اَلدِّیْنُ النَّصِیْحۃ

[ساجد تاج]

اب اس سلسلے کی ان احادیث کو پڑھیے اور سنیے جن میں رسول اللہ ﷺ نے پڑوسی کے حقوق کی اہمیت بتائی ہے اور ان کے حقوق کو ادا کرنے کا تاکیدی حکم دیا ہے خواہ وہ پڑوسی رشتہ دار ہو یا اجنبی مسلمان ہو یا کافر۔

 

[ساجد تاج]

رسول اللہ ﷺنے فرمایا:
اَلْجِیْرَانُ ثَلٰثَۃٌ جَارٌلَہٗ حَقٌّ وَاحِدٌ وَجَارٌلَہٗ حَقَّانِ وَجَارٌلَہٗ ثَلٰثَۃُ حُقُوْقٍ فَالْجَارُ الَّذِیْ لَہٗ ثَلٰثَۃُ حُقُوْقٍ اَلْجَارُ الْمُسْلِمُ ذُوْالرَّحِمِ فَلَہٗ حَقُّ الْجَوَار وَحَقُّ الْاِسْلَامِ وَحَقُّ الرَّحِمِ وَاَمَّا الَّذِیْ لَہٗ حَقَّانِ فَالْجَارُ الْمُسْلِمُ لَہٗ حَقُّ الْجَوَار وَحَقُّ الْاِسْلَامِ وَاَمَّا الَّذِیْ لَہٗ حَقٌّ وَاحِدٌ فَالْجَارُ الْمُشْرِکُ۔ (بزار)
تین قسم کے پڑوسی ہیں ایک وہ جس کے لیے ایک ہی حق ہے دوسرا وہ جس کے لیے دو حق ہیں اور تیسرا وہ جس کے لیے تین حقوق ہیں۔ جس پڑوسی کے تین حقوق ہیں وہ مسلمان رشتہ دار پڑوسی ہے ایک حق مسلمان ہونے کی حیثیت سے، دوسرا حق رشتہ داری اور صلہ رحمی ہونے کی وجہ سے اور تیسرا حق پڑوسی ہونے کی وجہ سے اور جس کے دو حق ہیں وہ مسلمان پڑوسی ہے، اسلامی حق اور پڑوس کا حق اور جس کے لیے ایک حق وہ مشرک و کافر پڑوسی ہے۔

 

[ساجد تاج]

اس حدیث سے معلوم ہوا کہ کافر و مشرک کا بھی پڑوسی ہونے کی وجہ سے حق ہے جس کی ادائیگی مکارم اخلاق میں داخل ہے۔ یہ ہمسائیگی درجہ بدرجہ چالیس گھروں تک رہتی ہے۔

 

[ساجد تاج]

سیدنا کعب بن مالک رضی اللہ عنہ روایت کرتے ہیں کہ ایک شخص نے رسول اللہ ﷺکی خدمت میں حاضر ہوکر عرض کیا کہ میں فلاں محلے میں رہتا ہوں اور سب سے زیادہ قریبی پڑوسی مجھے ستاتا ہے۔ رسول اللہ ﷺنے سیدنا ابوبکر و عمر اور علی رضی اللہ عنہم کو بھیجا کہ وہ مسجد کے دروازے پر کھڑے ہوکر پکار پکار کر یہ اعلان کریں کہ چالیس گھروں تک ہمسائیگی ہے اور جس کا ہمسایہ اپنے ہمسایہ کی تکلیفوں سے خوف کھاتا ہے وہ شخص جنت میں داخل نہیں ہوگا۔ (طبرانی، ترغیب)

 

[ساجد تاج]

اس حدیث سے یہ معلوم ہوا کہ پڑوسی کو ستانا اور تکلیف دینا بڑی بے انصافی اور گناہ کبیرہ ہے، لیکن جہاں تک ہوسکے مظلوم پڑوسی ظالم پڑوسی کی تکلیفوں پر صبر کرے اور اگر ناقابل برداشت ہو تو اپنے گھر کے سامان کو باہر راستے میں ڈالے تاکہ آنے جانے والے اس ظالم پڑوسی کو بُرا بھلا کہیں، ممکن ہے کہ وہ اس کی تکلیف رسانی سے باز آجائے۔ رسول اللہ ﷺنے یہی ترکیب بتائی ہے۔

 

