں سے جس کے پاس نبیﷺ آئیں وہ یہ کہے کہ آپ نے مغافیر کھایا ہے؟ مجھے آپﷺ کے منہ سے اس کی بدبو آتی ہے۔ (چنانچہ آپﷺ تشریف لائے تو ہم نے ایسا ہی کیا)آپﷺ نے فرمایا :''نہیں میں نے زینب (رضی اللہ عنہا)کے گھر سے شہد پیا ہے اور اب میں قسم کھاتا ہوں کہ کبھی شہد نہ پیوں گا، تم کسی سے کہنا نہیں۔ ''

 

[Aamir]

تفسیر سورۃ القلم
باب : اللہ تعالیٰ کے قول ''سخت خو ہے اس کے علاوہ بد ذات ہے۔ ''(القلم :۱۳) کے بیان میں
(۱۷۹۴)۔ سیدنا حارثہ بن وہب خزاعی رضی اللہ عنہ کہتے ہیں کہ میں نے نبیﷺ کو یہ فرماتے ہوئے سنا :''کیا میں تمہیں جنتی لوگوں کی خبر نہ دوں (کہ وہ کون لوگ ہوتے ہیں)؟ جنتی ہر وہ شخص جو دنیا والوں کی نظر میں حقیر و ذلیل ہو اور اللہ کے بھروسے پر کسی بات کی قسم کھا لے تو اللہ اس کو پورا کر دے اور کیا میں تمہیں دوزخیوں کی خبر نہ دوں (کہ وہ کون لوگ ہوتے ہیں)؟ دوزخی شریر،مغرور،اور متکبر لوگ ہوتے ہیں۔ ''