آپ کو اس بات پر بھی غور کرنا چاہیے کہ جہاں آپ کی ’ قوس ‘ سے ضرورت پوری کی جائے گی ، وہاں خیر القروں کی ’ قوس ‘ کو ہٹایا ہی کیوں جائے گا ؟ یا چودہ صدیاں بغیر قوس کے قرآن سمجھ آتا رہا ، لیکن اب اسے آپ کی قوس کی ضرورت پڑ گئی ہے ؟ گویا آپ قرآن میں اپنی قوسیں داخل کرکے الگ معنی نکالنے کی سعی کر رہے ہیں ۔
اس بات پر ہٹ کر پھر غور کرلیں ، یا تو صرف قرآن مجید پڑھیں ، اور اگر اس میں قوسیں داخل کرنی ہیں ، تو چودہ صدیوں کی قوسیں ہٹانے اور اپنی جوڑنے کے دلائل گھڑ کے رکھیں ، اور لوگوں کو مطمئن کریں ۔
الطَّلَاقُ مَرَّتَانِ ۖ فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ ۗ وَلَا يَحِلُّ لَكُمْ أَن تَأْخُذُوا مِمَّا آتَيْتُمُوهُنَّ شَيْئًا إِلَّا أَن يَخَافَا أَلَّا يُقِيمَا حُدُودَ اللَّـهِ ۖ فَإِنْ خِفْتُمْ أَلَّا يُقِيمَا حُدُودَ اللَّـهِ فَلَا جُنَاحَ عَلَيْهِمَا فِيمَا افْتَدَتْ بِهِ ۗ تِلْكَ حُدُودُ اللَّـهِ فَلَا تَعْتَدُوهَا ۚ وَمَن يَتَعَدَّ حُدُودَ اللَّـهِ فَأُولَـٰئِكَ هُمُ الظَّالِمُونَ ﴿٢٢٩﴾
فَإِن طَلَّقَهَا فَلَا تَحِلُّ لَهُ مِن بَعْدُ حَتَّىٰ تَنكِحَ زَوْجًا غَيْرَهُ ۗ فَإِن طَلَّقَهَا فَلَا جُنَاحَ عَلَيْهِمَا أَن يَتَرَاجَعَا إِن ظَنَّا أَن يُقِيمَا حُدُودَ اللَّـهِ ۗ وَتِلْكَ حُدُودُ اللَّـهِ يُبَيِّنُهَا لِقَوْمٍ يَعْلَمُونَ ﴿٢٣٠﴾
دونوں آیات آپ کے سامنے ہیں ، ’ فإن طلقها ‘ کو ’ علیهما فيما افتدت به ‘ کے ساتھ جوڑیں تو ترجمہ ہی درست نہیں رہتا ، آپ نے جو ترجمہ کیا ہے ، اسے قوسین سمیت ملاحظہ کرلیں :
ان آیات میں ایک تو طلاقوں کی تعداد بتائی گئی ہے ، دوسرا طلاق کے بعد رجوع ہونے یا نہ ہونے کی بات ہے ، تیسرا طلاق بعوض ہوگی یا بلا عوض ۔
- الطلاق مرتان اور فإن طلقہا میں طلاق کی تعداد بتائی گئی ہے
- لا یحل لکم أن تاخذوا سے فیماافتدت بہ تک طلاق عوض ہوگی یا بلا عوض ، یہ بات واضح کی گئی ہے
- فإمساک بمعروف أو تسریح بإحسان اور فلا تحل لہ من بعد حتی تنکح زوجا غیرہ میں کس طلاق کے بعد رجوع ہوسکتا ہے ، کس کے بعد نہیں ہوسکتا ، اس بات کا ذکر ہے ۔
پہلی شق کے دوسرے جملے کو آپ دوسری شق کے ایک جملے سے جوڑ کر تینوں باتوں کو آپس میں خلط ملط کر رہے ہیں ۔
سنت نبوی ، فہم صحابہ اور مفسرین نے ان آیات کو اسی انداز سے فہم و تفہیم کیا ہے ، اور اسی انداز سے عبارت سلیم رہتی ہے ، کہ :
- طلاقیں تین ہیں ۔
- دو کے بعد رجوع کرنے یا نہ کرنے کا آپشن ہے ۔ تیسری کے بعد رجوع کا آپشن نہیں ۔
- طلاق آدمی خود بھی دے سکتا ہے ، اور خاتون مطالبہ کرکے خلع بھی لے سکتی ہے ۔
جس طرح آپ نے تعلق جوڑا ہے ، اس طرح ان تینوں باتوں کی تفصیلات ان آیات سے ثابت کرکے دکھادیں ۔
شاید آپ ’ فدیہ دیکر ‘ لکھنا چاہ رہے تھے ۔