[ساجد تاج]

چنانچہ ترغیب و ترہیب میں ہے کہ حضرت ابوجحیفہ رضی اللہ عنہ بیان کرتے ہیں:
جَائَ رَجُلٌ اِلٰی رَسُوْلِ اللہِ صَلَّی اللہُ عَلَیْہِ وَسَلَّمَ یَشْکُوْا جَارَہٗ فَقَالَ اِطْرَحْ مَتَاعَکَ عَلٰی طَرِیْقٍ فَطَرَحَہٗ فَجَعَلَ النَّاسُ یَمُرُّوْنَ عَلَیْہِ وَیَلْعَنُوْنَہٗ فَجَائَ اِلَی النَّبِیِّ صَلَّی اللہُ عَلَیْہِ وَسَلَّمَ فَقَالَ یَارَسُوْلَ اللہِ لَقِیْتُ مِنَ النَّاسِ قَالَ وَمَا لَقِیْتَ مِنْھُمْ قَالَ یَلْعَنُوْنَنِیْ قَالَ قَدْ لَعَنَکَ اللہُ قَبْلَ النَّاسِ فَقَالَ اِنَّنِیْ لَا اَعُوْدُ فَجَائَ الَّذِیْ شَکَاہُ اِلَی النَّبِیِّ صَلَّی اللہُ عَلَیْہِ وَسَلَّمَ فَقَالَ اِرْفَعْ مَتَاعَکَ فَقَدْ کُفِیْتَ۔ (طبرانی، بزار)
ایک شخص نے رسول اللہ ﷺکے پاس آکر اپنے پڑوسی کی ایذا رسانی کی شکایت کی، آپ نے صبر کی تلقین فرمائی۔ اس کے متعدد بار شکایت کرنے کی وجہ سے آخری دفعہ آپ نے فرمایا کہ تم اپنے گھر کے سامان کو نکال کر راستہ میں ڈال دو۔ اس نے ایسا ہی کیا۔ جو لوگ اس راستہ سے گزرتے، ماجرا سُن کر اس تکلیف رساں پڑوسی کو بُرا بھلا کہتے اور اس پر لعنت و پھٹکار بھی کرتے۔ اس نے رسول اللہ ﷺکی خدمت میں عرض کیا کہ لوگوں سے مجھے بہت تکلیف پہنچ رہی ہے۔ آپ نے دریافت فرمایا کہ کیا تکلیف پہنچ رہی ہے۔ اس نے کہا کہ لوگ مجھے لعن طعن کررہے ہیں۔ آپ نے فرمایا کہ لوگوں کے لعن طعن کرنے سے پہلے اللہ تعالیٰ تجھے لعن طعن کررہا ہے، کیوں کہ تم نے پڑوسی کو تکلیف پہنچائی ہے۔ اس نے کہا کہ آئندہ ایسا نہیں کروں گا۔ شکایت کرنے والے نے رسول اللہ ﷺکے پاس حاضر ہو کر یہ سب حال بیان کیا تو آپ نے اس سے فرمایا کہ تم اپنا سامان اُٹھا لو کیوں کہ تمہاری کفایت کردی گئی ہے۔

 

[ساجد تاج]

اس حدیث سے معلوم ہوا کہ پڑوسی کی ایذارسانی پر حتی الامکان صبر کرنا چاہیے۔ جب معاملہ حد سے بڑھ جائے تو گھر کے سامان کو راستہ میں ڈال دے۔ جب لوگوں کو پڑوسی کی تکلیف رسانی کی خبر ہوگی تو وہ اس تکلیف رساں پڑوسی کو بُرا بھلا کہیں گے تو وہ اس کو تکلیف دینے اور مصیبت میں ڈالنے سے باز رہے گا۔

 

[ساجد تاج]