اس آیت کو اس انداز سے خلع کے ساتھ مقید کردینے کا مطلب ہے ، کہ خلع سے ہٹ کر مرد خود جتنی مرضی طلاقیں ، دیتا رہے ، اور رجوع کرتا رہے ؟ جاہلیت میں بھی تو یہی کچھ تھا ، جس کا طعنہ آپ علماء کو دے رہے ہیں ۔
اور پھر اسی ’ إن طلقھا ‘ کے بعد ایک اور طلقہا بھی ہے ، آپ کے نزدیک اگر عورت خلع لے لے ، تو کیا وہ کسی اور مرد سے شادی کرکے دوبارہ خلع والے سے پھر شادی کرسکتی ہے ؟
اگر ہاں ، تو پھر یہ تو وہی حلالہ ہے ، جس کی مذمت آپ بیان کر رہے ہیں ، بات تو پھر وہیں آگئی ، اپنی طرف سے قرآنی مفہوم گھڑنے کا کیا فائدہ ہوا ؟
آپ اوپر بیان کرآئے ہیں یہ جو آپ نے تعلق جوڑے ہیں ، یہ آپ کا ’ خیال ‘ ہے ، اگر آپ اپنے خیال کی بنا پر قوس لگانے کا حق رکھتے ہیں ، تو ہم سنت نبوی ، فہم صحابہ و تابعین اور اجماع امت کی بنا پر اس کا زیادہ حق رکھتے ہیں ۔
باقی آپ کا تعلق جوڑنا غلط ہے ، اس کی وضاحت اوپر ہوچکی ہے ۔
رہا ہمارا تعلق جوڑنا ، اس کی مزید وضاحت یہ ہے کہ الطلاق مرتان میں دو طلاقین ہونا تو بالکل روز روشن کی طرح واضح ہے ، اس کا وہی انکار کرے گا ، جسے عربی کے لفظ مرۃ اور مرتان کا ترجمہ بھی نہیں آتا ۔
ان دو طلاقوں کے بعد إمساک بمعروف اور تسریح بإحسان یعنی رجوع اور عدم رجوع دونوں آپشن بیان کیے گئے ہیں ، جبکہ ’ فإن طلقہا ‘ کے بعد صرف ایک ہی آپشن ہے ، یہ اس بات کی دلیل ہے کہ یہ پہلی دو طلاقوں سے ہٹ کر ایک اور طلاق ہے جسے ہم تیسری طلاق کہتے ہے ۔ پہلی دو میں چونکہ رجوع کا حق ہوتا ہے ، اس لیے ہم انہیں ’ رجعی ‘ کہتے ہیں ، تیسری میں قرآن مجید نے رجوع کا حق ختم کردیا ہے ، اس لیے ہم اسے ’ غیر رجعی ‘ کہتے ہیں ۔
اس سے عجیب وغریب دلیل کیا ہوسکتی ہے ، الطلاق میں کوئی ضمیر نہیں ۔ مرتان تثنیہ کا صیغہ ہے ، درست ،جس کا مطلب ہے طلاقیں دو ہیں ۔ یعنی جنہیں دو کہا گیا وہ طلاقیں ہیں ۔
علیہما میں تثنیہ یعنی دو کی ضمیر ہے ، لیکن اس سے مراد میاں اور بیوی ہیں ، دونوں کا اس انداز سے آپس میں ربط ہے ہی کوئی نہیں ، ایک طرف طلاق کی بات ہے ، دوسری طرف طلاقین لینے دینے والے دو افراد کی ۔
اور مجھے لگتا ہے کہ شاید آپ کہانی گھڑنے میں خطا کر چکے ہیں ، کیونکہ آپ کے نزدیک تعلق الطلاق مرتان سے نہیں بلکہ فإن طلقہا سے ہے ۔ افتدت بہ اور طلقہا میں دونوں جگہ ضمیر مؤنث ہی ہے ، اس میں کوئی شک نہیں ، کیونکہ اس سے مراد عورت یعنی زوجہ ہی ہے ۔
اس طرح بھی بات سمجھ سے بالکل باہر ہے کہ ضمیر مؤنث کے استعمال کی وجہ سے دونوں کا تعلق کس طرح آپس میں جڑ گیا ہے ، دوسری بات ضمیر کسی ضمیر کی طرف نہیں لوٹتی ، یہاں تو دونوں جگہ ضمیریں ہی ہیں ، اسم یا معنی نام کی کوئی شے نہیں ، پھر بھی آپ تعلق پتہ نہیں کس بنا پر جوڑ رہے ہیں ۔
کچھ نہ سمجھے خدا کرے کوئی !
طلق میں ضمیر مذکر ہے ، ھا ضمیر مؤنث ہے ، یہ دونوں لوٹ کس طرف رہی ہیں ؟ علیھما خود ضمیر ہے ، فی حرف ہے ، جس طرف ضمیر نہیں لوٹ سکتی ، ما اسم موصولہ ہے ، جس کی طرف بہ میں ھ ضمیر لوٹ رہی ہے ، افتدت فعل ہے ، جس میں بذات خود ھا ضمیر ہے ، جو کسی اور طرف لوٹ رہی ہے ، جس کی طرف آپ ضمیر کو لوٹا رہے ہیں ، اس چیز کی نشاندہی کریں ۔
آپ کی باتوں سے لگتا ہے کہ آپ نحو و لغت کی چند اصطلاحات سےواقف ہیں ، لیکن ان کی حقیقت سے بالکل بے خبر ،
تعلق جوڑنے والی آپ کی ساری کہانی آپ کی لاعلمی اور جہالت کا منہ بولتا ثبوت ہے ، اس سے پہلے بھی آپ نے لفظ ’ ثلاثۃ مرات ‘ لکھا تھا ، جو نحو کے اعتبار سے قبیح غلطی ہے ۔ اس سب کے باوجود آپ کی جرأت کا یہ حال ہے کہ قرآن مجید کی جوڑ توڑ میں مصروف ہیں ۔ اس تدبر و تفکر کے نام پر ، جس کی حقیقت سے بھی ناواقف ہیں ، جس کی وضاحت آئندہ کرتا ہوں ۔ إن شاءاللہ ۔
قرآن مجید کا نام لے کر سنت نبوی ، فہم سلف صالحین کو رد کرنے والے اور اپنی سوچ کو نافذ کرنے والوں کو ان کے دعوی کے مطابق ’ اہل قرآن ‘ کہا جاتا ہے ، ورنہ یہ حقیقت ہے کہ اس طرح کے لوگ اہل قرآن بھی نہیں ہیں ۔
سب ہی قرآن کو سپریم اتھارٹی مانتے ہیں ، الحمد للہ ۔ سنت رسول یا احادیث کو ماننا بھی قرآن کو ہی ماننا ہے ۔
جو حدیث آپ نے ذکر کی ہے ، حضور صلی اللہ علیہ وسلم کی طرف اس کی نسبت درست نہیں ، تفصیل
یہاں دیکھ لیں ۔ اس طرح کی باتوں کا پینتیس دفعہ اسی فورم پر جواب دیا جاچکا ہے ۔
اگر اسی غلط اصول کی بنیاد پر خود اسی حدیث کو قرآن مجید پر پیش کریں ، تو بھی یہ مردود ٹھہرتی ہے ، کیونکہ قرآن تو کہتا ہے و ما آتاکم الرسول فخذوہ ، حضور جو دیں لے لیں ، اس میں کہیں نہیں کہ صرف قرآن دیں تو لے لو ، اور کچھ کہیں تو کہیں کہ نہیں پہلے اس بات کی قرآن سے دلیل لائیں ۔
اگر احادیث ابھی تک موجودہیں ، فہم سلف کا نام لینے والے ابھی تک اربوں لوگ موجود ہیں ، اور اس پر عمل پیرا ہیں ، تو یہ اس بات کا ثبوت ہے کہ یہ چیزیں قرآن مجید سے ٹکراتی نہیں ، ورنہ یہ صدیوں یوں محفوظ نہ رہتیں ، بقول آپ کے پاش پاش ہوجاتیں ۔
البتہ جس طرح کے آپ کے خیالات ہیں ، اس طرح منحرف افکار کئی دفعہ آئے ، اور آج ان لوگوں کا نام لے کر کوئی راضی نہیں ہے ۔