امام بخاری رحمۃ اللہ علیہ نے اپنی کتاب ’’الادب المفرد‘‘ میں سیدنا ابوہریرہ رضی اللہ عنہ سے اس روایت کو نقل فرمایا ہے:
قَاَل رَجُلٌ یَارَسُوْلَ اللہِ اِنَّ لِیْ جَارًا یُوْذِیْنِیْ فَقَالَ اِنْطَلِقْ فَاَخْرِجْ مَتَاعَکَ اِلَی الطَّرِیْقِ فَانْطَلَقَ فَاَخْرَجَ مَتَاعَہٗ فَاجْتَمَعَ النَّاسُ عَلَیْہِ فَقَالُوْا مَا شَانُکَ قَالَ لِیْ جَارٌ یُوْذِیْنِیْ فَذَکَرْتُ لِلنَّبِیِّ صَلَّی اللہُ عَلَیْہِ وَسَلَّمَ فَقَالَ اِنْطَلِقْ فَاَخْرِجْ مَتَاعَکَ اِلَی الطَّرِیْقِ فَجَعَلُوْا یَقُوْلُوْنَ اَللّٰھُمَّ الْعَنْہُ اَللّٰھُمَّ اَخْزِہٖ فَبَلَغَہٗ فَاَتَاہُ فَقَالَ اِرْجِعْ اِلٰی مَنْزِلِکَ فَوَاللہِ لَایُوْذِیْکَ۔
اس حدیث کا خلاصہ مطلب وہی ہے جو پہلی حدیث میں آچکا ہے۔

اور بُرے پڑوس سے بچنے کے لے رسول اللہ ﷺیہ دعا پڑھا کرتے تھے:

اَللّٰھُمَّ اِنَّیْ اَعُوْذُبِکَ مِنْ یَوْمِ السُّوْئِ وَمِنْ لَیْلَۃِ السُّوْئِ وَمِنْ سَاعَۃِ السُّوْئِ وَمِنْ صَاحِبِ السُّوْئِ وَمِنْ جَارِ السُّوْئِ فِیْ دَارِ الْمُقَامَۃِ۔ (نسائی، ابن ماجہ)

اے اللہ! تیری پناہ چاہتا ہوں بُرے دن، بُری رات، بُری گھڑی سے اور بُرے ساتھی اور بُرے ہمسایہ سے۔

 

[ساجد تاج]

نیک پڑوسی باعث خیر و رحمت و برکت ہے

اور اس کی نیکی کی وجہ سے پاس پڑوس کے سو گھرانوں سے مصیبتوں کو اللہ تعالیٰ دُور فرما دیتا ہے۔ نیک پڑوسی کی بہت فضیلت ہے جیسا کہ رسول اللہ ﷺنے فرمایا:

اِنَّ اللہَ عَزَّوَجَلَّ لَیْدَفَعُ بِالْمُسْلِمِ الصَّالِحِ عَنْ مِائَۃِ اَھْلِ بَیْتٍ مِنْ جِیْرَانِہِ الْبَلَآئَ ثُمَّ قَرَأَوَلَوْ لَا دَفْعُ اللہِ النَّاسَ بَعْضَھُمْ بِبَعْضٍ لَّفَسَدَتِ الْاَرْضُ۔ (طبرانی)

اللہ تعالیٰ نیک مسلمان کی برکت سے سو پڑوسی کے گھرانے سے مصیبت کو دُور کردیتا ہے پھر اس کی تائید میں آپ نے قرآن مجید کی یہ آیت تلاوت فرمائی کہ اللہ تعالیٰ بعض کے ذریعہ بعض مصیبتوں کو دُور فرما دیتا ہے۔

 

[ساجد تاج]

نیک پڑوسی باعث سعادت اور موجب برکت ہے اور بُرا پڑوسی باعث نحوست ہے۔ آپ صلی اللہ علیہ وسلم نے فرمایا:

اَرْبَعٌ مِّن السَّعَادَۃِ اَلْمَرْئَ ۃُ الصَّالِحَۃُ وَالْمَسْکَنُ الْوَاسِعُ وَالْجَارُ الصَّالِحُ وَالْمَرْکَبُ الْہَنِیءُ وَاَرْبَعٌ مِّن الشَّقَآئِ اَلْجَارُ السُّوْئُ وَالْمَرْئَ ۃُ السُّوْئُ وَالْمَرْکَبُ السُّوْئُ وَالْمَسْکَنُ السُّوْئُ (ابن حبان)

چار چیزیں نیک بختی کے سبب ہیں (۱) نیک بیوی (۲) کشادہ مکان (۳) نیک پڑوسی (۴) اچھی اور فرماں بردار سواری جو اپنے سوار کو تکلیف نہ پہنچائے اور چار چیزیں باعث شقاوت اور موجب نحوست ہیں (۱) بُرا پڑوسی (۲) بُری بیوی (۳) بُری سواری (۴) تنگ مکان۔