قرآن مجید میں تدبر و تفکر کرنا تو ضروری ہے ، اس میں تو کوئی شک نہیں ، لیکن یہ بھی حسن ظن رکھیے کہ اس پر حضور صلی اللہ علیہ وسلم اور آپ کے صحابہ کرام اور بعد کے علماء کرام بھی عمل پیرا رہے ہوں گے ، لہذا ہمیں اپنے تدبر و تفکر کو لگام دے کر درست سمت رکھنا ہوگا ، اگر یہ تدبر نبوی اور خیر القروں کے تفکر سے ٹکرایا تو پاش پاش ہی ہوگا ، اس کے علاوہ اس کا کوئی انجام نہیں ۔
یہ غلط فہمی دل سے نکال دینی چاہیے کہ تدبر کا حق تبھی پورا ہوگا ، جب ہم قرآن مجید کا نام لے کر لوگوں کو سنت اور احادیث سے برگشتہ کریں گے ۔
قرآن مجید کے معانی و مفاہیم کے ساتھ دہشت گردی کیے بغیر بھی اس پر تدبر و تفکر ہوسکتا ہے ، بالکل ویسے ہی ، جیسے اس قرآن مجید کو لے کر آنے والے نے کیا ، صحابہ کرام کو سکھایا ، اور اس کے طبقہ در طبقہ بعد والوں میں منتقل ہوتا رہا ۔ ہاں بعد والوں میں جہاں کسی نے غلطی کی ہے ، قرآن مجید کی واضح نص اور واضح حدیث رسول کی روشنی میں اس کی تردید کریں ، لیکن چودھویں صدی کے کسی شخص کا ’ خیالی پلاؤ ‘ یہ حیثیت نہیں رکھتا کہ اس کی بنیاد پر مسلمات دین کا چھوڑ دیا جائے ۔ کیونکہ یہ قرآن مجید میں تدبر و تفکر نہیں بلکہ الحاد ہے ، جس کے متعلق قرآن مجید نے خبر دار کیا ہے :
إن الذین یلحدون فی آیاتنا لا یخفون علینا ۔
بالکل درست ۔
لیکن ایک ہے قرآن کے الفاظ سےمنہ موڑنا ، دوسرا ہے ، اس کے مسلمہ معانی و مفاہیم سے منہ موڑنا ، اب اگر کوئی قرآن مجید میں وارد لفظ صلاۃ کو کہے کہ اس سے مراد ورزش کرنا بھی ہے ، تو ظاہر ہے ، اسے تدبر و تفکر فی القرآن کی بجائے ، الحاد فی القرآن ہی کہا جائے گا ، قرآن آسان ہے ، سمجھنے والوں کے لیے ، لیکن اس کا حلیہ بگاڑنے والوں کے لیے یہ لقمہ تر ثابت نہیں ہوسکتا ۔
لہذا غفلت سے نکلنا چاہیے ، اور قرآن کا اس کے تقاضوں کے مطابق سمجھنا چاہیے ، نہ کہ خالی چیک کی طرف اس کے الفاظ کا غلط استعمال کرنا چاہیے ۔ و منہم أمیون لا یعلمون الکتاب إلا أمانی و إن ہم إلا یظنون والے رویے سے بچنا چاہیے ۔
اللہ ہم سب کو ہدایت سے نوازے ۔
![محدث فورم [Mohaddis Forum]](/styles/default/xenforo/Forum.jpg)
